Mme Asan̄autom Unamutom Ẹnam Eti Utom
1 “Mmọ ẹma ẹwụt ke mmimọ ke akpanikọ idi irenowo oro ẹyakde idem ẹnọ ẹmi ima ikayarade mbuọtidem mmimọ ke ifịk ifịk utom Obio Ubọn̄ ye ke ndin̄wam mmọ en̄wen ẹsọn̄ idem ke mbuọtidem.” Ntre ke Ẹtịm Man Inam Utom Nnyịn Ima, ke page 57, etịn̄ aban̄a mme asan̄autom unamutom. Ke akpanikọ, uwụtn̄kpọ eke spirit oro mme asan̄autom unamutom nnyịn ẹnịmde odot se ẹkpebede. Ndinam utom ye mmọ ye mbiowo anam idem “ọsọn̄ọ akpaha adiana, ọdọdiọn̄ ọkọri adaha ada ke ima.”—Eph. 4:16.
2 Mme asan̄autom unamutom ẹnam akpan utom ke esop. Kere ban̄a kpukpru nti utom mmọ! Mmọ ẹse ẹban̄a okụk, mme n̄wed, mme magazine, mme editobo, ye mme efakutom; mmọ ẹnam utom nte mme adaidaha, ẹse ẹban̄a ukwak ikwọ, ẹnyụn̄ ẹn̄wam ndise mban̄a Ufọkmbono Obio Ubọn̄. Mmọ ẹsibuana ke Ufọkn̄wed Utom Ukara Abasi ye Esoputom. Ndusụk mmọ ẹkam ẹkeme ndinọ mme utịn̄ikọ an̄wa m̀mê ndinịm ndusụk mbono esop. Ukem nte mme ndido ikpọkidem, mme asan̄autom unamutom ẹnam mme utom oro nnyịn iyomde.—1 Cor. 12:12-26.
3 Ndikụt nte mme asan̄autom unamutom ẹdianade kiet ye mbiowo nte ubak idem asan̄autom kiet ye ukpono edem mbiba ye ifiọk, esịn udọn̄ ọnọ mbon eken ndinam ukem ntre. (Col. 2:19) Ebede ke ndibiom mme mbiomo mmọ ke urua ke urua ke edinam akpanikọ ye ke ndiwụt ọkpọkpọ udọn̄ ke idem mbon efen, mmọ ẹtịp ẹsịn ke esop oro ọkọride-kọri ke n̄kan̄ eke spirit.
4 Nso ke nnyịn ikeme ndinam man iwụt esịtekọm oro inyenede inọ mme asan̄autom unamutom oro ẹnamde utom ọkpọsọn̄? Oyom nnyịn imehe ye mme utom oro ẹnọde mmọ ẹnam inyụn̄ idu ke mben̄eidem ndidiana kiet ke ini ẹyomde un̄wam nnyịn. Ebede ke ikọ m̀mê edinam, nnyịn imekeme ndinam mmọ ẹdiọn̄ọ ke imowụt esịtekọm iban̄a utom mmọ. (N̄ke 15:23) Odot itịm ikọm mbon oro ẹnamde utom ọkpọsọn̄ ke ufọn nnyịn.—1 Thess. 5:12, 13.
5 Ikọ Abasi anam ẹdiọn̄ọ utom ye se inamde ẹdot nte mme asan̄autom unamutom. (1 Tim. 3:8-10, 12, 13) Ọsọn̄urua edisana utom mmọ ẹdi se owo mîkemeke ndifụmi ke utom esop. Mme utọ irenowo oro ẹdot n̄kaiso nsịnudọn̄ nnyịn, nte kpukpru mmọ ‘ẹyọhọde ke utom Ọbọn̄.’—1 Cor. 15:58.