Ke Ini N̄kpọ Mmọn̄eyet Etịbede

Kpa ye emi esịnde ofụri ukeme ndinam ndọ fo enem, mme n̄kpọ emi afo mûkodorike enyịn ẹkeme nditịbe inyụn̄ iyakke okop idatesịt. (Ecclesiastes 9:11) Abasi esin̄wam nnyịn ke ini isobode afanikọn̄. Edieke afo anamde mme item N̄wed Abasi oro iyomde ndineme mi, afo ye ubon fo ẹyesụk ẹkop inemesịt ọkpọkọm mfịna mbufo okpon didie.

1 BUỌT IDEM YE JEHOVAH

BIBLE ỌDỌHỌ ETE: “[Ẹtop] kpukpru editịmede esịt mbufo ẹdori enye ke idem, koro enye ekerede aban̄a mbufo.” (1 Peter 5:7) Ti kpukpru ini ete ke idịghe Jehovah edi ntak idomo oro isobode. (James 1:13) Edieke ekperede enye, enye idikpọn̄ke fi. (Isaiah 41:10) ‘N̄wan̄a esịt fo nọ enye.’—Psalm 62:8.

Afo oyokop ndọn̄esịt n̄ko edieke okotde onyụn̄ ekpepde Bible kpukpru usen. Emi ayanam okụt nte Jehovah “ọdọn̄de nnyịn esịt ke kpukpru ukụt nnyịn.” (2 Corinth 1:3, 4; Rome 15:4) Enye ọn̄wọn̄ọ ke imọ iyọnọ fi “emem . . . emi akande kpukpru ekikere.”—Philippi 4:6, 7, 13.

SE AKPANAMDE:

• Bọn̄ akam dọhọ Jehovah anam esịt ana fi sụn̄ man ekeme ndikere n̄kpọ ọfọn

• Tie kere nsio nsio n̄kpọ emi akpanamde ada an̄wam idem, nyụn̄ nam enye oro ọfọnde akan

2 SE BAN̄A IDEMFO YE UBON FO

BIBLE ỌDỌHỌ ETE: “Esịt asian ọkọ ifiọk, utọn̄ mbon ọniọn̄ onyụn̄ odụn̄ọde oyom ifiọk.” (Mme N̄ke 18:15) Fiọk se ikade iso ke ufọk fo. Bụp owo kiet kiet se enye oyomde ẹnam ẹnọ imọ. Neme nneme ye mmọ nyụn̄ kpan̄ utọn̄ ke ini mmọ ẹtịn̄de ikọ.—Mme N̄ke 20:5.

Nso ke akpanam edieke owo fo akpade? Kûyak bụt anam fi nditua eyet. Ti ete ke Jesus ama akam “atua eyet.” (John 11:35; Ecclesiastes 3:4) Ọfọn enen̄ede ọduọk odudu onyụn̄ ede idap ọfọn. (Ecclesiastes 4:6) Emi ayanam ekeme ndiyọ se itịbede.

SE AKPANAMDE:

• Sineme nneme ye ubon fo ke ini n̄kpọ mîtịbeke. Edieke anamde emi, eyemem utom ọnọ mmọ ndineme nneme ye afo ke ini n̄kpọ etịbede

• Nyene nneme ye mbon oro utọ n̄kpọ emi eketịbede ọnọ

3 YAK MME OWO ẸN̄WAM FI

BIBLE ỌDỌHỌ ETE: “Ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.” (Mme N̄ke 17:17) Ọdọn̄ mme ufan fo ndin̄wam fi, edi ekeme ndidi mmọ ifiọkke se ẹkpenamde. Ntre, nam mmọ ẹdiọn̄ọ se oyomde mmọ ẹnam. (Mme N̄ke 12:25) N̄ko-n̄ko, dọhọ mbon oro ẹnen̄erede ẹfiọk Bible ẹn̄wam fi. Item oro mmọ ẹdidade Bible inọ fi eyenen̄ede an̄wam fi.—James 5:14.

Edieke esisopde idem kpukpru ini ye mbon oro ẹnen̄erede ẹbuọt idem ye Abasi, emi ẹnyụn̄ ẹnen̄erede ẹnịm ke kpukpru se enye ọn̄wọn̄ọde ẹyesu, emi ọyọsọn̄ọ fi idem. Afo oyokop ndọn̄esịt n̄ko ke ini akade ekese mbon emi ẹnyenede mfịna n̄ko. Nam mmọ ẹdiọn̄ọ ke emenen̄ede ọbuọt idem ye Jehovah n̄ko ke emenịm ke se enye ọn̄wọn̄ọde oyosu. Nen̄ede sịn idem n̄wam mbon oro ẹyomde un̄wam, kûnyụn̄ ukpọn̄ mbon oro ẹmade fi.—Mme N̄ke 18:1; 1 Corinth 15:58.

SE AKPANAMDE:

• Neme mfịna fo ye ata akpan ufan fo nyụn̄ yak enye an̄wam fi

• Tịn̄ se oyomde nọ enye; kûdịp enye n̄kpọ