Mmọ Ikatuakke Ibuot Inọ Owo Gold

Nte ini akakade, Edidem Nebuchadnezzar ama ada gold obot ata akamba mbiet kiet adaha ke Dura, onyụn̄ okot mbon emi ẹkamade ikpọ itie ke ukara ete ẹdi do. Shadrach, Meshach, ye Abednego ẹma ẹsịne ke otu oro. Enye ama ọdọhọ ete: ‘Ndondo emi mbufo ẹkopde uyo nnụk, harp, ye obukpon̄, ẹduọ ke isọn̄ ẹtuak ibuot ẹnọ mbiet oro! Ẹyetop owo ekededi emi mîtuakke ibuot ẹsịn ke akwa ikan̄.’ Ndi nditọ Hebrew ita oro ẹyetiene ẹtuak ibuot ẹnọ mbiet oro, mîdịghe ndi mmọ ẹdituak ibuot inọ Jehovah kpọt?

Ke ini edidem ọkọnọde uyo ẹfri ẹnyụn̄ ẹbre mme n̄kpọ oro, kpukpru owo ẹma ẹduọ ke isọn̄ ẹtuak ibuot, edi Shadrach, Meshach, ye Abednego iketieneke ituak. Ndusụk owo emi ẹkekụtde mmọ ẹma ẹkedọhọ edidem ẹte: ‘Nditọ Hebrew ita oro iketieneke ituak ibuot.’ Edidem ama ọdọhọ ẹkot mmọ ẹnọ imọ, onyụn̄ ọdọhọ mmọ ete: ‘Mmọn̄ nnọ mbufo ifet en̄wen. Edieke mbufo mîtuakke ibuot isan̄ emi, nyotop mbufo ndọn̄ ke akwa ikan̄. Abasi ndomokiet idikemeke ndinyan̄a mbufo nsio mi ke ubọk.’ Mmọ ẹma ẹdọhọ enye ẹte: ‘Nnyịn idituakke. Abasi nnyịn ekeme ndinyan̄a nnyịn. Ekpededi enye idinyan̄ake nnyịn, O edidem, nnyịn idituakke ibuot inọ mbiet gold oro.’

Ikọ oro ama ayat Nebuchadnezzar tutu enye ọnọ uyo ete: ‘Ẹnam ikan̄ oro ofiop utịm ikatiaba akan nte esifiopde!’ Enye ama ọdọhọ mbonekọn̄ esie ete: ‘Ẹbọp mmọ mbita ẹtop ẹdọn̄ ke ikan̄ oro!’ Ikan̄ oro ama ofiop tutu owot mbonekọn̄ emi ẹkemende Shadrach, Meshach, ye Abednego ẹketop ẹdọn̄ do. Edi mmọ mbita ẹma ẹkeduọn̄ọ ke esịt ikan̄ oro. Ke ini Nebuchadnezzar ekesede esịt ikan̄ oro, enye ama okụt owo inan̄ ẹsan̄ade ke esịt utu ke owo ita. Idem ama enyek enye tutu enye ọdọhọ ikpọ owo ukara esie ete: ‘N̄kọ owo ita ke ikotop isịn ke ikan̄? Edi n̄kụt owo inan̄; kiet ebiet angel!’

Enye ama asan̄a akada ekpere ikan̄ oro ọdọhọ ete: ‘Mme asan̄autom Ata Edikon̄ Abasi, ẹwọn̄ọ ẹdi!’ Idem ama akpa kpukpru owo ke ini Shadrach, Meshach, ye Abednego ẹwọn̄ọde ẹdi, n̄kpọ inamke. Ikan̄ ikataha mmọ, itaha idet mmọ, inyụn̄ itaha ọfọn̄ mmọ; owo ikonyụn̄ ikopke utebe ikan̄ ke idem mmọ.

Nebuchadnezzar ama ọdọhọ ete: ‘Abasi Shadrach, Meshach, ye Abednego edi ọkpọsọn̄ Abasi. Enye ama ọdọn̄ angel esie edinyan̄a mmọ. Idụhe abasi efen emi etiede nte Abasi mmọ.’

Ndi emebiere nditie nte nditọ Hebrew ita oro, nnyụn̄ nnam n̄kpọ Jehovah kpọt inamke n̄kpọ m̀mê nso itịbe?