Jesus Akabade Edi Messiah

John ama esikwọrọ ete: ‘Owo emi akande mi ke edi.’ Ini Jesus ekedide n̄kpọ nte isua 30, enye ama oto Galilee edi Akpa Jordan emi John ekenịmde mme owo baptism. Jesus ama ọdọhọ enye enịm imọ baptism, edi John ama ọdọhọ enye ete: ‘Afo akpakam enịm mi baptism, idịghe ami n̄kpenịm fi.’ Jesus ama ọdọhọ ete: ‘Jehovah oyom afo enịm mi baptism.’ Mmọ ẹma ẹdụk Akpa Jordan, John onyụn̄ obụk enye ke mmọn̄.

Ke John ama okosio Jesus ke mmọn̄, Jesus ama ọbọn̄ akam. Nte enye osụk ọbọn̄de akam, enyọn̄ ama eberede, spirit Abasi onyụn̄ edi nte ibiom edidoro enye ke idem. Jehovah ama etie ke heaven ọdọhọ ete: “Afo edi edima Eyen mi; mmenyịme fi.”

Jesus akakabade edi Christ, m̀mê Messiah, ke spirit Jehovah ama ekedidoro enye ke idem. Ini oro ke enye ọkọtọn̄ọ utom oro Jehovah ọkọdọn̄de enye edi isọn̄ edinam.

Ndondo oro Jesus anade baptism ama, enye ama aka wilderness okodu usen 40. Ke enye ama okoto wilderness edi, enye ama aka ekese John. Ke ini John okokụtde Jesus asan̄ade edi, enye ama ọdọhọ ete: ‘Sese, Eyenerọn̄ Abasi oro emende idiọkn̄kpọ ererimbot efep!’ Se John eketịn̄de oro ama anam mme owo ẹdiọn̄ọ ke Jesus edi Messiah. Ndi ọmọdiọn̄ọ se iketịbede inọ Jesus ke wilderness? Yak ise ise.