Akpatre Passover Jesus

Mme Jew ẹkesidia Passover kpukpru isua ke ọyọhọ usenọfiọn̄ 14 ke ọfiọn̄ Nisan ẹda ẹti nte Jehovah okosiode mmọ ke ufụn Egypt emen aka Isọn̄ Un̄wọn̄ọ. Jesus ye mme apostle esie ẹkedia Passover eke isua 33 C.E. ke ubet enyọn̄ ufọk kiet ke Jerusalem. Ke utịt Passover oro, Jesus ama ọdọhọ ete: ‘Owo mbufo kiet ayada mi ọnọ.’ Ikọ oro ama akpa mme apostle esie idem etieti, mmọ ẹnyụn̄ ẹbụp m̀mê anie ke edi. Jesus ama ọdọhọ ete: ‘Owo emi ndinọde uyo emi ke edi.’ Enye ama emen uyo oro ọnọ Judas Iscariot. Kpa idahaoro, Judas ama adaha ada ọwọrọ.

Ekem Jesus ama ọbọn̄ akam, obụn̄ uyo, edeme ọnọ mme apostle emi ẹkesụhọde, onyụn̄ ọdọhọ ete: ‘Ẹta uyo emi, koro enye ada aban̄a ikpọkidem mi emi ndinọde ke ibuot mbufo.’ Ekem enye ama emen wine, ọbọn̄ akam, ayak ọnọ mmọ, onyụn̄ ọdọhọ ete: ‘Ẹn̄wọn̄ wine emi, koro enye ada aban̄a iyịp mi emi ndiduọkde man ẹfen idiọkn̄kpọ. Mbufo ẹyetiene mi ẹkara ke heaven. Ẹnam emi nditi mi kpukpru isua.’ Mme anditiene Jesus ẹsinam emi kpukpru isua ke mbubreyo ke ukem usenọfiọn̄ oro. Edinam emi ke ẹsikot Udia Mbubreyo Ọbọn̄.

Ke ẹma ẹkekụre Editi oro, mme apostle ẹma ẹfan̄a m̀mê anie ikpon itie ikan. Edi Jesus ama ọdọhọ mmọ ete: ‘Owo emi adade idem ke ata ekpri ke otu mbufo, enye okpon itie akan.

‘Mbufo ẹdi mme ufan mi. Kpukpru se Ete mi oyomde ntịn̄ nnọ mbufo ke nsitịn̄. Ibịghike mmọn̄ nnyọn̄ mbịne Ete mi ke heaven. Mbufo ẹyesụk ẹdu mi ke isọn̄. Edieke ẹmade idem mbufo, mme owo ẹyeda oro ẹfiọk ke mbufo ẹdi mbet mi. Ana mbufo ẹma kiet eken kpa nte mmade mbufo.’

Ekem Jesus ama ọbọn̄ akam ọdọhọ Jehovah ekpeme kpukpru mbet esie, an̄wam mmọ ẹdiana kiet ẹnam n̄kpọ ke emem, ẹnyụn̄ ẹnam enyịn̄ Abasi asana. Ke enye ama ọkọbọn̄ ama, enye ye mme apostle esie ẹma ẹkwọ ikwọ ẹtoro Jehovah ẹnyụn̄ ẹwọn̄ọ ke ufọk emi mmọ ẹkedude. Idibịghike, ẹmọn̄ ẹmụm Jesus.