Ntọt M’ọkwọrọ Obio Ubọn̄
◻ APOSTLE JOHN ọkọdọhọ ete: “Eyak nnyịn ikûma ke ikọinua ye ke edeme, edi eyak nnyịn ima ke edinanam ye ke akpanikọ.” (1 John 3:18) Jesus ọkọdọhọ ete ke ‘nnyịn ikpenyene ndima mbọhọidụn̄ nnyịn nte idem nnyịn.’ (Matthew 22:39) Ndiwụt ima ke ndinanam n̄kpọ esinam ẹdiọn̄ọ akpanikọ, nte ifiọkutom otode Britain oro etienede mi owụtde.
Ke ini Pauline akakade ekese eka esie, emi ọkọdọn̄ọde udọn̄ọ oro ebietde akpauben̄, akananam owo en̄wen ndomokiet isidụhe do. Edi ke isan̄ enyeemi, nte enye okodụkde esịtufọk, enye ama okop nte ukwak uyetọfọn̄ anamde utom ye nte owo ke ufọkenyọn̄ akamade ukwak ukpọri isọn̄ ọdiọn̄ ufọk. “Nso itịbe, anie odu mi?” ntre ke enye okobụp eka esie. Eka esie ama anam an̄wan̄a enye ete ke Mme Ntiense Jehovah ẹkewaha ke enyịnusụn̄ imọ, ke ẹkụtde nnanenyịn imọ, mmọ ẹma ẹdụk ẹdi ndin̄wam. Ke mmọ ẹma ẹkenam utom esịtufọk ẹnyụn̄ ẹtem udia ẹkụre, mmọ ẹma ẹsụhọrede ẹtie ẹnyụn̄ ẹdọhọ ẹte: “Nte afo emeben̄e idem?” “Ndiben̄e idem nnọ nso?” ntre ke Pauline okobụp. Eka esie ama anam an̄wan̄a ete ke imọ ima inyịme ukpepn̄kpọ Bible. Pauline ama emen̄e nditie, edi sia enye okotode anyan ebiet edi, enye ama obụp m̀mê ọkpọfọn itiene ibuana ke ukpepn̄kpọ oro. Enye ama okop inem ukpepn̄kpọ oro ata etieti tutu eyedi se enye anamde ndutịm ndisidi kpukpru urua ke ukem usen oro man enye akpabuana kpukpru ini. Ke akpatre, ufan esie ama etiene enye, ndien idahaemi mmọ mbiba ẹma ẹna baptism. Ke ntak akpa ukpepn̄kpọ emi, owo duop ke ubon kiet emi ẹdi Mme Ntiense Jehovah idahaemi! Ih, un̄wam “ke edinanam”!
Pastọ ke New Guinea Onyịme Akpanikọ
◻ Ke eyo Jesus ndusụk mme oku ẹma ẹnyịme ukpepn̄kpọ Jesus, Mme ọkwọrọ ederi oro ẹnyenede esịt akpanikọ ẹmenam ntre n̄ko mfịn, nte ẹwụtde ke ifiọk n̄kpọntịbe oro otode enyọn̄ enyọn̄ idụt New Guinea, emi esenyịn circuit ọtọtde. Enye obụk ete: “Akparawa kiet oro enen̄erede ọfiọk n̄wed, kpa pastọ Pentecostal ke ọkọbọp ekpri ufọkederi ekpere Ufọkmbono Obio Ubọn̄. Eyenete kiet ke esop oro ama ọnọ enye ikọ ntiense, ndien enye ama etie ufan ufan. Ibio ini ke emi ebede, ami mma n̄ka n̄kese esop oro nnyụn̄ n̄kodu ye eyenete oro ke n̄kan̄ usụhọde efak oro, ke ẹtode ufọk pastọ oro ẹdi. Kpasụk ke mbubịteyo usen oro n̄kebehede, akparawa emi ama asan̄a ye Bible esie edida ke enyịnusụn̄ nnyịn, ye akamba otuowo ẹtode esop esie. Kpukpru mmọ ẹkeyom ndikop etop Obio Ubọn̄, Enye ama obụp ediwak mbụme, ndien nneme ama akaiso mfọn mfọn tutu ke ufọt okoneyo. Mbubịteyo kiet ke isan̄ mi, enye ye mbon eken oro ẹnyenede udọn̄ ẹma ẹsidi man ẹkpebọrọ mme mbụme mmọ efen efen. Ami mma nnọ enye ikot nte edi mbono circuit nnyịn ke urua oro eketienede, enye ama odụk, asan̄ade ye eyenete oro ekebemde iso ọnọ enye ikọ ntiense. Eren emi ama akaiso ye ukpepn̄kpọ Bible esie, ama ọkpọn̄ Ufọkederi Pentecostal, ndien idahaemi enye edi asuanetop eti mbụk oro anamde emi kpukpru ini.”
Ke akpanikọ, uduak Abasi edi yak “kpukpru owo ẹnyene edinyan̄a ẹnyụn̄ ẹsịm ifiọk akpanikọ.”—1 Timothy 2:4.