Mme Mbụme Ẹtode Mme Andikot
◼ Ndi odot Christian nditop utop m̀mê ndikọ iyak?
Nsio nsio usụn̄ oro ẹnamde n̄kpọ ẹban̄a utop esiwak ndibuana ntotụn̄ọ ntụk. Ntre ọfọn Christian ndidomo ndiọn̄ọ nnyụn̄ nda ekikere Jehovah Abasi kaban̄a n̄kpọ emi nte ẹkụtde ke Bible nsịn ke edinam.
Abasi ama ọnọ ubonowo odudu ndikara “unam obot” ye “ufene.” Ke akpa, ubonowo ikenyeneke unyịme Andibot, m̀mê iso-ọfọn ufọn ndomokiet ke n̄kan̄ eke ikpọkidem, ndiwot mme unam ke udia. (Genesis 1:24, 29,30) Ibọhọke ke Ukwọ ama ekebe ke Abasi ọkọnọ ubonowo unen ndita unam emi ẹkeduọkde “uwem esie, iyịp esie” nte odotde. (Genesis 9: 3,4) Oro ekpekeme ndidi obụk unam otode ufene m̀mê unam ikọt.
Nditọ Israel ẹma ẹsibọk ufene, utọ nte erọn̄ ye enan̄, oro ẹkekemede ndiwot ke udia ke adan̄aemi mmọ ẹkeyomde unam ndita. Mmọ n̄ko ẹma ẹsitop utop ẹnyụn̄ ẹkọ iyak man ẹnyene udia. (Deuteronomy 12: 20-24; 14:4-20) Emi odu ke n̄kemuyo ye ndamban̄a ikọ oro Abasi ọkọdọhọde ete ‘iyedọn̄ ẹkekot ediwak mme ọkọiyak ndikọ ikọt esie ye ediwak atautop ndibịne mmọ.’ (Jeremiah 16:16) Ke ukperedem, Jesus ama esịn mme ọkọiyak ke otu mme apostle esie onyụn̄ ọnọ ndausụn̄ ata ata utom ukọiyak.—Matthew 4: 18-22: 17:27: Luke 5:2-6: John 21: 4-7.
Ke ini akanieren ete ekpụk oro Isaac okoyomde edinem udia ndidia, eyen esie Jacob ama onyịme ndiwot nditọ ebot iba man anam edinem udia ọnọ enye. Esau, nte ededi, ama okotop unam ikọt man enyene unam ọnọ ete esie. Tịmfiọk ete ke okposụkedi mme efene ẹkedude, Isaac okoyom unam ikọt. Tịmfiọk, n̄ko, ete ke nditọiren iba emi ẹkewot mme unam oro edide udia, idịghe eke idemmọ, edi eke owo efen.—Genesis 27:1-19.
Ẹkeme ndiwot unam ke mme ntak efen oro mîdịghe ẹdinyene unam nto mmọ. Ẹkeme ndida ikpa mmọ ẹnam edisịnen̄kpọ, (2 Ndidem 1:8: Mark 1:6: Mme Hebrew 11:37) Ẹma ẹsinam mme n̄kpọ ufụkn̄kpọ ye mme n̄kpọ ndụn̄ufọk ẹto ikpaunam n̄ko, idem ẹnamde ẹto mme unam oro mîkasanake ke udia ẹmi mîkanaha nditọ Israel ẹta.—Exodus 39:33, 34: Numbers 24:7: Judges 4:19: Psalm 56:8.
Abasi ndiyom ẹduọk iyịp unam oro ẹwotde ekpeti mme atautop nte ke uwem unam oto enye ndien ke ntre ekpekama enye ukpono ukpono, idịghe nte ẹmama. (Leviticus 17:13) Nimrod nte an̄wan̄ade ama esiwot mme unam ndien iso-ọfọn anamde inua aban̄a ukeme utop esie, udomo m̀mê ibat oro enye owotde, mîdịghe mme utịp oro enye ekekemede ndinyene nto mmọ. Enye ekedi “ọkpọsọn̄ atautop ke ubiọn̄ọ Jehovah.”—Genesis 10:9, NW.
Utọ nduaidem oro ke utop m̀mê ke ndiwot mme unam, m̀mê ke idat idat ukọiyak, ekeme ndidemede Christian ke idem. Atautop m̀mê ọkọiyak kiet kiet oro ọkọdụn̄ọrede esịt esie ese ama okụt ete ke ‘idatesịt ke se iwotde’ ama omụm imọ. Utọ nduaidem oro asan̄a ikpat kiet ye unana ediwụt ukpono nnọ uwem unam. Ntre ke adan̄aemi mîdiọkke nditop utop m̀mê ndikọ iyak (ke ini ẹdidade se ẹtopde m̀mê se ẹmụmde ke udia m̀mê ke uduak efen oro odotde), ididotke ndinam ntre edieke Christian enyenede ukem edu Nimrod eset. Edi mme n̄kpọndịk ẹdu ke ẹsiode ukop nduaidem nto utop, uwot unam, m̀mê utịp efep.
Enyọn̄-Ukpeme eke February 1, 1984, ama eneme ntak emi mme ata Christian mîsikamake m̀mê ndinyene ikan̄ man ẹda ẹbiọn̄ọ mme owo m̀mê ẹda ẹkpeme idem. (Page 24-27) Nditie n̄kere item emi ama an̄wam ndusụk Mme Ntiense ndifiak n̄kere mban̄a idem edinyene ikan̄ utop. Ekese owo ẹma ẹnyịme ndiduọk ikan̄ mmọ ofụri ofụri m̀mê nditre ndikama mmọ nnyụn̄ nnịm ke ebiet oro ekemede ndisọp n̄kụt. Mme Christian ẹmi ke ntre iyomke ndiwụt edu ntan̄idem ke mme n̄kpọekọn̄ m̀mê ndiberi edem ke mmọ. Akande oro, ndikam ntre ndinyene ikan utop, m̀mê edinịm mmọ ke ebiet oro owo mîkemeke ndisọp nsịm, ekeme ndimen n̄kpọ mmọn̄eyet mfep. Akama n̄kpa n̄kpọekọn̄ ẹmi adan̄aoro idikemeke ndidụk ubọk nditọn̄wọn̄ ẹmi ekemede ndinọ owo unan m̀mê ndiwot owo ke unana idotenyịn, m̀mê ikan̄ ndidu n̄kpere owo ubọk ke ini edịghede enye uwem m̀mê ẹnamde enye okop idiọkesịt.—Men Mme N̄ke 22:3 domo.
Ndusụk Christian ekeme ndima ufuọn̄ ndusụk unam m̀mê iyak, ndien ata eti usụn̄ kiet ndinyene utọ udia emi edi ndika utop m̀mê ndika ọkọ. Ndusụk owo ẹsikop inem ubọ ofụm ye edinam usịn̄ede idem oro enyenede ebuana ye utop ke akai, m̀mê ẹkụt nte hour ifan̄ oro ẹdade ẹka ukọiyak ọnọde owo nduọkodudu. Bible itịn̄ke n̄kpọ ibiat emi, ntre ufọn idụhe ndikpe ikpe nnọ mbon en̄wen kaban̄a m̀mê mmọ ẹkọp inem ke utọ n̄kpọ ntre m̀mê ikopke. N̄ko uwụtn̄kpọ Isaac ye nditọiren esie owụt ke utọn̄ ndomokiet idụhe ndineni mban̄a owo oro editade unam m̀mê iyak oro.—Matthew 7:1-5: Rome 14:4.
Apostle Peter nte an̄wan̄ade akanam utom ukọiyak. Ye ndusụk iyak ẹdude ekpere, Jesus emi ẹkenamde ẹset ama an̄wam enye ndidụn̄ọde mme ntụk esie kaban̄a iyak m̀mê utom ukọiyak. Jesus ama obụp ete: “Simon, eyen John, nte ama Mi akan mmọemi?”—John 21:1-3, 9-15: se Enyọn̄-Ukpeme, November 1, 1988, page 31.
Ukem ntre, Christian emi ye eti ubieresịt ẹmekde ndika utop m̀mê ukọiyak ekpenyene ndikpeme mme n̄kpọ ẹmi enye onịmde ke akpa. Ke uwụtn̄kpọ, edieke ini utop m̀mê ukọiyak anade ọtọn̄ọ ke ini emi ẹdiomide mme mbonoesop, nso ke enye edinam? Mîdịghe ndi nneme esie esiwụt ke enye owụt ntan̄idem aban̄a ukeme esie nditop utop m̀mê ndikọ iyak? Edi eti n̄kpọ didie edieke Christian oro ọkọride osịm ọyọhọ idaha, emi, ke ndusụk ini, emekde ndika utop m̀mê ọkọ ekemede ndidọhọ ye nsọn̄uyo ete: “Ọbọn̄, Afo ọmọfiọk ete mmama Fi [n̄kan mmọemi].”—John 21:16.