Ndinyan̄a Isọn̄ Nsio ke Nsobo
INIKIET kọ ke mbụk ubonowo, Abasi ama anyan̄a isọn̄ osio ke nsobo ke ubọk mme owo. Enye akanam ntre ebe ke ukwọ ofụri ererimbot ke eyo Noah. Nnyịn inyeneke n̄wetnnịm n̄kpọ ndomokiet nte ke mme owo ẹma ẹsobo ata n̄kann̄kụk kọ ke inioro. Edi ẹma ẹsobo isọn̄ ke usụn̄ en̄wen tutu osịm udomo oro Abasi okokụtde ke oyom inam n̄kpọ ke ata ọkpọsọn̄ ubọk.
Bible obụk ete: “Ererimbot etie oburobụt ke iso Abasi, afai onyụn̄ ọyọhọ ke ererimbot. Ndien Abasi ese ererimbot, ndien, sese, ababiara; koro kpukpru owo ẹkebiatde usụn̄ mmọ ke isọn̄.” (Genesis 6:4, 11, 12) Ih, ke eyo Noah Abasi ama okụt nte ẹkesobode isọn̄ ke ntak afai ye ukwan̄ido ubonowo.
Ukem ntre, ke ini Israel eset ẹketọn̄ọde ndida Isọn̄ Un̄wọn̄ọ nnyene, Abasi ama ọtọt ete: “Mbufo ẹkûbiat isọn̄ emi mbufo ẹdude ke esịt: koro iyịp abiatde isọn̄ . . . Ẹkûnyụn̄ ẹsabade isọn̄.” (Numbers 35:33, 34) Ntem, ẹma ẹbiat Canaan ke ntak ubiomikpe iyịp mme andidụn̄ enye. Enyene-ndịk uwụtn̄kpọ kaban̄a emi ekedi edinam mmọ ke ndiwa n̄kpri nditọn̄wọn̄ nnọ abasi mmọ.
Mbọn Canaan n̄ko ẹma ẹnam akwa mbubiam ido ndien emi n̄ko ama otụk usụn̄ nte Abasi ekesede idụt oro. Enye ama odụri Israel utọn̄ ete: “Mbufo ẹkûda mme mmọemi ndomokiet ẹsabade idem mbufo ke esịt: koro mme idụt ẹmi ami mmọn̄ mbịn mmọ mfep ke iso mbufo, ẹdade kpukpru n̄kpọ ẹmi
ẹsabade idemmọ ke esịt: isọn̄ omonyụn̄ edehe: ndien . . . isọn̄ [eye]nyụn̄ ọkpọhi mme andidụn̄ enye efep.” (Leviticus 18: 24, 25) Obukpo ido ye uduọkiyịp ama abiat Canaan osịm udomo oro Abasi okosobode mme idụt Canaan efep.
Edisobo Isọn̄
Nso kaban̄a mfịn? Nte nnyịn n̄ko idụn̄ke ke eyo emi afai, uduọkiyịp, ye obukpo ido ẹbede ubọk? Se ededi oro owo anamde ke ndidomo ndinen̄ede se enye abiatde ke ata isọn̄ emi, enye ikemeke tutu amama ndifiak nnọ n̄kpọ nte million owo ikie ẹmi ẹkekpan̄ade ke mme ekọn̄ esie ke isua ikie emi uwem; m̀mê enye ndikeme ndifiak nda ediwak million owo oro mme abiatibet ẹwotde m̀mê anana-ibat mbọm mbọm mbon oro biọn̄ owotde. Ke akpanikọ, enye ikemeke ndifiak nnọ n̄kpọ nte nseknditọ million 40 osịm 60 ẹmi owo mîkamanke oro ẹkewotde ke usion̄o idịbi ke isua kiet kiet uwem. Nte nnyịn imekeme ndiyịk nte ke owo isoboke isọn̄ ke enyịn Abasi oto mme utọ n̄kpọ ntre—owo itịn̄ke-tịn̄ se itode obukpo ido oro enen̄erede atara asuana mfịn?
Ntak emi asian nnyịn ete ke ana Abasi anam n̄kpọ usọp usọp man anyan̄a isọn̄ osio ke mme mbiara mbiara edinam owo, ndien prọfesi Bible ọsọn̄ọ emi. Edi nso ke enye edinam? Bible ọdọhọ ete ke enye ‘eyesobo mmọemi ẹsọbọde isọn̄.’ (Ediyarade 11:18; men Matthew 24:3-14 domo.) Kpa nte ete-enyene-okụre esibịnde odudụn̄ oro abiatde-biat n̄kpọ efep, ntre ke Abasi ‘edibịn’ mbọn oro ẹbiatde ediye edibotn̄kpọ esie, kpa isọn̄, efep.
Bible ọdọhọ ete: “Edi ẹyesobo mme idiọkowo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.” (Mme N̄ke 2:22) Bible okot edinam Abasi emi edide mi Armageddon. (Ediyarade 16:16) Jesus n̄ko okokot enye “akwa ukụt . . . orụk eke akanam mîdụhe toto ke editọn̄ọ ererimbot tutu osịm emi, eke mîdinyụn̄ idụhe aba.” (Matthew 24:21) Enye eyekam okpon akan Ukwọ oro.
Nte emi edi ebe-ubọk m̀mê ukwan̄ usọbọ? Baba, Abasi, nte Andibot isọn̄, enyene unen ndibiere m̀mê anie owo edidụn̄ ke enye. Enye n̄ko enyene unen ndinọ owo utịp ke ntak mme edinam esie. Akande oro, edieke Abasi ayakde owo akaiso ke usụn̄ esie ye unana ukpan, ẹyesobo isọn̄ emi ẹbaha kpukpru owo, ndien uwem idikemeke ndikaiso. Ke n̄kan̄ eken, ke ‘ndisobo mmọemi ẹsobode isọn̄,’ Abasi otịm inyene isọn̄ nnyịn onịm ọnọ mbon esịtekọm. Bible ọn̄wọn̄ọ ete: “Koro mbon edinen idọ ẹyedụn̄ ke obio, mmọ eke ẹfọnde ẹma ẹyenyụn̄ ẹbịghi ke esịt.”—Mme N̄ke 2:21.
Ye un̄wam Abasi, ediwak million owo ẹma ẹnyene ukeme ndiwụt idemmọ nte ibọhọde nduduọhọ koro mmọ ẹyomde ẹyak mmimọ ibọhọ idu man ikop inem edibotn̄kpọ Abasi. Mmọ n̄ko ẹtiene n̄kokon̄ edumbet ido uwem Abasi enyụn̄ ẹfep idem ke afai ye ubiomikpe iyịp idem ke ndịbe. Ntem, mmọ idịghe mme andibiat isọn̄ ke akpan usụn̄ifiọk emi.
Isọn̄ oro Ẹnyan̄ade Ẹsio ke Nsobo
Utọ mbon oro idahaemi ẹnyene idara idara idotenyịn edikụt nte ẹkpụhọrede isọn̄ emi ke mbiara idaha oro enye odude idahaemi ẹsịn ke ediye paradise. Kamse, ẹyenam idem ikpọkidem mmọ asana, ẹyet mmọ mbiara mbiara odudu idiọkn̄kpọ ẹfep. Akpatre n̄wed Bible etịn̄ aban̄a enọ Abasi ke ndinam kpukpru ẹmi otịbe nte ndamban̄a “akpammọn̄ uwem.” Ke n̄kan̄ akpa emi ye ke n̄kan̄ oko, “eto uwem ada . . . , on̄wụm orụk mfri duopeba, on̄wụm mfri esie ke ọfiọn̄ ke ọfiọn̄; ẹnyụn̄ ẹda ikọn̄ eto oro ẹkọk mme idụt udọn̄ọ.”—Ediyarade 22: 1, 2.
N̄kukụt eke odudu spirit emi edi ubiọn̄ nte ke Abasi eyenyan̄a isọn̄ ye ubonowo oro ẹdude ke enye osio ke nsobo. Mme prọfesi eken ẹbemiso ẹnọ un̄wana ẹban̄a isọn̄ oro ẹfiakde ẹwụk do. Kere, ke uwụtn̄kpọ, ban̄a ikọ uto emi Isaiah ekebemde iso okụt, ete: “Wilderness ye nsatisọn̄ ẹyedara; desert eyenyụn̄ ebre, onyụn̄ asiaha ikọn̄ nte rose. Eyediọn̄ asiaha ikọn̄, onyụn̄ ebre mbre, onyụn̄ ọkwọ.” (Isaiah 35:1, 2) Ke ini oro mme akpainyan̄ oro ẹsabarede, isọn̄ oro ẹsobode, m̀mê ofụm oro ọyọhọde ye ibọkn̄kpa ididụhe.
Ke edide akpan n̄kpọ akan, owo ididaha afai, uduọkiyịp, m̀mê obukpo ido ibiat isọn̄. Sụk mbon oro ẹten̄ede Abasi, mme edumbet esie, ye edibotn̄kpọ esie ẹdidu do. (Ediyarade 21:7, 8) Idahaemi kop mme ubọn̄ ubọn̄ utịp eke kpukpru n̄kpọ ẹmi: “[Abasi] eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep. . . . Sese, mmanam kpukpru n̄kpọ ẹdi mbufa.”—Ediyarade 21:4, 5.
Nso idara idara utịp! Nnyịn ikop idatesịt didie ntem nte ke Abasi ibịghike ‘eyesobo mmọemi ẹsobode isọn̄’! Ndien mme un̄wọn̄ọ eke odudu spirit emi onụk nnyịn didie ntem ndiyom ndinam n̄kpọ Abasi emi edinyan̄ade isọn̄ osio ke nsobo onyụn̄ anam enye edi ebietidụn̄ paradise ọnọ ubonowo oro enyenede eti esịt!
[Se ẹwetde ke ikpọ abisi ke page 6]
Bible ọdọhọ ke Abasi ‘eyesobo mmọemi ẹsobode isọn̄.’—Ediyarade 11:18