Ibịghike Isọn̄ Ayakabade Paradise!

“Ete nnyịn emi odude ke heaven: Yak ikpono enyịn̄ Fo, Yak Ubọn̄ Fo edi; Yak inam uduak Fo; Nte ẹnamde ke heaven, yak inam ke isọn̄ kpasụk ntre.”—Matthew 6:9, 10, Edisana Ŋwed Abasi Ibom.

EDIWAK owo ẹsikot akam emi Akam Ọbọn̄, ndien akam emi ọnọ ubonowo idotenyịn. Didie?

Nte ẹsitịn̄de ke Akam Ọbọn̄, Obio Ubọn̄ Abasi ayanam ẹnam uduak Abasi ke isọn̄ nte ẹnamde idahaemi ke heaven. Ndien uduak Abasi edi ndinam isọn̄ afiak edi Paradise. (Ediyarade 21:1-5) Nso idi Obio Ubọn̄ Abasi, ndien didie ke enye edinam isọn̄ afiak edi Paradise?

Enye Edi Ata Ukara

Obio Ubọn̄ Abasi edi ata ukara. Ana ukara enyene andikara, mme ibet, ye mbon oro enye akarade. Ndi Obio Ubọn̄ Abasi enyene mme n̄kpọ emi? Se nte Bible ọbọrọde mbụme ita oro ẹtienede mi:

Mmanie ẹdi mme andikara Obio Ubọn̄ Abasi? (Isaiah 33:22) Jehovah Abasi emek Jesus Christ Eyen esie nte Adaibuot ukara Obio Ubọn̄ emi. (Matthew 28:18) Jehovah ọnọ Jesus odudu ndimek ibat ibat owo ke “kpukpru esien ye usem ye obio ye idụt” man ẹtiene enye ẹkara “isọn̄ nte ndidem.”—Ediyarade 5:9, 10.

Mme ibet ewe ke mme andidu ke idak Obio Ubọn̄ Abasi ẹkpenịm? Ndusụk ibet m̀mê mme ewụhọ emi oyom ẹnanam n̄kpọ ẹwụt. Jesus ama etịn̄ se idide n̄kponn̄kan ibet ete: “‘Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.’ Emi edi n̄kponn̄kan ye akpa ewụhọ. Udiana, eke ebietde enye, edi emi, ‘Afo enyene ndima mbọhọidụn̄ fo nte idemfo.’”—Matthew 22:37-39.

Mme ibet eken ẹteme mme andidu ke idak Obio Ubọn̄ Abasi ete ẹtre ndinam ndusụk n̄kpọ. Ke uwụtn̄kpọ, Bible etịn̄ in̄wan̄-in̄wan̄ ete: “Ẹkûyak ẹtụn mbufo usụn̄. Mbon use, mme okpono ndem, mme esịn efịbe, iren oro ẹnịmde ndida nyụhọ oburobụt udọn̄ idan̄, irenowo emi ẹdan̄de ye irenowo, mme inọ, mbon idiọkitọn̄, mme akpammịn, mme osụn̄i isụn̄i, ye mbon n̄kanubọk ididaha obio ubọn̄ Abasi inyene.”—1 Corinth 6:9, 10.

Mmanie ke Obio Ubọn̄ Abasi edikara? Jesus ọkọdọhọ ke mbon oro Obio Ubọn̄ Abasi edikarade ẹtie nte mme erọn̄. Enye ọkọdọhọ ete: “Mmọ ẹyekop uyo mi, mmọ ẹyenyụn̄ ẹkabade ẹdi otuerọn̄ kiet, ekpemerọn̄ kiet oyonyụn̄ odu.” (John 10:16) Man owo odụk Obio Ubọn̄ Abasi, inaha enye etetịn̄ kpọt ke imọ imetiene Jesus, kpa Eti Ekpemerọn̄, edi ana enye ananam mme ewụhọ esie n̄ko. Jesus ọkọdọhọ ete: “Idịghe kpukpru mbon oro ẹkotde mi ẹte, ‘Ọbọn̄, Ọbọn̄,’ ẹdidụk ke obio ubọn̄ heaven, edi enye emi anamde uduak Ete mi emi odude ke heaven edidụk.”—Matthew 7:21.

Ntre, mbon oro ẹdude ke idak Obio Ubọn̄ Abasi ẹsikot ẹnyụn̄ ẹkpono enyịn̄ Abasi, Jehovah, ukem nte Jesus ekesinamde. (John 17:26) Mmọ ẹnịm ewụhọ Jesus oro ọdọhọde ẹkpep mbon en̄wen “eti mbụk obio ubọn̄ emi.” (Matthew 24:14; 28:19, 20) Ndien mmọ ẹnen̄ede ẹma kiet eken.—John 13:35.

Ndisobo “Mmọ Oro Ẹsobode Isọn̄”

Se itịbede idahaemi ke ererimbot ẹwụt ke Obio Ubọn̄ Abasi ọyọsọp anam n̄kpọ man okpụhọ mme idaha oro ẹdude ke isọn̄. Nnyịn isan̄a didie ifiọk emi? Ke tọsịn isua iba oro ẹkebede, Jesus ama etịn̄ mme n̄kpọ oro ẹdiwụtde ke “obio ubọn̄ Abasi ke ekpere.” (Luke 21:31) Nte iketịn̄de ke ibuotikọ oro ekebede, mme n̄kpọ emi ẹtịbe ke ofụri ererimbot.

Nso iditịbe ke oro ebede? Jesus ọbọrọ ete: “Adan̄aoro akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matthew 24:21) Idịghe owo edinam akwa ukụt emi etịbe. Abasi edinam man osobo “mmọ oro ẹsobode isọn̄.” (Ediyarade 11:18) “Ẹyesobo mme idiọk owo” oro ẹdomode ndibiat isọn̄ emi ke ntak idiọkitọn̄. Edi mmọ eke ẹfọnde ẹma, emi ẹkponode Abasi ke usụn̄ oro enye enyịmede, ‘ẹyebịghi ke esịt.’—Mme N̄ke 2:21, 22.

Jehovah Abasi enen ke se enye oyomde ndinam emi. Ntak-a? Kere ban̄a uwụtn̄kpọ emi: Yak idọhọ ke afo emenyene ufọk. Ndusụk mme andidụn̄ ufọk oro ẹdu uwem ọfọn, ẹsikpe okụk ufọk, ẹnyụn̄ ẹtịm ufọk oro ẹkama. Edi, mmọ eken ẹdi mbon ntịme, ẹbụk ibụk, imaha ndikpe okụk ufọk, ẹnyụn̄ ẹbiat ufọk oro. Kpa ye se etịn̄de, mmọ idọn̄ke utọn̄. Nso ke afo akpanam? Sia edide afo enyene ufọk, emenyene unen ndision̄o mbon ntịme oro ke ufọk fo.

Kpasụk ntre, Jehovah Abasi emi okobotde ererimbot ye kpukpru se idude ke esịt enyene unen ndibiere owo emi enye ediyakde odụn̄ ke isọn̄. (Ediyarade 4:11) Jehovah etịn̄ ke imaduak ndision̄o ndiọi owo oro mînamke uduak imọ ẹnyụn̄ ẹfịkde mbon eken ifep ke isọn̄ emi.—Psalm 37:9-11.

Isọn̄ Ayafiak Edi Paradise

Ibịghike, Jesus Christ ayakara isọn̄ emi ke Obio Ubọn̄ Abasi. Jesus ọkọdọhọ ke ini emi ‘ke ẹdinam n̄kpọ ẹkabade ẹdi mbufa.’ (Matthew 19:28, Edisana Ŋwed Abasi Ibom) N̄kpọ editie didie ini oro? Se mme un̄wọn̄ọ Bible emi:

Psalm 46:9. “Enye anam ekọn̄ etre tutu esịm ke utịt ekondo.”

Isaiah 35:1. “Wilderness ye nsat-isọn̄ ẹyedara; desert oyonyụn̄ ebre, onyụn̄ asiaha ikọn̄ nte rose.”

Isaiah 65:21-23. “Edimek ikọt mi ẹyedia se ubọk mmọ ẹnamde. Mmọ idinamke utom ke ikpîkpu, idinyụn̄ imanke nditọ inọ n̄kpọndịk.”

John 5:28, 29. “Ini ke edi eke kpukpru mme andidu ke udi editi ẹdikopde [Jesus] uyo ẹnyụn̄ ẹwọn̄ọ ẹdi.”

Ediyarade 21:4. “[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”

Ntak Ikpenịmde ke Mme N̄kpọ Emi Ẹyesu

Ndi emenịm ke mme un̄wọn̄ọ Bible ẹyesu? Bible ama etetịn̄ ke ediwak owo idinịmke. Enye ọkọdọhọ ete: “Ke mme ukperedem usen mbon nsahi ẹyeda nsahi mmọ ẹdi, ẹsan̄ade nte ekemde ye idiọk udọn̄ mmọ ẹnyụn̄ ẹdọhọ ẹte: ‘Edidu esie emi ẹken̄wọn̄ọde, enye? Kamse, tọn̄ọ ke usen emi mme ete ete nnyịn ẹkedede ke n̄kpa, kpukpru n̄kpọ ẹka iso ukem nte ẹketiede toto ke ntọn̄ọ edibot n̄kpọ.’” (2 Peter 3:3, 4) Edi mbon nsahi emi ẹnam ata akwa ndudue. Kam kere ban̄a ntak inan̄ emi akpanamde enịm se Bible etịn̄de:

(1) Abasi ama osobo mme idiọkowo ke eset. Ukwọ eyo Noah edi akakan uwụtn̄kpọ.—2 Peter 3:5-7.

(2) Ikọ Abasi ama etetịn̄ ke ererimbot editie ntem.

(3) Kpukpru n̄kpọ itiehe “ukem nte ẹketiede toto ke ntọn̄ọ edibot n̄kpọ.” Akananam isọn̄ ibiarake ntem.

(4) Ẹkwọrọ “eti mbụk obio ubọn̄” ke ofụri isọn̄, ndien emi owụt ke “utịt” esesịm ama.—Matthew 24:14.

Mme Ntiense Jehovah ẹsịn udọn̄ ẹnọ fi ndikpep Ikọ Abasi, kpa Bible, ye mmimọ man enen̄ede ọfiọk nte nsinsi uwem editiede ke Obio Ubọn̄ Abasi. (John 17:3) Uwem eyenen̄ede enem ke ini iso. Ke akpanikọ, ini oro n̄kpọ edifọnde akan emi enen̄ede ekpere. Ndi eyetiene odu ini emi?

[Se ẹwetde ke ikpọ abisi ke page 7]

Mbon oro ẹdọhọde ke n̄kpọ ẹditie nte osụk etiede emi ẹnam ata akwa ndudue

[Ndise ke page 8]

Ndi eyetiene odu ini emi?