Mme N̄kpọntịbe Ẹtode Isọn̄ Un̄wọn̄ọ

Jordan Oro Ekemede Ndidi Afo Ufiọkke

EDIKAM nsasiak Akpa Jordan ekeme ndinam fi eti mme n̄kpọntịbe oro emehede: Nditọ Israel ke idak Joshua ẹsanade ke edisat isọn̄akpa emi ekperede Jericho ebe; Naaman eyerede mmọn̄ utịm ikatiaba ke mmọn̄ Jordan man ẹkọk enye udọn̄ọ akpamfia; ediwak mme Jew, ndien ekem Jesus, ẹdide man John onịm mmọ baptism do.​—Joshua 3:5-17; 2 Ndidem 5:10-14; Matthew 3:3-5, 13.

Nte an̄wan̄ade, kpukpru ọwọrọetop n̄kpọntịbe ẹmi ẹketịbe ke anyan ikpehe Jordan oro ẹtịmde ẹdiọn̄ọ, kpa ikpehe n̄kan edem usụk Inyan̄ Galilee osụhọde osịm Inyan Inụn̄. Edi mme ẹsịn ifịk nditọ ukpepn̄kpọ Ikọ Abasi ẹkeme ndifụmi ikpehe Jordan efen​—kpa ikpehe n̄kan̄ edem edere inyan̄ oro ye n̄kann̄kụk esie. Se n̄wed ndise emi.a Unaisọn̄ unaisọn̄ ikpehe oro ke ufọt ufọt edi ubak Akwa Itịghede, kpa ebeden̄ ebeden̄ isọn̄ emi ọtọn̄ọde ke Syria ana osịm Africa.

Akpan ebiet ita oro Akpa Jordan ọwọrọde oto edi mme idịm oro ẹwetde ẹto snow ẹmi ẹtarade ke n̄kokon̄ Obot Hermon. Nsannsan idịm edem usiahautịn (page 17, enyọn̄ enyọn̄) ọwọrọ oto ebeden̄ ndom emi ekperede ukot obot oro. Emi edi ebiet Caesarea Philippi okodude; ti ete ke Jesus ama aka do ibio ini mbemiso ẹkekpụhọrede mbiet esie ke “akwa obot.” (Matthew 16:13-17:2) Idịm efen ọwọrọ oto ibombom ebiet ẹkebọpde obio Dan, emi nditọ Israel eke obio ubọn̄ edem edere ẹkewụkde eyen enan̄ o-gold. (Judges 18:27-31; 1 Ndidem 12: 25-30) Ọyọhọ idịm ita osop ibuot ye mbiba emi ndinam Akpa Jordan, emi odon̄ode ke se ikon̄de ikan ikpat tọsịn kiet ọduọhọ ke n̄kpọ nte itiat itiaba.

Ekem itịghede oro anyanade ana osịm N̄kpọdiọhọ Mmọn̄ Hula, anamde mmọn̄ Jordan asuana, osụn̄ọde ke ntatara, okpụk okpụk ikpehe. Ke ini eset ekese mmọn̄ oro ọkọdiọhọ ke n̄kpọdiọhọ mmọn̄ emi mîtụn̄ọke oro ẹkediọn̄ọde nte N̄kpọdiọhọ Mmọn̄ Hula (m̀mê Huleh). Edi N̄kpọdiọhọ Mmọn̄ Hula idụhe do aba koro ke ndondo emi ẹma ẹnen̄ede enyọn̄ enyọn̄ Akpa Jordan, ẹma ẹsiak mme usụn̄mmọn̄ ndidụhọde mmọn̄ nsio ke okpụk okpụk ikpehe oro, ẹma ẹnyụn̄ ẹsiak usụn̄ oro n̄kpọdiọhọ mmọn̄ oro asan̄ade ọwọrọ otụn̄ọ. Ntem, edieke afo esede n̄wed ndise ikpehe emi onyụn̄ okụtde n̄kan̄ edem edere Inyan̄ Galilee, kpa n̄kpọdiọhọ mmọn̄ (Hula), afo eyefiọk ete ke n̄wed ndise emi edi eke ikpehe ini eset, idịghe nte afo edikụtde enye mfịn.

Edieke afo akade do, nte ededi, afo eyekụt n̄kann̄kụk oro ẹbọkde ẹnịm oro ekemede ndinọ fi ekikere nte ikpehe oro eketiede ke mme usen Bible, ke ini enye ọkọyọhọde ye mme akpan uduot mbiet, utọ nte mme nsesịri akai n̄kukịp ye nnyanyan̄a isantịm.​—Job 8:11.

Ebiet oro ekedi idụn̄ nsio nsio inuen kpukpru ini. Mme inuen idịm, akpantana, ikpan̄-inyan̄, mbomon̄kuku, ye mme inuen eken ẹma ẹsidu do ediwak ediwak, ke ndusụk udomo ke ntak edide edep ye n̄kpọdiọhọ mmọn̄ oro akanamde ata eti itie nduọkodudu odu ke usụn̄ odude ke ufọt Europe ye Africa. (Deuteronomy 14:18; Psalm 102:6; Jeremiah 8:7) Owo ikesisọpke ikụt mme edibotn̄kpọ eken ẹkedude ke ikpehe emi, edi mmọ ndidu ama anam owo imaha ndisan̄a mbe N̄kpọdiọhọ Mmọn̄ Hula. Iso-ọfọn lion, isantịm, wolf, ye edi ikọt ẹma ẹsịne ke otu mmọemi. (Job 40: 15-24;, Jeremiah 49:19; 50:44; Habakkuk 1:8) Ke ndusụk ini udọn̄ọ ufiopidem otode ọbọn̄ ama esidu, nte an̄wan̄ade kiet ke otu ufiopidem oro ẹsiakde ke Bible.

Nte an̄wan̄ade, mme akaisan̄ ikpọn̄ ye ke udịm ẹkesisan̄a mben mben edep emi ẹbe. Ntre m̀mọ̀n̄ ke mmọ ẹkpesan̄a Akpa Jordan ẹbe ke itịghede n̄kan̄ edem edere Inyan̄ Galilee?

Ke itie ekperede Inyan̄ Galilee itiat basalt ẹma ẹwọrọ ẹbiọn̄ọ; mbiet ubahade mmọn̄ emi ekedi ntak mmọn̄ akabakde ada onyụn̄ anamde N̄kpọdiọhọ Mmọn̄ Hula. Afo emekeme ndikụt ubak itiat oro ke page 16. Nte Jordan ewetde ebe enye ke n̄kan̄ edem usụk odụk Inyan̄ Galilee (oro ẹdade ẹkụt ke anyan usụn̄), enye efehe ọsọp ata etieti tutu akabade afia mmọn̄. Nte an̄wan̄ade, mbonisan̄ eset ẹma ẹkụt nte edide n̄kpọndịk ndisụhọde ndụk ntotụn̄ọ itịghede oro nnyụn̄ nsan̄a mbe edisọp mmọn̄ Jordan.

Ke ufọt okpụk okpụk ikpehe N̄kpọdiọhọ Mmọn̄ Hula ye ntotụn̄ọ itịghede oro, ibio ibio, unaisọn̄ unaisọn̄ ikpehe emi mmọn̄ mîsọpke ama odu. Mi mbonisan̄ eset ẹma ẹkeme ndisan̄a ke ukot mbe akpa oro ifụre ifụre, ndien enye ama akabade edi ubak akpan usụn̄ ndisan̄a mbe Isọn̄ Un̄wọn̄ọ. Idahaemi ẹsịn ebọp ke ebiet emi, emi osụk edide akpan ebiet ndisana mbe Jordan.

Mfịn N̄kpọdiọhọ Mmọn̄ Hula edi eduek eduek ikpehe utọin̄wan̄; idem n̄kpọdiọhọ mmọn̄ ukọiyak ẹdu. Kpukpru ẹmi ẹkeme ndida itie ke ntak uwak mmọn̄ oro ewetde osụhọde ikpehe Akpa Jordan emi.

[Mme Ikọ Idakisọn̄]

[Ndise obio ke page 17]

(Ama oyom ndikụt nte enye enen̄erede etie, se n̄wed)

Hula

Inyan̄ Galilee

[Ebiet Ẹdade N̄kpọ Ẹto]

Oto n̄wed ndise obio oro ẹbọde unen History) Est. and Survey of Israel.

[Ebiet Ẹdade Ndise Ẹto ke page 16]

Pictorial Archive (Near Eastern History) Est.

[Ebiet Ẹdade Ndise Ẹto ke page 17]

Pictorial Archive (Near Eastern History) Est.

Animal photos: Safari-Zoo of Ramat-Gan, Tel Aviv