Nte Afo Emeti?
Nte afo ama okop inem ndikot mme nsiondi Enyọn̄-Ukpeme eke ndondo emi? Ọfọn, se ise m̀mê afo emekeme ndibọrọ mme mbụme ẹtienede mi:
◻ Sia ẹkụkde mme ọsọn̄ibuot angel oro ẹsịn ke Tartarus, emi ọwọrọ nso ọnọ mmọ? (2 Peter 2:4)
Mmọ inyeneke itie aba ke edisana esop Jehovah ẹnyụn̄ ẹsịbe mmọ idahaemi ẹkpọn̄ un̄wana Abasi. Nte ededi, mmọ ẹsụk ẹnanam n̄kpọ ke ndausụn̄ Satan ẹnyụn̄ ẹkaiso ndinyene n̄kpet n̄kpet ebuana ye mme owo, ẹdomode ndikara irenowo, iban, ye idem nditọn̄wọn̄. (Ediyarade 12:12, 17)—4/15, page 14.
◻ Ntat ‘edisua se idiọkde’ ke enyịn Jehovah edide akpan n̄kpọ? (Psalm 97:10)
Mbon oro ẹsuade se idiọkde idiyomke mme usụn̄ ndisịn idem ke enye. Ke n̄kan̄ eken, mme owo oro mîsuaha enye ẹkeme ndisio idem mfep ke enye ke adan̄aemi mmọ ke esịt ẹkerede nte mmimọ ikpabuanade ke ndiọi n̄kpọ.—4/15, page 21.
◻ Ke n̄ke Jesus aban̄ade mme talent, nso ukpepn̄kpọ ke ẹnịm ẹnọ kpukpru mmọ oro ẹdọhọde ke idi mme anditiene Christ? (Matthew 25:14-30)
Ana mmọ ẹnam utom ndikọri inyene Eteufọk mmọ eke heaven ke ndinyene ọyọhọ ebuana ke utom ukwọrọikọ. Do ndien ke ekeme ndin̄wọn̄ọ nnọ mmọ ndinyene itoro ye utịp otode Jesus. Mmọ ke ntem ẹfep ndidi se ẹtopde ẹduọk ke an̄wa ekịm ye ọyọhọ nsobo.—5/1, page 9.
◻ Nso ke ikọ Jesus ọkọwọrọ ke ini enye ọkọdọhọde mme mbet esie ete ẹbọn̄ akam ntem: “Kûnyụn̄ uda nnyịn usịn ke idomo”? (Matthew 6:13)
Owo ikpenyeneke ndida nte ke ikọ emi ọwọrọ ke Jehovah esisịn nnyịn ke idomo ndinam idiọkn̄kpọ. Utu ke oro, nnyịn, ke akpanikọ, imekeme ndiben̄e Jehovah ite okûyak nnyịn imem idem ke ini isobode idomo m̀mê mfịghe ndisọn̄ ibuot ye enye. Nnyịn imekeme ndikpe Ete nnyịn ubọk ite ekpeme ikpatisan̄ nnyịn man idomo ndomokiet oro ọsọn̄de akan nnyịn ndibe okûsịm nnyịn. (1 Corinth 10:13)—5/15, page 19.
◻ Nte odot Christian ndinyịme ẹkịm enye ubak iyịp, utọ nte editịbe globulin m̀mê albumin?
Ke ndinam n̄kpọ ntiene ibet Abasi, mme Christian isinyịmeke edikịm iyịp nsịn ke idem eke ikpọ n̄kpatan̄a n̄kpọ iyịp—plasma, ndat ndat nsen iyịp, afia nsen iyịp, m̀mê platelet. Nte ededi, ndusụk Mme Ntiense Jehovah ke ubieresịt ẹma ẹkụt ẹte ke imekeme ndibọ ukịmibọk kiet otu n̄kpri mbak protein ẹtode plasma. Nte enemde, ndusụk protein ẹmi ẹsiwọrọ nte obot akanamde ẹto usan̄a-iyịp eke an̄wan idịbi ẹdụk san̄asan̄a iyịp eke ọbọn̄-eyen esie.—6/1, page 30,31.
◻ Jesus ndiyet mme mbet esie ukot ke akpatre enyene-ufọn Passover oro ọkọyọhọ nso uduak?
Jesus ekekpep mme mbet esie ukpepn̄kpọ usụhọdeidem. Owo baba kiet ikpedehedei iyom akpa itie, ekerede ete ke imọ idi n̄wọrọnda. Utu ke oro, kpukpru owo ẹkpetiene uwụtn̄kpọ Jesus ẹnyụn̄ ẹnyịme ndinam n̄kpọ nnọ kiet eken ye unana asari, ọkpọkọm utom oro ekpri didie mînyụn̄ inemke. (John 13:12-17)—6/15, page 9.
◻ Ke nso ekikere ke mme Jew ke Beroea ‘ẹkeda ini ẹdụn̄ọde’ N̄wed Abasi? (Utom 17:11)
Idịghe nte ke mbon Beroea ẹkeyeyịk Paul ye etop oro enye akadade ọsọk mmọ, edi mmọ ẹkenam ndụn̄ọde ndisọn̄ọ nte ke Jesus ekedi Messiah, Sia ediwak mmọ ẹkekabarede ẹdi mme andinịm ke akpanikọ edi n̄kpọ owụtde nte ke uduakesịt mmọ ekedi eke akpanikọ. (Utom 17:12)—6/15, page 18.
◻ Nso ikedi “n̄wed mme ekọn̄ Jehovah”? (Numbers 21:14)
Enye ekedi mbụk akpanikọ emi aban̄ade mme ekọn̄ oro Abasi akan̄wanade ke ibuot ikọt esie. Eyedi enye ọkọtọn̄ọ ye edikan oro Abraham akakande mbon oro ẹkedade ekọn̄ ẹdụk Isọn̄ Un̄wọn̄ọ nte ẹwetde ke Genesis ibuot 14. Ata akpatre n̄wed emi edidi “ekọn̄ akwa usen Abasi, Andikara kpukpru n̄kpọ” ke Har-Magedon. (Ediyarade 16:14, 16)—7/1, page 20, 22.
◻ Didie ke Ikọ Abasi, kpa Bible, an̄wam nnyịn ndiyọ ubiak?
Bible asian nnyịn ntak emi Jehovah ayakde ubiak odu, Bible n̄ko ọn̄wọn̄ọ ọnọ nnyịn nte ke ibịghike ubiak eyetre. (Rome 5:12; Ediyarade 21:1-5)—7/15, page 4, 5.
◻ Didie ke ikọt Abasi mfịn ekeme ‘ndimụm ubọn̄ Ọbọn̄ [Jehovah] n̄kama nte ukụtiso omụmde n̄kpọ’? (2 Corinth 3:18)
“Un̄wana gospel ubọn̄ Christ, emi edide mbiet Abasi” anam ubọn̄ Abasi ayama. Mme Ntiense Jehovah ẹwụt ubọn̄ emi ke nditịn̄ n̄kpọ mban̄a ubọn̄ Jehovah ye ubọn̄ Obio Ubọn̄ esie ke ubọk Eyen esie. (2 Corinth 4:4-6)—7/15, page 15, 16.
◻ Ini ewe ke owo akpana baptism?
Baptism edi usioukot kiet ẹnyenede nditiene ke owo ama akanam ọyọhọ ọyọhọ, uyakidem oro mîkọn̄ọke ke n̄kpọ, ye unana edifam n̄kpọ nda, ọnọ Jehovah ebe ke Christ Jesus ndinam uduak Abasi.—8/1, page 14.