Watchtower LIBRARY EKE INTANET
Watchtower
LIBRARY EKE INTANET
Efịk
Ẹ,Ê,Ị,Ọ,Ụ,Û,N̄
  • Ẹ
  • ẹ
  • Ê
  • ê
  • Ị
  • ị
  • Ọ
  • ọ
  • Ụ
  • ụ
  • Û
  • û
  • N̄
  • n̄
  • BIBLE
  • MME N̄WED
  • MBONO ESOP
  • w90 12/15 p. 10-15
  • “Owo Eke Onyụn̄ Okopde, Yak Enye Ọdọhọ Ete, Di”

Vidio ndomokiet idụhe mi.

Kûyat esịt, n̄kpọ anam vidio emi okûbre.

  • “Owo Eke Onyụn̄ Okopde, Yak Enye Ọdọhọ Ete, Di”
  • Enyọn̄-Ukpeme Ọnọ Ntọt Obio Ubọn̄ Jehovah—1990
  • N̄kpri Ibuotikọ
  • Ukem Ibuot Nneme
  • Udọn̄ Edemede Kaban̄a Mmọn̄ Uwem
  • Otu N̄wanndọ Ọnọ Ikot Ete, “Di”
  • Spirit ye N̄wanndọ Ẹdọhọ Ẹte, “Di”
  • Mme Erọn̄ En̄wen Ẹdiana ke Ndidọhọ Ẹte, “Di”
  • Buana Idahaemi ke Nditan̄a
  • “Spirit ye N̄wanndọ Ẹka Iso Ẹdọhọ Ẹte: ‘Di!’”
    Enyọn̄-Ukpeme Ọnọ Ntọt Obio Ubọn̄ Jehovah—2010
  • Ẹdara Ndọ Eyenerọn̄!
    Enyọn̄-Ukpeme Ọnọ Ntọt Obio Ubọn̄ Jehovah—2014
  • Mmọn̄ Emi Otopde Ọwọrọ Ndinọ Nsinsi Uwem
    Enyọn̄-Ukpeme Ọnọ Ntọt Obio Ubọn̄ Jehovah—2008
  • Ediyarade ye Afo
    Ediyarade—Ubọn̄ Ubọn̄ Ata-Utịt Esie Emekpere!
Se En̄wen En̄wen
Enyọn̄-Ukpeme Ọnọ Ntọt Obio Ubọn̄ Jehovah—1990
w90 12/15 p. 10-15

“Owo Eke Onyụn̄ Okopde, Yak Enye Ọdọhọ Ete, Di”

Ke ofụri isua ẹmi ẹdide mi, Mme Ntiense Jehovah ke mme idụt ẹwakde ẹbe 200 ke ofụri ererimbot ẹyeda idemmọ ẹnam n̄kpọ ke n̄kemuyo ye ibuotikọ isua mmọ eke 1991: ‘OWO EKE ONYỤN̄ OKOPDE, YAK ENYE ỌDỌHỌ ETE, DI”

“Spirit ye n̄wanndọ ẹdọhọ ẹte, Di. Owo eke onyụn̄ okopde, yak enye ọdọhọ ete, Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.”​—EDIYARADE 22:17.

1. Ẹkot nnyịn ẹte ‘idi’ ewe “mmọn̄”?

ẸKOT fi ẹte “di.” Edi edinam nso? Kamse, edi edibịt itọn̄ ke mmọn̄. Emi idịghe ata mmọn̄ edi edi ukem mmọn̄ oro Jesus Christ eketịn̄de aban̄a ke ini enye ọkọdọhọ n̄wan Samaria oro ke obube mmọn̄ ete: “Owo ekededi eke ọn̄wọn̄de mmọn̄ emi Ami ndinọde enye idikopke nsatitọn̄ aba: edi mmọn̄ oro ndinọde enye eyekabade edi idịm mmọn̄ ke esịt esie eke otopde akabade ọwọrọ edi nsinsi uwem.” (John 4:14) Ke m̀mọ̀n̄ ke Jesus akada “mmọn̄” emi?

2. Nso idi ebiet emi “mmọn̄” oro ọwọrọde oto, ndien n̄kukụre ke ewe n̄kpọntịbe ama akada itie ke enye ọkọtọn̄ọ ndifiọrọ?

2 Ẹma ẹnọ apostle John ifet ndikụt ke n̄kukụt ebiet emi “mmọn̄” oro ọwọrọde oto nte enye ekewetde ke Ediyarade 22:1 ete: “Ekem angel owụt mi akpammọn̄ uwem, emi asakde nte crystal, emi otode ke ebekpo Abasi ye eke Eyenerọn̄.” Ih, idịm afia nsem nsem mmọn̄ ye mme n̄kpọ oro ẹnọde uwem mi idịghe efen ekededi ikan Ọnọ-Uwem, kpa Jehovah ke idemesie, emi anamde enye odu ebe ke Eyenerọn̄, Jesus Christ. (Men Ediyarade 21:6 domo.) Sia ẹsiakde “ebekpo Abasi ye eke Eyenerọn̄,” anaedi ke ẹma ẹkewụk Obio Ubọn̄ Messiah ke 1914, ke usen Ọbọn̄ ama ọkọtọn̄ọ, ke mmọn̄ uwem ọtọn̄ọ ndisiaha.​—Ediyarade 1:10.

3, 4. Nso ke “mmọn̄” oro ada aban̄a, ndien enye odu ọnọ mmanie?

3 Nso ke mmọn̄ uwem emi ada aban̄a? Enye ada aban̄a ndutịm Abasi ndifiak nnọ mme owo mfọnmma uwem, kpa nsinsi uwem ke mfọnmma idaha ke isọn̄ oro ẹnamde akabade edi paradise. Mmọn̄ uwem oro ada aban̄a kpukpru ndutịm uwem oro ẹnamde ẹbe ke Jesus Christ. Ndi kpukpru ẹmi odu idahaemi? Baba, idịghe kpukpru, koro ana Abasi ebemiso emen idiọk editịm n̄kpọ emi ye andikara esie oro enyịn mîkwe, Satan kpa Devil efep. Edi nnyịn imekeme ndinyene se itode “mmọn̄” oro idahaemi ebe ke ndikop nnyụn̄ nsụkibuot nnọ eti mbụk Obio Ubọn̄ nnyụn̄ nnam uwem nnyịn asan̄a ekekem ye enye.​—John 3:16; Rome 12:2.

4 Ntem ke ama okowụt John ‘akpa uwem,’ Jesus ama asian John aban̄a uduak Esie ke ndidọn̄ angel esie ye n̄kukụt oro. Ekem John okop nte ẹdọhọde ẹte: “Spirit ye n̄wanndọ ẹdọhọ ẹte, Di. Owo eke onyụn̄ okopde, yak enye ọdọhọ ete, Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Ediyarade 22:17) Ntem, ikọt Abasi ẹnọ mbon oro ẹkopde nsatitọn̄ ikot emi man ẹtọn̄ọ ndin̄wọn̄ ndutịm Abasi ndinyene nsinsi uwem ke isọn̄ ebe ke Eyenerọn̄ Abasi.​—John 1:29.

Udọn̄ Edemede Kaban̄a Mmọn̄ Uwem

5. Didie ke ubonowo ẹkesan̄a ediyom ndutịm Abasi emi?

5 Ke mfụhọ, akpa ete ye eka ubonowo ikọsọn̄ọke iyịre ke usụn̄uwem oro ọkpọnọde nditọ mmọ ifet ndidara mfọnmma uwem eke owo ke nsinsi ke paradise ebietidụn̄. Nsinsi uwem ubonowo ama oyom ete Adam anam ọniọn̄ ọniọn̄ edimek ndinam n̄kpọ nnọ Andibot esie ke n̄kopitem. Ke idak odudu ọsọn̄ibuot edibotn̄kpọ eke spirit, Eve ama ọtọn̄ọ edinam oro okosụn̄ọde ke n̄kpa ọnọ ubonowo, ndien Adam, mfọnmma ebe esie, ama emek ndidiana ye enye ke edinam adade n̄kpa edi do. Ntre, nte andiyak uwem ke ndammana usụn̄ nnọ emana ubonowo oro editienede, Adam ke akpan ekedi owo oro akadade edinam n̄kpa esịn ke ofụri ekpụk ubonowo. Enen̄ede edi ntre anamde Bible ọdọhọ ete: “Nte idiọkn̄kpọ okotode owo kiet odụk ke ererimbot, n̄kpa onyụn̄ otode ke idiọkn̄kpọ oro odụk; n̄kpa onyụn̄ ebe osịm kpukpru owo, koro kpukpru owo ẹma ẹnam idiọkn̄kpọ.” (Rome 5:12) Ekedi ke Adam ye Eve ẹma ẹkeduọ ẹdụk idiọkn̄kpọ ke mmọ ẹketọn̄ọ ndidian mbufa owo ke ubon eke owo.​—Psalm 51:5.

6. Ntak Jehovah akanamde ndutịm ọnọ “mmọn̄” oro ndidu?

6 Ndi ẹkenyene ndibiọn̄ọ Abasi ke nsinsi ndiyọhọ uduak esie aban̄ade paradise isọn̄ ndiyọhọ ye mfọnmma owo? Ibọrọ Bible nte ededi, edi, baba! Edi, man osu uduak esie, Jehovah ama anam ima ima ndutịm nditre akama-nsobo edikpu oro Adam okokpude edi edinyụn̄ odude ke n̄kemuyo ye unenikpe ye edinen ido, emi enye edide ọyọhọ ye akakan andiwụt edu emi. Enye anam emi ebe ke “akpa mmọn̄ uwem.” Ebede ke emi, enye eyefiak ayak mfọnmma uwem owo ọnọ okopitem ubonowo, emi ẹkebọde mmọ unen ndisan̄a nsịm Ntọn̄ọ uwem esie. Ke Tọsịn Isua Ukara Jesus Christ ke akpa emi ediwet ke ọyọhọ idaha esie. Ntre ke ofụri Tọsịn Isua Ukara Christ oro, mme owo, ẹsịnede mmọ oro ẹnamde ẹset ke n̄kpa, ana ẹn̄wọn̄ mmọn̄ “akpa mmọn̄ uwem” oro.​—Men Ezekiel 47:1-10; Utom 24:15 domo.

7. Ke ewe isọn̄ ntak ke ẹnam ndutịm ẹnọ “mmọn̄” ndidu?

7 Jehovah adara uwem esie, enye n̄ko adara ndinọ ndusụk edibotn̄kpọ esie ifet edidu ọniọn̄ ọniọn̄ uwem. Uwa ufak Jesus edi isọn̄ ọnọ ọnọ-uwem ndutịm oro Jehovah anamde. (Mark 10:45; 1 Joh’n 4:9, 10) Se ibuanade n̄ko edi ikọ Abasi, emi Bible ndusụk ini okotde “mmọn̄.” (Ephesus 5:26) Jehovah Abasi enen ndidọhọ edibotn̄kpọ edide owo, ẹmi ẹtabade akpa ndutịm oro Abasi akanamde ọnọ akpa mfọnmma owo iba oro, Adam ye Eve, ete, “Di.”

Otu N̄wanndọ Ọnọ Ikot Ete, “Di”

8. Mmanie, ndien ini ewe ke ẹkebemiso enọ “mmọn̄” emi?

8 Akpa mbon oro ẹnọde ikot ete ‘ẹdi’ edi mbon oro ẹnamde ndamban̄a n̄wanndọ Eyenerọn̄, kpa akpa Eyen Jehovah eke spirit. (Ediyarade 14:1, 3, 4; 21:9) N̄wanndọ Christ eke spirit idọhọke idemesie ikpọn̄îkpọn̄ ite, “Di,” oro edi, mbon oro Jehovah mîtan̄ke kan̄a ibok nte ubak otu n̄wanndọ man anam owo 144,000 okopidem. Ẹnam mme ikọ ikot oro atara osịm mme owo oro ẹdoride enyịn ndinyene mfọnmma uwem eke owo ke isọn̄ ke Armageddon ebede. (Ediyarade 16:14, 16) Ke utịt editịm n̄kpọ emi, toto ke 1914, nnyịn imokop nte “n̄wanndọ” anamde ikot oro atara ke edidianakiet ye edisana spirit Abasi.

9. Nnyịn isan̄a didie ifiọk ite ke enye idụhe inọ sụk ekpri otu mme owo?

9 Ke edide n̄kpọ inemesịt, akpatre n̄wed Bible owụt ete ke ‘akwa otuowo, eke baba owo kiet mîkemeke ndibat,’ ẹyenam n̄kpọ ẹban̄a ikot editan̄a eti mbụk Obio Ubọn̄ Abasi ẹyenyụn̄ ẹsọn̄ọ ẹsịn idemmọ ke n̄kan̄ ubọn̄ ubọn̄ ukara oro. (Ediyarade 7:9, 10, 16, 17) Nte afo edi kiet ke otu akwa otuowo oro? Do, yak “owo eke onyụn̄ okopde, ọdọhọ ete, Di.”

Spirit ye N̄wanndọ Ẹdọhọ Ẹte, “Di”

10. Anaedi ndamban̄a mmọn̄ emi asiaha oto m̀mọ̀n̄, ndian ntak-a?

10 Edi ntak emi owo mîsiakke Abasi ye ndamban̄a Ebendọ ke Ediyarade 22:17? Akpa, fiọk ete ke ufan̄ikọ emi itịn̄ke m̀mê ke ndausụn̄ anie ke spirit emi anam utom. Edi, editịn̄ oro ẹtịn̄de ẹtụk spirit ada ekikere nnyịn aka ebịne Jehovah Abasi ke idemesie. Owo isioho Ete ifep ke n̄kpọ emi, sia enye akam edide Andinyene edisana spirit. Ọyọhọ iba, Eyen adiana kiet ọyọhọ ọyọhọ ye Ete esie, nte enye ke idemesie ọdọhọde ete: “Eyen ikemeke ndinam baba n̄kpọ kiet ke idemesie, ke mîbọhọke se okụtde nte Ete anamde; koro n̄kpọ ekededi eke Ete anamde, kpa oro n̄ko ke Eyen onyụn̄ etiene anam.” (John 5:19) Akande oro, ke adan̄aemi ikot emi edide ikọ eke odudu spirit emi ọwọrọde oto Jehovah Abasi ofụri ofụri, mme owo ẹkeme ndibọ ndausụn̄ otode Abasi, m̀mê ‘ikọ odudu spirit,’ ebe ke Jesus Christ, kpa “Ikọ.” (Ediyarade 22:6; n̄ko Edi 22:17, Reference Bible, ikọ idakisọn̄; John 1:1) Nte odotde, ndien, nnyịn imabuan Christ, kpa Ebendọ ye ikot emi. Ih, nnyịn imekeme ndinịm ke akpanikọ nte ke Jehovah Abasi, Ete Ebendọ, ye Jesus Christ, Ebendọ, ẹdiana ye “n̄wanndọ” ebe ke edisana spirit ndidọhọ ẹte, “Di.”

11, 12. (a) Nso ntọn̄ọ ntọn̄ọ uyarade ikowụt nte ke ẹyetat ikot edin̄wọn̄ mmọn̄? (b) Didie ke n̄kpọ okotịm an̄wan̄a ke mme isua ẹmi ẹkebede?

11 Ke ediwak isua ikot emi ẹnọde ẹte ‘ẹdi’ amaka anyan osịm mbon oro ẹkopde nsatitọn̄ “mmọn̄ uwem.” Idem ko ke edem ke 1918, otu n̄wanndọ ama ọtọn̄ọ ndikwọrọ etop oro akpan akpan abuanade mbon oro ẹdidude uwem ke isọn̄. Emi ekedi utịn̄ikọ an̄wa oro ọkọdọhọde “Ediwak Million Owo Oro Ẹdude Uwem Idahaemi Idikpaha ke Nsinsi.” Emi ama ọnọ idotenyịn nte ke ediwak owo ẹyebọhọ Armageddon ẹnyụn̄ ẹnyene nsinsi uwem ke oro ebede ke paradise isọn̄ ke idak Obio Ubọn̄ Messiah Abasi. Edi etop oro ikenen̄ekede iwụt usụn̄ edinyene ifet ubọhọ emi, ke mîbọhọke edinen ido ke ofụri ofụri.

12 Man ẹkpesịm ediwak owo efen efen ye ikot oro, “Di,” ke 1922 etop ama ọwọrọ okosịm kpukpru mmọ oro ẹnyenede udọn̄ ndinam n̄kpọ Abasi ete: “Etan̄a Edidem ye Obio Ubọn̄.” Ke 1923 otu n̄wanndọ ama edifiọk ete ke “erọn̄” ye “ebot” eke n̄ke Jesus ke Matthew 25:31-46 ẹwụt idem mbemiso Armageddon. Ekem, ke 1929, Enyọn̄-Ukpeme (Ikọmbakara) eke March 15 ama akama ibuotikọ oro “Idara Idara Ikot.” Itien̄wed ibuotikọ esie ekedi Ediyarade 22:17, ndien enye ama osio owụt mbiomo oro otu n̄wanndọ enyenede ndinam ikot oro, “Di,” atara.​—Mme page 87-89.a

Mme Erọn̄ En̄wen Ẹdiana ke Ndidọhọ Ẹte, “Di”

13, 14. Ke iduọk isua 1930, nso n̄kaiso edinam an̄wan̄a ke ẹkenọ nte ke mbon en̄wen ẹyen̄wọn̄ ndamban̄a mmọn̄ emi?

13 Akande oro, ke edem ko ke 1932, Enyọn̄-Ukpeme (Ikọmbakara) ama anyan ubọk owụt mbiomo “mme erọn̄ en̄wen,” ke ifet mmọ, ndidọhọ ete, “Di.” (John 10:16) Ke nsiondi eke August 1, page 232, ikpehe ekikere 29 ọkọdọhọ ete: “Mme Ntiense Jehovah idaha emi ẹnyene ifịk ebietde eke Jehu ndien mmọ ẹkpenyene ndisịn udọn̄ nnọ otu Jehonadab [mme erọn̄ en̄wen] ndidiana ye mmọ nnyụn̄ nnyene udeme ke nditan̄a nnọ mmọ en̄wen nte ke Obio Ubọn̄ Abasi ekpere.” Ekem, ke ama okokot oto Ediyarade 22:17, ikpehe ekikere oro ama ọdọhọ ete: “Yak mbon oro ẹyetde aran ẹsịn udọn̄ ẹnọ kpukpru mmọ oro ẹdinyenede udeme ke ndikwọrọ eti mbụk Obio Ubọn̄. Mmọ inyeneke ndidi ikọt Ọbọn̄ oro ẹyetde aran man ẹtan̄a etop Ọbọn̄. Edi akwa n̄kpọ ndọn̄esịt ọnọ Mme Ntiense Jehovah ndifiọk idahaemi nte ke ẹnyịme mmọ ẹmen mmọn̄ uwem ẹsọk otu mbon oro ẹdimende ẹbe Armageddon ẹdinyụn̄ ẹnọde nsinsi uwem ke isọn̄ ke ntak uwak nti ido Jehovah.”b

14 Ọtọn̄ọde ke 1934 kaiso, nsụhọ oro ẹyetde aran ẹma ẹsio ẹwụt nte ke mme erọn̄ en̄wen ẹmi ẹnyene ndinam uyakidem mmọ nnọ Abasi kemi nnyụn̄ nyarade uyakidem emi ke mmọn̄ baptism ndien ekem ẹdiana ye otu n̄wanndọ ke ndidọhọ mmọ eken oro ẹkopde nsatitọn̄ ẹte, “Di.” Ntem, akpan ikot ama odu kemi, oro otu n̄wanndọ akasuande ndida ntan̄ mme erọn̄ en̄wen oro ẹkopde nsatitọn̄ mbok ke “otuerọn̄ kiet” ke idak “ekpemerọn̄ kiet,” Jesus Christ. (John 10:16) Ke 1935 nsụhọ oro ẹyetde aran ẹma ẹdara ndikop ke mbono mmọ eke isua oro nte ke otu mbon mbieterọn̄ oro mmọ ẹkedọhọde ẹte, “Di,” ekenen̄ede edi “akwa otuowo” eke Ediyarade 7:9-17. Emi ama esịn akwa odudu ke utom unọ ikot.

15. Didie ke “spirit” akabuana ke ikot oro, “Di”?

15 Ke ndidọhọ ete, “Di,” otu n̄wanndọ okodu ke n̄kemuyo ye spirit Abasi. Ebede ke spirit esie ndisiak se mme prọfesi eke ediwewet Ikọ esie ọwọrọde, enye ama anam nsụhọ otu n̄wanndọ atat ikot oro. Ekewet mme prọfesi ẹmi ikot mmọ ọkọkọn̄ọde ke odudu spirit Abasi. Ntem, ke nditịm ntịn̄, ekedi spirit Abasi oro ọfiọrọde ebe ke Jesus Christ ye n̄wanndọ esie ọkọdọhọ akwa otuowo mbon mbieterọn̄ ete, “Di.”​—Ediyarade 19:10.

16. Didie ke spirit ye n̄wanndọ ẹdiana kiet ke ikot oro mfịn?

16 Tutu osịm mfịn emi spirit ye n̄wanndọ, emi nsụhọ adade ke ibuot mmọ, ke akaiso ndidọhọ, ete, “Di.” Nsụhọ ẹdọhọ mme erọn̄ en̄wen ẹmi ẹte ẹsụk ẹkot mme owo efen efen ẹte, ‘edi.’ Mmọ inyeneke ndimụm “mmọn̄ uwem” oro odude mfịn, nnịm nnọ idemmọ. Ana mmọ ẹnam ewụhọ oro “spirit ye n̄wanndọ” ẹnọde, oro edi: “Owo eke onyụn̄ okopde, yak enye ọdọhọ ete, Di.” Ana kpukpru mbon oro ẹbịtde nsatitọn̄ mmọ ẹsuan ikot oro. Ana mmọ ẹtat enye osịm kpukpru owo ikereke iban̄a orụk, idụt, usem, m̀mê ido ukpono mmọ eke idahaemi​—kpukpru owo ke kpukpru ebiet! Se ẹnyenede ẹto “mmọn̄ uwem” oro idahaemi edi se Mme Ntiense Jehovah ẹkotde ẹnyụn̄ ẹn̄wamde mme owo ndibọ, ke ikpikpu!

17. Nso orụk “mmọn̄” idu mfịn?

17 Ke ofụri ererimbot, Eyenerọn̄, Jesus Christ, ke akpanikọ ke ada akwa otuowo aka “ke idịm mmọn̄ uwem.” (Ediyarade 7:17) Emi idịghe mmọn̄ oro ẹsabarede, edi edi nsasana, mbịtmbịt, eti mmọn̄ oro ọwọrọde oto Enyịnidịm esie. Ndamban̄a mmọn̄ emi ẹwọrọ se ikponde ikan ikpîkpu mmọn̄ ke usụn̄ifiọk eke ifiọk akpanikọ Bible; mmọ ẹda ẹban̄a kpukpru ndutịm oro Abasi anamde ebe ke Jesus Christ oro ẹtọn̄ọde idem idahaemi nditịm akwa otuowo idem ndisan̄a ke afan̄usụn̄ oro adade osịm edinyene mfọnmma nsinsi uwem ke inemesịt.

Buana Idahaemi ke Nditan̄a

18. Ikot oro atara adan̄a didie ke eyo nnyịn?

18 Idahaemi, ibat akwa otuowo emi ọmọdọk osịm ediwak million. Mmọ ifịk ifịk ke ẹkaiso nditan̄a eti mbụk Obio Ubọn̄ ke ofụri ikpehe isọn̄. Mmọ kpukpru ini ẹsitọt ibatutom an̄wautom mmọ ke ndikwọrọ eti mbụk Obio Ubọn̄, emi idahaemi ẹnamde ke idụt 212. Nte ini osụhọde ọnọ akani editịm n̄kpọ emi ayakde, ikot oro eyekaiso nte ekemde ye ime ye anyanime Jehovah Abasi, kpa Akwa Ekpeme-ini. Enye Eyefiọk adan̄aemi ini ekemde ye ke adan̄aemi edide akpatre idaha ọnọ enye ndinam kpukpru owo ẹdiọn̄ọ ẹban̄a idemesie nte Jehovah, kpa nte enye ọkọwọn̄ọde ndinam nte ekemde ye ikọ prọfesi ẹmi ẹtịn̄de ke Bible ndien ndien.​—Ezekiel 36:23; 38:21-23; 39:7.

19. Ntak emi ikemede ndidọhọ nte ke ẹnọ “mmọn̄” emi ke mfọn-ọ?

19 Ke adan̄aemi ini osụk odude, ke ntre, mbon akwa otuowo ke idara ẹdiana ye nsụhọ otu n̄wanndọ ke ndidọhọ ẹte: “Edi edibọ mmọn̄ uwem ke ikpîkpu.” Mme anditan̄a anyan̄a-uwem eti mbụk emi ẹnam editan̄a emi ke mfọn, ibọhọ okụkutom oro mmọ ẹnamde nte mmọ ẹsuande etop Obio Ubọn̄ ke ofụri ererimbot.

20. Nso ididi utịp sia “mmọn̄” emi odude?

20 Mmọn̄ uwem oro idahaemi akanade ofụri ererimbot, man mbon oro ẹyomde ndin̄wọn̄ ẹkpenam ntre ẹnyụn̄ ẹkop uyụhọ ọyọhọ ọyọhọ ye anyan̄a-uwem utịp. Ubonowo oro ẹnyan̄ade ẹyedara anana-utịt uwem ke ini isọn̄ emi, emi ẹdinamde akabade edi paradise ọyọhọde eti uduak Jehovah. Andibot nnyịn ikanamke isọn̄ ke ikpîkpu, edi man edi in̄wan̄ Eden oro atarade osịm ofụri ererimbot, m̀mê in̄wan̄ inemesịt, emi mfọnmma edibotn̄kpọ edide owo ke mbiet Abasi ẹdụn̄de.

21. Didie ke ediyọhọ uduak Abasi kaban̄a isọn̄?

21 Ke akpanikọ, edidi akwa ifet ye idara oro inua mîkemeke nditịn̄ ndidu ke utọ obufa ererimbot oro! Adan̄aoro ewụhọ oro Abasi ọkọnọde akpa owo iba oro ke Genesis 1:27, 28 eyesu ọyọhọ ọyọhọ. Ekọm enyene ọniọn̄ ọniọn̄ usụn̄ oro Jehovah esede aban̄a afanikọn̄ oro okosịmde ekpụk ubonowo, eyekan isọn̄ ke udomo oro edikabarede edi paradise edinyụn̄ ọyọhọde ye mfọnmma orụk owo. Ih, Abasi eyekụt kpukpru n̄kpọ oro enye akanamde, ndien, sese, enye eyefọn etieti. Nte afo eyedu do? Ke edide ntre, do ana afo idahaemi ye esịtekọm ọtọn̄ọ ndin̄wọn̄ mmọn̄ uwem ke ikpîkpu. “Di” nnyụn̄ ndin̄wọn̄ yụhọ nnyụn̄ bịt itọn̄ ke mmọn̄ uwem oro idahaemi ama ọkọtọn̄ọ ndifiọrọ emi edinyụn̄ ọfiọrọde ọyọhọ ọyọhọ ke Tọsịn Isua Ukara oro edide. Ndien yak owo eke onyụn̄ okopde inem ikot emi ọdọhọ ete: “Di.”

[Mme Ikọ Idakisọn̄]

a Ke otu mme n̄kpọ eken, ibuotikọ emi ọkọdọhọ ete: “Akananam unọ ikọ ntiense akpanikọ itarake nte eke isua ifan̄ ẹmi ẹkebede. . . . Nsụhọ ẹda etop idatesịt ẹsọk mmọ, ẹnyụn̄ ẹdọhọ mmọ ẹte: ‘Owo ekededi oro amade, yak enye ọbọ mmọn̄ uwem ke ikpîkpu.’ Ẹma ẹsian mmọ nte ke ana mmọ ẹda idaha mmọ idahaemi ke n̄kan̄ Ọbọn̄, ẹnyụn̄ ẹn̄wana ye Devil, ndien ẹbọ edidiọn̄. Nte idịghe utọ otu mme owo oro ẹkeme ndiyom sụn̄sụn̄ ido ye edinen ido idahaemi, ẹnyụn̄ ẹdi se ẹdịpde ke usen iyatesịt esie, ẹnyụn̄ ẹmen ẹbe akwa ekọn̄ Armageddon ẹnyụn̄ ẹdu uwem ke nsinsi ye unana edikpa? (Zeph. 2:3) . . . Otu anam-akpanikọ nsụhọ adiana ke idara idara ikot oro onyụn̄ ọdọhọ ete: ‘Di.’ Enyene nditan̄a etop emi nnọ mbon oro ẹnyenede udọn̄ ẹnọ edinen ido ye akpanikọ. Ana ẹnam enye idahaemi.”

b Enyọn̄-Ukpeme (Ikọmbakara) eke August 15, 1934, n̄ko ama etịn̄ otụk mbiomo eke mme erọn̄ en̄wen onyụn̄ ọdọhọ ke page 249, ikpehe ekikere 31 ete: “Otu Jonadab edi mbon oro ‘ẹkopde’ etop akpanikọ oro onyụn̄ anade edọhọ mmọ en̄wen ke utọn̄ mmọ ete: ‘Di. Ndien yak owo eke okopde ọdọhọ ete, Di. Owo eke itọn̄ asatde yak enye edi. Owo eke amade, yak edi edibọ mmọn̄ uwem ke ikpîkpu.’ (Edi. 22:17) Ana mbon oro edide otu Jonadab ẹsan̄a ye mbon oro ẹdide ndamban̄a otu Jehu, oro edi, mbon oro ẹyetde aran, ẹnyụn̄ ẹtan̄a etop obio ubọn̄ oro, okposụkedi mmọ mîdịghe mme ntiense Jehovah oro ẹyetde aran.”

Didie ke Afo Ọkpọbọrọ?

◻ Ewe “mmọn̄” ke ẹtịn̄ ẹban̄a ke Ediyarade 22:17?

◻ Nso idi ntọn̄ọ “mmọn̄” oro?

◻ Ntak ẹyomde “mmọn̄” oro, ndien ini ewe kpọt ke enye ọkọtọn̄ọ ndifiọrọ?

◻ Ke utịn̄ikọ nnyịn, nso ke editịn̄ ntụk “spirit” owụt, ndien didie ke “n̄wanndọ” abuana?

◻ Mmanie ẹkeme ndin̄wọn̄ “mmọn̄” oro, ndien ye nso utịp?

    Mme N̄wed Ikọ Efịk (1982-2025)
    Wọrọ
    Dụk
    • Efịk
    • Share
    • Mek nte amade
    • Copyright © 2025 Watch Tower Bible and Tract Society of Pennsylvania
    • Nte Ẹkpedade Ikpehe Intanet Emi Ẹnam N̄kpọ
    • Ediomi
    • Privacy Settings
    • JW.ORG
    • Dụk
    Share