Ntọt M’ọkwọrọ Obio Ubọn̄
Akpanikọ Bible Amakan Ido Edinam
ẸKEME ndisọn̄ọ n̄wụk ido edinam ido ukpono. Ediwak million owo ẹkere ke akwan̄a owo ndikpụhọ ido ukpono esie. Saul, emi akakabarede edi apostle Paul, nte an̄wan̄ade ama enyene ukem ekikere oro, sia enye ọkọdọhọde ete: ‘Mma mfiop esịt etieti ndikpeme mme item mme ete mi n̄kan ediwak n̄ka mi.’ Edi ke ẹma ẹkewụt enye akpanikọ, enye ama okpụhọ ido ukpono Jew onyụn̄ akabade edi Christan. (Galatia 1:13-16) Ediwak owo mfịn ẹma ẹdifiọk ẹte ke akpanikọ Bible oto ebiet oro okon̄de akan eke item owo. Tịmfiọk nte akpanikọ Bible akakande ke Italy.
N̄wan kiet anam an̄wan̄a ete: “Ami ye eyeneka mi an̄wan ikọkọri iwọrọ owo ke akwa ubon emi mme ido edinam Catholic ẹnyene orụn̄ ke ata anyanini, nnyịn ikonyụn̄ idi mbon Catholic oro isịnde ifịk etieti. Nte ini akade, mma ndọ ndọ. ekem ebe mi ama akpa, ndien ami mma ndu ikpọn̄ nte ebeakpa ke ediwak isua ye nditọ mi. Eyen eyeneka mi edide n̄wan ekekpep ukpepn̄kpọ ido ukpono (catechism) ndien enye ama esiyịre ndibụp oku mme mbụme ẹtode Bible, edi ikọbọhọ ibọrọ oro ọnọde uyụhọ ndomokiet.
“Ke adan̄aemi n̄kakade obio emana mi, mma nsobo ye Mme Ntiense Jehovah ke akpa ini nnyụn nyịme ukpepn̄kpọ Bible. Kpukpru n̄kani ufan Catholic mi ẹma esak mi nsahi ke ndikpep Bible. Nte ededi, idem ikememke mi. Mma nyene Bible ke akpa ini, ndien baba owo kiet ikekeme ndibọ mi enye. Eyeneka mi an̄wan n̄ko ama ada idaha esie ọnọ Jehovah, ndien ke mîyọhọke isua iba, nnyịn mbiba ima ina baptism.
“Ami mma ntua eyet ke akpa ini oro n̄kọkpọn̄de ufọkederi koro n̄kokopde ndịk ndikpọn̄ mme ido edinam oro ẹma ẹkesịọn̄ọ ẹbụhọ mi ke idem ke isua 76. Edi idahaemi ami mmokop idatesịt ndisan̄a ke usụn̄ Jehovah nnyụn̄ nnam ukeme mi ndin̄wam mbon en̄wen ẹwọn̄ọ ke ekịm eke spirit!”—Men 1 Peter 2:9 domo.
Afatidet Enen̄ede Ukwan̄ Ekikere
Afatidet kiet ke Japan ama esima ndineme mban̄a mme demon ye UFO (Unidentified Flying Objects) [Mme N̄kpọ Ẹfede ke Enyọn̄ Ẹmi Owo Mîfiọkke] ke adan̄aemi esifatde idet mbon urua esie. Nte ededi, ke ama ọkọtọn̄ọ ndikpep Bible, enye ama edikụt adan̄a nte edinam oro ọdiọkde. Ntem utu ke oro enye ama esinọ mbonurua esie ikot ndibuana ye enye ke ukpepn̄kpọ Bible esie. Enye ama esinọ n̄kparawa mbonurua esie ikọ ntiense aban̄a edibotn̄kpọ. Kpukpru urua enye ama esitobo mme Bible ye ediwak n̄wed Afo Emekeme Ndidu Uwem ke Nsinsi ke Paradise ke Isọn̄ oto Ntiense emi ekesikpepde n̄kpọ ye enye man okponịm mmọ ye mbonurua esie.
Okposụk edi mîdịghe Ntiense kan̄a, enye ama onịm se iwakde ibe nsio nsio Bible 30 ye n̄wed Ndidu Uwem ke akpa isua ukpepn̄kpọ esie. Mme owo ẹwakde ebe 25 ẹma ẹtọn̄ọ ndikpep Bible nte utịp ikọ ntiense ido nneme esie. Ndusụk ini mme owo ẹwakde ẹsịm duop ẹsibuana ke otu ukpepn̄kpọ Bible esie. Idahaemi itiaba ke otu mbon oro enye ọkọnọde ikọ ntiense ke adan̄aemi ọdiọn̄de mmọ idet ẹma ẹnen̄ede ukwan̄ ekikere mmọ ẹnyụn̄ ẹdi Mme Ntiense Jehovah oro ẹnade baptism!