Edisana Usem Adian Akwa Otu Mme Andituak Ibuot Ọtọkiet
EDISANA usem oro Abasi ọnọde edi odudu ọnọ edidianakiet Christian. Uyarade aban̄ade oro ama ana in̄wan̄în̄wan̄ ọnọ kpukpru owo oro ẹkedụkde mbono Mme Ntiense Jehovah emi ẹkenịmde ke West Berlin ọtọn̄ọde ke Tuesday osịm Friday, July 24 osịm 27, 1990, sia Mme Ntiense ẹtode nsio nsio idụt 64 ẹma ẹdu do.
Ke ini ẹkenịmde Mbono District “Uten̄e Abasi” ke Poland ke ndaeyo eke 1989, ediwak tọsịn mme andidụk ẹketo Russia ye Czechoslovakia, edi owo ikie ifan̄ kpọt ẹketo East Germany. Idaha ererimbot okpụhọde ke n̄kan̄ ukaraidem didie ntem toto ke ini oro! Isan̄ enyeemi, n̄kpọ nte mme andidụk 30,000 ẹtode East Germany ẹma ẹsop idem ye Mme Ntiense ke Olympia Stadium ke West Berlin. Mbono oro ekedi n̄wọrọnda ke otu ediwak ikie oro ẹkenịmde ke mme ikpehe ererimbot eken, ofụri ofụri ke Thursday osịm Sunday.
Ke ntọn̄ọ ikọ ekọm esie ke Tuesday, etieibuot okpokoro ama obụk ufọn oro mme mbono akanamde ọtọn̄ọde ke 1919 ke ndin̄wam Mme Ntiense Jehovah ndinam n̄kọri ke ndisem edisana usem. Mbono emi ukem ntre eyen̄wam kpukpru owo oro ẹdụkde ndikọri ke ukeme mmọ ndisem edisana usem nnyụn̄ nda enye ndu uwem. Enye ama eti mme andidụk nte ke ebede ke ukamaidem ye edu mmọ, ikọt Jehovah ẹsiwụt n̄kọri oro mmọ ẹnamde ke ndisem edisana usem.
“Edisana Usem Oro Ẹnọde Kpukpru Idụt”
Nte odotde, utịn̄ikọ ibuotikọ mbono akakama ibuotikọ isụk isiakde mi. Enye ọkọkọn̄ọ ke Zephaniah 3:9, ke ebiet emi Abasi ọkọn̄wọn̄ọde ete: “Ke ini oro nyekabade edisana n̄kpọkinua [“usem,” NW] nnọ mme idụt: man kpukpru mmọ ẹkot enyịn̄ Jehovah, man ẹnam n̄kpọ ẹnọ enye ke esịt kiet.” Edisana usem abuana nnennen ifiọk ye esịtekọm ke akpanikọ aban̄ade Abasi ye mme uduak esie. Jehovah ikpọn̄îkpọn̄ ekeme ndinọ emi ebe ke edisana spirit esie. Ima oro ẹnyenede ẹnọ akpanikọ enyene ndinụk owo ndikpep edisana usem, emi ọbọhọde kpukpru ndek ndek ido uwem.
Adianade do, ndisem edisana usem idịghe sụk n̄kpọ edidiọn̄ọ akpan usem kiet. Utu ke oro, ana usụn̄ uwem nnyịn odu ke n̄kemuyo ye se iwọrọde nnyịn ke n̄kpọkinua. Ke akpanikọ, uyoikọ nnyịn, nte inịmde iso itịn̄ ikọ, ye edida idem ntịn̄ ikọ edi n̄ko akpan n̄kpọ, koro mmọ ẹwụtde se nnyịn idide ke esịt esịt. Man isan̄a ikpat kiet ye ntatara edisana usem emi, ana nnyịn inyene ndutịm ukpepn̄kpọ oro enyenede iwụk inyụn̄ idụk kpukpru ukpepn̄kpọ esop ofụri ini.
Ndikpep Edisana Usem
Nte utịn̄ikọ kiet ke uwemeyo Tuesday okowụtde, ndikpep edisana usem ọwọrọ “Ndikọri ke Mme Akpan Ukpepn̄kpọ Nsịm Ọyọhọ Idaha.” N̄kọri edi akpan n̄kpọ edieke anade nnyịn ikaiso ndikọri ke n̄kan̄ eke spirit. Oro ọwọrọ ndibọ ufọn nto kpukpru enọ kaban̄a n̄kọri eke spirit nnyụn̄ nda mme edumbet Bible nsịn ke edinam kpukpru usen.
Man ikabade idi nta ke ndisem edisana usem, nnyịn inyene “Ndidi Se Jehovah Ọnọde Ukpep,” kpa ibuotikọ nneme ke usenubọk Thursday. Akpa etịn̄ikọ ama owụt ‘Nte Jesus Ọkọnọde Uwụtn̄kpọ’ aban̄a emi. Nte ke Jehovah ama ọnọ Jesus ukpep ama ana in̄wan̄în̄wan̄ ke mme ikọ ye edinam esie. Ntre nnyịn iyom ndikpebe enye ke nte enye ekekpepde owo n̄kpọ. Ndien nte Jesus okosụkde idem ọnọ uduak Ete esie kpukpru ini, ntre ke ana nnyịn inam.
Mme etịn̄ikọ ita ẹtienede ẹma ẹwụt nte Jehovah ọnọde ukpep ebe ke mme mbonoesop ye mme mbono. Nnyịn imọbọ ufọn ito ofụri ukpepn̄kpọ esop mbition ikponyụn̄ inaha ifụmi ndomokiet ke otu mmọ. Mbonoesop kiet kiet edi akpan n̄kpọ ọnọ n̄kọri eke spirit nnyịn. Jehovah n̄ko esinọ nnyịn ukpep ebe ke mbono circuit, mbono district, ye ndutịm akpan usen mbono nnyịn. Man ibọ ufọn ito kpukpru ẹmi, ana nnyịn inen̄ede inọ n̄kpan̄uton̄, ndien ekem imen se ikpepde isịn ke edinam.
Utịn̄ikọ oro “Ndiwa Idem Nnọ Ọkpọ Ọkpọ Ukpepn̄kpọ” eketiene nneme emi. Man inyene ini inọ emi, ana nnyịn inam item odude ke Ephesus 5:15, 16 ke ndidedep ifet nsio ke mme n̄kpọ oro mîdịghe akpan n̄kpọ.
Mbufiọk mbufiọk utịtmbuba emi nnyịn ikpepde edisana usem edi uyakidem ye baptism. Ẹma ẹsio akpanikọ emi ẹwụt ke utịn̄ikọ oro “Baptism Mbon Oro Ẹkpepde Edisana Usem.” Usem emi ke ada ediwak owo usụn̄ aka uyakidem ye baptism. Nte ededi, ana owo ke oro ebede akaiso nditiene uwụtn̄kpọ Jesus ke ndikwọrọ eti mbụk ifịk ifịk, emende obufa edu esịne, onyụn̄ adianarede ọkpọn̄ ererimbot.
Ọkpọsọn̄ Udia eke Spirit
Mme odụk mbono ẹma ẹkop inemesịt n̄ko ke ndibọ ọkpọsọn̄ udia eke spirit oro ọkọkọn̄ọde ke edisu mme ntịn̄nịm uwụtn̄kpọ. Ke uwemeyo Thursday, utịn̄ikọ iba ẹkekọn̄ọ ke mme ibuotikọ ẹkesiode ẹto prọfesi Ezekiel. Akpa, “Chariot Jehovah eke Enyọn̄ ke Anam Isan̄,” anamde an̄wan̄a akwa, ubọn̄ ubọn̄, enyene-uten̄e n̄kpọisan̄ eke enyọn̄ oro ọsọpde nte emịnen̄mịnen̄. Enye ada aban̄a esop Jehovah eke heaven, emi Abasi awatde ke oro enye ima ima ọnọde ndausụn̄ ke kpukpru isan̄ esie, adade enye ke ndinam mme uduak esie. Ezekiel akada aban̄a nsụhọ oro ẹyetde aran ke spirit, akpan akpan ọtọn̄ọde ke 1919. Akpan akpan ọtọn̄ọde ke 1935, “akwa otuowo” ẹma ẹdiana ye mmọ.—Ediyarade 7:9.
Utịn̄ikọ oro eketienede ọkọdọhọ “Ẹsan̄a Ikpat Kiet ye Esop Oro Ẹkụtde ke Enyịn.” Mbụme idụhe nte ke esop Abasi oro ẹkụtde ke enyịn asan̄a ikpat kiet ye esop mbiet chariot eke enyọn̄ esie. Nte Ezekiel akanamde, ana mme asan̄autom Jehovah mfịn ke n̄kopitem ẹkaiso ke ntịn̄nịm utom mmọ kpa ye unana udọn̄, nsahi, m̀mê ukọbọ. Edisan̄a ikpat kiet ada osịm ediwak edidiọn̄ idahaemi ye nsinsi uwem ke obufa ererimbot Abasi oro asan̄ade ekpere usọp usọp.
Ke usenubọk Friday, ẹma ẹnọ ọkpọsọn̄ udia eke spirit n̄ko ebe ke utịn̄ikọ ita ẹmi ẹkekọn̄ọde ke Isaiah ibuot 28. Akpa ke otu mmọemi ama owụt ke ọkpọsọn̄ uyo nte ke mme akpa mmịn eke spirit Israel ye Judah eset ẹkeda ẹban̄a mme akpa mmịn eke spirit Christendom. Ndien nte akpa okosobode ubiomikpe Jehovah, ntre ke edidi ye mbon eke Christendom.
Utịn̄ikọ oro eketienede, emi ọkọdọhọde “Ebiet Ubọhọ Mmọ—Kpa Nsu!,” ama esịne ọkpọsọn̄ ntọt emi: Kpa nte Judah eset ndibuọt idem ke Egypt ekedide ikpîkpu ebiet ubọhọ, ntre ke ufan emi Christendom anamde ye odudu ukaraidem ke eyo nnyịn edidi. Ẹkewọn̄ọde ọyọhọ utịn̄ikọ ita ke Isaiah ibuot 28, “Ẹkaiso Nditọt Utịbe Edinam Jehovah,” ẹnọ ikọt Abasi. Ẹkot se Jehovah edinamde Christendom nte enende utịbe, koro enye edidide nte ọyọhọ n̄kpọ n̄kpaidem ọnọ enye. Mfịn, Jehovah edi anyanya ubọn̄ ọnọ ekpri otu mme Christian oro ẹyetde aran ye “mme erọn̄ en̄wen” ẹmi ẹwakde ẹbe owo million inan̄. (John 10:16) Etịn̄ikọ oro eketre ye ikọ nduaidem emi: “Ifịk, ubiere, ye edinam akpanikọ nnyịn akpakam otip n̄kpọ esịn ke nsinsi itoro ọkpọsọn̄ Abasi nnyịn, kpa Jehovah!”
Ndisem Edisana Usem Ọwọrọ Ndiwụt Ima Nditọete
Ke uwemeyo Wednesday ẹma ẹnam mme odụk mbono ẹfiọk nte ke mmọ ndisem edisana usem n̄ko ọwọrọ ‘Ndise Mban̄a Nditọakpa ye Mme Ebeakpa ke Ukụt Mmọ.’ Ẹkeme ndin̄wam nditọ ẹmi ete ẹkpade ẹkpọn̄ ke mmọ ndibọ ọkpọ ọkpọ ukpep. Nnyịn imekeme ndiwụt mme ebeakpa edikere mban̄a ke nti ikọ ndọn̄esịt, ke ndisịn mmọ ke mme edinam Christian nnyịn ye mme mboho otuowo, ye ke ndin̄wam mmọ ke n̄kan̄ eke ikpọkidem edieke mmọ ẹdotde ẹnyụn̄ ẹyomde un̄wam ke akpanikọ. Ndụn̄ọde ẹma ẹwụt nte ẹsinamde mme n̄kpọ ẹmi.
Ke uwemeyo Thursday, inem inem utịn̄ikọ efen ama owụt “Nte Mme Christian Ẹsede Ẹban̄a Kiet Eken.” Mme Ntiense Jehovah ẹnyene eti etop ẹban̄a edise mban̄a kiet eken, akpan akpan ke ini mme utọ unọmọ nte oyobio ye unyekisọn̄ ẹtịbede, ke ini oyomde ẹwet mme adaidaha, m̀mê ke ini mme udọn̄ n̄kann̄kụk ẹdude. Edi ke ini mfịna edemede ke ntak unana mfọnmma owo, akpana nnyịn ida edumbet abuanade ke item Jesus ke Matthew 5:23, 24 ye Mt 18:15-17 isịn ke edinam. Akpan akpan ke ini edide edisịm mme ndutịm mbubehe ke ufọt nditọete ke oyom ukpono edem mbiba odu ye edidu ke ukpeme mbak eteutom m̀mê eyenutom edinam n̄kpọ ibụk ibụk ke ntak ebuana eke spirit.
Ndisem Edisana Usem Ọwọrọ Ndikpeme Edu Nnyịn
Ẹma ẹsọn̄ọ ẹwụt ndien ndien ke oyom ikpeme edu nnyịn. Ntem, akpa etịn̄ikọ ke uwemeyo Tuesday ama eneme ke ibuotikọ oro “Ndikop Nnyụn̄ Nnam Ikọ Abasi.” Enye ama owụt ke odu akpan ntak iba emi akadade nnyịn edi mbono: ndibọ nnennen ifiọk nnyụn̄ ndi se ẹnụkde ndinam n̄kpọ mban̄a ifiọk oro.
Akpa utịn̄ikọ ke usenubọk Wednesday ama obụp mbụme ndụn̄ọde oro “Christ ‘[Ama] Asua Se Ikwan̄ade’—Nte Afo Amasua?” Ndima edinen ido ikemke. Nnyịn inyene n̄ko ndisua ukwan̄ido man inyene eti ubieresịt, imụm eti itie ebuana ye Jehovah ikama, itre ndimen esuene ndori ke enyịn̄ esie, inyụn̄ itre ndidọk mbun̄wụm ukwan̄ido—kpa mbiara ye n̄kpa.
Otịmde enyene ebuana ye ibuotikọ oro ekedi udiana utịn̄ikọ, oro ọkọdọhọde “Sịn Mme Ekikere Ererimbot, Bịne Mme Ata Idem N̄kpọ Obio Ubọn̄.” Satan, Eve, ye mme angel ẹmi ẹkeduọn̄ọde kpukpru ẹkebịne mme ekikere ẹmi ẹkedade iduọ mmọ ẹdi. Ekikere ererimbot, ẹmi ẹsịnede ekikere inyene obụkidem m̀mê mmọ oro ẹban̄ade ebuana idan̄ oro ibet mînyịmeke, ẹsisụn̄ọ ke unana inemesịt edieke mîdịghe akwa idiọkn̄kpọ n̄ko. Man ibiọn̄ọ ekikere emi, ana nnyịn ibịne mme ata idem n̄kpọ Obio Ubọn̄ ebe ke ukpepn̄kpọ, akam, edidụk mbonoesop, ye ediwọrọ an̄wautom.
Man idu eti uwem Christian, ana nnyịn n̄ko inam item oro ẹkenọde ke uwemeyo Wednesday ke utịn̄ikọ oro “Mme Christian—Ẹdu Uwem Nte Ekpat Okụk Mbufo Edide.” Ndikpu ndinam emi eyenyene ndiọi odudu ke n̄kan̄ eke obụk ye spirit. Usụn̄ owụtde ọniọn̄ edi ndisịbe ibụk ibụk udọn̄itọn̄ n̄kpọ oro owo enyenede ke nditre ndikama isọn oro owo mîyomke ye ke ndidiomi ndutịm ubiatokụk oro enyenede se ọwọrọde ndien ekem ẹsọn̄ọde ẹyịre ke enye. Oyom nnyịn ikọri uten̄e Abasi ofụri ini. Asan̄ade ye edikụt ke se inyenede ekem, emi edi usụn̄ akwa udori.—1 Timothy 6:6-8.
Ẹma ẹsio ufọn oro odude ke ndikpeme mme nsan̄a nnyịn ẹwụt ke utịn̄ikọ Tuesday oro “Ndi Mme Ufan Fo Edi Mme Ufan Jehovah?” Mme ufan nnyịn ẹkpedi mme Christian oro ẹma ẹkemen edu Christ ẹsịne ẹnyụn̄ ẹsịn ifịk ke utom ukwọrọikọ. Mme ufan ererimbot idịghe mme ufan Abasi, nnyịn inyụn̄ ikemeke ndidụk nsan̄a ye mmọ ye unana edinọ idem nnyịn unan. Idem ke esịt esop, ana nnyịn isasat edieke mme nsan̄a nnyịn ke akpanikọ anade edi se ibọpde-bọp.
Ẹma ẹsọn̄ọ item oro isụk inemede ikụre mi kaban̄a edu n̄n̄wan̄a n̄n̄wan̄a ke drama eyomfịn. Ẹkekot enye “Ndikan Mme N̄kari N̄kari Edinam Devil.”
Item Oro Edisana Usem Ọnọde Mme Ubon
Ẹyomde akamba akamba ekedi utịn̄ikọ Wednesday oro “Mme Ete ye Eka—Ẹbiom Mme Mbiomo Mbufo!” Ana mme ete ye eka ke idemmọ ẹdiọn̄ọ uduak Abasi ẹnyụn̄ ẹnam enye ke mfọnn̄kan ukeme mmọ. Ana mmọ n̄ko ẹkpep nditọ mmọ Ikọ Abasi. Akande oro, ndida nditọn̄wọn̄ n̄ka sụk mme mbonoesop Christian nnyụn̄ n̄wọrọ an̄wautom ikemke. Ana ekpep mmọ ndima Jehovah nnyụn̄ n̄kụt ata ọniọn̄ oro odude ke ndinam mme n̄kpọ Abasi.
Efen ekedi nneme ke “Ubon ke Eyo Nnyịn.” Akpa etịn̄ikọ ama owụt nte ke Abasi ọkọtọn̄ọ ubon. Mme ete ẹnyene ndineme n̄kpọ mfọn mfọn mban̄a mme n̄kpọ eke spirit. Mme eka ẹnyene ndidi nti mme akama ufọk, ndien nditọn̄wọn̄ ẹnyene ndiwụt ukpono nnọ Jehovah ke ndidiana kiet ye mme ete ye eka mmọ.
Etịn̄ikọ oro ẹtienede ama owụt nte ke ubon “Odu ke En̄wan ye Mme Asua.” Mme mfịghe ndutịm uforo ẹmeda afanikọn̄ mmọ ẹdi. Itieutom ọyọhọ ye mme idomo ndinam se idiọkde, ndien ndutịm usuanetop oro ẹwụtde ọyọhọ ye afai, idan̄ oro ibet mînyịmeke, ye edisịn udọn̄ nnọ uma-inyene. Unọitem ana ababak ọtọn̄ọ, onyụn̄ oyom akwa nsịnifịk man ẹkan mme odudu ererimbot. Ana ẹda mme n̄kpọutom oro ukara Abasi ọnọde ebe ke Watch Tower Society ẹnam n̄kpọ nte ọfọnde.
Utịn̄ikọ efen, emi aban̄ade ‘Edinyan̄a Ubon Nsịn ke Obufa Ererimbot,’ ama akaiso ndiwụt akwa mbiomo oro mme ete ye eka ẹnyenede. Ẹnyene ndinọ nditọ ukpep ye akwa nsịnifịk. Ẹma ẹnọ eti item ẹban̄a ukpepn̄kpọ Bible eke ubon ye se ẹkpekpepde, kpukpru ẹmi ye uduak ndisịm esịt nditọ. N̄kukụre ke ini oro ke mme ete ye eka ye nditọ ẹkeme ndidori enyịn ndidi se ẹnyan̄ade ẹsịn ke obufa ererimbot nte ubon.
Ọnọde eti item ke idaha eke ubon emi ediwak Ntiense ẹkụtde idemmọ ekedi utịn̄ikọ oro “Ndiyọ ke Ufọk oro Abaharede.” Ẹma ẹnọ mbon ẹmi ẹdude ke mme utọ idaha emi item ẹte ẹkûdedei ẹduọk idotenyịn nte ke enyeemi mînịmke ke akpanikọ mi ẹkeme ndikabade ndi andinịm ke akpanikọ usen kiet. Biat ini ye nsan̄andọ oro mînịmke ke akpanikọ nnyụn̄ kụt ete ke imodu uwem ekekem ye kpukpru se ẹyomde ẹto nsan̄andọ edide Christian. Afo emekeme ndinyene un̄wam nto mbiowo m̀mê iso-ọfọn mmọ en̄wen ẹmi ẹdude ke ufọk oro abaharede.
Ndisem Edisana Usem Nnọ Mmọ En̄wen
Otịmde odot, ẹma ẹnọ ekese ntịn̄enyịn ke nnyịn ndida mme ifet n̄kpep mmọ efen edisana usem. Ntem, ke usenubọk Wednesday mme odụk mbono ẹma ẹkop utịn̄ikọ oro “Da Ọsọn̄urua Ini Fo Nam N̄kpọ Ọniọn̄-Ọniọn̄.” Man inam oro nnyịn inyene ndinịm mme ebeiso n̄kpọ, ke ndidu ke n̄kemuyo ye Matthew 6:33, emi ọdọhọde ete: “Ẹkam ẹbemiso ẹyom Obio Ubọn̄ Esie ye edinen ido Esie.” Oro esịne edisio ini nnịm nnọ ọkpọ ọkpọ ukpepn̄kpọ Bible, edidụk kpukpru mbonoesop nnyụn̄ n̄wọrọ an̄wautom kpukpru ini. Emi oyom ete nnyịn idedep ifet isio ke mme edinam oro mîdịghe akpan n̄kpọ okposụkedi ẹnọde inemesịt. Ediwak ndụn̄ọde ẹma ẹwụt nte ndusụk owo ẹkenamde emi.
Inaha nnyịn idedei ifre ke nnyịn idi Mme Ntiense Jehovah. Ke uwemeyo Thursday, ediwak nnamn̄wụt ẹma ẹsio akpan n̄kpọ oro ẹwụt ke idak ibuotikọ oro “Ẹkaiso Ndisem Edisana Usem Kpukpru Ini.” Nnamn̄wụt ẹmi ẹma ẹwụt nte ẹkemede ndinam emi ke edinọ ikọ ntiense efak, ke edinọ ikọ ntiense ido nneme, ye ke ndikama urụk ukopikọ. Ima unana ibụk oro inyenede inọ Jehovah ye mbọhọidụn̄ nnyịn eyenụk nnyịn ndisem edisana usem ke kpukpru ifet.
Otịmde enyene ebuana ye ibuotikọ emi ekedi utịn̄ikọ oro eketienede, “Mme Edidiọn̄ Ẹnyenede Mbon Oro Mîkpaha Mba.” Ke edide ata isio ye Christendom edi esop unọ ukpep ofụri ererimbot eke Mme Ntiense Jehovah. Nte owo kiet kiet, nnyịn inyene ndin̄wana mbiọn̄ọ kpukpru mfịghe, utọ nte an̄wan̄wa ubiọn̄ọ, ntatara unana udọn̄, ye mme mfịna ndutịm uforo. Nnamn̄wụt ẹkọn̄ọde ke n̄wed Reasoning From the Scriptures ẹma ẹwụt nte ẹkemede ndikan mme mfịghe ẹmi.
Ẹsịnde udọn̄ n̄kọ ọnọ ifịk ifịk ukwọrọikọ ekedi drama a-Bible oro Ndinam Uduak Abasi ye Ifiopesịt. Enye ama owụt nte Jehu ekenyenede ifiopesịt ọnọ enyịn̄ Jehovah ye nte edide akpan n̄kpọ ọnọ nnyịn ndiwụt ukem uko ye ifiopesịt oro ke utom Abasi.
Mme N̄wed Ẹsiode ke Mbono
Odu n̄wọrọnda n̄wed iba ẹmi ẹkesiode ke usem Ikọmbakara ye usem German ke mbono oro. Ẹkeda akpa ke otu n̄wed ẹmi ẹdisịn ke ebuana ye utịn̄ikọ oro ọkọdọhọde “Ndida Iyịp Nnyan̄a Uwem Fo—Didie?” Etịn̄ikọ ekebemiso etịn̄ aban̄a mme n̄kpọndịk asan̄ade ye edikịm iyịp nsịn ke idem. Enye ama osio owụt ke ediwak n̄kpọ efen ẹdu ndida ke itie iyịp man ẹnyene iyịp oro ẹketabade. Edi Mme Ntiense Jehovah ẹbet iyịp idịghe koro enye mînọhọ nsọn̄idem, edi koro ndinyịme enye edi se mîsanake. Mmọ ẹbet, idịghe koro ẹkemede ndisabade iyịp, edi koro enye edide ọsọn̄urua n̄kpọ ọnọ Abasi. Iyịp oro ke akpanikọ anyan̄ade uwem edi iyịp ufak Jesus Christ. Ke ndiberi etịn̄ikọ ama anam kpukpru mme andikpan̄ utọn̄ nnọ enye ẹkop inemesịt ke ndiwụt ekpri n̄wed oro How Can Blood Save Your Life? (Didie ke Iyịp Ekeme Ndinyan̄a Uwem Fo?) emi enyenede page-32.
Ọsọn̄urua n̄wed ọyọhọ iba oro ẹkesiode ekedi ke ebuana ye utịn̄ikọ oro “Mbufo Ẹyom Jehovah.” Ke ofụri ofụri, mme owo iyomke Abasi. Ediwak nsio nsio ido ukpono ndidu owụt nte ẹnọde ediyom oro owo oyomde Abasi idiọk ndausụn̄ koro enye ofụmide Ikọ Abasi. Nte ẹkụtde ke mme ntọt Editi nnyịn ke isua kiet kiet, oyom ẹn̄wam ediwak million owo ndida idaha mmọ nnọ Jehovah. Isaiah 55:6, 7 owụt ke Jehovah ke akpanikọ edi ima ima ye enyene mbọm Abasi, odude ke mben̄eidem ‘ndiwak ndidahado.’ Nte Mme Ntiense esie, ẹma ẹnọ nnyịn edisana usem man nnyịn ikeme ndin̄wam mmọ efen ẹdiana ye nnyịn ke ndinam n̄kpọ Jehovah ke esịt kiet.
Mfịn, ikọt Jehovah ẹsak iso ẹse n̄kpọ-ata ke ntak emi uwak ibatowo ẹwọrọde idụn̄. Nte utịp, mme owo ke efakutom nnyịn ẹkeme ndidọhọ ke idi mbon kpukpru orụk ido ukpono. Man nnyịn ikeme ndin̄wam mbon Hindu, Buddha, Shinto, ye mbon oro ẹdude ke ediwak ido ukpono eken, N̄ka ọmọnọ ediye n̄wed oro Mankind’s Search for God (Ediyom oro Ubonowo Oyomde Abasi) emi enyenede page-384. Enye ke odudu ọmọnọ mme akpan ukpepn̄kpọ ikpọ ido ukpono oro ẹwọrọde ẹkpọn̄ Christendom. Edi enye n̄ko odụn̄ọde mbụk nsunsu ido ukpono ẹmi ẹdude ke Christendom. N̄wed emi ekeme ndiberede usụn̄ nnọ editọn̄ọ mme ukpepn̄kpọ Bible ye mme owo oro ẹdọhọde ke idi mbon ediwak nsio nsio ido ukpono.
Utịn̄ikọ An̄wa ye Mme Akpatre Utịn̄ikọ
“Ẹkabade Ẹdiana Kiet Oto Edisana Usem” ekedi ibuotikọ utịn̄ikọ an̄wa ke Friday. Etịn̄ikọ ama owụt ete okposụkedi nsio nsio usem tọsịn ita ẹnamde n̄kpọ nte ubiọn̄ọ idahaemi ẹnọ edidianakiet, edisana usem edi akwa odudu edidianakiet. Enye emekpeme Mme Ntiense Jehovah osio ke mme ndudue mbon Babylon, emekpep mmọ ndikpono edisana idaha eke uwem ye iyịp, omonyụn̄ an̄wam mmọ ndidu uwem nte ekemde ye mme edumbet Bible oro ọnọde mmọ ufọn ke n̄kan̄ eke spirit ye obụk. Oyom kpukpru owo ẹkere ẹban̄a edikpep nnyụn̄ nsem edisana usem, koro mmọ oro ẹnamde ntre ikpọn̄ ẹdibọhọ Armageddon. Ini ndomokiet idụhe ndibiat ke ndinam item odude ke Zephaniah 2:1-3.
Ke ẹnọde ndusụk nti item N̄wed Abasi ẹkụre ke nte oyomde “Ẹfara ke Idem, Man Ẹkeme Ndibọn̄ Akam,” akpatre utịn̄ikọ ama etiene oro ọkọkọn̄ọde ke ibuotikọ oro “Ndisan̄a Nte Ekemde ye Edisana Usem.” Ibat oro ẹsan̄ade idahaemi nte ekemde ye edisana usem ke akpanikọ ke ọkọri. Ndien mbon oro ẹkedụkde mme mbono ẹmi ẹma ẹwụt ukpono ẹmi ẹnyenede ẹnọ edisana usem ke usanaidem mmọ, edinam n̄kpọ ke nde ke nde, ye n̄kemuyo eke esop. Mbufa n̄wed ẹmi ẹkesiode ẹyen̄wam kpukpru Mme Ntiense Jehovah ndisuan edisana usem uforo uforo n̄kan.
Akpatre etịn̄ikọ mbono ama eti kpukpru owo aban̄a ufọn edime ime. Enye ama owụt ete ke ebede ke mbono emi, kpukpru owo ẹkpenyene ndisọn̄ọ ubiere ndisịn ifịk n̄kaiso. Ekem enye ama eberi ye ikọ ẹmi: “Nnyịn ikpakam ikaiso ndisan̄a nte ekemde ye edisana usem oro Abasi ọnọde man nnyịn ikeme ndinọ ima ima Ete nnyịn eke heaven, Jehovah Abasi, ubọn̄, idahaemi ye ke nsinsi nsinsi!”
[Ekebe ke page 26]
N̄wakn̄kan ibatowo ke mbono ke West Berlin ekedi 44,532, ndien ẹma ẹnịm owo 1,018 baptism. Akada mbon baptism minit 19 ndisan̄a n̄wọrọ ke Olympia Stadium, ndien ke ini emi ukwakubọk okosụk akaka iso. San̄asan̄a ikpehe ama odu ọnọ mme andidụk ẹsemde usem Ikọmbakara. N̄kpọ nte owo 6,000 ke otu mmọemi ẹma ẹkop ofụri ndutịm ke usem mmọ. Ke mbono emi, owo 4,500 ẹmi ẹtode Poland ẹma ẹdu n̄ko; ke uwemeyo iba, mbon Otu Ukara ẹma ẹnọ mbio mbio utịn̄ikọ ke ufọn mmọ.
[Mme ndise ke page 24, 25]
1. Olympia Stadium, West Berlin
2. Ndutịm mbono oro ẹmịn̄de-mịn̄
3. Bọs ikie iba ẹmi ẹkemende mme andidụk ẹtode East Germany ẹdi
4. Mme odụk mbono ẹdide mbon Poland ẹma ẹkop inemesịt ndibọ mme n̄wed ẹsiode
5. Ndudiọn̄ flawa ama anam an̄wa eye
6. A. D. Schroeder, kiet ke otu mbon Otu Ukara ama odu ke ndutịm ke West Berlin