Chariot Jehovah Eke Enyọn̄ ke Anam Isan̄
“Amaedi mme wheel, owo ofiori okot mmọ ke utọn̄ mi, ete, O wheel!”—EZEKIEL 10:13.
1. Nso orụk n̄kpọisan̄ ke Jehovah enyene?
KE EYO ndiye ubomofụm ẹmi, mme adaiso ererimbot ẹkeme ndikere ke mmimọ imokop n̄kpon n̄kan inem ke ukaisan̄ oro ọfọnde akan. Edi, ke isua 2,600 oro ẹkebede, Jehovah Abasi ama ayarade nte ke imọ imenyene akakan orụk n̄kpọisan̄, emi ọdiọn̄-ukwakutom ndomokiet akanam mîkwe mbiet esie. Enye edi akwa, enyene-ndyọ chariot! Nte emi etie esen esen nte ke Andibot ekondo awat ke n̄kpọisan̄ oro ebietde chariot? Baba, koro n̄kpọisan̄ Jehovah eke enyọn̄ okpụhọde akamba akamba ye ekededi oro mme owo ẹkerede.
2. Didie ke Ezekiel ibuot 1 owụt chariot Jehovah eke enyọn̄, ndien mmanie ke prọfet oro ebemiso odụri ntịn̄enyịn owụt?
2 Ke Eze ibuot 1 ke prọfesi Ezekiel, ẹwụt Jehovah nte awatde ke akwa chariot eke enyọn̄. Enyene-uten̄e n̄kpọisan̄ oro enyenede wheel inan̄ mi asan̄a ke idemesie ikpọn̄ onyụn̄ ekeme ndinam mme n̄kpọ n̄kpaidem. Ezekiel okokụt chariot eke enyọn̄ emi ke n̄kukụt ke 613 B.C.E., ke ini enye okodude ke mbeninyan̄ kiet ke Babylon eset. Prọfet emi ebemiso odụri ntịn̄enyịn nnyịn owụt mbon oro ẹsede enyịn ẹban̄a chariot Jehovah eke enyọn̄ emi. Nte nnyịn ikotde, ẹyak nnyịn idomo ndikụt ke enyịn ikike se Ezekiel okokụtde.
Odu-Uwem N̄kpọ Inan̄
3. Nso ke iso inan̄ ke kiet kiet ke otu mme cherub inan̄ oro ẹda ẹban̄a?
3 Ezekiel ọtọt ete: “N̄kụt, ndien, sese, ofụm idio oto ke edem edere edi, akamba obubịt enyọn̄ ye ikan̄ eke emịnen̄de, uyama onyụn̄ akan enye okụk . . . Mbiet [“Odu-uwem,” NW] n̄kpọ inan̄ ẹnyụn̄ ẹdu enye ke ufọt.” (Ezekiel 1:4, 5) Mme odu-uwem n̄kpọ inan̄, m̀mê mme cherub ẹmi kiet kiet, ẹkenyene mba inan̄ ye iso inan̄. Mmọ ẹma ẹnyene iso lion, owụtde unenikpe Jehovah; iso enan̄, adade aban̄a odudu Abasi; ye iso ntrukpom, owụtde ifiọk Esie. Mmọ n̄ko ẹma ẹnyene iso owo, adade aban̄a ima Jehovah.—Deuteronomy 32:4; Job 12:13; Isaiah 40:26; Ezekiel 1:10; 1 John 4:8.
4. Ntak emi mme cherub oro ẹkenyenede iso inan̄, ndien nso ke mme cherub oro ekebiet ke usọp?
4 Cherub kiet kiet ekenyene iso kiet oro esede n̄kan̄ kiet ke edem mbinan̄. Ntem, mme cherub ẹmi ẹkeme ndikpụhọde isan̄ inikiet inikiet ẹnyụn̄ ẹtiene iso oro esede usụn̄ oro ẹyomde. Edi mme cherub oro ẹkebiet nso ke usọp? Kamse, mmọ ẹkeme ndifehe ke usọp emịnen̄mịnen̄! (Ezekiel 1:14) Idụhe n̄kpọisan̄ oro owo akananam ọdiọn̄de, emi ekemede ndisọp ntre.
5. Didie ke Ezekiel akanam mme wheel ye n̄kpanuen chariot oro an̄wan̄a?
5 Inikiet inikiet, mme wheel chariot ẹmi ẹbiọn̄ọde. Mmọ ẹnana mbiet didie ntem! Eze 1 Ufan̄ikọ 16 ye 18 ẹdọhọ ẹte: “Iso mmọ ye ubọkusọ mmọ ẹnyụn̄ ẹtie nte wheel odude ke ufọt wheel. Amaedi n̄kpanuen mmọ, mmọ ẹkon̄ ẹnyụn̄ ẹnyene ndịk; enyịn-enyịn ẹnyụn̄ ẹyọhọ n̄kpanuen ẹkanade mmọ mbinan̄ ẹkụk.” Wheel kiet ke n̄kan̄ cherub kiet ọkpọwọrọ wheel inan̄ ke itie inan̄. Mme wheel ẹmi ẹkeyama nte itiat Tarshish, kpa n̄n̄wan̄an̄wan̄a m̀mê uto-uto m̀mê awawa itiat. Emi adian un̄wana ye uyai ọnọ ubọn̄ ubọn̄ n̄kukụt emi. Sia n̄kpanuen eke wheel ẹmi ‘ẹkeyọhọde ye enyịn oro ẹkanade ẹkụk,’ mmọ ikasan̄ake nnan-nnan ke usụn̄ ekededi. Ndien mme wheel ẹmi ẹma ẹnen̄ede ẹkon̄, ke ntem ẹkemede ndisịm anyan ebiet ke n̄kpasịp edikanade kiet ke idaha mmọ. Mmọ, ukem nte mme cherub oro, ẹkeme ndisọp isan̄ nte emịnen̄mịnen̄.
Mme Wheel ke Esịt Mme Wheel
6. (a) Didie ke edi nte ke chariot oro ama enyene wheel ke esịt mme wheel? (b) Mme wheel ẹmi ẹnam isan̄ mmọ ẹkekem ye nso?
6 Esen esen n̄kpọ en̄wen omodu. Wheel kiet kiet ama enyene wheel kiet ke esịt esie—kiet emi edide ukem udomo, ẹnyụn̄ ẹsịnde enye ibiọn̄ ibiọn̄ ye wheel enye eken. Usụn̄ emi kpọt ke ẹkeme ndidọhọ ke mme wheel ẹmi “ẹka edem mbinan̄ ke ini mmọ ẹsan̄ade.” (Eze 1 Ufan̄ikọ 17) Inikiet inikiet, mme wheel ẹmi ẹkeme ndikpụhọde usụn̄ isan̄ mmọ koro iso wheel esede usụn̄ kiet kiet. Mme wheel ẹmi ẹnam isan̄ mmọ ẹtiene eke cherub inan̄ oro. Ke enyọn̄ wheel inan̄ ẹmi, idem chariot Abasi ekeme ndiwat oto un̄wam oro enyịn mîkwe emi ebietde okopodudu ekpri ubom oro ofụm akamade ufụmi nte enye otohode ke enyọn̄ mmọn̄.
7. M̀mọ̀n̄ ke odudu mme wheel oro okoto?
7 Mme wheel oro ẹda odudu emi ke m̀mọ̀n̄ nditiene kpukpru isan̄ cherub inan̄ ẹmi? Ẹda ẹto edisana spirit Ata Ọkpọsọn̄ Abasi. Eze 1 Ufan̄ikọ 20 ọdọhọ ete: “Ke edem eke spirit oyomde ndika do, mmọ ẹka do . . . koro spirit n̄kpọ uwem odude ke mme wheel.” Ukem anamutom odudu Abasi eke enyịn mîkwe, oro odude ke mme cherub onyụn̄ odu ke mme wheel ẹmi.
8. Nso enyịn̄ ke ẹkenọ mme wheel oro, ndien ntak-a?
8 Ẹkot mme wheel ẹmi ke ikọ emi “O wheel [“wheel utom,” NW]!” (Ezekiel 10:13) Enyịn̄ emi ama enen̄ede odot ye se wheel kiet kiet anamde. Enye ewewere m̀mê akakanade. Ndisio ikpehe chariot eke enyọn̄ emi utọ enyịn̄ oro odụri ntịn̄enyịn owụt usọp oro chariot eke enyọn̄ emi asan̄ade. Okposụkedi mme wheel esie ẹkanarede usọp usọp ntre, mmọ ẹkeme ndisụk n̄kụt usụn̄ koro enyịn ẹyọhọde mmọ ke idem.
9. Didie ke Ezekiel akanam wheel inan̄ eke chariot oro asan̄ade usọp usọp mi an̄wan̄a?
9 Edi idahaemi ẹyak nnyịn ise inyụn̄ ikụt se idude ke enyọn̄ enyene-ndịk edikon̄ wheel inan̄ ẹmi ẹkanarede usọp usọp mi. Ufan̄ikọ 22 ke Ezekiel ibuot 1 ọdọhọ ete: “Ikpaenyọn̄ eke odude mbuot n̄kpọuwem ke enyọn̄ ebiet enyịn crystal enyene-ndịk, enen̄ede enye ke enyọn̄ ibuot mmọ.” Ikpaenyọn̄ emi, okposụkedi ọsọn̄de, edi n̄n̄wan̄an̄wan̄a, “ebiet enyịn crystal enyene-ndịk.” Enye ama esem nte ediwak tọsịn diamond nte utịn asiahade ọtọ mmọ. Enyene-ndịk n̄kpọ ke akpanikọ!
Ubọn̄ Ubọn̄ Andiwat Chariot
10. (a) Didie ke ẹnam ebekpo ye Enyeemi etiede ke ebekpo an̄wan̄a? (b) Nso ke akpanikọ oro nte ke Andiwat chariot oro asan̄a ye ubọn̄ owụt?
10 Nte an̄wan̄ade, chariot atuak ada man Andiwat enye etịn̄ ikọ ọnọ Ezekiel. Ke enyọn̄ ikpaenyọn̄ oro, se ibietde ebekpo odu, ebietde sapphire, m̀mê ata obubịt enyọn̄ ke uduot. Ke ebekpo oro, Enyeemi ebietde owo isọn̄ odu do. Mbiet owo oro ama ekeme ndin̄wam Ezekiel ọfọn akan ndifiọk ediyarade eke Abasi emi. Edi mbiet owo emi asan̄a ye ubọn̄, tutu enye ayama nte edisem okpoho, ayamade nte silver ye gold. Nso utịbe utịbe uyai! Ọtọn̄ọde ke isịn mbiet owo emi, utịbe utịbe ubọn̄ emi ama atara osịm enyọn̄ ye isọn̄. Ofụri mbiet oro ke ntre ọyọhọ ye ubọn̄. Emi owụt ke Jehovah enyene ubọn̄ oro owo mîkemeke nditịn̄. Akande oro, ediye akpara asan̄a kiet ye Andiwat chariot emi. Nso ndobo ndobo ye emem emem idaha ke akpara esiwụt ntem ke oyobio ama okokụre! Ke ndinyene emem emem edu oro, Jehovah onịm edu esie eke ifiọk, unenikpe, odudu, ye ima ke n̄kem n̄kem mfọnmma idaha.
11. Didie ke n̄kukụt chariot ye ebekpo Jehovah okotụk Ezekiel?
11 Un̄wana ye ndiye uduot ẹkanarede chariot ye ebekpo Jehovah ẹkụk. Nso ukpụhọde ke edi ntem ye Satan, kpa ọbọn̄ ekịm ye ubre-idiọn̄! Ndien didie ke kpukpru ẹmi okotụk Ezekiel? Enye ọdọhọ ete, “Ke ini n̄kụtde, nduọ ke isọn̄ n̄kûbi iso mi, nnyụn̄ n̄kop uyo eke etịn̄de ikọ.”—Ezekiel 1:28.
Se Chariot oro Akadade Aban̄a
12. Nso ke chariot Jehovah eke enyọn̄ ada aban̄a?
12 Nso ke utịbe utịbe chariot emi ada aban̄a? Esop Jehovah Abasi eke enyọn̄, m̀mê eke heaven. Enye esịne kpukpru ndisana edibotn̄kpọ esie eke spirit ke obio oro enyịn mîkwe—mme seraph, mme cherub, ye mme angel. Sia Jehovah edide Ata Edikon̄ Abasi, kpukpru edibotn̄kpọ esie eke spirit ẹsụk idem ẹnọ enye, ndien enye awat mmọ ke ekikere nte ke enye, ke mfọnido akara mmọ onyụn̄ ada mmọ anam n̄kpọ nte ekemde ye uduak esie.—Psalm 103:20.
13. (a) Ntak ẹkemede ndidọhọ ke Jehovah awat esop esie-e? (b) Didie ke n̄kukụt aban̄ade chariot Jehovah oro enyenede wheel inan̄ emi anamde isan̄ otụk fi?
13 Jehovah awat esop emi nte n̄kpọ eke odorode ke chariot, anamde enye asan̄a aka ebiet ekededi oro spirit esie onụkde enye ndika. Enye ifeheke idat-idat, ye unana ndausụn̄ m̀mê ọniọn̄ ọniọn̄ usenyịn. Abasi iyakke esop emi odụk usụn̄ ekededi oro enye akpamade ndika. Utu ke oro, enye etiene ndausụn̄ esie. Ọtọkiet, kpukpru owo ẹsan̄a ẹkaiso ke edidianakiet ndiyọhọ mme uduak Abasi. Nso utịbe utịbe esop eke heaven ke ẹyarade ntem ke n̄kukụt emi, oro aban̄ade chariot Jehovah eke enyọn̄ oro enyenede wheel inan̄ oro anamde isan̄! Ke n̄kemuyo ye emi, ẹwụt esop Jehovah nte edide ukem udomo ke edem mbinan̄, ke n̄kem n̄kem mfọnmma idaha.
Ẹmek Nte Owo Ukpeme
14. Mmanie ke prọfet Ezekiel ada aban̄a?
14 Edi mmanie ke prọfet Ezekiel ada aban̄a? Otode mme akpanikọ eke mbụk, ayarade nte ke otu Mme Ntiense Jehovah oro ẹyetde aran ke spirit ẹbuana ye chariot eke enyọn̄ emi. Ntem, Ezekiel nte enende ada aban̄a nsụhọ Mme Ntiense Jehovah oro ẹyetde aran toto ke 1919. Ke n̄kan̄ eke spirit, esop Abasi eke heaven ama enyene edinam ye nsụhọ oro ẹyetde aran ke isua oro, ndifiak nnọ mmọ uwem man ẹdi Mme Ntiense Jehovah ẹnọ ofụri ererimbot. (Men Ediyarade 11:1-12 domo.) Esop oro ebietde chariot mi ke akanam isan̄ ini oro, idem kpa nte anamde mfịn. Ke akpanikọ, mme wheel esie oro ẹsan̄ade ye n̄kọri ke ẹkanade usọp usọp ẹkan nte akanam edide. Jehovah ke awat usọp usọp akaiso!
15. Nso ke uyo Andiwat chariot eke enyọn̄ oro etịn̄, ndien nso utom ke Ezekiel ọbọ?
15 Ezekiel ama oyom ndidiọn̄ọ ntak emi chariot eke enyọn̄ oro akasan̄ade ekpere imọ onyụn̄ atuakde ada. Enye ama ọdiọn̄ọ nte uyo okotode Owo oro odorode ke enyọn̄ chariot oro osịm enye. Ke odude ke n̄kpaidem oto enyene-uten̄e ndise emi, Ezekiel ama ọduọ ke isọn̄. Kpan̄ utọn̄ nte uyo Andiwat chariot eke enyọn̄ emi ọdọhọde ete: “Eyen owo, daha da ke ukot fo, ndien nyedọhọ ye afo.” (Ezekiel 2:1) Jehovah ndien ọnọ Ezekiel utom nte owo-ukpeme ndinyụn̄ ndụri ọsọn̄ibuot ufọk Israel utọn̄. Ẹkam ẹnọ enye utom nditịn̄ ikọ ke enyịn̄ Abasi. Enyịn̄ Ezekiel ọwọrọ “Abasi Ọsọn̄ọ.” Ntre ke edi nte ke Abasi ọmọsọn̄ọ otu Ezekiel idem onyụn̄ osio mmọ ọdọn̄ utom, emekde mmọ nte owo-ukpeme ọnọ Christendom.
16, 17. (a) Didie ke n̄kukụt aban̄ade chariot eke enyọn̄ akada ufọn ọsọk Ezekiel? (b) Ke eyo nnyịn, didie ke ifiọk aban̄ade chariot eke enyọn̄ otụk otu Ezekiel ye akwa otu owo?
16 N̄kukụt chariot eke enyọn̄ emi ekedi akpan n̄kpọ ye n̄kpọ n̄kpaidem ọnọ prọfet Ezekiel, edi ama otịm enye idem n̄ko ọnọ utom esie nte owo-ukpeme nditọt nsobo Jerusalem oro ekedide. Ukem oro ke edi ọnọ otu owo-ukpeme mfịn. Ifiọk mmọ kaban̄a n̄kukụt aban̄ade chariot Jehovah eke enyọn̄ oro anamde isan̄ enyene se enen̄ede ọwọrọ ke idem nsụhọ oro ẹyetde aran. Ke 1931 mmọ ẹma ẹfiọk ekese ẹban̄a n̄kukụt Ezekiel, nte ẹkeyararede ke Vindication, Akpa Eboho. Mmọ ẹma ẹyọhọ ye utọ akwa esịtekọm oro tutu ọtọn̄ọde ke nsiondi eke October 15, 1931, osịm eke August 1, 1950, ndise ikpaedem Enyọn̄-Ukpeme (Ikọmbakara) ke ubọk nnasia esie ama akama ndise ẹwetde ẹban̄a n̄kukụt oro Ezekiel okokụtde chariot eke enyọn̄. Ntre, otu Ezekiel ama anam n̄kpọ etiene utom oro ẹkenọde mmọ, ndien mmọ ke ẹnanam utom nte owo-ukpeme, ẹtan̄ade ubiereikpe Abasi. Ini ikan̄ ikan̄ nsobo Christendom otode Jehovah oro odorode ke chariot eke enyọn̄ akananam ikpereke ntem!
17 Mfịn, “akwa otuowo” eke mme owo mbieterọn̄ ke ẹbuana ye nsụhọ oro ẹyetde aran. (Ediyarade 7:9) Ke edidianakiet, mmọ ke ẹtan̄a nsobo oro edide ẹdori Christendom ke idem ye ofụri ubi ubi editịm n̄kpọ emi. Utom unọ ntọt emi ke akaiso usọp usọp, ndien nte ẹwụtde ke Ediyarade 14:6, 7, mme angel ke ẹnọ utom emi ibetedem.
Ndisan̄a ye Chariot eke Enyọn̄
18. Nso ke ana ẹnam man ẹnyene n̄kaiso ibetedem mme angel, ndien nso ke nnyịn idisọp ndinam?
18 Mme angel oro ẹsụhọrede idem mi ẹnam isan̄ ke n̄kemuyo nte ubak esop Abasi eke heaven ke adan̄aemi ẹn̄wamde mme asan̄autom Jehovah eke isọn̄ ndiyọhọ utom mmọ eke editan̄a ubiereikpe Abasi. Edieke nnyịn iyomde n̄kaiso ukpeme ye ndausụn̄ eke n̄kpọsọn̄ angel asan̄autom Abasi ẹmi, ana nnyịn n̄ko isan̄a ke n̄kemuyo inyụn̄ isan̄a ikpat kiet ye ndamban̄a wheel utom emi. Akande oro, nte ubak esop Jehovah oro ẹkụtde ke enyịn emi asan̄ade ke mbiet usụn̄ oro chariot eke enyọn̄ asan̄ade, ana nnyịn isọp nditiene ndausụn̄ spirit Abasi. (Men Philippi 2:13 domo.) Edieke nnyịn idide Mme Ntiense Jehovah, nnyịn inyene ndisan̄a ke ukem usụn̄ oro chariot eke enyọn̄ asan̄ade. Nnyịn ke akpanikọ ikpedehe-dei isan̄a ye isio isio uduak ye enye. Ke ini ẹnọde ndausụn̄ ke usụn̄ oro ikpasan̄ade, ana nnyịn itiene enye. Ntem, esop ibahakede.—1 Corinth 1:10.
19. (a) Kpa nte enyịn ẹyọhọde mme wheel chariot eke enyọn̄ oro, nso ke ana ikọt Jehovah ẹdu ke edidemede ndinam? (b) Nso ikpedi usụn̄ edinam nnyịn ke ntịme ntịme eyo emi?
19 Enyịn oro ẹyọhọde mme wheel chariot Abasi oro ẹwụt edidu ke edidemede. Nte esop eke heaven odude ke edidemede, ntre ana nnyịn idu ke edidemede ndinọ esop Jehovah eke isọn̄ ibetedem. Ke idaha eke esop, nnyịn imekeme ndiwụt ibetedem emi ke ndidiana kiet ye mbiowo n̄kann̄kụk. (Mme Hebrew 13:17) Ndien ke ntịme ntịme eyo emi, oyom mme Christian ẹnen̄ede ẹdiana kiet ye esop Jehovah. Nnyịn iyomke ndikabade se mme n̄kpọntịbe ẹwọrọde ke idem nnyịn, koro do nnyịn ikpasan̄ake ye chariot Jehovah eke enyọn̄. Ẹyak nnyịn kpukpru ini isibụp idem nnyịn, ‘Ewe usụn̄ ke chariot emi asan̄a aka?’ Edieke nnyịn isan̄ade ikaiso ye esop Abasi oro ẹkụtde ke enyịn, nnyịn n̄ko iyesan̄a ye esop oro enyịn mîkwe.
20. Nso eti item ke apostle Paul ọnọ ke Philippi 3:13-16?
20 Ke afan̄ emi, Paul ekewet ete: “Nditọete, mbatke nte mmomụm n̄kpọ oro kan̄a n̄kama; edi n̄kpọ kiet emi ke nanam; mfefre se idude mi ke edem, nnyụn̄ nnyanade mbịne se inade mi ke iso; mmesịn ifịk n̄kaiso mbịne utịtmbuba, man n̄kpọbọ utịp akwa ikot eke Abasi okokotde mi ke Christ Jesus. Ẹyak kpukpru nnyịn, eke ima ikọkọri iwọrọ idi owo, inyene orụk esịt emi, ndien edieke mbufo ẹnyenede ekikere eke ẹkpụhọrede ke se ntetịn̄, Abasi eyeyarade emi ọnọ mbufo. Edi ẹyak nnyịn isan̄a ke se nnyịn ima ikọbọ inyene idu uwem [“ke ukem ido emi,” NW].”—Philippi 3:13-16.
21. Ke editiene ewe ido ke idikeme ndinam n̄kọri ke n̄kan̄ eke spirit ye esop Abasi?
21 Mi ikọ oro “ido” iwọrọke ediyịre ke idiọk usụn̄ kiet oro nnyịn mîkemeke ndisio idem mfep. Mme asan̄autom Jehovah ẹnyene ediye ido emi ebede ke enye mmọ ẹnam n̄kọri ke n̄kan̄ eke spirit. Enye edi ido edisịn idem ke ọkpọ ọkpọ ukpepn̄kpọ Bible, edidụk mme mbonoesop, edikwọrọ eti mbụk Obio Ubọn̄ kpukpru ini, ye ediwụt mme edu esop Abasi eke heaven. Utọ ido oro an̄wam mmọ nditiene ndausụn̄ esop mbiet-chariot Jehovah eke enyọn̄. Ke ndisọn̄ọ nyịre ke edu emi, nnyịn iyesịm utịtmbuba nnyịn, edide enye edi uwem unana n̄kpa ke heaven m̀mê nsinsi uwem ke paradise isọn̄.
22. (a) Man ẹtịm nsụhọ oro ẹyetde aran ye akwa otuowo ndidiana kiet, nso ke ana ẹnam? (b) Nso n̄kpọ ke Jehovah mîtreke ndifiọk?
22 Nte John 10:16 owụtde, ẹyetịm “mme erọn̄ en̄wen” ye otu Ezekiel ẹdiana kiet. Ntem, edi akpan n̄kpọ nte kpukpru owo ke esop Jehovah ẹdiọn̄ọ ọyọhọ ọyọhọ se n̄kukụt oro ẹwetde ke Ezekiel ibuot 1 ọwọrọde ye se enye adade aban̄a edieke anade mmọ ẹsan̄a ke n̄kemuyo ye chariot Abasi eke enyọn̄. N̄kukụt aban̄ade enye aman̄wam nnyịn ndifiọk nte ke nnyịn ikpenyene ndisan̄a ke n̄kemuyo ye esop Jehovah, oro ẹkụtde ke enyịn ye eke enyịn mîkwe. Nyene ke ekikere, n̄ko, ete ke enyịn Jehovah “[ẹsan̄a] ke ofụri ererimbot, ete isọn̄ọ imụm mmọ eke ofụri esịt mmọ odude ye enye ikama.” (2 Chronicles 16:9) Idụhe n̄kpọ ndomokiet oro Jehovah mîfiọkke, akpan akpan n̄kpọ ekededi oro aban̄ade uduak esie ndiwụt unen oro enye enyenede nte Andikara Ekondo.
23. Ye chariot Jehovah eke enyọn̄ oro anamde isan̄, nso ke ana nnyịn inam?
23 Chariot Jehovah eke enyọn̄ ke akpanikọ ke anam isan̄ mfịn. Ibịghike ẹmọn̄ ẹnam kpukpru n̄kpọ ẹnyene ubọn̄ ke n̄kemuyo ye ubọn̄ ubọn̄ Owo oro awatde chariot emi—kpukpru emi ke unen esie nte Ọbọn̄ Andikara ekondo. Mme seraph, cherub, ye angel esie ke ẹn̄wam nnyịn mfịn ke akwa utom ukwọrọikọ nnyịn eke ofụri ererimbot. Ẹyak nnyịn isasan̄a ikaiso, ndien, ye esop Jehovah eke enyọn̄. Edi didie ke nnyịn ikeme ndisan̄a ikpat kiet ye chariot eke enyọn̄ oro asan̄ade usọp usọp mi?
Didie ke Afo Ọkpọbọrọ?
◻ Mme edu ewe ke odu-uwem n̄kpọ inan̄ oro Ezekiel okokụtde ẹda ẹban̄a?
◻ Chariot Jehovah eke enyọn̄ ada aban̄a nso?
◻ Mmanie ke Ezekiel prọfet Abasi ada aban̄a?
◻ Didie ke ifiọk aban̄ade chariot Jehovah eke enyọn̄ otụk otu Ezekiel ye akwa otu owo?