Ẹsan̄a Ikpat Kiet ye Chariot Jehovah Eke Enyọn̄
“Tịn̄ ikọ emi [“ikọ mi,” NW] nọ mmọ, ke mmọ ẹkopde ye ke ẹtrede ndikop.”—EZEKIEL 2:7.
1, 2. Nso ubọn̄ ubọn̄ n̄kpọisan̄ ke Ezekiel okokụt, ndien nso ke ẹketịn̄ ẹnọ enye?
CHARIOT Jehovah eke enyọn̄ idahaemi atuak ada ke iso mme asan̄autom esie. Ye enyịn mbuọtidem, mmọ ẹmekụt ubọn̄ ubọn̄ n̄kpọisan̄ eke Ọbọn̄ Andikara mmọ. Enye edi ubọn̄ ubọn̄, enyene-ndyọ, enyene-uten̄e.
2 Ukem ubọn̄ ubọn̄ ukpatn̄kpọ emi akatuak ada ke iso Ezekiel prọfet Abasi ke n̄kukụt ke n̄kpọ nte isua 2,600 ẹmi ẹkebede. Ke ebekpo emi akamade chariot mi—esop Abasi eke heaven emi mme edibotn̄kpọ eke spirit ẹnamde—Jehovah ama ọnọ Ezekiel akpan ewụhọ emi ete: “Nditọ usọn̄enyịn ye eke itụnesịt. M̀mọ̀n̄ ndọn̄ fi utom ke ebiet mmọ; dọhọ mmọ ndien, ete, Ntem ke Ọbọn̄ Jehovah ọdọhọ. Ndien amaedi mmọ, ke mmọ ẹkopde, ye ke mîkopke (koro mmọ ẹdide ufọk nsọn̄ibuot) iditreke ndifiọk ete ke prọfet odu ke otu mmọ.”—Ezekiel 2:4, 5.
3. Ewe nsan̄a eyomfịn ke Ezekiel enyene?
3 Ezekiel ye ubiere ama anam utom oro, anamde utom nte n̄kukụre n̄kpọutom ke ubọk Abasi. Ukem ntre, idahaemi Abasi emenyene n̄kukụre esop kiet nte n̄kpọutom oro odude ke idak ndausụn̄ esie. Otu Ezekiel, kpa nsụhọ oro ẹyetde aran, ẹdaiso ke utom edinọ akpatre ikọ ntiense, ye “akwa otuowo” eke “mme erọn̄ en̄wen” ẹkanarede mmọ ẹkụk ndinọ un̄wam. (Ediyarade 7:9, 10; John 10:16) Mmọ ke edidianakiet ẹdi “otuerọn̄ kiet” ye Eti Ekpemerọn̄ oro, Jesus Christ, adade mmọ usụn̄ ke idak itie edikara eke akwa Andiwat Chariot, kpa Jehovah Abasi.
4, 5. Didie ke esop Abasi oro ẹkụtde ke enyịn akasan̄a edidu, ndien nso ke enye okụt ke n̄kemuyo ye Isaiah 60:22?
4 Ke idak ndausụn̄ Jehovah, esop eke ofụri ererimbot emi ọmọkọri oto ke ekpri ntọn̄ọ tutu akabade edi okopodudu n̄kpọutom nditan̄a ewụhọ emi “mbufo ẹten̄e Abasi, ẹnyụn̄ ẹnọ enye ubọn̄; koro ekem ini ikpe esie.” (Ediyarade 14:7) Nte Ezekiel mîkadahake ida m̀mê ndimek idemesie nte prọfet, ntre esop Abasi oro ẹkụtde ke enyịn ikanamke m̀mê ndimek idemesie. Enye ikọtọn̄ọke ito uduak m̀mê ukeme owo. Abasi Andiwat Chariot akanam esop emi edidu. Sia spirit Abasi ọnọde odudu onyụn̄ enyenede ibetedem otode ndisana angel, ikọt Jehovah ẹmekụt utọ nduaidem nduaidem n̄kọri oro ‘esisịt akabarede edi ọkpọsọn̄ idụt.’—Isaiah 60:22.
5 Se ibede Mme Ntiense Jehovah 4,000,000 ke ẹtan̄a etop Obio Ubọn̄ ke idụt 212. Ẹbahade mmọ ẹdọn̄ ke se iwakde ikan otu esop 63,000 oro ẹtịmde ẹsịn ke mme circuit ye district. Ntatara n̄kọk itieutom ye mme ufọkutom umịn̄-n̄wed ke ẹnam utom ke idak ndausụn̄ Otu Ukara nte iwụk ebiet ibuot itieutom esop. Nte n̄kpọ eke mmọ ẹdide owo kiet, kpukpru mmọ ke ẹsan̄a ẹkaiso, ẹkwọrọde eti mbụk, ẹnọde mbon oro ẹnyịmede ukpep, ẹbọpde mme itie usopidem. Ih, esop Jehovah oro ẹkụtde ke enyịn ke asan̄a ikpat kiet ye chariot eke enyọn̄ ye Andiwat enye.
6. Nso ke abuana ndisan̄a ikpat kiet ye esop Jehovah oro ẹkụtde ke enyịn?
6 Edieke afo edide kiet ke otu Mme Ntiense Jehovah, ndi afo ke asan̄a ikpat kiet ye esop Abasi oro ẹkụtde ke enyịn? Ndinam ntre idịghe mbubehe edidụk mme mbonoesop Christian nnyụn̄ mbiat ini ke an̄wautom. Akpan akpan, edisan̄a ikpat kiet enyene n̄kpọ ndinam ye edika iso iso nnyụn̄ n̄kọri ke n̄kan̄ eke spirit. Enye abuana edinyene in̄wan̄în̄wan̄ ekikere, edinịm mme akpan n̄kpọ ke itie, nnyụn̄ nnyene ifiọk idahaemi. Edieke nnyịn isan̄ade ikpat kiet ye chariot Jehovah eke enyọn̄, uwem nnyịn ekem ye etop oro nnyịn itan̄ade.
7. Ntak ọfọnde ndikere mban̄a edu uwem Ezekiel nte prọfet Abasi?
7 Ke n̄kpọ aban̄ade edisan̄a ikpat kiet, mme asan̄autom Jehovah eke eyomfịn ẹkeme ndikpep ekese nto uwụtn̄kpọ Ezekiel. Okposụkedi Jehovah ekemekde enye san̄asan̄a nte prọfet, Ezekiel okosụk okokop ntụk, enyene se esede aban̄a, ye udọn̄. Ke uwụtn̄kpọ, nte uke uke akparawa oro ọdọde ndọ, enye ama okop mfụhọ ke nditaba n̄wan esie ke n̄kpa. Kpa ye oro, enye akananam ikofụmike enyịn isio ke utom esie nte prọfet Jehovah. Ke ndikere nte Ezekiel akakamade idemesie ke mme idaha en̄wen n̄ko nnyịn imekeme ndisọn̄ọ idem nnyịn idem ndisan̄a ikpat kiet ye esop Abasi oro ẹkụtde ke enyịn. Emi eyen̄wam nnyịn ndisan̄a ikpat kiet ye esop esie oro enyịn mîkwe.
Ndibọ Utom Nnyụn̄ Nnam
8. Ke se iban̄ade utom esie, nso uwụtn̄kpọ ke Ezekiel okonịm?
8 Ezekiel ama onịm eti uwụtn̄kpọ ke ndibọ utom esie nnyụn̄ nnam enye mma. Nte ededi, ama oyom n̄kopitem ye uko man anam enye, koro nnyịn ikot ite: “Eyen owo, kûfehe mmọ, kûnyụn̄ udịghe uban̄a ikọ mmọ, koro akpap ye n̄kukịm n̄kpọ ẹdude ye afo, afo onyụn̄ odụn̄ ke otu scorpion [ikpeyen]: kûfehe uban̄a ikọ mmọ, kûnyụn̄ udịghe uban̄a iso mmọ, koro mmọ ẹdide ufọk nsọn̄ibuot. Nyụn̄ ntịn̄ ikọ emi nọ mmọ, ke mmọ ẹkopde, ye ke ẹtrede ndikop: koro mmọ ẹdide mbon nsọn̄ibuot. Edi afo, eyen owo, kop se ami ndọhọde fi; kûsọn̄ ibuot nte ufọk nsọn̄ibuot emi.”—Ezekiel 2:6-8.
9. N̄kukụre ke edinam nso ke Ezekiel edibọhọ ubiomikpe iyịp?
9 Ikanaha Ezekiel anana udọn̄ m̀mê okop ndịk, oyomde ẹnonụk kpukpru ini man anam utom esie. Akana enye enyene utebe ikpe iyịp n̄kukụre edieke enye ke unyịmesịt ye uko etịn̄de ikọ Jehovah. Ẹkedọhọ Ezekiel ete: “Edieke afo etemede idiọkowo oro, ndien enye mîkabakede ikpọn̄ mme idiọkido esie, ye idiọk usụn̄ esie, enye eyekpa ke idiọkido esie, edi afo amanyan̄a ukpọn̄ fo.”—Ezekiel 3:19.
10. Didie ke otu Ezekiel ebiet prọfet oro?
10 Nte ekedide ye Ezekiel, otu Ezekiel oro ẹyetde aran ẹmenyịme utom oro Abasi ọnọde mmọ ndien ke enyụn̄ ẹnam enye. Edieke nnyịn idide Mme Ntiense Jehovah, nnyịn ikpenyene nditi nte ke uwem nnyịn ye uwem mbon en̄wen ọkọn̄ọ ke n̄kopitem nnyịn. (1 Timothy 4:15, 16) Ntiense kiet kiet enyene ndisan̄a ikpat kiet ye esop Jehovah. Abasi idibọpke nnyịn idian ke chariot esie inyụn̄ idụri nnyịn ida isan̄a. Unana udọn̄ ye ubak esịt ososụhọde uku Andiwat Chariot oro. Ntre esop oro ẹkụtde ke enyịn eteme nnyịn ete inam mme udọn̄ n̄kpọ Abasi enyene akpan itie ke uwem nnyịn. Edinam n̄kpọ ke n̄kemuyo ye utọ item oro anam nnyịn isan̄a ikpat kiet ye esop Abasi onyụn̄ emenede edisana utom oro nnyịn inamde okpon akan ido, ntụk. Ke akpanikọ, ikọt Jehovah ke ofụri ofụri ẹwụt n̄wọrọnda uyakidem. Udeme nnyịn owo kiet kiet edi ndimụm edisan̄a ikpat kiet n̄kama.
Ẹda Ikọ Abasi Ẹsịn ke Esịt
11. Nso uwụtn̄kpọ ke Ezekiel okonịm ke se iban̄ade ikọ Abasi?
11 Ezekiel ama onịm eti uwụtn̄kpọ n̄ko ke ndida ikọ Abasi nsịn ke esịt esie. Ke ẹnọde uyo, enye ama adia eboho n̄wed, m̀mê ikpan̄wed oro Abasi ọkọnọde enye. Ezekiel ọkọdọhọ ete, “n̄wed akabade enịn̄e mi ke inua nte aran ọkwọk.” Okposụkedi eboho n̄wed oro ọkọyọhọde ye “eyet, ye ntuan̄a, ye eseme,” enye ama enịn̄e Ezekiel koro enye ama owụt esịtekọm aban̄a ukpono oro odude ke ndida ke ibuot Jehovah. Ekedi inem inem ifiọkutom ọnọ prọfet oro ndinam utom esie oro Abasi ọkọnọde mma. Abasi ọkọdọhọ enye ete: “Eyen owo, da kpukpru ikọ mi ẹmi nditịn̄de nnọ fi sịn ke esịt fo, nyụn̄ kop mmọ ke utọn̄ fo.” (Ezekiel 2:9–3:3, Eze 3:10) Mme n̄kukụt oro ẹma ẹnam Ezekiel ọsọp ọfiọk se Abasi akayakde enye ada okot onyụn̄ ọsọn̄ọ itie ebuana esie ye Jehovah.
12. Nso ke Ezekiel akanam ke se iwakde ikan isua edịp ke utom prọfet?
12 Ẹma ẹnọ Ezekiel mme n̄kukụt ye etop kaban̄a nsio nsio uduak ye otuowo. Enye ekenyene nditịm n̄kpan̄utọn̄ ndien ekem etịn̄ onyụn̄ anam nte ẹkenọde ndausụn̄. Ẹma ẹyarade mbufa ntọt ye usụn̄ unam n̄kpọ ẹnọ enye ke adiana ke adiana ke n̄kpọ nte isua 22 oro enye akanamde utom nte prọfet. Ndusụk ini Ezekiel ama esitịn̄ san̄asan̄a ikọ etop. Ke mme ini eken, enye ama esiwọn̄ọde ebịne edida edinam ntịn̄ ikọ, utọ nte edina nse brick adade aban̄a Jerusalem. (Ezekiel 4:1-8) Uwụtn̄kpọ esie ke mme ọkpọ ọkpọ n̄kpọ, utọ nte edinam esie ke n̄kpa an̄wan esie, n̄ko ama akama etop. (Ezekiel 24:15-19) Enye ekenyene ndidi n̄kem n̄kem ye ini, kpukpru ini ọnọde nnennen etop onyụn̄ anamde nnennen n̄kpọ ke nnennen ini. Ezekiel ama ọsọn̄ọ eyịre ke ata n̄kpet n̄kpet n̄kaiso ebuana utom ye Jehovah.
13. Didie ke nnyịn ikeme ndibọp n̄kpet n̄kpet itie ebuana ye Jehovah?
13 Ukem ntre, man ibọp inyụn̄ imụm n̄kpet n̄kpet itie ebuana ye Jehovah ikama nte ekemmọ mbonutom esie, ana nnyịn ida ikọ Abasi isịn ke esịt nnyịn. (1 Corinth 3:9) Ndisan̄a ikpat kiet ye esop Abasi oro ẹkụtde ke enyịn ke afan̄ emi oyom ete nnyịn isan̄a ikpat kiet ye uwak udia eke spirit nte ẹnọde enye ke ekem ini. (Matthew 24:45-47) “Edisana usem” ke akaiso atara. (Zephaniah 3:9, NW) Ibọhọke nnyịn inyene ifiọk idahaemi ke nnyịn ke akpanikọ idikeme ndinam n̄kpọ ye n̄kopitem ye ndausụn̄ Andiwat Chariot oro.
14, 15. Ewe ido ke ẹyom man ẹsan̄a ke nde ikpat oro esop Abasi onịmde?
14 Ke ntak oro, nnyịn imoyom eti ido ubọn̄ akam, ọkpọ ọkpọ ukpepn̄kpọ, ye edibuana ke edisana utom eti mbụk. (Rome 15:16) Ti uwụtn̄kpọ Ezekiel ke ndidia eboho n̄wed oro esịnede etop Abasi. Ezekiel ama adia ofụri eboho n̄wed oro, ikedịghe ubak ubak esie. Enye ikemenke inyụn̄ imek n̄kpri mben̄e oro ẹkpekemde ye ọkpọ ọkpọ udọn̄ esie. Ukem ntre, ikpenyene nditịm ọkpọ ọkpọ ukpepn̄kpọ Bible ye mme n̄wed Christian nnyịn man asan̄a ikpat kiet ye uwak udia eke spirit, ndien ikpenyene ndidia kpukpru se ẹnịmde ke okpokoro eke spirit, esịnede mme akpanikọ oro otụn̄ọde akan.
15 Nte nnyịn ye akam imesisịn ukeme ndinyene ifiọk ọkpọsọn̄ udia? Ndisan̄a ikpat kiet oyom ete ifiọk ye asian nnyịn ọkọri ebe ntọn̄ọ ifiọk koro nnyịn ikot ite: “Owo ekededi eke awapde eba anana ifiọk aban̄a ikọ edinen ido, koro enye edide kan̄a eyen nsek. Edi ọkpọsọn̄ udia enyene mmọemi ẹma ẹkekon̄ ẹwọrọ idaha, kpa mmọemi otode ke nnam-mmehe mmọ ẹma ẹkọ ifiọk ndidiọn̄ọ se ifọnde ye se idiọkde.” (Mme Hebrew 5:13, 14) Ih, ndinam n̄kọri ke n̄kan̄ eke spirit edi akpan n̄kpọ ndisan̄a ke nde ikpat oro esop Abasi onịmde.
Unana Udọn̄ Ibiọn̄ọke
16, 17. Didie ke Ezekiel akanam n̄kpọ ye unana udọn̄, nsahi, ye unana n̄kpan̄utọn̄?
16 Ezekiel ama onịm eti uwụtn̄kpọ n̄ko ke n̄kopitem inyụn̄ iyakke unana udọn̄ ye nsahi ọbiọn̄ọ enye. Ukem ntre, ke ndikaiso ye n̄kọri edisana usem, nnyịn isan̄a ke usụn̄ oro ubọn̄ ubọn̄ Andiwat Chariot oro asan̄ade. Ntem ẹmetịm nnyịn idem ndinam n̄kpọ nte ekemde ye mme ewụhọ esie, ẹsọn̄ọ nnyịn idem nditre ndidi se unana udọn̄ m̀mê nsahi mbon oro nnyịn itịn̄de etop ubiereikpe Jehovah inọ ẹbiọn̄ọde. Nte ekedide ye Ezekiel, Abasi ama ebebem iso ọtọt nnyịn ete ke ndusụk owo ẹyenen̄ede ẹbiọn̄ọ, ẹdide mbon nsọn̄ibuot ye nsọn̄esịt. Mmọ eken idikopke koro mmọ mîyomke ndikpan̄ utọn̄ nnọ Jehovah. (Ezekiel 3:7-9) Edi mmo eken ẹyedi mbon mbubịk, nte Ezekiel 33:31, 32 ọdọhọde ete: “Mmọ ẹdi ke ọtọ fo, kpa nte mbio obio ẹdide, ẹnyụn̄ ẹtie ke iso fo, kpa nte ikọt mi ẹtiede, mmọ ẹnyụn̄ ẹkop ikọ fo; edi inamke mmọ: koro mmọ ẹnamde nte mbonima ke n̄kpọkinua mmọ, edi esịt mmọ ẹbịne udori mmọ. Ndien mmọ ẹse fi ke ikwọ mbonima, eke owo edinem uyo, ọfiọk nditịm mbre ndido: ndien mmọ ẹkop ikọ fo, edi inamke mmọ.”
17 Nso ididi utịp? Eze 33 Ufan̄ikọ 33 adian do ete: “Ndien ke ini enye edide (sese, ke edi) mmọ ẹyefiọk, ndien, ẹte ke prọfet kiet okodu ke otu mmọ.” Ikọ ẹmi ẹwụt ke Ezekiel ikakpaha mba ke ntak unana n̄kpan̄utọn̄. Unana udọn̄ mbon en̄wen ikanamke enye anana udọn̄. Edide mme owo ẹma ẹkpan̄ utọn̄ m̀mê ikakpan̄ke, enye ama okop uyo Abasi onyụn̄ anam utom esie ama.
18. Mme mbụme ewe ke afo okpobụp idemfo?
18 Esop Jehovah oro ẹkụtde ke enyịn otịm ọsọn̄ọ atan̄a idahaemi ete ke akpana kpukpru owo ẹten̄e Abasi ẹnyụn̄ ẹnọ enye ubọn̄. Nte afo emesisịn ifịk ke ini ẹsụkde fi uyo ke ntak adade uko uko idaha ke edinọ ikọ ntiense Obio Ubọn̄, ke ndinyene eti ido ke usụn̄uwem fo? Nte afo emesisọn̄ọ ada ke ini afo edide iwụk itie mfịghe koro esịnde ndibọ iyịp, ndituak ibuot nnọ mme n̄kpọ idiọn̄ọ idụt, ndidia mme usọrọ nduọkodudu ererimbot?—Matthew 5:11, 12; 1 Peter 4:4, 5.
19. Kaban̄a ndausụn̄, nso ke nnyịn idinam edieke nnyịn isan̄ade ikpat kiet ye chariot Jehovah eke enyọn̄?
19 Usụn̄uwem emi idịghe mmemmem, edi ẹyenyan̄a mmọ eke edimede ime tutu osịm akpatre. (Matthew 24:13) Ye un̄wam Jehovah, nnyịn idiyakke mbon ererimbot ẹnam nnyịn itie nte mmọ ndien ke ntem ẹnamde nnyịn ikûsan̄a ikpat kiet ye chariot Jehovah eke enyọn̄. (Ezekiel 2:8; Rome 12:21) Edieke nnyịn isan̄ade ikpat kiet ye esop mbiet-chariot emi mme angel ẹnamde, nnyịn usọp usọp iyebere ye ndausụn̄ ye item emi ibọde ebe ke esop Abasi oro ẹkụtde ke enyịn. Jehovah ọmọnọ se nnyịn iyomde man ikan ke en̄wan oro in̄wanade kaban̄a mbuọtidem nnyịn, man isọn̄ọ imụm Ikọ uwem ikama, man inyụn̄ isọn̄ọ iwụk enyịn ise mme ata idem n̄kpọ eke spirit oro ọkọn̄ọde ke Ubọn̄ Ubọn̄ Andiwat chariot eke enyọn̄.
Edemede Esịt Ndisan̄a Ikpat Kiet
20. Nso idi ndusụk n̄kpọ oro Ezekiel ekewetde onịm oro ekpedemerede nnyịn esịt ndisan̄a ikpat kiet?
20 Mme n̄kukụt Ezekiel ẹkpenyene ndidemede nnyịn esịt ndisan̄a ikpat kiet. Enye n̄kukụre ikatan̄ake ubiereikpe Abasi idori Israel ke idem edi n̄ko ama ewet mme prọfesi aban̄ade edifiak n̄wụk. Ezekiel ama anyan ubọk owụt Enyeemi edinyenede unen ndikara ke ebekpo Jehovah ke edikem ini. (Ezekiel 21:27) Ubọn̄ Ubọn̄ Asan̄autom oro, “David,” eyefiak atan̄ ikọt Abasi obok onyụn̄ ọbọk mmọ. (Ezekiel 34:23, 24) Okposụkedi Gog eke Magog edin̄wanade ye mmọ, Abasi eyenyan̄a mmọ ndien ẹyenyịk mme asua Esie ‘ndifiọk Jehovah’ idem nte mmo ẹdụkde nsobo. (Ezekiel 38:8-12; 39:4, 7) Ekem mme asan̄autom Abasi ẹyedara anana-utịt uwem ke ndutịm edisana utuakibuot oro abuanade temple eke spirit. Mmọn̄ uwem oro ewetde oto edisana ebiet eyedi ebiet oro udia ye usọbọ otode, ndien ẹyeda udeme isọn̄ ẹnọ mmọ ke edidiọn̄.—Ezekiel 40:2; 47:9, 12, 21.
21. Ntak emi idaha Mme Ntiense Jehovah eyomfịn okponde akan eke Ezekiel?
21 Anaedi akaduai Ezekiel idem didie ntem ndiwet mme prọfesi oro! Edi, idaha Mme Ntiense Jehovah eyomfịn okpon akan. Nnyịn idu uwem ke ini ndusụk mme prọfesi oro ẹsude. Ke akpanikọ, nnyịn idi mme ọsọn̄idem andibuana ke ndusụk edisu. Ebede ke usụn̄ nte idude uwem, ndi nnyịn owo kiet kiet imowụt edinịm oro nnyịn inịmde ke akpanikọ nte ke Jesus ke akara idahaemi nte Enyeemi enyenede unen? Nte nnyịn ke idem nnyịn imonịm ke akpanikọ ite ke Jehovah eyesọp ndikpono idem esie onyụn̄ afak mbon oro ẹsan̄ade ikpat kiet ye esop esie esịn ke obufa ererimbot? (2 Peter 3:13) Utọ edinịm ke akpanikọ oro, ke asan̄ade ye utom mbuọtidem, ayarade nte ke nnyịn ke akpanikọ ke isan̄a ikpat kiet ye chariot Jehovah eke enyọn̄.
Ẹkaiso Ndisan̄a Ikpat Kiet
22. Nso ke ẹkeme ndinam man ẹfep mme n̄kpọ oro ẹkemede nditịmede owo man otodo ẹsọn̄ọ ẹmụm in̄wan̄în̄wan̄ usen̄kpọ ke n̄kan̄ eke spirit ẹkama?
22 Sia ‘ima ikesịn ubọk ke ufụn̄isọn̄,’ inaha nnyịn ise edem ye udọn̄ ndiyom n̄kpọ ekededi oro ererimbot enyenede ndinọ. (Luke 9:62; 17:32; Titus 2:11-13) Ntre ẹyak nnyịn itre ntụhọ ekededi ndibon n̄kpọuto ke isọn̄, ẹnyụn̄ ẹyak inam enyịn nnyịn efere, owụhọde ke Obio Ubọn̄. (Matthew 6:19-22, 33) Ndinam uwem nnyịn edi mmemmem, ndikpọnọde mbiomo uwem ofụri usen nnịm ke ebiet ekededi ikemede, eyen̄wam nnyịn ndisan̄a ikpat kiet ye esop Jehovah. (Mme Hebrew 12:1-3) Mme n̄kpọ oro ẹtịmerede owo ẹkeme ndibiọn̄ọ nnyịn ndikụt chariot eke enyọn̄ emi ye Andiwat enye. Edi ye un̄wam esie, nnyịn imekeme ndisọn̄ọ mmụm in̄wan̄în̄wan̄ usen̄kpọ ke n̄kan̄ eke spirit ikama, ukem nte Ezekiel akanamde.
23. Nso ke ana Mme Ntiense oro ẹnamde akpanikọ ẹnam ke ufọn mbufa owo?
23 Ubak mbiomo nnyịn nte Mme Ntiense Jehovah abuana ndin̄wam ediwak mbufa owo ndisan̄a ikpat kiet ye chariot Abasi eke enyọn̄. Ke 1990, se ikperede owo 10,000,000 ẹkedụk Editi n̄kpa Jesus Christ. Ke adan̄aemi ediwak otu mme owo ẹmi ẹkemede ndisidụk ibat ibat mbonoesop Christian, oyom mmọ ẹkụt nte edide akpan n̄kpọ ndinam n̄kọri ye esop Jehovah oro ẹkụtde ke enyịn. Nte Mme Ntiense oro ẹnamde akpanikọ, nnyịn imekeme ndin̄wam mmọ ebe ke edu oro iwụtde ye nsịnudọn̄ oro inọde.
24. Nso ke nnyịn ikpenyene ndinam ke ata akpatre ini emi?
24 Emi edi ata akpatre ini. Ye enyịn mbuọtidem, nnyịn imokụt chariot eke enyọn̄ oro atuakde ada ke iso nnyịn. Ubọn̄ ubọn̄ Andiwat Chariot ọmọnọ esop esie oro ẹkụtde ke enyịn utom edikwọrọ ikọ nnọ mme idụt man, ke akpatre, mmọ ẹkpefiọk enyeemi Jehovah edide. (Ezekiel 39:7) Bọ ufọn nte ekekeme to akwa ifet emi ke ndibuana ke ndiwụt unen itie edikara Abasi ye edinam edisana enyịn̄ esie asana ebe ke ndisan̄a ikpat kiet ye chariot Jehovah eke enyọn̄.
Didie ke Afo Ọkpọbọrọ?
◻ Ezekiel okonịm nso uwụtn̄kpọ adan̄a nte utom esie akabuanade?
◻ Nso ke ọwọrọ ndisan̄a ikpat kiet ye esop Abasi?
◻ Didie ke Ezekiel ekese ikọ Jehovah?
◻ Didie ke nnyịn ikeme nditiene uwụtn̄kpọ Ezekiel ke ndinam n̄kpọ ye unana udọn̄?
◻ Nso ikpedemede mme asan̄autom Jehovah esịt ndisan̄a ikpat kiet ye chariot esie eke enyọn̄?
[Mme Ndise ke page 15]
Nso ke ẹyom man ẹsan̄a ikpat kiet ye chariot Jehovah eke enyọn̄?
[Ndise ke page 16]
Ezekiel ama owụt esịtekọm aban̄a mme ifetutom oro Abasi ọkọnọde enye. Nte afo omowụt?