Dụk Mbono District “Mme Ama Ubọhọ-Ufụn”!
ỌNỌ-UTỊP item Bible usen ita ke ebet fi. Du ke itie ke n̄kanika 9:20 ke usenubọk Friday ke ini mbono ọtọn̄ọde ye ikwọukwak. Dara utịn̄ikọ ediberede oro, “Ntak Owụkde Enyịn Ese Mfọnmma Ibet Ubọhọ-Ufụn?,” ye akpatre ikpehe ke edinam usenubọk, kpa utịn̄ikọ ibuotikọ mbono: “Uduak ye Nte Ẹdade Ubọhọ-Ufụn Emi Abasi Ọnọde Nnyịn Ẹnam N̄kpọ.”
Ke uwemeyo Friday, ẹyenọ mme Christian item ndiyọhọ utom mmọ nte mme asan̄autom Abasi. “Ndisịn Idem—Ke Mme Utom N̄kpa M̀mê ke Utom Jehovah?” ye “Mbon Oro Ẹbọhọde Ufụn edi Ẹnamde Ibat” ẹdi iba ke otu ibuotikọ oro ẹdinemede. Ẹyenọ owo nsịnudọn̄ ndida ubọhọ-ufụn oro enye enyenede nnam n̄kpọ Jehovah ke drama oro ẹsịnede ọyọhọ ọyọhọ usịnen̄kpọ. Edida enye ito mme ifiọk n̄kpọntịbe Ezra ye eke mme nsan̄a esie ẹmi ẹketode Babylon ẹfiak ẹnyọn̄ọ Jerusalem ke 468 B.C.E. man ẹkediọn̄ temple Abasi.
Usenubọk Saturday eyekama nneme ikpehe ita, “Ubọhọ-Ufụn ye Mbiomo ke Ekpụk Ubon.” Etienede utịn̄ikọ udụn̄ọde idem oro “Nam Idemfo Ọbọhọ-Ufụn Man Anam N̄kpọ Jehovah” edidi utịn̄ikọ aban̄ade uyakidem ye baptism Christian. Ke uwemeyo ediwak owo ẹyetie ye idotenyịn ẹbet ikpehe oro “Nte Ndọ Edi Ukpọhọde Inemesịt?” Ikpehe oro eyesịm utịt ye akpan n̄kpọ oro nte eyịghe mîdụhe edidade akwa idara isọk kpukpru mme ama ubọhọ-ufụn.
Afo eyeyom ndidu ke usenubọk Sunday man okop nneme ikpehe ita oro “Ndinam Utom Nte Mme Ọkọ Owo.” Emi eyeneme n̄ke Jesus aban̄ade iyịre ye iyak eyenyụn̄ anam an̄wan̄a udeme emi nnyịn ikemede ndinyene ke edisu esie. Edinam usenubọk eyesịm utịt ye akpan nneme ẹmi “Du ke Edidemede ke ‘Utịt Ini’” ye “Anie Edibọhọ Ini ‘Ukụt’?” Ekem, ke uwemeyo, afo uduyomke nditaba utịn̄ikọ an̄wa oro, “Nditoro Obufa Ererimbot Ubọhọ-Ufụn Abasi.” Mbemiso nduaidem nduaidem utịn̄ikọ ediberi, ẹyeneme ibuotikọ ukpepn̄kpọ Enyọn̄-Ukpeme urua oro. San̄a ye magazine fo oro edikpepde urua oro.
Ke ọfiọn̄ November ye December, 1991, ye January, 1992, ẹmetịm se ibede mbono 66 ke ofụri Nigeria ikpọn̄, ntem kiet eyedu emi mîdiyomke usụn̄ ikpọn̄ ufọk fo. Nam ndụn̄ọde ye Mme Ntiense Jehovah ke n̄kann̄kụk ban̄a ini ye ebiet mbono oro ekperede fi akan.