Ibịghike Udọn̄ọ M̀mê N̄kpa Ididụhe Aba!

IDỤHE owo ndomokiet oro adarade ndidọn̄ọ, m̀mê mme owo ndiyom ndikpa. Akwa ekpepn̄kpọ mban̄a ibọkusọbọ ebuana otuowo ọsọn̄ọ etịn̄ ete: “Ediyom oro ẹyomde anyan uwem etie nte ekpere ndidi eke ofụri ererimbot ke ofụri mbụk ye ke ata ediwak n̄kaowo. Emi enyene ebuana ye akpan ubịnikọt nnyom edikpeme idem . . . Ponce de Leon edi n̄kukụre ọwọrọetop n̄kan ke otu anyan udịm mme owo oro ẹkedade uwem mmọ ndiyom anyan uwem. Ẹnam ekese ifiọk ukọkudọn̄ọ ẹnọ editịm anyan uwem nnịm ebe ke ndibiọn̄ọ udọn̄ọ ye n̄kpa.”

N̄kpa esinam owo esịtidem nnyịn okop ubiak etieti tutu ke ini enye akande mme ufan ye mbonubon, nnyịn nte ido edide imesikpere ndidomo ndibiọn̄ọ odudu esie. N̄wed oro, Funeral Customs the World Over ọdọhọ ete: “Idụhe otu ndomokiet, ẹdu ke ekịm nte ẹkpedodu ke n̄kan̄ kiet m̀mê ẹtat enyịn nte ẹkpetatat ke n̄kan̄ eken, oro ke ẹyakde ifụre ifụre ẹnọ idemesie ye se enye enyenede mîsibụkke mme okpo ikọt esie ye usọrọ. . . . Emi oyụhọ ntotụn̄ọ udọn̄ ofụri ekondo. Ndinam emi etie nte ‘enen,’ ndien nditre ndinam emi, akpan akpan mbon oro ẹtịmde ẹnyene ebuana ke ubon, ntụk, ẹbuana uwem, ọsọ ifiọkutom, m̀mê mme mbọbọ eken, etie nte se ‘mînenke,’ kpa edisio mfep oro mîdịghe ndammana n̄kpọ, n̄kpọ ndiseme m̀mê ndikop bụt mban̄a. . . . [Owo] edi odu uwem n̄kpọ oro obụkde akpan̄kpa esie ye usọrọ.”

Ntọn̄ọ Udọn̄ọ ye N̄kpa

Ekikere oro nte ke ẹyesio udọn̄ọ ye n̄kpa ẹfep usen kiet enyene ọkpọsọn̄ odudu ke ntre, edi ndi ntak odu ọnọ utọ edinịm ke akpanikọ oro? Ke akpanikọ odu, ndien enye owụt ifiọk, edi se ẹberide edem, onyụn̄ anana ndudue. Enye edi Ikọ Andibot nnyịn eke odudu spirit—kpa Edisana Bible.

N̄wed oro nte an̄wan̄ade anam ntọn̄ọ idiọk itie owo an̄wan̄a. Enye asian nnyịn ete ke Abasi okobot akpa owo oro, Adam, onyụn̄ onịm enye ke paradise in̄wan̄ ebietidụn̄ okodude ke ebiet kiet ke Middle East. Ẹkebot Adam edi mfọnmma; enye ikọfiọkke udọn̄ọ ye n̄kpa. Ikebịghike n̄wan edide ukem mfọnmma oro ama adiana ye enye, ndien mmọ ẹma ẹdara idotenyịn nsinsi uwem ke isọn̄ ọtọkiet.—Genesis 2:15-17, 21-24.

Inem inem idaha emi ikebịghike. Ntak-a? Koro Adam ke ibụk ama emek usụn̄uwem nda-ke-idem n̄kpọn̄ Abasi. Ọkpọsọn̄ utom, ubiak, udọn̄ọ, ndien ke akpatre n̄kpa ama osụn̄ọ. (Genesis 3:17-19) Nditọ esie ẹma ẹda orụk unana inem uwem oro Adam ekemekde ẹmana. N̄wed Mbon Rome 5:12 anam an̄wan̄a ete: “Idiọkn̄kpọ [okoto] owo kiet odụk ke ererimbot, n̄kpa onyụn̄ [oto] ke idiọkn̄kpọ oro odụk; n̄kpa onyụn̄ ebe osịm kpukpru owo, koro kpukpru owo ẹma ẹnam idiọkn̄kpọ.” N̄wed Mbon Rome 8:22 adian do ete: “Nnyịn imọfiọk ite ofụri ekondo ke omụm mmụm, onyụn̄ odu ke ubiak uman tutu osịm emi.”

Ke Isọn̄ M̀mê ke Heaven?

Edi, Bible ọsọn̄ọ ọnọ nnyịn nte ke ibịghike Abasi eyefiak owụk okopitem ubonowo ke idaha inemesịt oro Adam ye Eve ẹketabade. Ediyarade 21:3, 4 ọdọhọ ete: “Abasi ke Idemesie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” Prọfet eset kiet ukem ntre ama ebemiso ada okụt ini emi “andidụn̄ [mî]didọhọke ite, Ndọdọn̄ọ.”—Isaiah 33:24.

Nte afo emekeme ndikere mban̄a ererimbot oro ufọkibọk, ufọk unịmokpo, ye mme udi mîdụhe? Nte afo emekeme ndikere mban̄a edidu uwem n̄kaiso, ọbọhọde idem ndịk ukụt ye n̄kpa? Ih, un̄wọn̄ọ Abasi omotụk mme ntụk esịtidem kpukpru nnyịn ntotụn̄ọ ntotụn̄ọ. Edi, nnyịn ikeme didie ndifiọk nte ke utịbe idotenyịn emi enyene ekondo Isọn̄ nnyịn—idịghe heaven? Tịmfiọk udọn̄ikọ Itien̄wed Abasi oro ẹkesiakde mbemiso. Mme akpa ufan̄ikọ Ediyarade ibuot 21 ufan̄ikọ 1-3 etịn̄ aban̄a “obufa enyọn̄ ye obufa isọn̄.” Ẹnọ in̄wan̄în̄wan̄ utịn̄ikọ nte ke Abasi eyedu ye ubonowo ye nte ke mmọ ẹyedi ikọt esie. Editịn̄ ntụk “mmọ eke ẹdụn̄de ke esịt,” ẹmi “ẹfen[de] mme idiọkido mmọ” etiene un̄wọn̄ọ oro odude ke n̄wed Isaiah nte ke owo ndomokiet ididọn̄ọke.

Ntre mme ọnọ nsịnudọn̄ un̄wọn̄ọ ẹmi aban̄a uwem ke isọn̄! Ndien mmọ ẹdu ke n̄kemuyo ye akam oro Jesus ọkọbọn̄de ọnọ Ete esie ete: “Yak inam uduak Fo; nte ẹnamde ke heaven, yak inam ke isọn̄ kpasụk ntre.”—Matthew 6:10.

Ntak Edide Usọp Usọp?

Mme Ntiense Jehovah ẹmen̄wam ediwak million owo ndididiọn̄ọ nte ke mme un̄wọn̄ọ ẹmi ẹyesu ke n̄kpet n̄kpet ini iso. Nte ededi, ke nso isọn̄ ntak, ke mmọ ẹtịm ẹfiọk ẹban̄a emi? Ke ntak akakan uyarade nte ke nnyịn idu uwem ke “ukperedem ini” eke editịm n̄kpọ emi, m̀mê ndutịm, mme n̄kpọ ke isọn̄. (2 Timothy 3:1-5) Mme mbet Jesus ẹma ẹbụp ẹban̄a idiọn̄ọ aban̄ade ini emi akpatre ini editịm n̄kpọ emi edidide. Ke ibọrọ Jesus ama ebemiso etịn̄ ke nde ke nde mme n̄kpọntịbe ererimbot oro ẹkọridẹ-kọri ẹmi ẹdade itie toto nte Ekọn̄ Ererimbot I akasiaha ke 1914.a Ekem enye ama adian do ete: “Ke ini ẹkụtde kpukpru n̄kpọ ẹmi, ẹfiọk ẹte Enye ke ekpere, odu ke enyịnusụn̄. Ke akpanikọ ke ndọhọ mbufo, Emana emi idibehe ifep tutu kpukpru n̄kpọ ẹmi ẹwọrọ ẹsu.” Ntre ndusụk owo oro ẹkedude uwem ke 1914 ẹyedu ndikụt utịt ndutịm ererimbot odude kemi.—Matthew 24:33, 34.

Ke ini oro Jehovah Abasi eyedọn̄ Eyen esie, Christ Jesus, ndiwọrọ n̄ka n̄kosobo kpukpru ntak ukụt ye mbaba mfep ke iso ediye ekondo Isọn̄ emi. Bible etịn̄ aban̄a edisio idiọkido mfep nte “ekọn̄ akwa usen Abasi, Andikara kpukpru n̄kpọ” ke Armageddon.—Ediyarade 16:14, 16.

Akwa udịm mme owo oro ẹbakde Abasi ẹyebọhọ enyene-ndịk n̄kpọntịbe emi ẹnyụn̄ ẹdu uwem ẹkụt emem emem ini ukara Christ Jesus ọtọn̄ọde. (Ediyarade 7:9, 14; 20:4) Okposụkedi ukara esie editode heaven, kpukpru mbon oro ẹdụn̄de ke isọn̄ ẹyedara mme utịp ufọn esie—mme andibọhọ ekọn̄ Armageddon ye ediwak million owo ke mme itie million oro ẹdinamde ẹset ke n̄kpa ke adiana ke adiana. Un̄wọn̄ọ oro ndien eyekabade edi ata idem n̄kpọ: “Enye [Christ] enyene ndida ubọn̄ tutu Enye onụk kpukpru mme asua Esie ke idak ikpat. Akpatre usua emi Enye edisobode edi n̄kpa.”—1 Corinth 15:25, 26.

Nnyịn ke ntre ye mbuọtidem imekeme ndifiori ite: “Ibịghike udọn̄ọ m̀mê n̄kpa ididụhe aba!” Emi idịghe n̄kpọ ndap, m̀mê enye ndidi se mîkemeke nditịbe. Enye edi un̄wọn̄ọ akpanikọ Jehovah Abasi, “emi mîkemeke ndisu nsu.” Nte afo eyekọn̄ mbuọtidem fo ke idotenyịn emi? Enye ekeme ndida ufọn nsọk fi ke nsinsi!—Titus 1:2.

[Mme Ikọ idakisọn̄]

[Ndise ke page 7]

Ibịghike eti nsọn̄idem ye nsinsi uwem ẹyeda itie udọn̄ọ ye n̄kpa