Mme Mbụme Ẹtode Mme Andikot
◼ Ntak emi Jesus ọkọtọn̄ọde Editi ye mme apostle esie ikpọn̄îkpọn̄ ndien idịghe ye mme mbet eken ẹmi ẹdidade isịn ke obufa ediomi?
Etie nte mbụme emi ọkọn̄ọ ke ukwan̄ ekikere oro nte ke Jesus okosop idem ye mme apostle ke mbubịteyo oro nditọn̄ọ Udia Mbubịteyo Ọbọn̄ ye esop Christian eke mbon oro ẹyetde aran oro ẹma ẹkedodu ke obufa ediomi. Utu ke oro, ke Nisan 14, 33 C.E., owo ikọtọ̄nọke kan̄a esop Christian oro, ndien Jesus ekedi ye mme apostle esie ndinịm usọrọ Passover eke mme Jew eke isua ke isua.
Edi akpanikọ, Jesus ama enyene mme mbet ke akande 12 oro ẹkediọn̄ọde nte mme apostle. Isua kiet mbemiso n̄kpa esie, enye ama osio mbet 70 ọdọn̄ ke isan̄ ukwọrọikọ. Ke enye ama ekeset, “Enye [ama] ayarade idem ini kiet owụt nditọete ẹmi ẹwakde ebe owo ikie ition.” Ndien mme mbet ‘ekperede owo ikie-ye-edịp’ ẹma ẹsop idem ke usen Pentecost. (1 Corinth 15:6; Utom 1:15, 16, 23; Luke 10:1-24) Edi ẹyak nnyịn idụn̄ọde otu oro okodude ye Jesus ke ini enye ọkọtọn̄ọde usọrọ eke isua ke isua oro ẹdiọn̄ọde nte Udia Mbubịteyo Ọbọn̄.
Luke 22:7, 8 etịn̄ ini, ọdọhọde ete: “Ekem osịm usen uyo eke leaven mîdụhe, eke ẹnyenede ndiwot passover ke esịt. Ndien Jesus osio Peter ye John ọdọn̄, ete, Ẹka ẹkenam passover ẹben̄e ẹnịm ẹnọ nnyịn, man nnyịn idia.” Mbụk oro akaiso ete: “Ẹnyụn̄ ẹdọhọ enyeneufọk ẹte, Andikpep ọdọhọ fi ete, Ubet isen odu m̀mọ̀n̄, eke ndidiade passover ye mbet Mi?” Ntre ke mbubịteyo oro Jesus okodu ye owo 12 ndinịm usọrọ mme Jew. Enye ama asian mmọ ete: “Ke ọkọdọn̄ Mi ọkpọsọn̄ ndidia passover emi ye mbufo, ndien ndikpa n̄kpa.”—Luke 22:11, 15.
Toto ke n̄tọn̄ọ esie ke Egypt, Passover ekedi usọrọ ubon. Ke nditọn̄ọ Passover, Abasi ama asian Moses ete ke ubon kiet kiet ekenyene ndiwot erọn̄. Edieke ubon ekekpride akaha ndita ofụri erọn̄ mma, ẹkenyene ndinọ ubon mbọhọidụn̄ ikot nditiene mbuana ke udia oro. Ntre, owụt ifiọk nte ke Passover eke 33 C.E., n̄wakn̄kan mbet Jesus ẹkesop idem ye mme ubon mmọ nte ido edide ndidia udia emi.
Edi ke “ọkọdọn̄” Jesus “ọkpọsọn̄” ndibuana se ikenyenede ndidi akpatre enyene-ufọn Passover, ye akpatre okoneyo mbemiso n̄kpa esie, ye mme ata n̄kpet n̄kpet anditiene enye, ẹmi ẹkenamde isan̄ ye enye ke ekese utom ukwọrọikọ esie. Ke utịt udia Passover oro, Jesus ama asian mmọ aban̄a obufa usọrọ emi kpukpru mme anditiene enye ẹkenyenede ndinịm ke ini iso. Wine usọrọ Christian ini iso emi edida aban̄a iyịp “Obufa Ediomi” oro ekenyenede ndida itie Ibet ediomi.—Luke 22:20.
Nte ededi, ke mbubịteyo Nisan 14, 33 C.E., obufa ediomi ikodụhe ke edinam, koro owo ikawaha—Jesus—kpa uwa ndida nsọn̄ọ. Ibet ediomi ke okosụk odu ke edinam. Owo ikọkọn̄ke enye kan̄a idian ke eto. N̄ko-n̄ko, enye ididụhe ke edinam tutu usen Pentecost oro obufa ediomi ye Israel eke spirit ẹdidade itie akani ediomi ye Israel eke obụk.—Galatia 6:16; Colossae 2:14.
Ntre, ẹdide mme anam-akpanikọ apostle 11 m̀mê mme mbet en̄wen ekededi ikodụhe ke obufa ediomi ke mbubịteyo oro. Ndien Jesus ikowụtke mme mbet eken ẹdide Jew unana unyịme ekededi ke ndiyak mmọ ẹsop idem ye mme ubon mmọ man ẹnịm Passover oro.