Mme Mbụme Oro Mme Andikot Ẹbụpde
Ini Jesus ọtọn̄ọde Udia Mbubreyo Ọbọn̄, mme mbet 70 emi enye ọkọdọn̄de ẹkekwọrọ ikọ mbemiso ini oro ẹkedu ke m̀mọ̀n̄? Ndi mmọ ẹma ẹfehe ẹkpọn̄ enye?
Sia mme mbet 70 oro mîkodụhe ini Jesus ọtọn̄ọde Udia Mbubreyo Ọbọn̄, ikpanaha ikere ke Jesus ikamaha mmọ aba mîdịghe ke mmọ ẹma ẹfehe ẹkpọn̄ Jesus. Jesus okoyom ndidu ye mme apostle esie ke ini edinam oro; ikanke oro.
Owo 12 oro ye owo 70 oro ẹkedi mme mbet Jesus. Enye ama ama kpukpru mmọ. Jesus ekebem iso emek irenowo 12 osio ke otu ediwak mbet esie onyụn̄ okot mbon oro mme apostle. (Luke 6:12-16) Ini Jesus odude ke Galilee, enye ama “okot mbet duopeba” onyụn̄ “osio mmọ ọdọn̄ ẹkekwọrọ obio ubọn̄ Abasi ẹnyụn̄ ẹkọk udọn̄ọ.” (Luke 9:1-6) Aka ko, ini Jesus osụhọrede aka Judea, enye ama “emek owo ata ye duop en̄wen onyụn̄ osio mmọ ọdọn̄ ẹsan̄a iba iba.” (Luke 9:51; 10:1) Kpukpru emi ẹwụt ke Jesus ama enyene mme mbet ke nsio nsio itie, emi ẹkesikwọrọde ẹban̄a enye.
Mme Jew emi ẹkekabarede ẹdi mbet Jesus ẹkesisụk ẹnenịm Passover emi ẹkesinịmde kpukpru isua. Anaedi mmọ ẹkesidiana ye mbonubon mmọ ẹnịm. (Ex. 12:6-11, 17-20) Ekpri ini mbemiso Jesus akpade, enye ye mme apostle esie ẹma ẹka Jerusalem. Edi enye ikọdọhọke yak kpukpru mme mbet imọ ẹto Judea, Galilee, ye Perea ẹdisop idem yak ẹnịm Passover. Imenen̄ede ikụt ke Jesus okoyom ndidu ye mme apostle esie kpọt ke ini edinam oro. Enye ọkọdọhọ mmọ ete: “Ama ọdọn̄ mi etieti ndidia passover emi ye mbufo mbemiso n̄kụtde ndutụhọ.”—Luke 22:15.
Jesus ama enyene eti ntak ndinam se enye akanamde oro. Ikebịghike, akana enye akpa nte “Eyenerọn̄ Abasi oro emende idiọkn̄kpọ ererimbot efep.” (John 1:29) Akana enye akakpa ke Jerusalem emi ẹkesiwade uwa ẹnọ Abasi toto ke ini edem. Eyenerọn̄ emi mme Jew ẹketade okoneyo emi mmọ ẹkekpọn̄de Egypt eketi mmọ nte mmọ ẹkewọrọde ke ufụn. Edi ufụn emi n̄kpa Jesus edisiode mme owo ayakan oro. (1 Cor. 5:7, 8) Se Jesus akanamde oro ama anam mme apostle 12 oro ẹkeme ndisịne ke otu mbon emi ẹkedade ẹtọn̄ọ esop Christian. (Eph. 2:20-22) N̄wed Ediyarade ọdọhọ ke edisana obio Jerusalem enyene “itiat idakisọn̄ duopeba” emi ẹwetde “enyịn̄ duopeba, kpa enyịn̄ mme apostle Eyenerọn̄ duopeba.” (Edi. 21:10-14) Omokụt do ke mme apostle emi ẹkesọn̄ọde ẹda ye Jesus ẹma ẹnyene ata akpan utom emi akanade mmọ ẹnam ke uduak Abasi emi akanade osu. An̄wan̄a nnyịn do ndien se ikanamde Jesus oyom ndidu ye mmọ ke akpatre Passover oro, ye ke Udia Mbubreyo Ọbọn̄ emi ẹkenịmde ke ẹma ẹkekụre Passover oro.
Mme mbet 70 oro ye mme mbet eken ikodụhe ye Jesus ke ini udia oro. Edi kpukpru mme mbet emi ẹkesọn̄ọde ẹda ẹma ẹdia ufọn Udia Mbubreyo Ọbọn̄ emi Jesus ọkọtọn̄ọde do. Kpukpru mme mbet emi ẹkedide mme Christian emi ẹyetde aran nte ini akakade, ẹma ẹdụk ediomi Obio Ubọn̄ emi Jesus eketịn̄de ye mme apostle esie okoneyo oro.—Luke 22:29, 30.