Itieutom Pope—Ndi Christ Ọkọtọn̄ọ?
“KE UFỌT Peter, akpa Bishop Rome, ye pope nnyịn idahaemi, John Paul II, odu anyan udịm mme akakan pope—oro ẹwakde ẹbe 260, ke akpanikọ. Ntre ke Anthony Foy, owo n̄ka friar Catholic ọdọhọ ke The Southern Cross, kpa n̄wedmbụk n̄kpọntịbe Catholic eke urua ke urua ke edem usụk Africa. Enye akaiso ete: “Edi udịm mme pope ẹmi mîtreke mi ke nnyịn ye mbuọtidem ikeme ndinyan ubọk n̄n̄wụt, ke ini ẹdọhọde nnyịn isọn̄ọ nte ke Jesus Christ ọkọtọn̄ọ Ufọkederi Catholic.”
Ndi ẹkeme ndidọhọ ye mbuọtidem nte ke anyan udịm mme pope ẹmi ọkọtọn̄ọ ye apostle Peter? Nte ekemde ye ukpepn̄kpọ ido ukpono Catholic, ẹdọhọ ke pope inan̄, Linus, Anacletus, Clement I, ye Evaristus ẹkeda itie Peter tutu osịm isua 100 C.E. Bible asiak Christian kiet emi ekekerede Linus oro okodụn̄de ke Rome. (2 Timothy 4:21) Nte ededi, idụhe n̄kpọ ndomokiet ndinọ ekikere nte ke Linus, m̀mê owo en̄wen ekededi, ekedi pope oro akadade itie Peter. Apostle John, emi ekewetde n̄wed ition eke Bible ke akpatre isua duop eke akpa isua ikie, iketịn̄ke n̄kpọ ndomokiet itụk ekededi ke otu mbon oro ẹsiakde ke enyọn̄ emi emi ẹdọhọde nte ẹkedade itie Peter mi. Ke akpanikọ, edieke edide ama odu andida itie Peter, nte owụtde ifiọk nte idịghe John ke idemesie ekpedi owo oro?
Kaban̄a ikọ oro nte ke Peter ekedi akpa bishop Rome, uyarade ndomokiet idụhe nte ke enye ama akam aka obio oro. Ke akpanikọ, Peter ke idemesie ọdọhọ ete ke imọ ikewet akpa n̄wed imọ ke Babylon. (1 Peter 5:13) Mfan̄a Catholic oro nte ke Peter akada “Babylon” nte ndedịbe enyịn̄ adade ọnọ Rome inyeneke isọn̄. Ata Babylon ama odu ke eyo Peter. N̄ko-n̄ko, ukeuke otu mme Jew ẹma ẹdu ke Babylon. Sia Jesus ọkọdọn̄de Peter ete anam ukwọrọikọ esie akpan akpan ye mme Jew oro ẹnade mbobi, owụt ifiọk ke ofụri ofụri ndinịm ke akpanikọ nte ke Peter akaka Babylon ke ntak emi.—Galatia 2:9.
Tịmfiọk, n̄ko, ete ke Peter akananam itịn̄ke iban̄a idemesie nte n̄kpọ ekededi ikan kiet ke otu mme apostle Christ. (2 Peter 1:1) Idụhe itie ndomokiet ke Bible oro ẹkotde enye nte “Edisana Ete,” “Akakan Ete,” m̀mê “Pope” (Latin, papa, kpa inem inem enyịn̄ adade ọnọ “Ete”). Utu ke oro, enye ke nsụhọdeidem ama ọsọn̄ọ eyịre ke mme ikọ Jesus ke Matthew 23:9, 10: “Ẹkûnyụn̄ ẹkot ndomo owo kiet ke isọn̄, ẹte, Ete; koro Kiet edi Ete mbufo, kpa Enyeemi odude ke heaven. Ẹkûnyụn̄ ẹyak ẹkot mbufo, ẹte, Mbọn̄; koro Kiet edi Ọbọn̄ mbufo, kpa Christ.” Peter ikọbọhọ utuakibuot. Ke ini Cornelius, akwa owoekọn̄ Rome “[ọkọduọde] enye ke ukot, atuak ibuot ọnọ enye.
. . . Peter [ama] emenede enye ete, Daha ke enyọn̄; ami ke idemmi ndi owo.”—Utom 10:25, 26.
Kaban̄a owo 260 oro ẹdọhọde nte ẹkedide pope, oku Foy onyịme ete: “Ediwak mmọ ikodotke n̄kokon̄ itieutom mmọ.” Ke ukeme ndinen̄ede emi, New Catholic Encyclopedia ọdọhọ ete: “Se ikedide mbubehe uduak ukara ekedi itieutom, idịghe edu pope kiet kiet ke idemesie. Enye ke idemesie ekeme ndidi ekedi edisana owo, didie didie owo, m̀mê idem obukpo owo.” Edi nte afo omonịm ke akpanikọ ete ke Christ akpada mme utọ owo oro anam n̄kpọ ke ibuot esie?
Ke usụn̄ ekededi, ikọ oro nte ke Jesus ọkọtọn̄ọ itieutom pope ikam inyeneke nsọn̄ọ ke Bible. Nte ekemde ye Encyclopedia of Religion, idem nditọ ukpepn̄kpo Catholic eyomfịn ẹnyịme ẹte ke “idụhe nnennen uyarade Bible ndomokiet nte ke Jesus ọkọtọn̄ọ itieutom pope nte taktak itieutom ke ufọkederi.”