Obufa N̄wed Aduai Ediwak Miliọn Owo Idem
IKPEHE kiet ke Mme Mbono “Mme Ama Ubọhọ-Ufụn” oro ọkọtọn̄ọde ke June isua oko ekedi utịn̄ikọ oro “Akakan Owo Oro Akanam Odude Uwem.” Akpan n̄kpọ esie ekedi edisio n̄wed oro enyenede ukem ibuotikọ oro. Se iwakde ibe owo miliọn itiokiet ke ofụri ererimbot ẹma ẹdodụk udịm udịm mbono ẹmi ẹnyụn̄ ẹkop utịn̄ikọ oro, emi ẹdude ye n̄kpri ukpụhọde ke ibuotikọ iba ẹmi ẹkebemde iso ke magazine emi.
Ẹma ẹmịn̄ se iwakde ibe n̄wed Akakan Owo Oro Akanam Odude Uwem miliọn 12 ke n̄kpọ nte usem 60. Enye akam odu ke usem Albania, Croatia, Hungary, Macedonia, Poland, Russia, Serbia, ye Slovenia eke mbon Edem Usiahautịn Europe. Se iwakde ibe owo 74,000 ẹmi ẹkedụkde mbono itiaba ke Soviet Union ẹma ẹnem esịt akpan akpan ndibọ enye ke usem Russia.
Ntọn̄ọ N̄wed Oro
Ibuotikọ n̄wed emi ẹma ẹbemiso ẹdu ke udịm udịm ibuotikọ ke adiana ke adiana ke mme nsiondi Enyọn̄-Ukpeme 137, ọtọn̄ọde ye nsiondi eke October 1, 1985. Ediwak mme andikot ẹkedọhọ ẹte ke esịt ikenemke mmimọ ke ini udịm udịm ibuotikọ emi ekedide edisịm utịt ke nsiondi eke June 1, 1991. Mmọn̄eyet ama asiaha Melissa, kpa eyen isua-12 ke Italy, ke ini enye okokotde akpatre mbụk oro ke Enyọn̄-Ukpeme. Enye ọkọdọhọ ete, “Okoneyo oro esierede usen mbono nnyịn, mma mbọn̄ akam nnọ Jehovah, mben̄ede n̄wed aban̄ade uwem Jesus. Ke ini ẹkesiode n̄wed oro, mma mmia ubọk tutu n̄kemeke ndimia aba.”
Ẹma ẹtịm ẹnyụn̄ ẹtan̄ ibuotikọ oro okodude udịm udịm ke Enyọn̄-Ukpeme mi ẹdọn̄ ke ediye n̄wed oro enyenede page-448 onyụn̄ enyenede ibuot 133. Ẹma ẹsịn ukeme ndiwụt kpukpru utịn̄ikọ oro Jesus eketịn̄de ye kpukpru edinam oro ẹkewetde ẹnịm ke ini uwem esie eke isọn̄, esịnede kpukpru n̄ke ye mme utịben̄kpọ esie. Ke udomo oro ẹkemede, ẹbụk kpukpru mbụk ẹmi ke adiana ke adiana nte mmọ ẹkedade itie. Ke utịt ibuot kiet kiet, mme itien̄wed Bible ẹdu emi ibuotikọ oro ọkọn̄ọde.
Ndusụk owo ẹkeme ndikere ẹte, ‘Ọfọn, ami mma n̄kokot n̄wed emi koro mma n̄kot udịm udịm ibuotikọ oro ke Enyọn̄-Ukpeme.’ Edi mme andikot Enyọn̄-Ukpeme ẹkebọ mbụk uwem Jesus ke n̄kpri mbai oro ẹkewetde ke mme ibuotikọ oro ẹkedude ke kpukpru urua iba ke ikpehe ini oro ebede isua itiokiet. Idem okposụkedi mme ibuotikọ ẹmi ẹkekamade ntọt ke ini enye ekedide ke adiana ke adiana, kere ban̄a nduaidem oro odude ke ndikot ofụri mbụk oro ke ekpri ibio ini nnyụn̄ n̄kụt ọyọhọ edinam akakan owo oro akanam odude uwem!
Ọsọn̄ọ Mbuọtidem
“Mma n̄kot n̄wed oro mma ke urua iba,” ntre ke n̄wan kiet otode Washington, D.C. ọtọt. “Ke adan̄aemi ami n̄kokotde, mmọn̄eyet ama esisiaha mi ke enyịn. Ami nyetre ndikot nnyụn̄ mbọn̄ akam nnyụn̄ ntua eyet. Enye ama anam etie mi ke idem nte n̄kpọ eke n̄kodude do ye Jesus, mbọde ufen ye enye. Idem urua kiet ke mma n̄kokot n̄wed oro mma, mmọn̄eyet okosụk asasiaha mi ke enyịn ke ini n̄kekerede mban̄a se ami n̄kokotde. Mma n̄kam nnen̄ede nsan̄a n̄kpere Jehovah ke enye ndikọnọ Eyen esie.”
“Mfịn ke n̄kụre ndikot n̄wed oro aban̄ade Jesus,” n̄wan kiet otode Pittsburgh, Pennsylvania, U.S.A., ekewet ntre. “Enye ekedi ata utịben̄kpọ. Mmọn̄eyet ama ọkọhọ mi ke enyịn nte n̄kokotde akpatre ibuot ifan̄ oro. Ndikot ofụri n̄wed oro ini kiet ama eye ata etieti. Ami n̄kemeke ndinen̄ede ntịn̄ nte enye etiede mi ke idem—n̄kukụre n̄kpọ edi ami mmama enye ata etieti!
Ndiye ndise ke n̄wed emi ẹtịp n̄kpọ ẹsịn ke nte enye otụkde owo ke idem, nte andikot n̄wed oro owụtde esịtekọm ọdọhọde ete: “Enye anam etie mi ke idem nte n̄kpọ eke ayakde esisịt ami ndikop nte mmọ ẹtuan̄ade ẹban̄a eyen oro akpade mi (ibuot 47) m̀mê nte ke nnyịn imọfiọk se Jesus ekekerede ke ini n̄wan oro ọkọdọn̄ọde uwọrọ-iyịp okotụkde enye onyụn̄ okopde nsọn̄idem (ibuot 46). Nte iso mmọ ẹtiede ẹdi ata idemn̄kpọ, enye otụk owo. . . . Utu ke ukot n̄wed ndidi ọkpọsọn̄ utom, n̄wed emi anam enye etie nte n̄kpọ inemesịt m̀mê idatesịt oro owo ọbọde ke utịt usen. Edu ye ntụk oro ẹdade ẹwet n̄wed emi, itịn̄ke n̄kpọ iban̄a se Jesus akanamde kpọt edi esịn un̄wana ke se enye ekekerede ye nte eketiede enye ke idem.”
Nsio Nsio Usụn̄ Nte Ẹkamade
Ediwak owo ẹma ẹtọtọn̄ọ ndikama n̄wed emi ke ukpepn̄kpọ Bible ubon mmọ. Ete ye eka ẹtode Silverton, Oregon, U.S.A., ẹwet ẹte, “Nnyịn imenyene n̄kpri nditọ ita ndien n̄wed emi edi mfọnmma ke ‘ukpepn̄kpọ ubon nnyịn eke ofụri okoneyo.’ Edi akpanikọ, odot didie ntem nte nnyịn ikpep n̄kpọ ye ntịn̄enyịn iban̄a idaha ima ima Ọbọn̄ nnyịn, Christ Jesus.”
Uyen kiet otode Japan anam an̄wan̄a ete: “Ete mi esikot ọnọ nnyịn ke adan̄aemi nnyịn iduọkde odudu ke ima ikadia udia mbubịteyo ikụre. Nte ubon, nnyịn itọn̄ọ ke ntọn̄ọ ntọn̄ọ ikot, edi ami mma mbiere nditọn̄ọ ke edem n̄wed oro n̄kot ibuot kiet kiet ke okoneyo kiet mbemiso ndụkde idap. Nte ededi, n̄wed oro esimụm owo udọn̄ ata etieti tutu ediwak ini eyedi se n̄kanika kiet usenubọk amiade mbemiso ndiọn̄ọde ke ini aka.”
Ediwak owo ẹkop n̄kpaidem ẹban̄a ediwak akpan n̄kpọ oro ẹsịnde ke mbụk ẹmi. Ntiense kiet ekewet ete: “Ami mma n̄kpep ata ediwak n̄kpọ oro mmen̄kakam mfiọkke.” Leta kiet otode California, U.S.A., ọkọdọhọ ete: “Ami ye n̄wan mi imodu ke akpanikọ ke se ibede isua 35, ndien ke esịt akpanikọ imekeme ndidọhọ ke nnyịn ikenyeneke n̄wed oro otịmde akama nduaidem nte enyeemi.”
N̄wed emi ekpenyene ndin̄wam ndimen nsu oro mfep nte ke Mme Ntiense Jehovah inịmke Jesus ke akpanikọ. Andikot kiet oro owụtde esịtekọm eketịn̄ ke usụn̄ emi ete: “Ami n̄kekemeke ndiyak enye nnịm, koro enye ekedide akakan uyarade ndiwụt ke unana ifiọk mbon oro ẹsidọhọde ke ikọt Jehovah inịmke mîdịghe ikponoke Jesus Christ edi nsu. Ofụri se oyomde nnyịn inam idahaemi edi ndisịn ibọrọ unana ifiọk mmọ ke ubọk mmọ.”
Ke akpanikọ n̄wed emi eyenyene akpan itie ke utom ukwọrọikọ Mme Ntiense Jehovah. Ntiense kiet ekewet ete, “Ami mma nnyak kiet nnọ n̄wan kiet oro nsinịmde ukpepn̄kpọ Bible ye enye, ndien odudu oro enye ekenyenede ke idem eyenan̄wan emi etie nte utịben̄kpọ. Enye ekpep n̄kpọ ke isua kiet idahaemi, ndien mma nnyene mfịna ke ndinam enye odụk mme mbonoesop.” Ke eyen ukpepn̄kpọ oro ama okokot ibuot 45 ke obufa n̄wed oro, Ntiense oro ama anam an̄wan̄a ete, “enye ama asian mi ete ke imọ imọn̄ idi ukpepn̄kpọ ke Sunday sia oro ekedide ini ọnọ enye ndida idaha esie.”
Mme Ọsọn̄urua N̄kpọ
Ke nditịm ntịn̄, Akakan Owo Oro Akanam Odude Uwem emetịn̄ n̄kpọ aban̄a mme Gospel. Ẹmenam ediwak n̄kpọ oro Jesus eketịn̄de onyụn̄ ekpepde an̄wan̄a, ntre ẹkeme ndikama n̄wed emi nte ọsọn̄urua n̄kpọ unam ndụn̄ọde, koro enye ọsọn̄ọde eyịre ketket ke mme mbụk Bible.
San̄asan̄a n̄kpọ kiet edi nte ke ẹbụk kpukpru mbụk ke adiana ke adiana. Ndikam n̄kûbọde mme ikọn̄n̄wed esie ye emi ke ekikere ekeme ndidi ata n̄kpọ un̄wam ke ndidiọn̄ọ ini emi ndusụk n̄kpọntịbe ẹkedade itie, ke ini utom ukwọrọikọ Jesus. Mme andikot mme Gospel ẹsiwak ndisobo se isitiede nte mme ntuaha. Obufa n̄wed oro, ye unana edidụri ntịn̄enyịn n̄wụt mmọemi, amanam mmọ ẹdu ke n̄kemuyo ke mbụk esie.
Nte mme Christian, ke akpanikọ nnyịn ikpoyomke ndifụmi ukpepn̄kpọ ntịn̄enyịn oro aban̄ade uwem anam-akpanikọ Uwụtn̄kpọ nnyịn, Jesus Christ. Ẹyak nnyịn, ke ntre, ikere ye ntịn̄enyịn iban̄a mme mbụk Gospel ye un̄wam obufa n̄wed oro, Akakan Owo Oro Akanam Odude Uwem.