Uwem ye Utom Jesus
IBUOTIKỌ oro “Jesus Okụre Kpukpru Se Abasi Ọdọn̄de,” ke page oro etienede, edi akpatre ikpehe ke udịm udịm “Uwem ye Utom Jesus” nnyịn. Ikpehe emi odu ke Enyọn̄-Ukpeme ke se ibede isua itiokiet, ke nsiondi 137 ke adiana ke adiana, ọtọn̄ọde ke nsiondi eke October 1, 1985.
Edi idotenyịn nnyịn nte ke ibuotikọ emi ke Enyọn̄-Ukpeme ama an̄wam fi nditiene item apostle Paul oro ‘ndiwụk enyịn nse Jesus’ nnyụn̄ nnịm ewụhọ Abasi ‘ndikpan̄ utọn̄ nnọ enye.’ (Mme Hebrew 12:2, 3; Matthew 17:5) Ke mme isua ẹmi ẹbede, ediwak owo ẹma ẹwet nditịn̄ nte ke ẹma ẹn̄wam mmimọ ndinam emi. Andikot kiet ekewet ete, “Etie nte n̄kpọ eke ami n̄kodude do n̄kpan̄ utọn̄ nnọ enye nnyụn̄ nse se enye anamde. Ami mmedima enye n̄kan ke ntak ibuotikọ ẹmi.”
Andikot en̄wen ekewet ete: “Etie nte kpukpru nsiondi ọdọn̄ọ n̄kpọ oro n̄katabade ke ini n̄kotde mbụk Bible oro. Ami mma ndara ndida nsio nsio n̄kpọtịbe ke uwem Jesus nsịn ke esịt ke adiana ke adiana usụn̄ oro mmọ ẹkedade itie nte ọfọnde akan ebe ke ndikot ibuotikọ kiet kiet.” Ediwak owo ẹma ẹwụt ukem esịtekọm oro ke ndikpep mban̄a ini ye ebiet emi Jesus ekekpepde onyụn̄ anamde mme n̄kpọ ke ini utom ukwọrọikọ esie.
N̄wan kiet ke Spain ọkọdọhọ ete: “Ami mmobon kpukpru ibuotikọ oro tọn̄ọ ke ntọn̄ọ. Mmọ ẹtịm ẹnọ ikpọ owo ọkọrọ ye nditọn̄wọn̄ ukpep. Ami ndi isua 44, mmonyụn̄ nsikop nduaidem ke ini n̄kotde mbụk ẹmi. Etie nte n̄kpọ oro ami n̄kodude ke mbụk n̄kpọntịbe kiet kiet.”
Ekaeyen kiet ke United States ekewet ete: “Ke ntak emi mme ibuotikọ ẹdide mbio mbio ye mmemmem usem mmọ, ebe mi amabuana ke ukpepn̄kpọ ubon nnyịn. Eyeneren mi ọsọn̄de-isua-itiaita ke emana ama ọdọhọ mi n̄wet n̄kọm mbufo nte ke ete imọ idahaemi ke ekpep Bible. Enye eben̄e ete usen kiet ke ini udịm udịm ibuotikọ emi edikụrede yak ẹsio mme ibuotikọ ẹmi ke n̄wed man imọ ikeme ndibuana mmọ ye nditọ ufọkn̄wed mmimọ.”
Iso-ọfọn afo abuana ekikere andikot emi ke ndondo emi ekesemede ete: “Mmokop mfụhọ esisịt ndikere nte ke mme ibuotikọ ẹmi ẹyesọp ndikụre nte ẹnemede ẹban̄a mme akpatre usen uwem Christ. Ke akpanikọ ami nyetaba itie mmọ ke Enyọn̄-Ukpeme.” Nnyịn idori enyịn ite ke mbufo ẹyedara akpatre ikpehe ke udịm udịm “Uwem ye Utom Jesus” nnyịn.