Nte Afo ke Ada Enye Anam N̄kpọ Ọyọhọ Ọyọhọ?
1 “Enen̄ede ọdọn̄ mi ndikama enye ke an̄wautom!” Ntre ke eyenete an̄wan kiet ekewet ke ama okokot Enyọn̄-Ukpeme eke January 1, 2008. Nte afo omodụn̄ọde ndusụk n̄kpọ emi ẹdude ke nsiondi ofụri owo, onyụn̄ okụt mme usụn̄ oro akpadade mmọ anam n̄kpọ ke an̄wautom?
2 “Se Nnyịn Ikpepde Ito Jesus”: Ekeme ndidi ikpehe emi ama an̄wam fi ọtọn̄ọ ukpepn̄kpọ Bible. Edieke mûkanamke ntre kan̄a, domo ndikot ibuotikọ ikpehe emi nọ enyeneufọk ndien ekem wụt se Jesus eketịn̄de ke ibuot nneme emi, nte ẹbụkde ke akpa ikpehe ekikere. Edieke enye owụtde udọn̄, da n̄kpri ibuotikọ emi ẹwetde nte mme mbụme oro ẹnamde owo ekere n̄kpọ domo ndika iso ke nneme oro. Dọhọ owo oro ọbọrọ mbụme oro. Tịn̄ ibio ibio ban̄a mme ndise oro ẹdude nyụn̄ be ka ikpehe ekikere efen. Emekeme ndineme mbahade iba ke ibuotikọ oro ke akpa ediwaha onyụn̄ eneme se isụhọde ke afiakde aka. Ben̄e idem ndida n̄wed Bible Ekpep n̄ka iso ke ukpepn̄kpọ oro.
3 “Ukpọhọde Inemesịt Ubon”: Ẹsiwet ikpehe enye emi ini kiet ke ọfiọn̄ ita, man an̄wam mme ebe, ibanndọ, ye mme ete ye eka ẹkụt nte ẹkemede ndida mme edumbet Bible nsịn ke edinam ke ini ẹnyenede mfịna oro oyomde ndibiat emem ubon. Afo n̄ko emekeme ndida mme ibuotikọ emi n̄n̄wam mbon emi mîdịghe Mme Ntiense ẹkụt ọniọn̄ oro odude ke Bible.—2 Tim. 3:16, 17.
4 Ikpehe N̄kpri Owo: Ikpehe oro, “Eke N̄kparawa Owo,” ọnọ andikot ufan̄ ndikere mban̄a mbụk Bible oro ẹnemede, ẹnyụn̄ ẹkeme ndida enye ndụn̄ọde akpan mbụk Bible. Emekeme ndida ibuotikọ emi n̄n̄wam n̄kparawa owo oro osobode ke an̄wautom ẹkụt nte ọfọnde ndikpep Ikọ Abasi. (Ps. 119:9, 105) Ke ini enemede nneme ye mme ete ye eka, emekeme ndiwụt ikpehe oro, “Kpep Nditọ Fo,” emi ẹsiwetde ini kiet ke ọfiọn̄ iba. Mmọ ẹkeme ndin̄wam n̄kpri nditọwọn̄ ndikpep n̄kpọ nto mbon oro ẹwetde ẹban̄a ke Bible. Nte afo amanam edi ido fo ndisikot ibuotikọ emi ye nditọ fo?
5 Mme Ikpehe En̄wen: Kpukpru ọfiọn̄, ikpehe oro “Mbụme Oro Mme Andikot Ẹbụpde” ẹsineme mbụme emi mbon oro mîdịghe Mme Ntiense ẹkemede ndibụp. Emekeme ndiwụt ibuotikọ emi ke ini ọnọde magazine ke utom eke ufọk ke ufọk. Ikpehe oro “Leta . . . ” esibụk n̄kpọ-ata emi mme isụn̄utom ye mbon en̄wen ẹsisobode nte mmọ ẹnamde utom ukwọrọikọ. Mmọ ẹkeme ndin̄wam mbon oro ẹnyenede udọn̄ ndikụt ke ẹkwọrọ eti mbụk emi ke ofụri isọn̄, man osu idiọn̄ọ edidu Christ.—Matt. 24:3, 14.
6 Ikpehe oro “San̄a Kpere Abasi,” emi ẹsimịn̄de kpukpru ọfiọn̄, oro esikọn̄ọde ke edikot Bible eke Ufọkn̄wed Utom Ukara Abasi, ekeme ndin̄wam mbon esịt akpanikọ ndiyom ndikpep mme n̄kpọ efen efen mban̄a Jehovah. Ẹsimịn̄ ikpehe oro, “Kpebe Mbuọtidem Mmọ” ikanan̄ ke isua man an̄wam mme owo ẹda enyịn ikike ẹkụt nte mbụk Bible ẹketịbede, anamde mme andikot Bible mfịn ẹnen̄ede ẹfiọk n̄kpọ-ata, ubiere, ye mbuọtidem mbon oro ẹwetde ẹban̄a ke Bible.
7 Esịt esinem nnyịn didie ntem ndisibọ Enyọn̄-Ukpeme emi ẹmịn̄de man ẹda ẹwọrọ an̄wautom! Ẹyak idomo ofụri ukeme nnyịn ndinen̄ede mmehe ye enye inyụn̄ inen̄ede ida enye inam n̄kpọ ke utom ukwọrọikọ nnyịn.