Nte Mbuọtidem Ekemede Ndin̄wam Owo Udọn̄ọ

MBỤK ẹban̄ade mme utịbe utịbe ukọkudọn̄ọ ke Bible ẹsọn̄ọ ẹnọ nnyịn nte ke Abasi ekere aban̄a mfọnọn̄kpọ nnyịn, mmọ ẹnyụn̄ ẹwụt odudu esie ndikọk udọn̄ọ. Sia mme utịbe utịbe ukọkudọn̄ọ ẹmi ẹkenọde Abasi ubọn̄ ẹnyụn̄ ẹdade ata ekese idatesịt ẹdi, owụt ifiọk ndibụp, Nte enọ edida edisana spirit n̄kọk udọn̄ọ ke osụk ododu?

Ibọrọ mbụme oro edi baba—ndien ntak ekeme ndikpa ndusụk owo idem. Mme utịbe utịbe ukọkudọn̄ọ oro ke akpa isua ikie ẹma ẹyọhọ uduak mmọ. The Illustrated Bible Dictionary etịn̄ nte enende ete: “Uduak ẹkenamde mme utịbe utịbe ukọkudọn̄ọ oro ekenyene n̄kpọ ndinam ye ukpepn̄kpọ ido ukpono, idịghe ye ibọkusọbọ.” Nso ikedi ndusụk uduak oro ẹnyenede n̄kpọ ndinam ye ukpepn̄kpọ ido ukpono oro mme utịben̄kpọ oro ẹkeyọhọde?

N̄kpọ kiet edi-o, mme utịbe utịbe ukọkudọn̄ọ Jesus ẹma ẹyọhọ uduak edinam ẹdiọn̄ọ enye nte Messiah. Ndien ke enye ama akakpa, mmọ ẹma ẹn̄wam ndisọn̄ọ nte ke edidiọn̄ Abasi ama odoro obufa esop Christian ke idem. (Matthew 11:2-6; Mme Hebrew 2:3, 4) N̄ko-n̄ko, mmọ ẹma ẹwụt ẹte ke un̄wọn̄ọ Abasi ndikọk ubonowo ke obufa ererimbot eyesu. Mmọ ẹsọn̄ọ mbuọtidem nnyịn nte ke ini ke akpanikọ eyedi emi “andidụn̄ [mî]didọhọke ite, Ndọdọn̄ọ: ẹfen mme idiọkido mmọ eke ẹdụn̄de ke esịt.” (Isaiah 33:24) Ndondo oro ẹkeyọhọde mme uduak eke akpa isua ikie ẹmi, owo ikoyomke mme utịben̄kpọ aba.

Odot ẹtịm ẹfiọk nte ke mme mbet Jesus eke akpa isua ikie ke idemmọ ẹma ẹnyene mme udọn̄ọ oro owo mîkọkọkke ke utịbe utịbe usụn̄. Emi edi n̄kaiso uyarade nte ke ẹketịm utịbe utịbe utom ukọkudọn̄ọ eke Jesus ọkọrọ ye eke mme apostle man ẹkpep mme akpanikọ oro ẹdide akpan n̄kpọ, idịghe man ẹda ẹsọbọ udọn̄ọ. Ke ini eketemede Timothy usọbọ ke unana nsọn̄idem oro ọkọkọbọde enye, Paul ama eteme enye ete ada wine, idịghe ukọkudọn̄ọ mbuọtidem. Paul, emi akanamde mme utịbe utịbe ukọkudọn̄ọ, ikenyeneke ubọhọ ke “n̄kukịm ke obụkidem” oro akakade iso ‘ndituai’ enye.—2 Corinth 12:7; 1 Timothy 5:23.

Ke ini mme apostle ẹma ẹkekpan̄a, enọ ukọkudọn̄ọ ama ebe efep. Paul ke idemesie ama owụt ete ke emi eyetịbe. Ke emende esop Christian odomo ye eyenọwọn̄, Paul ama ọdọhọ ete: “Ke ini n̄kedide eyenọwọn̄, ntịn̄ ikọ nte eyenọwọn̄, n̄kere ekikere nte eyenọwọn̄, nnyụn̄ nneni eneni nte eyenọwọn̄; edi mma n̄kabade n̄kpon, mmokụre ye ido uyen.” Akpan n̄kpọ oro odude ke uwụtn̄kpọ esie ekedi nte ke mme utịbe utịbe enọ eke spirit ẹkedi ubak ini uyen esop Christian. Mmọ ẹkedi “ido uyen.” Ntem, enye ama etịn̄ ete: “Mmọ [enọ unam utịben̄kpọ] ẹyekabade ẹdi ikpîkpu.”—1 Corinth 13:8-11.

Nte Mbuọtidem Ekeme Ndin̄wam ke Ini Nnyịn Idọn̄ọde?

Nte ededi, idem edieke nnyịn mîkọn̄ke mbuọtidem ke ukọkudọn̄ọ mbuọtidem, edi se itịmde idot ndibọn̄ akam nyom un̄wam Abasi ke ini nnyịn idọn̄ọde. Ndien ke akpanikọ inyeneke se ikwan̄ade ke mbon en̄wen ndibọn̄ akam mban̄a nnyịn. Edi mme akam ẹnyene ndiwụt eti ibuot nnyụn̄ ndu ke n̄kemuyo ye uduak Abasi. (1 John 5:14, 15) Itie ndomokiet idụhe ke Bible oro ẹdọhọde nnyịn ibọn̄ akam iyom ukọkudọn̄ọ mbuọtidem.a Utu ke oro, nnyịn ibọn̄ akam iben̄e ima ima un̄wam Jehovah ke ini idomo oro otode udọn̄ọ.

Bible owụt se mme anam-akpanikọ ẹkemede ndibọn̄ akam mban̄a ke ini udọn̄ọ ke ini enye ọdọhọde ete: “Jehovah eyemụm enye akama ke bed mmemidem: afo okpụhọde ofụri mbri esie ke udọn̄ọ esie.” (Psalm 41:3) Editie n̄kere Ikọ Abasi eyen̄wam mbon oro ẹdọn̄ọde ke n̄kan̄ eke ntụk. Andiwet psalm ekewet ete: “Ima fo, O Jehovah, omụm mi akama. Ke uwak ekikere emi odude mi ke esịt ndọn̄esịt fo enem mi esịt.”—Psalm 94:18, 19; se n̄ko 63:6-8.

Adianade do, oyom nnyịn iwụt eti ibuot ke n̄kpọ ẹban̄ade nsọn̄idem, ndien Bible ọnọ nnyịn item aban̄a emi. Otịm ọfọn akan ndidu uwem nte ekemde ye mme edumbet Bible akan ndisịn idem ke edida n̄kpọsọn̄ ibọk ke idiọk usụn̄, edin̄wọn̄ sika, ọkpọsọn̄ edin̄wọn̄ mmịn, m̀mê ekikak ekikak edidia udia ndien ekem ke ini ẹdade udọn̄ọ ẹdi, iwọn̄ọde ke mbrenyịn ibịne ukọkudọn̄ọ mbuọtidem. Ndibọn̄ akam nyom utịben̄kpọ ke ini owo ọdọn̄ọde idịghe ukpụhọ inọ ọniọn̄ ọniọn̄ edinam, utọ nte ke ndidia nti udia edieke odude mîdịghe ediyom un̄wam ibọkusọbọ oro odotde ke ebiet ememde utom, man ibọhọ udọn̄ọ oro ẹkemede ndifep.

Ikọ Abasi n̄ko esịn udọn̄ ọnọ nnyịn ndikọri nnennen idaha ekikere oro ẹkemede ndinọ nsọn̄idem ikpọkidem nnyịn ufọn. N̄wed Mme N̄ke ọnọ item ete: “Sụn̄sụn̄ esịt edi uwem obụkidem edi ufụp edi nyap ọkpọ.” “Idatesịt ọfọn owo ke idem: edi esịt mfụhọ an̄wan owo ọkpọ.” (Mme N̄ke 14:30; 17:22) Ndibọn̄ akam mben̄e edisana spirit man anam sụn̄sụn̄ edu ye idatesịt ẹkọri ke idem nnyịn ekeme n̄kukụre ndinyene ufọn nnọ nsọn̄idem ikpọkidem nnyịn.—Philippi 4:6, 7.

Nso Kaban̄a Ukọkudọn̄ọ Mbuọtidem?

Ke akpanikọ, idem edieke owo odude uwem nsọn̄idem adan̄a nte mme idaha esie ẹyakde, udọn̄ọ ekeme ndisụk mmụm enye. Nso ndien? Nte idiọk ekededi odu ke ndika mbịne ọkọkudọn̄ọ mbuọtidem ye idotenyịn edidi se ẹkọkde? Ih, idiọk odu. Edi ọkpọsọn̄ n̄kpọ mme ọkọkudọn̄ọ mbuọtidem eyomfịn ndinam ke mfọn. Ndien ndibiat okụk nnọ ọkọkudọn̄ọ mbuọtidem ke ini ẹkpedade okụk oro ẹbọ un̄wam ibọkusọbọ ekeme nditak nnyịn akamba n̄kpọ. Ke ẹsiode oro ẹfep, ntak ọnọde mbon oro ẹdiade ke idem mbon oro ẹsọpde ndinịm n̄kpọ ke akpanikọ okụk?

Ndusụk owo ẹkeme ndifan̄a ẹte: ‘Ke akpanikọ, anaedi ukọkudọn̄ọ mbuọtidem enyene ndusụk ufọn idem ekpedi ẹkọk ekpri ibat ke otu mbon oro ẹkade ẹbịne “mme ọkọkudọn̄ọ” ẹmi.’ Edi ẹkeme ndibụp m̀mê mme ọkọkudọn̄ọ mbuọtidem ẹsinen̄ede ẹkọk owo ekededi ke usụn̄ oro ebịghide. Encyclopædia Britannica onyịme ete: “Ẹnam ukeuke ndụn̄ọde oro enyenede-nyene adan̄a ẹban̄a ediwak n̄kpọ oro owo mîfiọkke ke ukọkudọn̄ọ mbuọtidem.”

Idem ekpedi etie nte ẹkọk ekpri ibat owo, emi idịghe uyarade nte ke edisana spirit anam utom. Ke Ukwọrọikọ oro ke Obot, Jesus ọkọdọhọ ete: “Ediwak owo ẹyedọhọ Mi ke usen oro, ẹte, Ọbọn̄, Ọbọn̄, nte nnyịn iketịn̄ke nte prọfet ke enyịn̄ Fo, inyụn̄ idaha enyịn̄ Fo iduọn̄ọ mme demon, inyụn̄ idaha enyịn̄ Fo inam ediwak n̄kpọ odudu? Ndien nyedọhọ mmọ adan̄aoro, nte, Akananam ndiọn̄ọke mbufo: ẹdianade Mi, mbufo mme anam ukwan̄n̄kpọ.” (Matthew 7:22, 23) Jesus ama ọdọhọ n̄ko ete ke odu ndusụk owo, okposụkedi mînyeneke unyịme Abasi, oro ẹdidade mme idiọn̄ọ ẹdụri ntịn̄enyịn mme owo ẹnọ idemmọ: “Koro mme Christ nsu ye mme prọfet nsu ẹyedaha ẹda, ẹnyụn̄ ẹwụt ikpọ mme idiọn̄ọ ye mme utịben̄kpọ, man, edieke mmọ ẹkpekemede, ẹda ndimek ikọt Abasi ẹwaha ẹkpọn̄ usụn̄.” (Matthew 24:24) Ke akpanikọ, ẹkeme ndisịn mme ọkọkudọn̄ọ eyomfịn ke mme ikọ oro, ye mme ndyọ ndyọ edinam mmọ, ediyom okụk nto mme owo kpukpru ini, ye edidọhọ oro ẹdọhọde nte inamde mme utịbe utịbe ukọkudọn̄ọ.

Utọ mbon oro isan̄ake ke nde-ikpat Jesus. Mmanie, ndien, ke mmọ ẹtiene? Apostle Paul owụt nnyịn emi ke ini enye ọdọhọde ete: “Satan ke idemesie ke oforo angel un̄wana. Ntre ke idịghe utịben̄kpọ edieke mme asan̄autom esie ẹforode mme asan̄autom edinen ido: edi utịt mmọ eyekem ye ubọkutom mmọ.” (2 Corinth 11:14, 15) Edieke mme ọkọkudọn̄ọ mbuọtidem mîkọkke udọn̄ọ oro mmọ ẹdọhọde nte ikọkde, do mmọ ẹdi mbon abian̄a, ẹsan̄ade ke usụn̄ Satan, “andibian̄a ofụri ererimbot.” (Ediyarade 12:9) Edi nso edieke, ke ata esisịt idaha, mmọ ẹkọkde mme udọn̄ọ? Nte idịghe nte ke ‘mme utom odudu’ mmọ ẹdi se Satan ye mme demon esie ẹnọde odudu? Ih, anaedi ntre!

Ini Ata Ukọkudọn̄ọ

Jesus akanam mme utịbe utịbe ukọkudọn̄ọ esie ye un̄wam edisana spirit Abasi. Mmọ ẹkewụt uduak esie ndikọk kpukpru mfịna unana nsọn̄idem owo ke edikem ini esie. Jehovah ọn̄wọn̄ọ ‘ndikọk mme idụt udọn̄ọ.’ (Ediyarade 22:2) Ndien enye idikọkke mme udọn̄ọ kpọt edi eyesio n̄kpa efep. John anam an̄wan̄a ete ke Jesus ekedi “man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Nso eti ukọkudọn̄ọ ke oro edidi ntem! Jesus eyefiak anam ukọkudọn̄ọ ẹbietde mbon oro ẹwetde ke Bible edi ke ata akamba udomo. Enye eyekam anam mme akpan̄kpa ẹset! (John 5:28, 29) Ini ewe ke emi editịbe?

Ke obufa ererimbot Abasi, emi, nte ekemde ye kpukpru uyarade, ama akasan̄a ekpere. Obufa ererimbot oro, emi ẹdidade ẹdi ke ẹma ẹkesio ukwan̄n̄kpọ editịm n̄kpọ emi ẹfep ke nsinsi, edidi ata edidiọn̄ ọnọ ubonowo oro enyenede eti esịt. Enye edidi ererimbot oro ndutụhọ mîdụhe. “[Abasi] eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” (Ediyarade 21:4) Nso ukpụhọde ke edidi ntem ye se nnyịn ikụtde akanarede nnyịn okụk mfịn!

Ke ntre, ke ini ọdọn̄ọde, bọn̄ akam nọ Abasi yom un̄wam. Ndien edide ọdọdọn̄ọ m̀mê odu ke nsọn̄idem, kpep nte edinyene nsinsi uwem ye unana udọn̄ọ edidide akpanikọ. Bọp mbuọtidem fo ke un̄wọn̄ọ Abasi emi ẹkemede ndiberi edem mi ebe ke ndikpep ediwak itie oro ẹtịn̄de n̄kpọ ẹban̄a enye ke Bible. Kpep nte uduak Abasi kaban̄a n̄kpọ emi ekperede ndisu nte ekemde ye ubatini esie. Kûnyene eyịghe, koro Ikọ Abasi ọn̄wọn̄ọ ọnọ nnyịn ete: “Enye eyemen n̄kpa ke nsinsi; Ọbọn̄ Jehovah onyụn̄ ọkwọhọde kpukpru iso mmọn̄eyet efep.”—Isaiah 25:8.

[Mme Ikọ idakisọn̄]

[Ndise ke page 7]

Mme utịbe utịbe ukọkudọn̄ọ Jesus ẹma ẹyọhọ uduak mmọ

[Ndise ke page 8]

Jesus eyefiak anam onyụn̄ anam mme utịbe utịbe ukọkudọn̄ọ ke akamba udomo