Mme Andikot N̄wed Nnyịn Ẹbụp Ẹte . . .
Ndi Mme Ntiense Jehovah Ẹsikọk Mme Owo Udọn̄ọ ke Utịbe Utịbe Usụn̄?
▪ Akananam Mme Ntiense Jehovah ikọkke udọn̄ọ ke utịbe utịbe usụn̄. Ukem nte Jesus, mmọ ẹnịm ke akpan utom mmimọ edi ndikwọrọ eti mbụk Obio Ubọn̄ Abasi. Mmọ ẹnyụn̄ ẹnịm ke ẹda n̄kpọ en̄wen, n̄kpọ emi enen̄erede edi akpan n̄kpọ ẹfiọk ata mme Christian, utu ke ukọkudọn̄ọ mbuọtidem.
Edi akpanikọ, mbọm ndikanam Jesus Christ ọkọk mme owo udọn̄ọ ke eyo mme apostle edi ata akpan n̄kpọ ọnọ kpukpru nnyịn. Ke ndinam ntre, enye ọkọsọn̄ọ nte ke ini imọ idikarade nte Edidem Obio Ubọn̄ Abasi, ke “andidụn̄ ididọhọke ite, Ndọdọn̄ọ.”—Isaiah 33:24.
Edi nso kaban̄a mfịn? Mme ọkọkudọn̄ọ mbuọtidem ke Christendom ọkọrọ ye ke ndusụk ido ukpono oro mîdịghe eke Christendom ẹdọhọ ke mmimọ imesikọk udọn̄ọ ke utịbe utịbe usụn̄. Edi Jesus ke idem esiemmọ ama enen̄ede odụri owo utọn̄ aban̄a mme owo emi ẹdidọhọde ke ikada enyịn̄ esie “inam ediwak utịben̄kpọ.” (International Standard Version) Enye ọyọdọhọ mmọ ete: “Akananam ndiọn̄ọke mbufo! Ẹdianade mi ke idem, mbufo mme abiatibet.” (Matthew 7:22, 23) Edi ndi inua-okot utịbe utịbe ukọkudọn̄ọ eyomfịn enen̄ede owụt ke ẹnyene edidiọn̄ Abasi?
Kere ban̄a se Bible etịn̄de aban̄a nte Jesus ọkọkọkde udọn̄ọ. Ke ini imende se N̄wed Abasi etịn̄de do idomo ye mme usụn̄ ukọkudọn̄ọ mbuọtidem eyomfịn, iyọsọsọp ifiọk m̀mê ukọkudọn̄ọ mbuọtidem eyomfịn oto Abasi.
Jesus ikọkọkke udọn̄ọ man ada ọkọ mbet m̀mê akwa udịmowo ọnọ idemesie. Utu ke oro, enye ọkọkọk ediwak owo udọn̄ọ ke ndịbe. Ediwak ini enye ama esidọhọ mbon oro enye ọkọkọkde udọn̄ọ ete ẹkûtịn̄ ẹnọ baba owo kiet.—Luke 5:13, 14.
Jesus ikesibọhọ okụk ke utịben̄kpọ oro enye akanamde. (Matthew 10:8) Ke adianade do, idụhe udọn̄ọ emi enye mîkekemeke ndikọk. Enye ama ọkọk kpukpru udọn̄ọ mbon oro ẹkedide ẹbịne enye ofụri ofụri, ndien idịghe mbuọtidem mmọ ke enye ekesida ọkọk mmọ udọn̄ọ. (Luke 6:19; John 5:5-9, 13) Jesus ama akam anam mme akpan̄kpa ẹset!—Luke 7:11-17; 8:40-56; John 11:38-44.
Okposụkedi emi Jesus akanamde mme utịben̄kpọ oro, akpan utom esie ikedịghe ndida mme aduai-owo-idem edinam unam utịben̄kpọ n̄kọ mbet. Utu ke oro, iso utom esie ekedi nditan̄a eti mbụk Obio Ubọn̄ Abasi. Jesus akatan̄ mme anditiene enye obon ọtọkiet man ẹkabade ẹdi mme anam-mbet, emi ẹdikpepde mbon en̄wen ẹban̄a idotenyịn edinyene mfọnmma nsọn̄idem ke Obio Ubọn̄ Abasi.—Matthew 28:19, 20.
Edi akpanikọ ke ndusụk mme anditiene Jesus ke eyo mme apostle ẹma ẹnyene san̄asan̄a enọ ukọkudọn̄ọ, edi emi ekenyene nditre. (1 Corinth 12:29, 30; 13:8, 13) Mfịn owo idaha ukọkudọn̄ọ ifiọk ata mme Christian, edi ẹda ima n̄waidem ẹfiọk. (John 13:35) Mme ọkọkudọn̄ọ mbuọtidem eyomfịn inamke mme owo emi ẹtode kpukpru idụt ye idaha ẹkabade ẹdi ata mme Christian emi ẹdianade kiet ẹnyene orụk ima oro.
Edi odu otu mme Christian emi ata ima anamde mmọ ẹdiana kiet, kpa ima oro okponde tutu anam mmọ ẹsịn ndinam kiet eken—m̀mê owo en̄wen ekededi—idiọk, idem ke ini ekọn̄ enen̄erede ọsọn̄ ubọk. Mmọ ẹdi mmanie? Mme Ntiense Jehovah. Ẹfiọk mmọ ke ofụri ererimbot nte mbon oro ẹnyenede orụk ima Christ. Ndidian mme owo emi ẹtode nsio nsio orụk, idụt, obio, ye ekpụk edi utịben̄kpọ, ndien edisana spirit Abasi anam emi ekeme nditịbe. Mbọk dụk kiet ke otu mbono esop mmọ man okụt emi ke idemfo.
[Ndise ke page 13]
Ndi mme ọkọkudọn̄ọ mbuọtidem eyomfịn (oro ẹwụtde ke nnasia) ẹnen̄ede enyene unyịme Abasi?