Ntọt M’ọkwọrọ Obio Ubọn̄
Ndiyak Un̄wana Mmọ Ayama ke India
MME okop-idatesịt Ntiense 11,524 ke ẹkwọrọ eti mbụk Obio Ubọn̄ ke India. (Matthew 24:14) Owo 1,066 ẹmi ẹkenade baptism ke isuautom 1991 ẹdi mme anditan̄a Obio Ubọn̄, ẹyakde un̄wana mmọ ayama ọnọ mbon en̄wen. Kpukpru mmọ ẹkekop inemesịt didie ntem ndikụt owo 28,866 ẹdụkde usọrọ Editi n̄kpa Christ!
◻ Ediwak owo ẹkebemiso ẹkpep ẹban̄a idotenyịn Obio Ubọn̄ ebe ke ikọ ntiense ido nneme. Ke uwụtn̄kpọ, Ntiense kiet ama eneme ye mme nsan̄autom esie, ẹmi n̄ko ẹdide mme anamusọ eto, aban̄a Obio Ubọn̄. Nsan̄autom kiet ama anam n̄kpọ aban̄a oro onyụn̄ ọtọn̄ọ ndiyak un̄wana esie ayama ọnọ ubon ye mme ufan esie. Mmọemi ke idara ẹma ẹnam utịbe utịbe etop Obio Ubọn̄ emi ebe osịm mmọ en̄wen. Nte mme mbụk ẹwụtde, ke ufan̄ isua ifan̄ kpọt, ‘se iwakde ikan owo 30 ẹma ẹnyịme akpanikọ.’ Jehovah ama ọdiọn̄ enye ye mbufa nditọete esie eke spirit ke ndikanam un̄wana mmọ ayama.
◻ Ekpri eyenete eren kiet ke esop efen ama ayak un̄wana esie ayama ebe ke ndinọ ekemmọ nditọ ufọkn̄wed ikọ ntiense ido nneme ke ufọkn̄wed. Ndusụk mmọ ẹma ẹnyene udọn̄ ke idotenyịn Obio Ubọn̄, ndien enye ama esiwak ndinam Bible an̄wan̄a mmọ tutu ebe ufọt okoneyo. Owo mmọ kiet, emi edide owo Catholic, ama ọsọn̄ọ ada ọnọ akpanikọ kpa ye oro oku okodụride enye utọn̄ aban̄a mme ubiak ubiak utịp oro ẹditienede edieke enye akade iso ndibuana ye Ntiense oro. Eyen ufọkn̄wed oro, nte ededi, ama onịm ke akpanikọ ete ke imọ ke ikekpep akpanikọ Bible ito Mme Ntiense, ndien enye ama akaiso ndibọ ifiọk. Nte ini akade enye ama ana baptism ndien idahaemi ke anam utom nte asan̄autom unamutom ke esop. Enye adara ke idotenyịn oro otode utịbe utịbe un̄wana akpanikọ!—Rome 12:12.
◻ Owo efen oro akakpan̄de utọn̄ ọnọ akparawa Ntiense emi ekedi ọwọrọetop eyen ufọkn̄wed kiet, kpa owo oro mînịmke edidu Abasi ke akpanikọ, emi ekesisakde mbon oro ẹdọhọde ke imonịm Abasi ke akpanikọ nsahi, edi usen kiet enye ama etiene abuana ke nneme onyụn̄ obụp ediwak mbụme. Idem ama akpa enye ke ini enye ọkọbọde ibọrọ oro esịnede ifiọk ke kpukpru mbụme esie ndien enye ama edisịm ubiere nte ke Bible edi Ikọ Abasi. Enye ama anam n̄kọri ke ifiọk Bible ndien ke akpatre ama ana baptism. Ete esie edide owo Hindu ama ọbiọn̄ọ enye okosịm udomo oro ebịnde enye osio ke ufọk. Nte ededi, nsọn̄ọnda akparawa emi kaban̄a akpanikọ edi se ẹkenọde utịp ke ini owo iba ke otu ata nditọeka esie iren ye ufan esie iba ẹkenyịmede akpanikọ ẹnyụn̄ ẹna baptism. Kiet ke otu nditọeka esie iren anam utom idahaemi ke n̄kọk itieutom ke India.
◻ Eyen ufọkn̄wed emi edide anam ndutịm ama etiene n̄ko abuana ke nneme ye akparawa Ntiense oro. Enye ekedi ata ọn̄wọn̄ sika ye ọkpọsọn̄ ọn̄wọn̄ mmịn. Ke idaha kiet, enye ama oyom ndimia owo iba ke otu ekemmọ nsan̄a nditọ ufọkn̄wed esie emi ẹkekpepde akpanikọ ẹto Ntiense oro. Ke ntak ẹkenyịmede akpanikọ, mmọ ẹma ẹsịn nditiene mbuana ke ntịme nditọ ufọkn̄wed ikonyụn̄ inọhọ iyịp ke ini ubịnikọt ubọ iyịp oro eyen ufọkn̄wed emi edide anam ndutịm mi akadade usụn̄. Akparawa emi idahaemi adat esịt ndidi Ntiense Jehovah oro ọnọde un̄wana.
◻ Ke ofụri ofụri, eyen ufọkn̄wed emi ekebemde iso ayak un̄wana esie ayama ekedi n̄kpọutom ke ndin̄wam owo 15 ke otu ubọkn̄ka esie ẹsịm uyakidem ye baptism ebe ke ndinọ mmọ ikọ ntiense ido nneme.
Edi n̄kpọ idara ndikụt ediwak owo ke akwa idụt oro ẹnyịmede idotenyịn Bible oro aban̄ade obufa ererimbot ẹnyụn̄ ẹdianade ye otu nditọete eke ofụri ererimbot oro Jehovah Abasi atan̄de obok man ẹdụn̄ ke nsinsi ke idak Obio Ubọn̄ esie.