Mme Edikabade Bible Eke Mbon Africa

Ẹkenam akpa edikabade Bible nsịn ke usem Africa ke Egypt. Ediọn̄ọde nte edikabade eke Coptic, ẹnịm ẹte ke usenọfiọn̄ mmọ ọtọn̄ọ ke ọyọhọ isua ikie ita m̀mê ikie inan̄ E.N. Ke n̄kpọ nte isua ikie ita ke ukperedem, ẹma ẹkabade Bible ẹsịn ke usem Ethiopia.

Mme usem ke ediwak itie ikie oro owo mîkewetke-wet ẹdi ẹsemde-sem ke edem usụk Ethiopia ye Sahara ẹkenyene ndibet tutu mme isụn̄utom ẹdisịm ke ọyọhọ isua ikie-19. Ke 1857 akpan ini ama edisịm ke ini Robert Moffat okokụrede edikabade Bible nsịn ke usem Tswana, kpa usem edem usụk Africa. Enye n̄ko ama emịn̄ enye ke ikpehe ke ikpehe ke ukwak umịn̄n̄wed oro ẹkamade ubọk ẹmịn̄. Emi ekedi akpa ofụri Bible oro ekemịn̄de ke Africa okonyụn̄ edi n̄ko akpa ofụri edikabade nsịn ke usem mbon Africa oro ke akpa owo mîkewetke-wet. Nte enemde, Moffat ama ada enyịn̄ Abasi Yehova ke edikabade esie. Ke nsiondi eke 1872 emi British and Foreign Bible Society okosiode, ẹda enyịn̄ oro Yehova ke mme akpan utịn̄ikọ oro Jesus eketịn̄de nte ẹwetde ke Matthew 4:10 ye Mark 12:29, 30.

Etisịm 1990 ẹma ẹkabade ofụri Bible ẹsịn ke usem 119 eke mbon Africa, ye mbak esie ẹdude ke uwetn̄kpọ 434 efen efen.