Edidu Messiah ye Ukara Esie

“Jesus emi, emi ẹmende Enye ẹkpọn̄ mbufo ẹdụk ke heaven, eyedi kpa [ke] ido emi mbufo ẹkụtde Enye ọnyọn̄de odụk ke heaven.”—UTOM 1:11.

1, 2. (a) Didie ke angel iba ẹkedọn̄ mme apostle Jesus esịt ke ini enye ọdọkde ke heaven? (b) Mme mbụme ewe ke idotenyịn aban̄ade edifiak ndi Christ edemede?

OWO duopekiet ẹkeda ke usụk usụk edem usiahautịn Obot Olives, ẹwụk enyịn ẹse ikpaenyọn̄. Ke ekpri ini oro osụk ebede Jesus Christ ama adaha ada ke otu mmọ, mbiet esie ama ọtọn̄ọ ndisop tutu obubịt enyọn̄ ofụk enye. Ke ediwak isua oro mmọ ẹkedude ye enye, irenowo ẹmi ẹma ẹkụt Jesus ọnọde ekese uyarade nte ke imọ ikedi Messiah; mmọ ẹma ẹkam ẹkop iduọesịt oro n̄kpa esie akadade edi ye akwa idatesịt oro ediset ke n̄kpa esie akadade edi. Idahaemi enye idụhe aba.

² Angel iba ẹma ẹbiọn̄ọde ke mbuari ẹnyụn̄ ẹtịn̄ ikọ ndọn̄esịt ẹmi: “Mbufo mbon Galilee, nsinam mbufo ẹdade ẹse ikpaenyọn̄? Jesus emi, emi ẹmende Enye ẹkpọn̄ mbufo ẹdụk ke heaven, eyedi kpa [ke] ido emi mbufo ẹkụtde Enye ọnyọn̄de odụk ke heaven.” (Utom 1:11) Emi ọnọ nsọn̄ọ didie ntem—Jesus ndidọk ndụk ke heaven ikọwọrọke ite ke enye ama okụre ye isọn̄ ye ubonowo! Ke edide isio ye oro, Jesus eyefiak edi. Nte eyịghe mîdụhe mme ikọ ẹmi ẹma ẹnam mme apostle ẹnyene idotenyịn. Ediwak miliọn owo mfịn n̄ko ẹda un̄wọn̄ọ aban̄ade edifiak ndi Christ ke ata akpan n̄kpọ. Ndusụk owo ẹsitịn̄ ẹban̄a enye nte “Edidi Ọyọhọ Ikaba” m̀mê “Editọn̄ọ Ntak Ndi.” Nte ededi, etie nte n̄wakn̄kan owo idiọn̄ọke se edifiak ndi Christ enen̄erede ọwọrọ. Christ afiak edi ke ewe usụn̄? Ini ewe? Ndien didie ke emi otụk uwem nnyịn mfịn?

Ido Oro Christ Afiakde Edi

3. Nso ke ediwak owo ẹnịm ke akpanikọ ẹban̄a edifiak ndi Christ?

³ Nte ekemde ye n̄wed oro An Evangelical Christology, “edidi ọyọhọ ikaba m̀mê edifiak ndi Christ (parousia) omowụk obio ubọn̄ Abasi, ke akpatre, in̄wan̄în̄wan̄, ye ke nsinsi.” Edi edinịm ke akpanikọ oro ẹnyịmede ntatara ntatara nte ke edifiak ndi Christ eyedi se ẹkụtde in̄wan̄în̄wan̄, edi se kpukpru owo ke ekondo ẹkụtde ata edikokụt. Man ẹsọn̄ọ ekikere emi, ediwak owo ẹsinyan ubọk ẹwụt Ediyarade 1:7, emi okotde ete: “Sese, Enye ọmọn̄ asan̄a ke obubịt enyọn̄ edi; kpukpru enyịn ẹyenyụn̄ ẹkụt Enye, ye mmọemi ẹkekịmde Enye.” Edi nte enyene ndida ufan̄ikọ emi nte ke ata se enye ọwọrọde edi oro?

4, 5. (a) Nnyịn isan̄a didie ifiọk ite ke Ediyarade 1:7 iwọrọke ntre ke ataata usụn̄ifiọk? (b) Didie ke mme ikọ Jesus ẹsọn̄ọ ifiọk emi?

⁴ Ti ete, ke ẹkewet n̄wed Ediyarade “ke idiọn̄ọ.” (Ediyarade 1:1, NW) Ndien, anaedi ufan̄ikọ emi edi ndamban̄a n̄kpọ; idem n̄kpọ, didie ke “mmọemi ẹkekịmde Enye” ẹkpekụt edifiak ndi Christ? Mmọ ẹma ẹkpan̄a ke se ikperede ndidi isua ikie 20 ẹmi ẹkebede! N̄ko-n̄ko, mme angel oro ẹkedọhọ ẹte ke Christ eyefiak edi ke “ido emi” enye akasan̄ade ọnyọn̄. Ọfọn, didie ke enye ọkọnyọn̄? Ye ediwak miliọn owo ẹdade ẹse? Baba, ibat ibat mme anam-akpanikọ kpọt ẹkekụt n̄kpọntịbe oro. Ndien ke ini mme angel oro ẹketịn̄de ikọ ẹnọ mmọ, nte mme apostle ẹkese Christ ke ataata usụn̄ nte anamde isan̄ ọnyọn̄ heaven? Baba, ntọn̄ enyọn̄ ama ofụk Jesus. Ndusụk ini ke oro ebede, anaedi enye ama ebe odụk heaven obio mme spirit nte owo eke spirit, oro enyịn owo mîkwe. (1 Corinth 15:50) Ntre, ke nnam n̄kaha, mme apostle ẹkekụt sụk ntọn̄ọ isan̄ Jesus; mmọ ikekemeke nditịn̄ enyịn nse utịt esie, kpa edifiak nnyọn̄ esie n̄ka heaven n̄kodu ye Ete esie, Jehovah. Mmọ n̄kukụre ẹkekeme ndikụt emi ebe ke enyịn mbuọtidem mmọ.—John 20:17.

⁵ Bible ekpep ete ke Jesus akafiak edi ke ata ukem usụn̄ oro. Jesus ke idemesie ama etịn̄ esisịt ini mbemiso n̄kpa esie ete: “Osụk esisịt, ndien ererimbot idikwe Mi aba.” (John 14:19) Enye n̄ko ama ọdọhọ ete ke “Ubọn̄ Abasi idịghe ke ido nte owo okụtde enye ke enyịn.” (Luke 17:20) Ke nso usụn̄ifiọk, ndien, ke ‘kpukpru enyịn ẹdikut enye’? Man ibọrọ, oyom nnyịn ibem iso inyene nnennen ifiọk iban̄a ikọ oro Jesus ye mme anditiene enye ẹkedade ẹtịn̄ ẹban̄a edifiak ndi esie.

6. (a) Ntak emi mme utọ ikọ nte “edifiak ndi,” “edibehe,” “edidi ọyọhọ ikaba,” ye “edidi” mîdịghe edikabade oro odotde ọnọ ikọ Greek oro pa·rou·siʹa? (b) Nso iwụt ite ke pa·rou·siʹa, m̀mê “edidu,” ebịghi akan ikpîkpu n̄kpọntịbe ibio ini ekededi?

⁶ Akpanikọ edi, Christ anam se itịmde ikpon ikan ikpîkpu ‘edifiak ndi.’ Utọ ikọ nte “edidi,” “edibehe,” m̀mê “editọn̄ọ ntak ndi,” etịn̄ aban̄a n̄kpọntịbe kiet ke esisịt ini. Edi ikọ Greek oro Jesus ye mme anditiene enye ẹkadade ọwọrọ ekese n̄kpọ akan oro. Ikọ oro edi pa·rou·siʹa, emi ke ataata usụn̄ ọwọrọde “ndidu ye” m̀mê “edidu.” N̄wakn̄kan nditọ ukpepn̄kpọ ẹnyịme nte ke ikọ emi ibuanake edibehe ikpọn̄îkpọn̄ edi n̄ko edikaiso ndu—nte emi andikara akade ekese Obio. Edidu emi idịghe n̄kpọntịbe ibio ini; edi san̄asan̄a ini, ikpehe ini oro ẹkemekde ẹnịm. Ke Matthew 24:37-39, Jesus ọkọdọhọ ete “edidi [“edidu,” NW] [pa·rou·siʹa] Eyen Owo” editie nte “mme usen Noah” emi okosịmde utịt ke Ukwọ. Noah ama ọbọp ubom onyụn̄ ọnọ mme idiọkowo ntọt ke ediwak isua mbemiso Ukwọ ekedide onyụn̄ ọkpọride idiọk editịm n̄kpọ oro efep. Ukem ntre, ndien, edidu Christ oro enyịn mîkwe ebịghi ke ufan̄ ini esịnede ediwak isua mbemiso enye n̄ko edisịmde utịt ke akwa nsobo.

7. (a) Nso iwụt ite ke pa·rou·siʹa idịghe se enyịn owo okụtde? (b) Didie ndien ini ewe ke itien̄wed oro etịn̄de nte ke “kpukpru enyịn” ẹyekụt edifiak ndi Christ edisu?

⁷ Nte eyịghe mîdụhe, pa·rou·siʹa idịghe se ẹkụtde ke ataata enyịn eke owo. Edieke enye ekpedide, ntak emi Jesus akpakabiatde ekese ini ntre, nte nnyịn idikụtde, ke ndinọ mme anditiene enye idiọn̄ọ man an̄wam mmọ ndidiọn̄ọ edidu emi?a Nte ededi, ke ini Christ afiakde edi ndisobo editịm n̄kpọ eke ererimbot Satan emi mfep, akpanikọ aban̄ade edidu esie eyeyarade ke akakan udomo ọnọ kpukpru owo. Edi adan̄aoro ke ‘kpukpru enyịn edikụt enye.’ Idem mme andibiọn̄ọ Jesus ẹyekeme ndidiọn̄ọ, ke oyomonsia, nte ke ukara Christ edi akpanikọ.—Se Matthew 24:30; 2 Thessalonica 2:8; Ediyarade 1:5, 6.

Ini Ewe ke Enye Ọtọn̄ọ?

8. Nso n̄kpọntịbe onịm ntọn̄ọ edidu Christ idiọn̄ọ, ndien ke m̀mọ̀n̄ ke emi akada itie?

⁸ Edidu Messiah ọtọn̄ọ ye n̄kpọntịbe oro osude mme prọfesi oro ẹban̄ade Messiah ẹmi ẹdude ndien ndien. Ẹyari enye anyanya nte Edidem ke heaven. (2 Samuel 7:12-16; Isaiah 9:6, 7; Ezekiel 21:26, 27) Jesus ke idemesie ama owụt ete ke edidu imọ eyenyene ebuana ye itie edidem imọ. Ke ediwak n̄ke, enye ama emen idemesie odomo ye eteufọk oro ọkpọn̄de ufọk ye ifụn esie, anamde isan̄ ke anyanini aka “anyan idụt” ke ebiet emi enye ọbọde “ubọn̄.” Enye ama otop utọ n̄ke oro kiet nte ibọrọ oro enye ọkọnọde ke mbụme oro mme apostle esie ẹkebụpde ẹban̄a ini emi pa·rou·siʹa esie editọn̄ọde; enye ama otop n̄ke efen koro “mmọ ẹkerede ẹte obio ubọn̄ Abasi ọmọn̄ ọtọn̄ọ idahaoro.” (Luke 19:11, 12, 15, NW; Matthew 24:3; 25:14, 19) Ntre ke ini emi enye okodude ke isọn̄ nte owo, edinọ enye ubọn̄ okosụk odu anyanini ke iso, ndida itie ke “anyan idụt” eke heaven. Ini ewe ke enye edida itie?

9, 10. Nso uyarade idu nte ke Christ ke akara idahaemi ke heaven, ndien ini ewe ke enye ọkọtọn̄ọ edikara esie?

⁹ Ke ini mme mbet Jesus ẹkebụpde enye ete: “Nso idinyụn̄ idi idiọn̄ọ edidi [“edidu,” NW] Fo, ye eke akpatre ini eyo emi?” Jesus ama ọbọrọ ke nditịn̄ nnọ mmọ mban̄a ini iso oro ke nde ke nde. (Matthew, ibuot 24; Mark, ibuot 13; Luke, ibuot 21; se n̄ko 2 Timothy 3:1-5; Ediyarade, ibuot 6.) Idiọn̄ọ emi ekem ye ọyọhọ ndise aban̄ade eyo ntịme. Edi ini emi mme ekọn̄ ofụri ererimbot, n̄kọri ke ubiatibet, mbiara ke uwem ubon, udọn̄ọ nditara nsuana, akan̄, ye unyekisọn̄ ẹnịmde idiọn̄ọ—idịghe nte mme mfịna n̄kann̄kụk edi nte n̄kpọntịbe ofụri ererimbot. Nte emi etie nte n̄kpọ oro ẹmehede? Usen kiet kiet oro ẹbede ẹsọn̄ọ nte ke se Jesus eketịn̄de aban̄a emi odot ye ọyọhọ isua ikie-20 emi nte ọfọnde.

¹⁰ Mme ewet mbụkeset ẹnyịme nte ke 1914 ekedi akpan ini ke mbụk ubonowo, akpan isua emi ediwak ke otu mfịna ẹmi ẹketọn̄ọde ndibe ubọk, ẹkọride ẹkesịm udomo ofụri ererimbot. Ih, mme n̄kpọntịbe ererimbot oro ẹkụtde ke enyịn ke ndisu prọfesi Bible kpukpru ẹnyan ubọk ẹwụt 1914 nte isua emi Jesus ọkọtọn̄ọde ndikara nte Edidem ke heaven. N̄ko-n̄ko, prọfesi ke Daniel ibuot 4 ọnọ uyarade ubatini oro adade nnyịn okosịm ata isua oro—1914—nte ini emi Edidem oro Jehovah emekde editọn̄ọde ukara esie.b

Ntak Edide Ini Afanikọn̄?

11, 12. (a) Ntak ọsọn̄de ndusụk owo idem ndinịm ke akpanikọ nte ke Christ ke akara ke heaven idem idahaemi? (b) Didie ke nnyịn ikeme ndinam se ikadade itie ke ẹma ẹkeyari Jesus anyanya nte Edidem an̄wan̄a?

¹¹ Nte ededi, ndusụk owo ẹyịk ẹte, ‘Ntak emi ererimbot odude ke afanikọn̄ ntem edieke Messiah akarade ke heaven? Nte ukara esie inyeneke odudu?’ Uwụtn̄kpọ ekeme ndin̄wam. Idụt kiet odu ke idak idiọk adaibuot ukara. Enye owụt idiọk ndutịm ye odudu esie ke ofụri ikpehe idụt oro. Edi ẹnam umekowo; eti owo akan. Idahaemi nso iditịbe? Nte esidide ke ndusụk idụt ukara mbio obio, ini edibe ke akani ukara ndụk obufa ukara esidu emi edide ndusụk ọfiọn̄ mbemiso obufa adaibuot ukara ọtọn̄ọ utom. Didie ke owo iba ẹmi ẹdinam n̄kpọ ke ikpehe ini emi? Ndi eti owo emi eyesọsọp obụmede odụk onyụn̄ abiat kpukpru ndiọi n̄kpọ oro andikebem enye iso n̄kara akanamde ke ofụri idụt oro? Nte enye, utu ke oro, ikpebemke iso iwụk ntịn̄enyịn ke ibuot obio ukara, ọtọn̄ọde obufa esop ukara onyụn̄ osịbe ebuana ye ndiọi ufan ye nsan̄a akani adaibuot ukara? Ke usụn̄ emi, ke ini enye ọtọn̄ọde ndikara ọyọhọ ọyọhọ, enye ekeme nditie ke eti ifụm ukara anam utom uforo uforo. Amaedi idiọk adaibuot ukara oro, nte enye ididaha ekpri ini oro osụhọde ọnọ enye inam ufọn inọ idem ke ndidụhọde kpukpru inyene idụt oro nte enye ekekeme mbemiso ukara ọwọrọde enye ke ubọk ofụri ofụri?

¹² Ke nditịm ntịn̄, edi ukem ntre ye pa·rou·siʹa Christ. Ediyarade 12:7-12 owụt ete ke ini ẹkenamde Christ Edidem ke heaven, enye ama ebemiso osio Satan ye mme demon efep ke heaven, ntem anamde ifụm ukara Esie asana. Ke ama okokụt edikpu oro akanade ebet enye ke anyanini mi, didie ke Satan anam n̄kpọ ke ‘ekpri ibio ini’ emi mbemiso Christ adade ọyọhọ odudu esie anam n̄kpọ mi ke isọn̄? Ukem nte idiọk adaibuot ukara oro, enye odomo ndinyene kpukpru se enye ekekeme ke akani editịm n̄kpọ emi. Enye iyomke okụk; enye oyom uwem owo. Enye oyom ndidianade adan̄a ediwak owo nte enye ekekeme n̄kpọn̄ Jehovah ye Edidem Esie oro akarade.

13. Didie ke N̄wed Abasi owụt nte ke ntọn̄ọ ukara Christ edidi ini afanikọn̄ mi ke isọn̄?

¹³ Eyịghe idụhe, ndien, ntọn̄ọ ukara Messiah edide ini “mbọm [ọnọ] isọn̄.” (Ediyarade 12:12) Ukem ntre, Psalm 110:1, 2, 6 owụt ete ke Messiah ọtọn̄ọ ukara esie ke ‘otu mme asua esie.’ Edi ke ukperedem kpọt ke enye edikụre utom edinuak “mme idụt,” ọkọrọ ye kpukpru ikpehe idiọk editịm n̄kpọ Satan emi, ke nsinsi!

Ke Ini Messiah Akarade Isọn̄

14. Nso ke Messiah edikeme ndinam ke enye ama okosobo idiọk editịm n̄kpọ Satan ẹmi?

¹⁴ Ke enye ama okosobo editịm n̄kpọ Satan ye kpukpru mbon oro ẹnọde enye ibetedem, Edidem Messiah, Jesus Christ, ke akpatre eyedu ke idaha ndisu mme utịbe utịbe prọfesi Bible oro ẹtịn̄de ẹban̄a Tọsịn Isua Ukara esie. Isaiah 11:1-10 an̄wam nnyịn ndikụt orụk andikara emi Messiah edidide. Isa 11 Ufan̄ikọ 2 asian nnyịn ete ke enye eyenyene “spirit Jehovah . . . spirit eti ibuot ye asian, spirit item ye odudu.”

15. Nso ke ‘spirit odudu’ ediwọrọ ke ukara Messiah?

¹⁵ Kere ban̄a se ‘spirit odudu’ ediwọrọde ke ukara Jesus. Ke ini emi enye okodude ke isọn̄, enye ama enyene ndusụk udomo odudu oto Jehovah, an̄wamde enye ndinam mme utịben̄kpọ. Ndien enye ama owụt udọn̄ ofụri esịt ndin̄wam mme owo, ọdọhọde ete, “Mmonyịme.” (Matthew 8:3) Edi mme utịben̄kpọ esie ke mme usen oro ẹkedi sụk ukpọn̄ ukpọn̄ uwụtn̄kpọ kaban̄a se enye edinamde ke ini enye editiede ke heaven akara. Jesus eyenam mme utịben̄kpọ ke udomo ofụri ererimbot! Mbon udọn̄ọ, nnan, inan, mbon oro ẹbiomode ndo, ye mme mbụn̄ọ ẹyekop nsọn̄idem ke nsinsi. (Isaiah 35:5, 6) Uwak udia, oro ẹdemede ukem ukem, eyetre biọn̄ ke nsinsi. (Psalm 72:16) Nso kaban̄a anana-ibat miliọn owo oro ẹdude ke udi ẹmi Abasi edikopde inemesịt nditi? “Odudu” Jesus eyesịne ukeme ndinam mmọ ẹset, ọnọde mmọ kiet kiet ifet ndidu uwem ke nsinsi ke Paradise! (John 5:28, 29) Edi, idem ye ofụri odudu emi, Edidem Messiah eyedu ke nsụhọdeidem ke akamba udomo kpukpru ini. “Uten̄e Jehovah eyenem enye esịt.”—Isaiah 11:3.

16. Nso utọ Ebiereikpe ke Edidem Messiah edidi, ndien didie ke oro edikpụhọde ye akpanikọ ẹban̄ade mme ebiereikpe ẹdide owo?

¹⁶ Edidem emi n̄ko edidi mfọnmma Ebiereikpe. Enye “idikpehe ikpe nte ẹsede ke enyịn, idinyụn̄ ibiereke ikọ nte okopde ke utọn̄.” Ewe ebiereikpe edide owo, ke ini edem m̀mê idahaemi, ke ẹkeme nditịn̄ mban̄a ke usụn̄ emi? Idem owo oro enyenede mbufiọk ekeme ndikpe ikpe ebe ke se enye okụtde onyụn̄ okopde, akamade sededi ọniọn̄ ye esịtifiọk oro enye enyenede. Ntem, mme ebiereikpe ye mme odụn̄ọde ikpe eke akani ererimbot emi ẹkeme nditụhọ mîdịghe ibuot oyon̄ ke ntak n̄kari n̄kari ikọ, idọkọ ufọkesop, m̀mê uyarade oro enyenede ntuaha. Ediwak ini esidi mme enyene n̄kpọ owo ye mme okopodudu owo ẹsinọ n̄kan̄idem oro ọfọnde, yak idọhọ, ẹdepde-dep unen. Idịghe ntre ke idak Messiah emi edide Ebiereikpe! Enye ọdiọn̄ọ se idude ke esịt. N̄kpọ ndomokiet ididịbeke enye. Unenikpe, ẹwụtde ima ye mbọm, idịghe ke unyam. Enye eyedu kpukpru ini.—Isaiah 11:3-5.

Nte Ukara Esie Otụkde Fi

17, 18. (a) Nso nyayama ndise aban̄ade ini iso ubonowo ke ẹwụt ke Isaiah 11:6-9? (b) Prọfesi emi ada aban̄a mmanie akpan akpan, ndien ntak edide ntre? (c) Didie ke prọfesi emi edinyene ataata edisu?

¹⁷ Nte an̄wan̄ade, ukara Messiah enyene akwa odudu ke idem mme andidu ke idak esie. Enye anam mme owo ẹkpụhọde. Isaiah 11:6-9 owụt nte mme utọ ukpụhọde oro ẹkam ẹkponde. Prọfesi emi owụt ndise oro aban̄ade mme enyene-ndịk, unam oro ẹsitade ekemmọ unam—mme bear, mme wolf, mme anawụriekpe, mme ekpe, mme cobra—ẹdude ọtọkiet ye sụn̄sụn̄ ufene ye idem nditọwọn̄. Edi mme unam oro ẹsitade ekemmọ unam ikamake ndịk ndomokiet! Ntak-a? Isa 11 Ufan̄ikọ 9 ọbọrọ ete: “Mmọ idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah eyeyọhọ ke ererimbot, kpa nte mmọn̄ ofụkde inyan̄.”

¹⁸ Nte ededi, “ifiọk Jehovah” ikpekemeke ndinyene odudu ke idem mme ata unam; ntre anaedi mme ufan̄ikọ ẹmi ẹtịn̄ ẹban̄a mme owo akpan akpan. Ukara Messiah ese enyịn ke ndutịm unọ ukpep ofụri ererimbot, ekpepde mme owo aban̄a Jehovah ye mme usụn̄ esie, ekpepde kpukpru owo ndinam n̄kpọ ye ekemmọ owo ke ima, ukpono, ye uten̄e. Ke Paradise oro edide, Messiah ke utịbe utịbe usụn̄ eyemenede ubonowo osịm mfọnmma ke ikpọkidem ye ido uwem. Mme edu uda ekemmọ owo nnam udia, ebietde eke unam emi abiatde anana mfọnmma uduot owo eyebe efep. Ke ataata usụn̄ifiọk, n̄ko, ubonowo eyedi edidu ke emem ye mme unam—ke akpatre!—Men Genesis 1:28 domo.

19. Didie ke ukara Messiah otụk uwem mme owo ke ukperedem ini ẹmi?

¹⁹ Ti, nte ededi, ete ke Messiah ke akara kemi. Idem idahaemi, mme andidu ke idak Obio Ubọn̄ esie ke ẹkpep ndidụn̄ emem emem ọtọkiet, ẹsude Isaiah 11:6-9 ke ndusụk usụn̄. Akan oro, ke se ikperede ndisịm isua 80, Jesus ke osu Isaiah 11:10: “Ama ekem ke usen oro, mme idụt ẹyetiene orụn̄ Jesse emi adade nte banner mme idụt: ndien itie nduọkodudu esie eyedi ubọn̄.” Mme owo ke kpukpru idụt ke ẹwọn̄ọde ẹbịne Messiah. Ntak-a? Koro toto nte enye ọkọtọn̄ọ ndikara, enye ama ‘adaha ada nte banner.’ Enye ke anam ẹdiọn̄ọ edidu esie ke ofụri ererimbot ebe ke akwa ndutịm unọ ukpep oro ẹketịn̄de ẹban̄a ke enyọn̄ emi. Ke akpanikọ, Jesus ama ebemiso etịn̄ nte ke utom edikwọrọ ikọ ke ofụri ererimbot edidi n̄wọrọnda idiọn̄ọ edidu esie mbemiso utịt akani editịm n̄kpọ emi.—Matthew 24:14.

20. Nso utọ edu ke kpukpru mme andidu ke idak ukara Messiah ẹkpefep, ndien ntak-a?

²⁰ Ntre edidu Christ ke odudu Edidem idịghe ekpri n̄kpọ, oro ẹkerede-kere, ikpîkpu nneme aban̄ade eneni mbon ifiọk ke otu mme ekpep ukpepn̄kpọ ido ukpono. Ukara esie otụk onyụn̄ okpụhọde uwem mme owo mi ke isọn̄, kpa nte Isaiah ekebemde iso etịn̄ ke eyenam. Jesus ada ediwak miliọn mme andidu ke Obio Ubọn̄ esie oto idiọk editịm n̄kpọ ererimbot emi. Nte afo edi utọ owo oro? Do nam n̄kpọ ke ofụri ifịk ye idatesịt oro Andikara nnyịn odotde! Ih, edi ata mmemmem n̄kpọ ndikpa mba, nditiene ererimbot mbuana ke mfiori n̄wụtidem emi: “Edidi eke Enye ọkọn̄wọn̄ọde ete iyedi enye?” (2 Peter 3:4) Edi nte Jesus ke idemesie ọkọdọhọde, “ẹyenyan̄a owo eke edimede ime tutu osịm akpatre.”—Matthew 24:13.

21. Didie ke kpukpru nnyịn ikpọkọri esịtekọm oro nnyịn inyenede kaban̄a idotenyịn Messiah?

²¹ Usen kiet kiet oro ebede ke odụri nnyịn ekpere akwa usen oro akan emi Jehovah edidade Eyen Esie usụn̄ ndinam edidu esie ayarade ọnọ ofụri ererimbot. Kûdede uyak idotenyịn fo ke usen oro okịm. Tie kere ban̄a itie Messiah Jesus ye mme edu esie nte Edidem oro akarade. Kere ntotụn̄ọ ntotụn̄ọ, n̄ko, ban̄a Jehovah Abasi, anditọn̄ọ ye andinam ndutịm nnọ akwa idotenyịn itie Messiah oro ẹwetde ke Bible. Nte afo anamde emi, nte eyịghe mîdụhe oro eyetotịm otụk fi ke idem nte okotụkde apostle Paul ke ini enye ekewetde ete: “Uwak ọniọn̄ ye ifiọk Abasi editụn̄ọ adan̄a didie!”—Rome 11:33.

[Mme Ikọ idakisọn̄]

Didie ke Afo Ọkpọbọrọ?

◻ Ke nso ido ke Christ afiak edi?

◻ Nnyịn isan̄a didie ifiọk ite ke pa·rou·siʹa Christ edi se enyịn mîkwe onyụn̄ ebịghi ke anyan ikpehe ini?

◻ Ini ewe ke edidu Christ ọtọn̄ọ, ndien nnyịn isan̄a didie ifiọk emi?

◻ Nso utọ Andikara eke heaven ke Messiah edi?

◻ Ke mme usụn̄ ewe ke ukara Christ otụk uwem mme andidu ke idak esie?

[Ndise ke page 15]

Idotenyịn oro nte ke Jesus eyefiak edi ama ọwọrọ ekese n̄kpọ ọnọ mme anam-akpanikọ apostle

[Ndise ke page 17]

Ke etiede ke heaven akara, Jesus eyenam mme utịben̄kpọ ke udomo ofụri ererimbot