‘Ẹmen Ẹdọk Man Ẹkesobo ye Ọbọn̄’—Didie?

NTỊMIDEM kaban̄a utịt idiọk editịm n̄kpọ emi ke akaiso ye unana ukpụhọde. Ye hour, minit, ye second kiet kiet ẹbede, nnyịn ke isan̄a ikpere mme aduai-owo idem n̄kpọntịbe oro ẹketịn̄de prọfesi ẹban̄a ke anyanini ko. Nte mbabuat edimen ndọk ke ikpọkidem edi kiet ke otu mmọemi? Edieke edide, ini ewe ndien didie ke enye editịbe?

Ikọ oro “mbabuat edimen ndọk ke ikpọkidem” idụhe ke Bible. Edi mbon oro ẹnịmde enye ke akpanikọ ẹsida mme ikọ apostle Paul ke 1 Thessalonica 4:17 nte isọn̄ edinịm ke akpanikọ mmọ. Ẹyak nnyịn idụn̄ọde itien̄wed emi ke udọn̄ikọ esie. Paul ekewet ete:

“Edi nnyịn imaha mbufo ẹnana ifiọk, nditọete, ẹban̄a mmọemi ẹdede, mbak mbufo ẹdifụhọ, kpa nte mmọ eken eke mînyeneke idotenyịn. Koro edieke nnyịn inịmde ke akpanikọ ite Jesus ama akpa onyụn̄ ọtọn̄ọ ntak eset, imonịm kpa ntre ite, Abasi eyeda mmọemi ẹdede ke Jesus edi. Koro nnyịn ida ikọinua Ọbọn̄ idọhọ mbufo ntem ite, nnyịn emi idude uwem, ẹmi isụhọde itie ibet edidi Ọbọn̄, idibemke mmọemi ẹdede iso ke baba usụn̄ kiet. Koro Ọbọn̄ ke Idemesie eyeto ke heaven osụhọde ye n̄kpo, ye uyo archangel, ye ukotowo Abasi; ndien mmọemi ẹkpan̄ade ke Christ ẹyebem iso ẹset: ndien ẹyemen nnyịn ẹmi idude uwem, ẹmi isụhọde, ẹdọk ye mmọ ke ikpaenyọn̄, man isobo ye Ọbọn̄ ke enyọn̄: ntem ke nnyịn ididu ye Ọbọn̄ ke nsinsi nsinsi. Mmọdo ẹmen ikọ ẹmi ẹdọn̄ kiet eken esịt.”—1 Thessalonica 4:13-18.

Esop ke Thessalonica ekedi ata obufa ke ini Paul ekewetde akpa n̄wed esie ọnọ mme Christian do ke n̄kpọ nte 50 E.N. Mme andibuana ke esop emi ẹma ẹkop mfụhọ nte ke ndusụk ke otu mmọ ẹma ‘ẹde ke n̄kpa.’ Nte ededi, se Paul ekewetde ama ọdọn̄ mbon Thessalonica esịt ye idotenyịn ediset ke n̄kpa.

‘Edidu’ Christ

Ke adan̄aemi ọkọsọn̄ọde nte ke ẹyenam mme anam-akpanikọ Christian ẹmi ẹkekpan̄ade adan̄aoro ẹset, Paul ama ọdọhọ n̄ko ete: “Nnyịn ẹmi idude uwem, ẹmi isụhọde itie ibet edidi Ọbọn̄, idibemke mmọemi ẹdede iso ke baba usụn̄ kiet.” (Ufan̄ikọ 15) Se itịmde idot ẹfiọk, nte ededi, edi nte ke apostle oro eketịn̄ aban̄a ‘edidu’ Ọbọn̄. Mi akpasarade ikọ usem ada ikọ Greek oro pa·rou·siʹan, emi ke ataata usụn̄ ọwọrọde “ndidu ke n̄kan̄.”

Ke ini adaibuot Ukara akade ekese idụt efen, ẹsiwak nditọt mme usen edidu esie do. Emi edi ntre ye edidu Ọbọn̄ Jesus Christ. Enyọn̄-Ukpeme ke akaiso ọnọ mme enyene esịt akpanikọ nditọ ukpepn̄kpọ ẹmi ẹkpepde ẹban̄a prọfesi Bible uyarade nte ke edidu Jesus ke odudu Obio Ubọn̄ ke heaven ọkọtọn̄ọ ke 1914. Mme n̄kpọntịbe toto ke isua oro ẹtie ntiense ẹban̄a edidu Jesus oro enyịn mîkwe. (Matthew 24:3-14) Ntre ke nditịn̄ nte ke ndusụk Christian oro ẹdude uwem ke usen edidu Ọbọn̄ ẹyedi se ‘ẹmende ẹdọk man ẹkesobo ye Ọbọn̄ ke ikpaenyọn̄,’ Paul okosio owụt nte ke mbon oro ẹdibọhọde ẹyesobo ye Christ, idịghe ke n̄kann̄kụk eke isọn̄, edi ke n̄kan̄ heaven oro enyịn mîkwe ke ebiet emi Jesus etiede ke ubọk nnasia Abasi. (Mme Hebrew 1:1-3) Edi mmanie ke mmọ ẹdi?

“Israel Abasi”

N̄wed Abasi etịn̄ ekese aban̄a Israel eke obụk onyụn̄ etịn̄ n̄ko aban̄a “Israel Abasi” eke spirit. Mme andinịm ke akpanikọ ẹdide Jew ye Gentile ẹkenyene ndinam ọyọhọ ibat otu emi ẹyetde aran mi ke edisana spirit, m̀mê anamutom odudu Abasi. (Galatia 6:16; Rome 11:25, 26; 1 John 2:20, 27) N̄wed Ediyarade owụt ete ke ofụri ibat Israel eke spirit edi 144,000, ofụri mmọ ẹdade ye Eyenerọn̄, Jesus Christ, ke Obot Zion eke heaven. Adianade ye Christ, mmọ ẹyedi mbọn̄ ye oku ke heaven. (Ediyarade 7:1-8; 14:1-4; 20:6) Mbon oro ẹbuanade ke otu mmọ ẹdidi mmọ oro ẹkebuanade ke mme esop ke Thessalonica ye ke ebiet efen, inamke n̄kpọ m̀mê ẹto ewe orụk m̀mê ewe idụt.—Utom 10:34, 35.

Mbemiso anam-akpanikọ andibuana ekededi ke otu Israel eke spirit ekeme ndibọ utịp eke heaven, mmọ ẹyenyene ndusụk ifiọkutom. Kpa nte n̄kpa Jesus ke eto ndutụhọ ekebemde ediset esie n̄ka uwem eke heaven iso, ntre mme Christian ẹmi ẹnyenede idotenyịn uka heaven ana ẹkpa mbemiso ẹbọde utịp mmọ. (1 Corinth 15:35, 36) Oro edidi akpanikọ aban̄a mme andibuana ke Israel eke spirit ẹmi ẹkedude ke akpa isua ikie E.N. ye utọ mmọ oro ẹdude uwem mfịn.

Ke ama eketịn̄ ‘edidu Ọbọn̄,’ Paul ama anyan ubọk owụt ini oro mme anam-akpanikọ Israel eke spirit ẹmi ẹkekpade ẹdibọde utịp mmọ eke heaven. Enye ekewet ete: “Ọbọn̄ ke Idemesie eyeto ke heaven osụhọde ye n̄kpo, ye uyo archangel, ye ukotowo Abasi; ndien mmọemi ẹkpan̄ade ke Christ ẹyebem iso ẹset.” (Ufan̄ikọ 16) Ke ntre, ndondo oro edidu Jesus nte Edidem ọkọtọn̄ọde, nnyịn ikpodori enyịn ediset n̄ka heaven nditọn̄ọ, ọtọn̄ọde ye mbon Israel eke spirit oro ẹma ẹkekpakpa nte mbon nsọn̄ọnda. (1 Corinth 15:23) Mmọ ke ẹnam utom idahaemi ye Jesus ke heaven. Edi nso kaban̄a ibat ibat mme Christian oro ẹyetde aran oro ẹsụk ẹdude ke isọn̄? Nte mmọ ẹtie ẹbet mbabuat edimen ndọk ke ikpọkidem?

‘Ẹmen Ẹdọk’—Didie?

Ke ama eketịn̄ aban̄a mme Christian oro ẹyetde aran ẹmi ẹkekpan̄ade, Paul ama adian do ete: “Ndien ẹyemen nnyịn ẹmi idude uwem, ẹmi isụhọde, ẹdọk ye mmọ ke ikpaenyọn̄, man isobo ye Ọbọn̄ ke enyọn̄: ntem ke nnyịn ididu ye Ọbọn̄ ke nsinsi nsinsi.” (Ufan̄ikọ 17) ‘Mmọ oro ẹdude uwem’ ẹdidi mbon oro ẹdude ke uwem ke ini edidu Christ. ‘Ẹyemen mmọ ẹdọk’ man ẹkesobo ye Ọbọn̄ Jesus. Nte ekedide ye mme anam-akpanikọ akpa Christian, oyom mmọ ẹkpan̄a nte owo man ẹkediana ye Christ ke heaven.—Rome 8:17, 35-39.

Ke ewetde n̄wed ọnọ mme Christian ke Corinth, Paul ọkọdọhọ ete: “Edi ndọhọ emi, nditọete, obụkidem ye iyịp ikemeke ndibọ Obio Ubọn̄ Abasi nda nnyene; mbiara inyụn̄ ikemeke ndibọ se mîdibiarake nda nnyene. Sese mmọn̄ ndọhọ ndịben̄kpọ nnọ mbufo. Idịghe kpukpru nnyịn iyede idap, edi ẹyenam kpukpru nnyịn ikpụhọde, ke idaha kiet, ke ediyịp enyịn kiet, ke adan̄aemi edifride akpatre ukotowo. Koro ẹyefri ukotowo, ndien ẹyenam mme akpan̄kpa ẹset nte mmọ mîdikemeke ndibiara aba, ẹyenyụn̄ ẹkpụhọde nnyịn.” (1 Corinth 15:50-52) Ke ẹkpade ke edinam akpanikọ ke ini edidu Christ, nsụhọ Israel eke spirit kiet kiet eyebọ utịp eke heaven esie ke ndondo oro. “Ke ediyịp enyịn,” ẹyenam enye eset nte edibotn̄kpọ eke spirit ẹnyụn̄ ‘ẹmen ẹdọk’ man akadiana ye Jesus onyụn̄ anam utom nte nsan̄a andikara ke Obio Ubọn̄ eke heaven. Edi nso kaban̄a kpukpru mmọ eken oro ẹkponode Jehovah? Nte utịt idiọk editịm n̄kpọ emi asan̄ade ekpere, nte ẹyemen mmọ n̄ko ẹdọk ke heaven?

Ndibọhọ—Edi Idịghe ke Mbabuat Edimen Ndọk ke Ikpọkidem

Sia ubọn̄ ubọn̄ edidu Jesus ama ọkọtọn̄ọ ke 1914, nnyịn kemi imodụk ntotụn̄ọ ntotụn̄ọ isịm “utịt ini” ererimbot emi. (Daniel 12:4) Paul ama odụri owo utọn̄ ete: “Nditọete, inaha nte ẹwet baba n̄kpọ kiet ẹnọ mbufo ẹban̄a mme ini ye mme eyo. Koro mbufo ke idem mbufo ẹmetịm ẹfiọk ẹte usen Ọbọn̄ ọmọn̄ edi nte inọ ke okoneyo. Ini mme owo ẹdọhọde ẹte, idu ke emem ye ifụre, kpa adan̄aoro ke nsobo abuat mmọ, nte emi uman abuatde n̄wan idịbi; ndien mmọ idikwe usụn̄ ubọhọ.” (1 Thessalonica 5:1-3) Edi mme Christian oro ẹdude ke edidemede ẹyebọhọ. Didie?

Mfiori “emem ye ifụre” enyene ndibem ini oro Jesus okokotde “akwa ukụt” iso. Ke etịn̄de aban̄a “akwa otuowo” eke mme anam-akpanikọ ẹmi ẹnyenede idotenyịn edidu uwem ke nsinsi ke paradise isọn̄, n̄wed Ediyarade ọdọhọ ete: “Mmọ oro ẹdi mmọemi ẹketode ke akwa ukụt ẹwọn̄ọ, ẹkenyụn̄ ẹyetde ọfọn̄idem mmọ ẹnam afia ke iyịp Eyenerọn̄.” (Ediyarade 7:9, 14; Luke 23:43) Baba, mmọ inyeneke idotenyịn mbabuat edimen ndọk ke ikpọkidem. Utu ke oro, mmọ ẹnyene idotenyịn edibọhọ kpa mi ke isọn̄. Man ẹtịm idem ẹnọ oro, ana mmọ ẹdu ke edidemede ke n̄kan̄ eke spirit. Didie ke afo ekeme ndinam emi nnyụn̄ mbọhọ utịt editịm n̄kpọ emi?

Oyom afo ‘omụm idem akama onyụn̄ esịne mbuọtidem ye ima nte ukwak ikpanesịt onyụn̄ ayara idotenyịn edinyan̄a nte ndụn ibuot.’ (1 Thessalonica 5:6-8) Idahaemi edi ini ndikpan̄ utọn̄ nnọ ntịn̄nnịm Ikọ Abasi, kpa Bible. Nte ini ebede tutu osịm utịt editịm n̄kpọ emi, nam item Paul oro: “Ẹkûsịn edisiak uduak Abasi ke ndek; ẹdomo kpukpru n̄kpọ ẹse; ẹmụm se ifọnde ẹkama.” (1 Thessalonica 5:20, 21) Ntem Mme Ntiense Jehovah ẹyedara edidi fo ke mme Ufọkmbono Obio Ubọn̄ mmọ, ke ebiet emi afo ekemede ndibuana ye mmọ ke ndikpep mme prọfesi Bible ye mme n̄kpọ eken ke Ikọ eke odudu spirit Abasi.

Nte afo ọkọride ke nnennen ifiọk ye mbuọtidem, afo eyekụt edisu uduak Jehovah Abasi emi edide ndisio mme asua esie mfep ke ekondo nnyụn̄ mfiak nnam isọn̄ akabade edi paradise. Ke ndiwụt mbuọtidem, afo n̄ko emekeme ndidu ke otu mme andibọhọ akwa ukụt, enyenede ifet ndifiak ndara ediwak miliọn owo oro ẹdinamde ẹset ẹdụk uwem ke isọn̄. Ndien nso n̄kpọ idatesịt ke edidi ntem ndidu ke idak Obio Ubọn̄ Abasi ke ubọk Jesus Christ ye nsan̄a mme andikara ye enye, ẹmi ẹma ‘ẹkemen ẹdọk man ẹkesobo ye Ọbọn̄’ ebe ke ndinam ẹset ẹdụk uwem ke n̄kan̄ eke heaven!

Kaban̄a okopitem ubonowo ke ofụri ofụri, nso, ndien idi ata idotenyịn oro N̄wed Abasi ọnọde? Idịghe mbabuat edimen ndọk ke ikpọkidem. Utu ke oro, edi nsinsi uwem ke isọn̄ ke idak ukara Obio Ubọn̄ Abasi.

[Ndise ke page 7]

Mme andibọhọ akwa ukụt ẹyedara mbon oro ẹnamde ẹset ẹdụk uwem ke paradise isọn̄ ke idak ukara Jesus ye mbon oro ‘ẹmende ẹdọk’ ke heaven