Nte Ẹyemen Fi Ẹdọk ke Heaven?
EDIWAK owo ẹnịm ke akpanikọ ẹte ke mmimọ iyeka heaven ke ima ikpa. Edi ndusụk owo ẹkere ke ẹyemen mmimọ ẹdọk ke heaven ke se ẹkotde mbabuat edimen ndọk ke ikpọkidem [rapture]. Nte oro edi idotenyịn fo?
Edimen ndọk edi “mbabuat edisop eke ata ediwak miliọn owo ye unana edidiọn̄ọ ebiet oro mmọ ẹkade!” Ntre ke ọkwọrọ ederi Protestant kiet ọkọdọhọ. Nte ekemde ye Evangelical Dictionary of Theology, ikọ oro “mbabuat edimen ndọk ke ikpọkidem” ada ọnọ “ufọkederi ndidiana kiet ye Christ ke edifiak ndi esie.”
Ndusụk owo ẹkụt nte afịnade mmọ ke idem ndikere nte mmọ ẹdikpọn̄de mme ufan ye mbonubon mmọ ẹkosobo ye Jesus Christ. Kpa ye oro, ediwak owo ẹnịm ẹte ke mbabuat edimen ndọk ke ikpọkidem ana ada itie. Nte enye eyeda itie? Ke edide ntre, ini ewe?
Nsio Nsio Ekikere Aban̄ade Mbabuat Edimen Ndọk ke Ikpọkidem
Bible owụt ete ke mbemiso Tọsịn Isua Ukara Christ oro ẹken̄wọn̄ọde ọtọn̄ọ, ini eyedu oro ẹkotde “akwa ukụt.” Jesus ọkọdọhọ ete: “Ke ini oro akwa ukụt eyedu, orụk eke akanam mîdụhe toto ke editọn̄ọ ererimbot tutu osịm emi, eke mîdinyụn̄ idụhe aba.” (Matthew 24:21; Ediyarade 20:6) Ndusụk owo ẹkere ke mbabuat edimen ndọk ke ikpọkidem eyeda itie mbemiso akwa ukụt. Mmọ efen ẹdori enyịn enye ndida itie ke ini oro. Edi ndusụk owo ẹkere ke mbabuat edimen ndọk ke ikpọkidem edidi ke anana-mbiet ukụt oro ama ekebe.
Ekikere enyeoro aban̄ade enye ndida itie ke ini ukụt ebede ama enen̄ede enyene odudu tutu ke ntọn̄ọ ntọn̄ọ isua ikie-19. Ekem, ke England ẹma ẹtọn̄ọ n̄ka kiet adan̄aoro emi akani ọkwọrọ ederi Ufọkederi Ireland, John Nelson Darby akadade usụn̄. Enye ye mbon Anglican oro ẹkenyenede ukem ekikere esie ekedi se ẹdiọn̄ọde nte Nditọete. Ọtọn̄ọde ke ufọkederi esie ke Plymouth, Darby ama anam isan̄ aka ndikwọrọ ikọ ke Switzerland ye ke mme ebiet en̄wen ke Europe. Enye ama ọsọn̄ọ etịn̄ ete ke edifiak ndi Christ edidi ke usụn̄ iba. Emi editọn̄ọ ye mbabuat edimen ndọk ke ndịbe, emi ẹditan̄de “ndisana owo” ẹdọk mbemiso ukụt isua itiaba osobode isọn̄. Ekem Christ eyewụt idem nte ẹkụtde ke enyịn, asan̄ade ye “ndisana owo” oro, ndien mmọ ẹyediana kiet ẹkara isọn̄ ke tọsịn isua kiet.
Darby ama ọsọn̄ọ etịn̄ aban̄a ufọn edidianade n̄kpọn̄ ererimbot, ndien ke akpatre ẹma ẹdidiọn̄ọ mbon oro ẹketienede ẹnyene ekikere esie nte San̄asan̄a Nditọete. B. W. Newton ama ada usụn̄ ke n̄ka efen oro okonịmde mbabuat edimen ndọk ke ikpọkidem ke akpanikọ edi idịghe enyeoro ebemde ukụt iso. Alexander Reese, andida nnọ ekikere oro nte ke emi edidi ke ukụt ebede, ọkọdọhọ ete ke “mme ekikere ẹban̄ade Mbabuat Edimen Ndọk ke ndịbe ẹdi n̄kpọndịk ẹnọ idotenyịn Edifiak Ndi Christ.”
Mbon oro ẹdọhọde ke enye edida itie mbemiso ukụt ẹnịm ke akpanikọ ẹte ke ukpụhọde oro odude ke ekikere emi ọdiọk ekem ndifịna “idaha idotenyịn [mmọ] ke ebuana ye edifiak ndi Christ.” Mmọ en̄wen ẹkọn̄ mbuọtidem ke “ekikere aban̄ade edimen ndọk ke ikpehe ke ikpehe,” ẹnịmde ke akpanikọ ke mbon oro ẹnen̄erede ẹnam akpanikọ ẹnọ Christ ke ẹdibemiso ẹmen ẹdọk ke mbuari ndien ekem ẹmen mbon ererimbot ẹdọk.
Ediwak n̄ka ukwọrọikọ ẹmetan̄a mbabuat edimen ndọk ke ikpọkidem eke mme anam-akpanikọ Christian nte ekperede. Ke ẹkerede ẹban̄a nsio nsio ekikere oro ẹdude, nte ededi, ekpri n̄wed kiet emi Elim Pentecostal Church eke Britain ekemịn̄de ọdọhọ ete: “Ke adan̄aemi nnyịn inyịmede nsio nsio n̄kpọntịbe oro ẹnyenede ebuana ye edifiak ndi Ọbọn̄ Jesus . . . , imenyene ifụre ndikabade mme prọfesi nte ekemde ye se owo kiet kiet onịmde ke akpanikọ. Ediwak owo ẹnyịme idaha oro owo mînyịkke-nyịk owo, ke ime ẹbetde mme n̄kpọntịbe ẹmi ndisu mme ndutịm prọfesi ke idemmọ.”
Ikọ odudu spirit Abasi, kpa Bible, edi idaha oro nnyịn ikemede ndida ndomo akpanikọ aban̄ade kpukpru edinịm ke akpanikọ. (2 Timothy 1:13; 3:16, 17) Ke ntre, nso ke enye etịn̄ aban̄a mbabuat edimen ndọk ke ikpọkidem?