Ntọt M’ọkwọrọ Obio Ubọn̄
Ndiyụhọ Mbon Oro Ẹkopde Biọn̄ eke Spirit—Ke Ufọkn̄wed
JESUS ọkọdọhọ ke Ukwọrọikọ esie ke Obot ete, “Ọfọfọn ọnọ mmọ eke ẹbuenede ke [“ẹnyenede udọn̄ n̄kpọ eke,” NW] spirit.” (Matthew 5:3) Ediwak nditọ ufọkn̄wed ẹkop nsatitọn̄ ifiọk Abasi ye mme utịbe utịbe uduak esie. Mmọ ẹyom mme ibọrọ ẹnọ mme mbụme ẹban̄ade uwem ẹyom ẹnyene ndifiọk nte mmọ ẹkpedude uwem man ẹnyene unyịme Abasi ẹnyụn̄ ẹkop inemesịt. Emi ama ana in̄wan̄în̄wan̄ ke ufọkn̄wed kiet ke mme Isuo British Virgin. Owo kiet ke otu Mme Ntiense Jehovah do obụk ete:
◻ “Mma ndụk mbono oro ẹkenịmde ye mme ete ye eka ye mme andikpep ke ufọkn̄wed n̄kann̄kụk, ndien ẹma ẹneme ekese ẹban̄a n̄kpọsọn̄ ibọk, edin̄wọn̄ mmịn, uwọrọan̄wa, edise TV, n̄kọri nditọ ufọkn̄wed, ye mme n̄kpọ eken, ntre mma mbiere ndida n̄wed Questions Young People Ask—Answers That Work man n̄kọnọ akamba etubom. Ke n̄wan emi ama okodụn̄ọde n̄wed oro, enye ama ọdọhọ ete ke enye akam edi se mmimọ ikoyomde onyụn̄ obụp m̀mê ufọkn̄wed ekeme ndinyene idem kiet kiet nnọ nditọ ufọkn̄wed 120. Ẹma ẹneme n̄kpọ emi ye mbiowo esop, ndien mmọ ẹma ẹbiere ndinọ n̄wed emi ke mfọn ẹsọk ufọkn̄wed oro. Ke ini nnyịn ikenemede iban̄a emi, mme andikpep ẹma ẹdọhọ yak nnyịn inọ nditọ ufọkn̄wed mme n̄wed oro. Ntiense iba ẹma ẹka, ndien nditọ ufọkn̄wed ẹmi ẹtiede ẹbet mmọ ẹma ẹyọhọ ubet oro. Nditọete ẹma ẹtịn̄ ikọ ke ubak hour, ndien ẹma ẹkot mme ifiọkutom ẹwụtde nte n̄wed emi akan̄wamde ikpọ ye n̄kpri ke mme magazine Watch Tower Society. Ekem ẹma ẹdeme n̄wed emi ẹnọ nditọ ufọkn̄wed ẹmi ẹkebetde ye ọkpọsọn̄ udọn̄.”
Edi n̄kpọ idara ndifiọk nte ke ufọkn̄wed oro ama ebiere ndikama n̄wed emi nte ubak n̄wed ukpepn̄kpọ eke ọyọhọ isua inan̄ ye ition. Enye ke akpanikọ eyebọrọ ediwak mbụme oro nditọ ufọkn̄wed ẹmi ẹnyenede ẹban̄a uwem ye ini iso.
Ndiyụhọ Mbon Oro Ẹkopde Biọn̄ eke Spirit —Ke Papua New Guinea
Ẹkebọ ifiọkutom emi etienede mi ẹto esenyịn emi asan̄ade-san̄a. Enye owụt nte mme owo ẹkopde biọn̄ eke spirit ke idụt oro ye nte mme n̄wed nnyịn oro ẹkọn̄ọde ke Bible ẹkụtde unen ke ndiyụhọ biọn̄ mmọ.
◻ Esenyịn oro ọkọdọhọ ete, “Sia mmen̄kekemeke ndika n̄kese obio-in̄wan̄ Kamberatoro, ami mma nda ini mi nsịn ke ndinam utom ye ekpri esop ke Vanimo. Ọkpọsọn̄ udọn̄ odu do. Ediwak owo ẹtode Bewani ẹma ẹbọ n̄wed. Eren kiet ama ọdọhọ mi ndi ndise obio-in̄wan̄ emi, ndien ke iyenọ mi itie ndidan̄. Ediwak owo ẹmehe ye n̄wed nnyịn. Ini kiet kiet emi nnyịn ikade obio Vanimo, n̄wed nnyịn esikụre kpa ye oro nnyịn isikamade ekebe n̄wed ita. Ẹda N̄wed Mi eke Mme Mbụk Bible ke ọsọn̄urua n̄kpọ nte gold. Mme owo ke ẹyom enye. Mma nnịm mme n̄wed ẹmi n̄kakamade mma usọp usọp. Ke ini nnyịn ikowụtde mme owo n̄wed nnyịn, ndusụk mmọ ẹma ẹdọhọ ẹte: ‘Enye-e utouto n̄wed oro?’ Eren kiet ama otobo itiokiet. Enye ama ọnọ mi enyịn̄ ye adres esie onyụn̄ ọdọhọ mi ete mma mbọ yak nnam ẹnọ ntọt ke radio. Imọ ndien iyeto obio imọ idibọ mmọ.” Esenyịn oro asan̄ade-san̄a mi adian do ete: “Mma n̄kụt nte ke ediwak owo ke Vanimo ẹma ẹbọ n̄wed Mankind’s Search for God ye Questions Young People Ask—Answers That Work.”
Emi owụt nte mbon nti esit ẹkopde biọn̄ udia eke spirit oro ẹkụtde ke Bible ye mme n̄wed oro Jehovah ọnọde ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Mme Ntiense Jehovah ẹkop inemesịt didie ntem ke ndikeme ndin̄wam mbon oro biọn̄ akpanikọ ọdọn̄de mi!
[Ndise ke page 19]
Ndinọ ikọ ntiense ke Papua New Guinea