Ntọt M’ọkwọrọ Obio Ubọn̄
‘Inemesịt Odu Ọnọ Mmọ Oro Ẹkopde Biọn̄ Eke Spirit’
JESUS ọkọdọhọ ete: “Inemesịt odu ọnọ mmọ oro ẹnyenede udọn̄ ke n̄kpọ eke spirit mmọ.” (Matthew 5:3, NW) Utọ mbon oro ẹyom ntọt oro ọnọde uwem ẹto Ikọ Abasi, kpa Bible, ndien ndinyene nnennen ifiọk emi eyeda mmọ okosịm nsinsi uwem.—Matthew 4:4; John 17:3.
◻ Owo kiet ke Africa oro okokopde biọn̄ eke spirit ama asan̄a isan̄ hour inan̄ ke tuep ye ekịm man ọkọbọ idem N̄wed Mi eke Mme Mbụk Bible kiet. Ke ama okosịm obio-in̄wan̄ oro Mme Ntiense Jehovah ẹkekwọrọde ikọ, enye ama enen̄ede okụt edikpu ndifiọk nte ke ẹma ẹnọ owo akpatre n̄wed oro. Enye ama etie ke obio-in̄wan̄ oro ke usen ita tutu ẹfiak ẹbọ n̄wed efen oro ẹkenọde edi, ndien enye ama okop inemesịt ke akpatre ndinyene eti ntọt eke spirit emi.
Ke ọfiọn̄ oro mmọ ẹkedude ke nsannsan ikpehe emi, Mme Ntiense oro ẹma ẹnịm ikpọ n̄wed 55, n̄kpri n̄wed 365, ye mme magazine 145, ndien mmọ ẹma ẹbọ etịbe 5. Ama otụk mmọ esịt etieti ke ini, nte mmọ ẹkenyọn̄de, ikpọ owo ye nditọn̄wọn̄ ẹketienede mmọ ke edem ẹdọhọde ke usem Kpelle ẹte: “Jehovah akpakam odu ye mbufo!” Ke ẹsịn ukeme ndibịne udọn̄ ẹkewụtde do.
Owo efen ama okop biọn̄ eke spirit kpasụk ke idụt emi. N̄wan emi ekedi akama-okụk ufọkederi esie ye anamutom ke itie unọ idem inemesịt ke obio esie. Ke ini Mme Ntiense Jehovah ẹkewahade ẹtiene enye, enye ye mmọn̄eyet ama onyịme ete ke ufọkederi emenen̄ede okpu ndisịm se Bible oyomde kaban̄a Ido Ukpono Christ. Mme Ntiense oro ẹma ẹwụt enye ke Bible esie nte ẹkemede ndifiọk ido ukpono akpanikọ. Ekem enye ama odụk mbonoesop iba ke Ufọkmbono Obio Ubọn̄ ndien ke oro ebede ama ọdọhọ ete: “Se n̄kokụtde nnyụn̄ n̄kopde ẹnen̄ede ẹnam mi nnịm nte ke emi edi akpanikọ.” Mme mbonoesop oro ye eduuwem mbon oro ẹkedụkde ẹma ẹtụk enye esịt. Enye ama okụt nte ke se Mme Ntiense oro ẹkewahade ke ebiet esie ẹketịn̄de ikedịghe n̄kpọ oro ẹkerede-kere edi ke ekedi ata idem n̄kpọ. Ọtọn̄ọde ke ini oro enye ama anam mme usio-ukot nditre ebuana esie ye ufọkederi oro, ndien emi ama osụn̄ọ ke edinọ eti ikọ ntiense ke obio oro.
◻ Akparawa Melanesia kiet edide ekpep ukpepn̄kpọ ido ukpono ke New Caledonia ama okop biọn̄ eke spirit. Enye ama okụt n̄wed oro Akpanikö Oro Adade Osim Nsinsi Uwem ke okpokoro ke ufọk eka esie, ndien enye ama okot ibuot 2 ye 3. Udọn̄ikọ Bible ke Exodus 20:4, 5 ye John 4:23, 24 oro ẹnemede ke n̄wed oro ama otụk enye esịt. Ke ekerede aban̄a se mme itien̄wed Abasi oro ẹdọhọde, enye ama obụp oku esie ntak emi Ufọkederi Catholic onyịmede edikama ndisọi mbiet ke utuakibuot. Oku oro ikọbọrọke mbụme oro. Eren oro ama aka ediwak ido ukpono “Christian,” edi owo ikọnọhọ enye ibọrọ oro oyụhọde enye ke mme mbụme esie. Ke akpatre enye ama ebiere ndidụk mbonoesop Mme Ntiense Jehovah ye eka esie, oro ama okowowụt udọn̄ ke akpanikọ. Ima oro enye okokụtde ke otu Mme Ntiense ye mme ukpepn̄kpọ mmọ oro ẹkọn̄ọde ke Bible ẹma ẹtụk enye esịt etieti.
Kpa ye anyan usụn̄, enye kpukpru ini ama esidụk moto mme owo aka mme mbonoesop, ama ọsọsọp ada idaha kaban̄a akpanikọ, onyụn̄ ana baptism. Idahaemi enye edi asan̄autom unamutom. Eka esie ye nditọeka esie iban iba n̄ko ẹma ẹkabade ẹdi Mme Ntiense Jehovah. Akparawa emi ama ọkwọrọ ikọ ọnọ ekpụk esie onyụn̄ ọtọn̄ọ ediwak ukpepn̄kpọ Bible. Idahaemi ediwak owo ke ekpụk esie ke ẹsidụk mme mbonoesop ke ikpehe emi—kpukpru ẹmi sia akparawa kiet ama okụt n̄wed oro anamde Bible an̄wan̄a ke okpokoro, ekpep enye, onyụn̄ ada se enye ekekpepde ke akpan n̄kpọ.
Jehovah enyene akwa ndutịm unọ udia eke spirit odude ke edinam mfịn, ndien akwa udịmowo ẹbọ ufọn ẹto enye. Isaiah ama etịn̄ prọfesi nnennen nnennen aban̄a enye ke ini enye ọkọdọhọde ete: “Sese, ikọt mi ẹyedia n̄kpọ, edi biọn̄ eyedọn̄ mbufo [mbon nsunsu ido ukpono].” (Isaiah 65:13) Inemesịt odu ọnọ nnyịn edieke ibọde ufọn ito ndutịm oro Jehovah anamde ndiyụhọ biọn̄ eke spirit nnyịn.