Ntọt M’ọkwọrọ Obio Ubọn̄
Edinam Akpanikọ Otoro Utom Nnyịn
EDINAM akpanikọ edi akpan n̄kpọ oro ẹyomde ẹto mme Christian. Apostle Paul ekewet ke Mme Hebrew 13:18 ete: “Nnyịn imobụre ifiọk ite, imenyene esịt emi mîbiomke nnyịn ke baba usụn̄ kiet, imonyụn̄ iyom ndidu uwem nte ọfọnde ke kpukpru usụn̄.” Edinam akpanikọ nnyịn ‘anam ukpepn̄kpọ Abasi Andinyan̄a nnyịn enyene uku ke kpukpru usụn̄.’ (Titus 2:10) Edinam akpanikọ, ọkọrọ ye edikwọrọ Obio Ubọn̄, oro Christian iba ẹkenamde ke obio ukara Tonga eke Edem Usụk Pacific ke ọnọ okopodudu ikọ ntiense. Ọfis n̄kọk itieutom Watch Tower Society ke Western Samoa obụk ete:
“Ke ediwak isua ebe ye n̄wan ẹdide Mme Ntiense ẹma ẹtịn̄ ẹban̄a Obio Ubọn̄ Abasi ẹnọ mme owo ke obio-in̄wan̄ inan̄ ke isuo mmọ edi ye unana n̄wọrọnda utịp. Ekem, ke ini ebe esie ọkọdọn̄ọde, n̄wan oro ekenyene ndise mban̄a in̄wan̄ mmọ, obom onyụn̄ an̄wan isịp mbakara, kpa n̄kukụre n̄kpọ oro mmọ ẹkedade ẹnyene okụk. Ke ini mbon udep ẹkedide ndisan̄a nse isịp mbakara oro, ekpat owo efen ama odụk otu ekpat ition oro n̄wan emi ekenyenede. Mbio obio ẹma ẹkpak enye ẹte onịm ekpat oro ọkọyọhọde osụhọ mi onyụn̄ ada enye nte mfọn Abasi. Eyenete an̄wan emi, nte ededi, ama esịn ndien, idem ke ini ẹkenọde enye okụk ekpat itiokiet, ọkọbọ nnennen okụk oro ẹkedide eke esie kpọt. Ẹma ẹdiọn̄ọ ẹban̄a edinam akpanikọ esie.
“Ke ukperedem, ke ini ebe esie okoyomde ndinam isan̄ n̄ka isuo efen, anyam ufọkurua ama ọdọhọ enye edep ndusụk n̄kpọurua ọsọk imọ. Ntiense emi ama anam nte ẹkedọn̄de enye onyụn̄ ada ndian̄ade okụk ọsọk eren oro. Eren emi ama odu ke n̄kpaidem. Enye ama ọdọhọ ke oro ekedi akpa ini emi owo ekededi akafiakde ada ndian̄ade okụk edi. Mbon efen oro enye ekesidọhọde ẹdep mme n̄kpọ kpukpru ini ẹsida ndian̄ade okụk oro. Ini efen, ke ini Ntiense emi okoyomde n̄kpọ oto ufọkurua eren emi, eren emi ama ọnọ enye ukpọhọde ufọkurua, eteme enye ete ekemen se enye oyomde onyụn̄ ọkpọn̄ okụk do ke ufọkurua. Mbon efen emi ẹkedude do ẹma ẹbụp anyam ufọkurua emi ntak emi enye ọkpọnọde Ntiense emi ukpọhọde ufọkurua ndien mînọhọ mmimọ. Enyene ufọkurua ama anam an̄wan̄a nte ke Ntiense emi ekedi n̄kukụre owo ke obio-in̄wan̄ oro emi imọ ikemede ndinịm ke akpanikọ.
“Ẹsineme ẹban̄a eti eduuwem ebe ye n̄wan emi ke otu mbio obio. Ẹdiọn̄ọ Mme Ntiense ẹmi ke ntak edinam akpanikọ mmọ, mmọ ndida san̄asan̄a ke mbre ukara, ye mmọ ndinọ ikọ ntiense mban̄a Obio Ubọn̄ Abasi, emi owụtde ukpụhọde oro odude ke ufọt edinịm ke akpanikọ mbio obio ye mme ukpepn̄kpọ Bible. Idahaemi ke ini mme mbụme ẹdemerede ẹban̄a Bible, mme owo ẹsiwak ndika mbịne Mme Ntiense ẹmi ndiyom mme ibọrọ. Ebe ama akam adaha ada ke bed ke okoneyo, aka mbono obio, onyụn̄ ọkọbọrọ mme mbụme oro ẹkebụpde ke ibuotikọ Bible. Ke ini odụkde edinam ubụkowo ke obio, ẹsiwak ndiben̄e enye ẹte owụt se Bible etịn̄de aban̄a n̄kpa, ndien ẹsinyịme mme ikọ esie.”
Ntre edinam akpanikọ ebe ye n̄wan ẹdide Mme Ntiense mi ye ukwọrọikọ Obio Ubọn̄ mmọ ke ẹnọ eti ikọ ntiense ke ediye isuo Edem Usụk Pacific emi. Mmọ ẹdori enyịn nte ke mbon efen ẹyekpep Bible ẹnyụn̄ ẹda idaha mmọ ẹnọ akpanikọ. Edieke mmọ ẹnamde, Jehovah Abasi ke akpanikọ eyediọn̄ mmọ.—John 8:32.