Ntọt M’ọkwọrọ Obio Ubọn̄

◻ “AKWA isịnenyịn [“ọkpọsọn̄ ukọbọ,” NW]” oro ẹkedade ẹtiene akpa esop Christian ama asuan ediwak mbet Christ. (Utom 8:1) Nte ẹdedi, ukọbọ emi ama ọnọ utịp unana idotenyịn koro mbon oro ẹkesuande mi ẹma “ẹsan̄a ke ebiet ke ebiet ẹkwọrọ gospel.” (Utom 8:4) Philip ama akaiso ndikwọrọ ikọ, ndien “mme otuowo [ẹma] ẹkpan̄ utọn̄ ye esịt kiet.” (Utom 8:6) Nte ukọbọ ọkọnọde utịp unana idotenyịn ke akpa isua ikie, kpasụk ntre ke enye akanam ke obio-in̄wan̄ kiet ke edem edere Thailand.

Akpan asiakusụn̄ Mme Ntiense Jehovah kiet ama ọtọn̄ọ ndikwọrọ ikọ ke obio-in̄wan̄ emi, ẹdi ke akpa mbon obio-in̄wan̄ oro ikọnọhọ n̄kpan̄utọn̄. Ke ini enye ekenyenede nneme ye ọkwọrọikọ n̄kann̄kụk oro, nte ẹdedi, mme owo ẹma ẹdiboho ọtọkiet ndikpan̄ utọn̄. Ndusụk mmọ ẹma ẹdidiọn̄ọ ẹte ke Ntiense oro ọfiọk Bible ọfọn akan asan̄autom mmọ, ntre mmọ ẹma ẹtọn̄ọ ndikpep Bible ye asiakusụn̄ oro idem okposụkedi mbon en̄wen ẹkefịnade mmọ. Ẹma ẹwot ndusụk unen-mbakara mmọ, ẹdịghe asiakusụn̄ oro uwem, ẹnyụn̄ ẹfọp ufọk eren kiet emi ekenyenede udọn̄. Eren oro ọkọdọhọ ete: “Mmọ ẹkeme ndifọp ufọk mi, ẹdi mmọ ikemeke ndifọp esịt mi.” Mbon oro ẹkpepde n̄kpọ ye Ntiense emi ẹsiwat anyanusụn̄ ke enan̄ukwak ndikodụk ukpepn̄kpọ ke Ufọkmbono Obio Ubọn̄. Owo inan̄ ke otu mmọ ẹma ẹna baptism, ndien owo itiokiet efen ke ẹsụk ẹdụk ukpepn̄kpọ ye mmọ.

Utịp Edinam Akpanikọ

◻ Nditọete ke Zambia ẹma ẹnyene eti enyịn̄ ke ntak edinam akpanikọ, ndien emi omosụn̄ọ ke mme edidiọn̄ ọnọ mmọ, onyụn̄ an̄wam mbon en̄wen ndikụt akpanikọ. Ebiowo kiet, oro edide asiakusụn̄ ofụri-ini, akaka isan̄ ke bọs onyụn̄ okop nte Ntiense kiet ke bọs oro enemede ye mbon en̄wen aban̄a ediset ke n̄kpa. Akaisan̄ kiet ama obụp n̄wan emi ete: “Ntak emi mbufo Mme Ntiense ẹdọhọde ke ido ukpono mmimọ edi n̄kukụre ido ukpono akpanikọ-ọ?” Eyenete eren emi ama esịn uyo ke nneme oro onyụn̄ ọdọhọ akaisan̄ oro ete ke Jehovah eyediọn̄ Mme Ntiense esie ke ntak mmọ ẹkpepde akpanikọ oro otode Bible.

Ke ufọt okoneyo ama ekebe ke anyan usụn̄isan̄ emi, bọs oro ama edisịm itie ukpeme usụn̄. Edịm ke ekedep ọkpọsọn̄ ọkpọsọn̄. Owoekọn̄ kiet ama odụk esịt bọs oro onyụn̄ obụp m̀mê owo Ntiense Jehovah ndomokiet odu ke isan̄ oro. Owo ita ẹma ẹdu. Ekem enye ama ọdọhọ ete: “Ọfọn, Mme Ntiense ẹsọn̄ọ ẹtie, mbon eken ẹwọrọ ye ekpat mbufo.” Kpukpru mbon eken ẹma ẹwọrọ ẹda ke edịm, ndien ke ndụn̄ọde oro okụrede, mmọ ẹma ẹfiak ẹdụk ye mbiomo mmọ ndien ọfọn̄ mmọ ẹma ẹbịt.

Ke afiakde odụk esịt bọs oro, owoekọn̄ oro ama ọdọhọ ete: “Ntak n̄kayakde Mme Ntiense ẹsụhọ edi nte ke mmọ ẹdi mbon oro ẹnamde akpanikọ. Nnyịn ima inyene ekese n̄kpọntịbe ima inyụn̄ ikụt ite ke mmọ ẹdi n̄kukụre mbon oro ẹnamde akpanikọ; ke ini nnyịn ibụpde se idude ke esịt ekpat mmọ, mmọ ẹsitịn̄ akpanikọ ẹnọ nnyịn.” Nte bọs oro akawatde akaiso, eyenete eren oro ama obụp ete: “Ewe idi ata ido ukpono?” Owo kiet ama ọbọrọ ete: “Enye oro edịm mîbịtke idem.”

Ih, edinam akpanikọ an̄wam ẹdiọn̄ọ ido ukpono akpanikọ, ndien enye ke akpanikọ enyene mme utịp esie!