Ntọt M’ọkwọrọ Obio Ubọn̄
Un̄wam Ẹnọde Mbon Oro Ẹkopde “Nsat-Itọn̄” ke Russia
“ỌFỌFỌN ọnọ mmọ eke ẹkopde biọn̄ ye nsat-itọn̄ edinen ido, koro mmọ ẹyeyụhọ,” ntem ke Jesus ọkọdọhọ. (Matthew 5:6) Mme ifiọkutom oro ẹtienede mi ẹwụt nte Mme Ntiense Jehovah ẹn̄wamde ndisụk nsatitọn̄ eke spirit ediwak owo ke Russia, emi ẹkebiọn̄ọde ifụre ido ukpono ke se ibede isua 70.
▪ N̄wan emi ekerede Valentina ama enyene mme akpan mbụme Bible ẹmi owo mîkọbọrọke ke ediwak isua. Ke uwụtn̄kpọ, enye ama eyịk ete: ‘Jesus ọkọbọn̄ akam ọnọ anie?’ Enye ama ekere ke anaedi Jesus ọkọbọn̄ akam ọnọ owo oro okponde akan enye onyụn̄ eyịk aban̄a se ikpedide enyịn̄ Owo emi.
N̄wan emi ama aka Ufọkabasi Russian Orthodox. Nte ededi, ke ido ukpono oro enye ikekwe mme ibọrọ inọ mme mbụme esie. Ke mîkopke uyụhọ, enye ama aka ufọkabasi Protestant edi ikosụk ikwe nnennen ibọrọ. Ke mîfiọkke ebiet en̄wen emi enye akpakade, Valentina ama ọtọn̄ọ ndikot Bible, odomode ndiyom mme ibọrọ ke idemesie—edi ufọn ikodụhe. Enye ama ọbọn̄ akam oyom un̄wam.
Ndusụk ini ke ukperedem Mme Ntiense Jehovah ẹma ẹkọn̄ usụn̄ufọk esie. Mmọ ẹma ẹwụt enye ke Bible ẹte ke enyịn̄ Abasi edi Jehovah. Ke akpatre, enye ama edifiọk owo emi Jesus ọkọbọn̄de akam ọnọ! Enye ama ọtọn̄ọ ndikpep Bible kpukpru ini ye Mme Ntiense. Ediwak ini enye ama esida ofụri okoneyo okot mme n̄wed oro Watch Tower Society emịn̄de onyụn̄ okot mme itien̄wed Bible. Ibịghike Valentina ama ebiere ete ke imọ ima ikụt akpanikọ. Ke ufan̄ ọfiọn̄ ita enye ama ọtọn̄ọ ndibuana ke utom ukwọrọikọ, ndien ọfiọn̄ iba ke oro ebede, enye ama ana baptism. Ndụn̄ọde esịt akpanikọ oro enye okodụn̄ọrede oyom akpanikọ ama enyene utịp.
▪ Ntiense kiet ama asan̄a ke bọs aka ndikọkwọrọ ikọ ke nsannsan ebiet. Ke ini isan̄ esie oro enye ama enyene nneme ye n̄kaiferi kiet aban̄a mme un̄wọn̄ọ Bible, edi n̄kaiferi oro ikenyeneke udọn̄. Ọfiọn̄ iba ke ukperedem Ntiense oro ama afiak anam isan̄ ọyọhọ ikaba aka kpa ebiet oro ndikọnọ utịn̄ikọ an̄wa. Ke utịn̄ikọ oro okụrede enye ama aka ebịne esenowo kiet onyụn̄ obụp enye ete: “Nte owo etetịn̄ n̄kpọ ọnọ fi aban̄a eti mbụk otode Bible?” Eren oro ama ọbọrọ ete, “Ih, afo ama etịn̄.” Ntiense oro ekekere ke enye akanam mbubru. Edi akparawa oro ama anam an̄wan̄a ete ke ọfiọn̄ iba ke edem imọ ima ikop nte Ntiense oro enyenede nneme ye n̄kaiferi, ke ini inamde isan̄ ke bọs. “Mma nyom ndifiọk ekese n̄kpọ, edi afo ama ọwọrọ ke bọs, ndien mma n̄kere ke ndikwe Mme Ntiense Jehovah aba tutu amama. Ekem ke itieutom mi mma nsobo ye eren kiet emi ekpepde Bible ye Mme Ntiense. Ndien oro anam ami ndu mi!”
Eren emi ye n̄wan esie ẹma ẹtọn̄ọ ndikpep Bible. Ke esisịt ini ebede, enye ama edikụt ete ke utom imọ atuaha ye mme edumbet Bible. Ke oyomde ndinyene eti ubieresịt ke iso Abasi, enye ama okpụhọ utom esie. Idahaemi enye etịn̄ ọnọ mmọ en̄wen aban̄a Obio Ubọn̄ Abasi ke kpukpru ifet. N̄wan esie n̄ko ke anam n̄kọri ke ukpepn̄kpọ Bible esie.
Mme Ntiense Jehovah ke akamba efakutom Russia ẹkop inemesịt ndinyene udeme ke ndidọhọ kpukpru mbon nti esịt ẹte: “Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.”—Ediyarade 22:17.