Ufọkn̄wed Gilead—Ọsọn̄ ke Isua 50 Onyụn̄ Okop Idem!

“EDIWAK ebiet ẹdu ẹmi owo mînọhọ ikọ ntiense aban̄ade Obio Ubọn̄ ke akamba udomo,” ntre ke N. H. Knorr eketịn̄ ọnọ akpa otu Gilead ke February 1, 1943, kpa usen oro ẹkebederede ufọkn̄wed emi. Enye ama adian do ete: “Anaedi odu ediwak owo efen efen ke mme itie ikie ye mme itie tọsịn oro ẹkpesịmde edieke mbonutom efen efen ẹkpedude ke an̄wautom. Ke mfọn Ọbọn̄, mmọ efen ẹyedu.”

Ndien mbonutom efen efen ẹmedu—ediwak miliọn efen efen! Ibat mme asuanetop Obio Ubọn̄ ọmọdọk ọtọn̄ọde ke owo 129,070 ke idụt 54 ke 1943 osịm owo 4,472,787 ke idụt 229 ke 1992! Ufọkn̄wed Gilead omotịp akamba akamba esịn ke ikọ ntiense oro osụn̄ọde oto n̄kọri oro. Ke isua 50 ẹma ẹkebe enye ke akaiso ndinyene akpan udeme ke ndinọ mbonutom isụn̄utom ukpep ndinam utom ke ebiet ekededi oro ẹyomde mmọ ke an̄wautom ererimbot.

Ke March 7, 1993, isenowo 4,798 oro ẹkenọde ikot ye mbonufọk Bethel eke U.S. ẹkedu ẹmi ẹkesopde idem ke Ufọkmbono Jersey City, ke New Jersey, kaban̄a edinam ukụre ukpep ọyọhọ otu 94. Ata akpan edinam emi ama ọnọ n̄ko ifet edikere mban̄a isua 50 eke Ufọkn̄wed Gilead n̄ka edem edem. Nte afo akpama ndifiọk esisịt mban̄a ndutịm emi?

Ke ẹma ẹkekwọ ikọ ediberede, George D. Gangas eke Otu Ukara ama ọbọn̄ akam ofụri esịt. Ekem, ke ntọn̄ọikọ Carey W. Barber, etieibuot okpokoro okụrede, mme andikụre ukpep—ye kpukpru mbon oro ẹkedụkde—ẹma ẹnọ ọyọhọ n̄kpan̄utọn̄ ke udịm udịm mbio mbio utịn̄ikọ.

Robert W. Wallen eketịn̄ ikọ akpa, ke ibuotikọ oro “Mbufo Idụhe Ikpọn̄.” Ke ufiop ufiop uyoikọ, enye ọkọdọhọ ete: ‘Ke mme usen oro ẹnade ke iso, mme idaha ẹyedaha ẹda ke uwem mbufo emi editiede mbufo ke idem nte ẹdu ata ikpọn̄, ẹdude enen̄ede oyom usụn̄ ọkpọn̄ ubon ye mme ufan.’ Didie, ndien, ke ẹkeme ndidọhọ ẹte, “Mbufo idụhe ikpọn̄?” Enye ama anam an̄wan̄a ete: ‘Koro se kpukpru mbufo ẹdinyenede edidi ifet edinyene nneme ke ediyịp enyịn kiet ye Jehovah Abasi.’ Enye ama akpak mme andikụre ukpep ete ẹda ifet edibọn̄ akam ke akpan n̄kpọ ẹnyụn̄ ẹda enye ẹnam n̄kpọ ke usen ke usen. Do, ukem nte Jesus, mmọ ẹyekeme ndidọhọ, “Ntiehe ikpọn̄.” (John 16:32) Mme ikọ oro ẹkedi n̄kpọ nsịnudọn̄ didie ntem ẹnọ mme andikụre ukpep oro!

Ke atatde ibuotikọ oro “Ẹsọn̄ọ Ẹmụm Idotenyịn Mbufo Ẹkama” (ọkọn̄ọde ke itien̄wed Abasi eke usen eke March 7), Lyman A. Swingle eke Otu Ukara ama etịn̄ ikọ kaban̄a ufọn edinyene edu iba—ime ye idotenyịn. Enye ọkọdọhọ ete, ‘Esuene, ibak ibak edinam, usua, edisịn ke n̄kpọkọbi, idem n̄kpa, ẹdi mme ntak oyomde mme Christian ẹnyene ime. Akwa ubom odudu emi mme anam-akpanikọ Mme Ntiense Jehovah ẹkemede ndibọ odudu nto ke mme ini unana inyeneke adan̄a. Emi ke akpanikọ anam owo enyene mbuọtidem, akpan akpan ye mbufo mme andikụre ukpep.’ Nso kaban̄a idotenyịn? Enye ama anam an̄wan̄a ete, ‘Idotenyịn edi ata akpan n̄kpọ. Nte ndụn ekpemede ibuot andiyara, ntre ke idotenyịn edinyan̄a ekpeme ekikere Christian, an̄wamde enye ndimụm nsọn̄ọnda n̄kama.’—1 Thessalonica 5:8.

Etịn̄ikọ efen, Ralph E. Walls, ama emek aduai-owo-idem ibuotikọ, “Didie ke Nnyịn Ikeme Ndibọhọ N̄kenyene Ifụre ke ‘Akamba Ufan̄’?” Nso idi “akamba ufan̄” emi? (Psalm 18:19) Etịn̄ikọ emi ama anam an̄wan̄a ete, “Idaha edinyan̄a oro adade nsụkesịt ye ifụre ekikere edi.” Nnyịn iyom ẹnyan̄a nnyịn ẹsio ke nso? ‘Esio fi ke ubọk—mme ndudue idemfo.’ Enye ama adian do ete: ‘N̄ko, ẹsio ke mme idaha ẹtode an̄wa oro Satan anamde ọdọdiọn̄ ọsọn̄ ubọk.’ (Psalm 118:5) Didie ke nnyịn ikeme ndibọhọ n̄kenyene ifụre ke akamba ufan̄? ‘Ebe ke ndiyom mme ewụhọ Jehovah ke kpukpru se nnyịn inamde ye ke ndikpe Jehovah ubọk ke mbuọtidem ke kpukpru se ifịnade nnyịn.’

“Nso Ina ke Iso?” ekedi ibuotikọ oro Don A. Adams ekemekde. Ndien nso ikana ke iso ibet mbufa isụn̄utom ẹmi? Ikpehe ini edinam ukpụhọde, enye ama anam an̄wan̄a. “Ediwak edidiọn̄ n̄ko ẹdu mbufo ke iso.” Nte uwụtn̄kpọ, enye ama etịn̄ aban̄a mbufa isụn̄utom iba ẹmi ke ẹma ẹkesụhọde ẹtie ke itieutom mmọ ẹkewetde ẹte: “Kere ban̄a mfọnn̄kan usen oro afo akanam enyenede ke utom, ndien oro edi nte kpukpru usen etiede. Nnyịn isikemeke ndikama n̄wed ẹwakde ẹkem, ndien mme owo ẹsikaiso ẹdọhọ nnyịn ikpep n̄kpọ ye mmimọ.” Etịn̄ikọ ama etịn̄ ndusụk ikọ ọnọ ubon ye mme ufan mme andikụre ukpep ẹmi ete: ‘Ufọn idụhe mbufo nditịmede esịt mban̄a mme andikụre ukpep ẹmi. Mbufo ẹmekeme ndin̄wam mmọ ke ndiwet mme ikọ nsịnudọn̄ nnọ mmọ.’—Mme N̄ke 25:25.

Ekem mme andikpep ke ufọkn̄wed emi ẹma ẹtịn̄ ikọ. Jack D. Redford ẹkemek ibuotikọ oro “Ẹkûyom N̄kpọ Ndomokiet Ẹto Owo Ekededi.” Enye ama anam an̄wan̄a ete ke kiet ke otu mme n̄kpọ-ata ẹmi mme andikụre ukpep ẹdisobode edi ndinyene ufan ufan itie ebuana ye mme owo. Nso ikeme ndin̄wam? “Ẹfụmi mme ndudue mmọ. Ẹkûyom se ikponde ikaha ẹto mmọ en̄wen. Ẹkûyom kpukpru n̄kpọ oro mbufo ẹkerede ke ẹmodot ndinyene kpukpru ini. Ẹnam ufan̄ ẹnọ unana mfọnmma mbon en̄wen, ndien mfọnido emi eyen̄wam mbufo ndinyene ufan ufan itie ebuana. Ukeme mbufo ndinyene ufan ufan itie ebuana ye mmọ en̄wen edidi udomo edikọri nsịm ọyọhọ idaha mbufo.” (Mme N̄ke 17:9) Ke akpanikọ, edida ọniọn̄ ọniọn̄ item emi nsịn ke edinam eyen̄wam mme andikụre ukpep ẹmi ndinam ukpụhọde oro okụtde unen ke ndidi isụn̄utom ke esenidụt!

“Nnyịn ikama ọsọn̄urua n̄kpọ emi ke aban̄ mbat,” ntre ke 2 Corinth 4:7 ọdọhọ. Ulysses V. Glass, esịn owo enyịn̄ ke Ufọkn̄wed Gilead, ama etịn̄ n̄kpọ aban̄a itien̄wed emi nte enye akatatde ibuotikọ oro “Ẹbuọt Idem ke Mme Anam-akpanikọ Nditọete Mbufo, Oro Ẹdomode Ẹfiọk.” Nso ẹdi “aban̄ mbat”? Enye ama ọdọhọ ete, “Anaedi ẹmi ẹban̄a nnyịn nte mme anana mfọnmma owo.” Nso idi “ọsọn̄urua n̄kpọ”? Enye ama anam an̄wan̄a ete, “Enye edi utom Christian nnyịn.” (2 Corinth 4:1) Ndien nso ke ẹkpenam ye ọsọn̄urua n̄kpọ emi? “Ọsọn̄urua n̄kpọ oro Jehovah akayakde esịn nnyịn ke ubọk idịghe se ẹkpeyakde ẹnịm. Ntre, mbufo ndima isụn̄utom ini iso, ẹsuan ọsọn̄urua n̄kpọ oro ke ebiet ekededi oro mbufo ẹkade, ẹnyụn̄ ẹkpep ediwak mmọ en̄wen nte ẹsuande enye.”

Ekedi idaha edifiak nti se ikebede ke ini edem ke ini Albert D. Schroeder ọkọtọn̄ọde nditịn̄ ikọ, koro enye ekedi esịn owo enyịn̄ ke Ufọkn̄wed Gilead ke ini enye ọkọtọn̄ọde. “Isua Aba ye Duop eke Unọ Ukpep Ukara Abasi” ekedi ibuotikọ esie. Enye ọkọdọhọ ete, “Jehovah ọfiọk nte ọnọde ukpep oro enyenede uforo, ndien enye amanam emi.” Didie? Brọda Schroeder ama etịn̄ aban̄a ukpep oro ẹbọde ẹto ufọkn̄wed iba oro ẹketọn̄ọde ke isua 50 ẹmi ẹkebede—Ufọkn̄wed Utom Ukara Abasi ye Ufọkn̄wed Gilead. Enye ama osio owụt nte ke ọsọn̄urua n̄kpọutom oro ẹdade ẹnọ nnennen ifiọk edi New World Translation. Enye ama ọsọn̄ọ ọnọ mme andikụre ukpep ete: “Mbufo ẹmekeme ndika utom esenidụt mbufo ye akwa mbuọtidem nte ke N̄ka eyekaiso ndinam mbufo ẹnyene nnennen ifiọk uduak Jehovah.”

Milton G. Henschel, etieibuot Watch Tower Bible and Tract Society of Pennsylvania, eketịn̄ ikọ ke ibuotikọ oro “Ẹdọdiọn̄ Ẹkan.” Brọda Henschel akada ibuotikọ esie oto ibuotikọ isua 1943: “Ẹdọdiọn̄ ẹkan oto ke enyeemi akamade nnyịn.” (Rome 8:37, King James Version) Enye ama anam an̄wan̄a ete ke oro ekedi ibuotikọ isua oro odotde koro ke ufọt Ekọn̄ Ererimbot II, nditọete nnyịn ke ediwak idụt ẹma ẹsobo ekese ukọbọ. Brọda Henschel ama okot ndusụk ikọ oto nsiondi Enyọn̄-Ukpeme oro ekenemede ibuotikọ isua oro ndien ekem anam an̄wan̄a ete: “Akpa otu Gilead ẹkekpep ibuotikọ Enyọn̄-Ukpeme (Ikọmbakara) emi [January 15, 1943] ke ọfiọn̄ February, ndien emi ama otịm mmọ idem eben̄e se ikanade ke iso.” Enye ama anam an̄wan̄a ete ke ediwak mme andikụre ukpep ke isua 50 ẹmi ẹkebede ẹma ẹwowụt idem nte mme andikan. Nso kaban̄a ọyọhọ otu 94? “Ẹsịk ẹkpere Jehovah, ẹsịk ẹkpere ima esie, ndien mbufo iditreke ndikan.”

Ke etienede mme utịn̄ikọ usenubọk oro, etieibuot okpokoro ama ọnọ ndusụk ekọm oro ẹkebọde ẹto nsio nsio idụt. Ndien ini emi mme ọdọ ndọ 24 oro ẹketiede ẹbet ye ọkpọsọn̄ udọn̄ ama edisịm—edinọ n̄weditoro. Kamse, nditọ ufọkn̄wed Gilead oro idahaemi ẹkedi mme andikụre ukpep in̄wan̄în̄wan̄! Mmọ ẹketo idụt 5, edi itieutom mmọ akada mmọ aka idụt 17, esịnede Hong Kong, Taiwan, Mozambique, ye mme ikpehe Edem Usiahautịn Europe.

Ke ini nduọkodudu ama ekebe, ndutịm uwemeyo ama ọtọn̄ọ ye ibio ibio Ukpepn̄kpọ Enyọn̄-Ukpeme, emi Robert L. Butler okonịmde. Ekem mme andikụre ukpep ẹma ẹbụk ndusụk n̄wọrọnda ifiọkutom oro mmọ ẹkenyenede ke adan̄aemi ẹkenọde ikọ ntiense ke n̄kann̄kụk Wallkill, New York. Ndutịm emi ama owụt kiet ke otu mme n̄kpọ oro nte eyịghe mîdụhe akadade mmọ aka Gilead—ntotụn̄ọ ima oro mmọ ẹnyenede ẹnọ an̄wautom.

Ke etienede edinam nditọ ufọkn̄wed, ediwak owo ke otuowo ẹma ẹyịk m̀mê idisụk idụhe ndutịm oro ediwụtde san̄asan̄a n̄kpọ ndida nti isua 50 eke Ufọkn̄wed Gilead. Mmọ ikekwe edikpu!—Se ekebe oro etienede, “Ndifiak Ndụn̄ọde Isua 50 eke Ufọkn̄wed Gilead.”

Isua 50 ẹmi ẹkebede, Brọda Knorr ama anam owụt ete ke imọ ikedi eren mbuọtidem ye ukeme ndida n̄kụt n̄kpọ anyan usụn̄. Enye ama owụt mbuọtidem oro enye ekenyenede nte ke Ufọkn̄wed Gilead eyekụt unen ke utịn̄ikọ ediberede oro enye eketịn̄de ọnọ akpa otu, ke ini enye ọkọdọhọde ete: “Nnyịn imonịm ke akpanikọ ite, ke nte ekemde ye enyịn̄ esie, ‘ebok ntiense’ eyewọrọ oto ebiet emi okosịm kpukpru ikpehe ererimbot ye nte ke utọ ntiense oro eyeda nte n̄kpọ editi kaban̄a ubọn̄ Abasi oro owo mîkemeke tutu amama ndisobo mfep. Mbufo nte mme asan̄autom ẹmi ẹdoride ubọk ẹyekọn̄ ọyọhọ mbuọtidem mbufo ke Ata Edikon̄, ẹfiọkde ẹte ke enye eyekpeme onyụn̄ ada mbufo usụn̄ ke kpukpru ini unana, ndien mbufo ẹyefiọk n̄ko ẹte ke enye edi Abasi edidiọn̄ n̄ko.”a

Isua 50 ke ukperedem, Ufọkn̄wed Gilead ke osụk okop idem! Mme andikụre ukpep eke ọyọhọ otu 94 idahaemi ẹnyene ifet editiene mme andikụre ukpep ẹwakde ẹkan owo 6,500 oro ẹkebemde mmọ iso. Mmọ ẹkpekam ẹkọn̄ ọyọhọ mbuọtidem mmọ ke Ata Edikon̄ nte mmọ ẹnamde udeme mmọ ke nditan̄ “ebok ntiense” mbok oro edidade nte n̄kpọ editi kaban̄a ubọn̄ Jehovah Abasi.

[Mme Ikọ idakisọn̄]

[Ekebe ke page 25]

Idaha Nditọ Ufọkn̄wed

Ofụri ibat nditọ ufọkn̄wed: 48

Ibat idụt oro mmọ ẹtode: 5

Ibat idụt oro ẹnọde mmọ ẹka: 17

Ukem mbahade isua emana: 32

Ukem mbahade isua ke akpanikọ: 15.3

Ukem mbahade isua ke utom uyọhọ-ini: 9.6

[Ekebe ke page 26, 27]

NDIFIAK NDỤN̄ỌDE ISUA 50 EKE UFỌKN̄WED GILEAD

Nso mfọnn̄kan usụn̄ idu ndikere mban̄a mbụk Gilead ke ebede ke mme ifiọkutom mbon oro ẹkekade ufọkn̄wed emi—mme akpa andikụre ukpep, mme andikpep, ye mmọ eken oro ẹken̄wamde nditịm enye? Esịt ama adat otuowo nte mmọ ẹkekpan̄de utọn̄ ẹnọ ikpehe oro “Ndifiak Ndụn̄ọde Isua 50 eke Ufọkn̄wed Gilead,” emi Theodore Jaracz okonịmde.

Nso ikedi mme idaha oro ẹkedade ẹkesịm editọn̄ọ ufọkn̄wed emi? Brọda Schroeder ama anam an̄wan̄a ete ke ẹkenọ imọ ye mme andikpep iba efen n̄kpasịp ọfiọn̄ inan̄ nditịm ufọkn̄wed emi. “Edi etisịm Monday, February 1, 1943, nnyịn ima iben̄e idem inọ edinam ediyak nnọ.”

N̄kpọ eketie didie ye mme akpa isụn̄utom ẹmi ẹkesiode ẹdọn̄ utom? Brọda Henschel ama etịn̄ ete: “Nnyịn ima inam itieutom N̄ka esede aban̄a unọ n̄wed ọwọrọ atan̄ kpukpru se mmọ ẹkenyenede ndikama ọdọn̄ ke ekebe eto. Ke ini mme ekebe ẹmi ẹkedide ẹdisịm, mmọ ẹma ẹkụbọde mmọ ye ntịn̄enyịn ẹnyụn̄ ẹsion̄o inyene mmọ. Edi ekem mmọ ẹma ẹda mme ekebe ẹmi ẹnam n̄kpọ ndụn̄ufọk.” Enye ama ọdọhọ ete ke akpatre N̄ka ama anam ndutịm ndinọ ufọkidụn̄ isụn̄utom oro ẹtịmde ediye ediye.

Ekem ke ndutịm emi, ndusụk mme andikụre ukpep ke mme akpa otu Gilead oro idahaemi ẹdide mbonufọk Bethel eke U.S. ẹma ẹbuana se mmọ ẹtide, mme ekikere mmọ, ye mme ifiọkutom mmọ. Mme utịn̄ikọ mmọ ke akpanikọ ẹma ẹtụk esịt kpukpru mbon oro ẹkedụkde.

“Ke mma n̄kọbọ ikot ndidụk akpa otu, mma ndifiọk nte ke eka mi enyene udọn̄ọ kansa. Edi sia enye ama akanam usiakusụn̄ ọtọn̄ọde ke edide isua 16 ke emana kaiso, enye ama ọsọn̄ọ ọdọhọ mi ete nnyịme ikot oro. Ntre ye mbuaha ntụk ye ibetedem ke Jehovah, mma nnam isan̄ n̄ka South Lansing. Mma nnen̄ede ndara nnyụn̄ n̄wụt esịtekọm ntotụn̄ọ ntotụn̄ọ mban̄a ukpep Gilead. Eka mi ama okụre utom esie eke isọn̄ esisịt ini ke mma n̄kokụre ukpep.”—Charlotte Schroeder, ama anam utom ke Mexico ye El Salvador.

“Sia Jehovah ama ekesese aban̄a mi ke ikpehe n̄kan̄ isọn̄ oro ami n̄kodude, mma n̄kere nte ke ebiet ekededi eke ami n̄kade osụk edi kpa isọn̄ esie, ndien ke enye eyese aban̄a mi. Ntre mma nnen̄ede n̄kop inemesịt ndinyịme ikot edidụk akpa otu.”—Julia Wildman, ama anam utom ke Mexico ye El Salvador.

“Utom isụn̄utom ekedi utịbe n̄kpọ! Nnyịn ima ikeme ndinyene nneme ke kpukpru enyịnusụn̄. Ke akpa ọfiọn̄, mma nnịm n̄wed 107 nnyụn̄ nnịm ukpepn̄kpọ Bible 19. Ke ọyọhọ ọfiọn̄ iba mma nnyene ukpepn̄kpọ Bible 28. Nte ededi, ama odu ndusụk n̄kpọ oro akanade nnyịn ikabade imehe—ufiop, mbịtmbịt ofụm, nduyịp. Edi ekedi utịbe ifet ndidu do. Enye edi n̄kpọ oro ami ndimade kpukpru ini.”—Mary Adams, ọyọhọ otu iba, kaban̄a itieutom esie ke Cuba.

“Idaha eyo ekedi kiet ke otu ikpọ ubiọn̄ọ oro nnyịn ikenyenede ndin̄wana n̄kan ke Alaska. Ke edem edere ama enen̄ede ebịt etieti, ye eyo ebịtde nte ice osụhọde okosịm Fahrenheit 60 onyụn̄ ebịtde akan oro. Ikesisan̄a ke ubom m̀mê ke ubomofụm isịm mme obio-in̄wan̄ India ye n̄kpri nsannsan ebiet ke ufọt edem usụk ye edem usiahautịn Alaska.”—John Errichetti, ọyọhọ otu ita.

“Ke n̄kan̄ mi Gilead ekedi ikot otode Jehovah ebe ke esop esie eke isọn̄ ndisọn̄ọ nnyịn idem ke n̄kan̄ eke spirit nnyụn̄ n̄wụt nnyịn utịbe utịbe usụn̄uwem.”—Mildred Barr, ọyọhọ otu 11, ama anam utom ke Ireland.

Ediwak inem inem ndụn̄ọde ẹma ẹtiene—Lucille Henschel (ọyọhọ otu 14, ama anam utom ke Venezuela), Margareta Klein (ọyọhọ otu 20, ama anam utom ke Bolivia), Lucille Coultrup (ọyọhọ otu 24, ama anam utom ke Peru), Lorraine Wallen (ọyọhọ otu 27, ama anam utom ke Brazil), William ye Sandra Malenfant (ọyọhọ otu 34, ẹma ẹnam utom ke Morocco), Gerrit Lösch (ọyọhọ otu 41, ama anam utom ke Austria), ye David Splane (ọyọhọ otu 42, ama anam utom ke Senegal).

Nso kaban̄a nditọete oro ẹkenamde utom nte mme andikpep? Ẹma ẹnam ndụn̄ọde ye ndusụk mmọ n̄ko—Russell Kurzen, Karl Adams, Harold Jackson, Fred Rusk, Harry Peloyan, Jack Redford, ye Ulysses Glass. Mmọ ẹma ẹkere ntotụn̄ọ ntotụn̄ọ ẹban̄a ifetutom mmọ, ẹtịn̄de nte emi otụkde mmọ tutu osịm usen nte mfịn.

Lloyd Barry, emi ama akanam utom ke Japan, ama ọnọ aduai-owo-idem ikọ ntiense ke nte mme isụn̄utom oro ẹbọde ukpep ke Gilead ẹnyenede uforo. Ke 1949, ke ini ẹkenọde isụn̄utom 15 ẹka do, se ikpride ikan mme asuanetop 10 ẹkedu ke ofụri Japan. Edi isua 44 ke ukperedem, mme anditan̄a Obio Ubọn̄ 175,000 oro ibat akade-kaiso ndidọk ẹdu ke idụt oro! Robert Wallen ndien ama etịn̄ aban̄a n̄wọrọnda unen oro ndusụk isụn̄utom ẹkekụtde ke ndin̄wam mme owo ẹdụk akpanikọ, esịnede eyenete an̄wan kiet edide isụn̄utom emi odude ke Panama ke se ibede isua 45 emi onyụn̄ an̄wamde owo 125 ndinam n̄kpọ n̄kosịm idaha uyakidem ye baptism.

Ẹma ẹsịm ata-utịt ofụri ndutịm emi ke ini ẹkenọde kpukpru mbon oro ẹkedude ke otuowo ẹmi ẹkedide mme andikụre ukpep ke Gilead ikot ẹte ẹdọk ẹka mbot itie edinam. Emi ke akpanikọ ekedi ini nduaidem. Uwak nditọete iren ye iban—owo 89 ẹtode ufọk Bethel ke adianade ye mme andikụre ukpep oro ẹketode-to ẹdi—ẹma ẹsan̄a ẹsụhọde ke ufan̄ n̄kpọitie ẹnyụn̄ ẹdọk udịghiukot ẹka mbot itie edinam. Nditọete oro ẹkenamde utom nte mme andikpep ke mme isua ẹmi ẹbede ẹma ẹdiana ye mmọ, ndien ekem mbon oro ẹkụrede ukpep ke ọyọhọ otu 94—n̄kpọ nte owo 160 ke ofụri ofụri!

Brọda Jaracz ama obụp ete, “Nte utom Ufọkn̄wed Gilead ke ndinọ mme isụn̄utom ukpep mben̄e utom esenidụt ama okụt unen? Uyarade eke isua 50 ẹmi ẹbede edi ih ke ọkpọsọn̄ uyo!”

[Ndise ke page 25]

Ọyọhọ Otu 94 Oro Ẹkụrede Ukpep ke Watchtower Bible School of Gilead

Ke udịm enyịn̄ ẹtienede mi, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) De La Garza, C.; Borg, E.; Arriaga, E.; Chooh, E.; Purves, D.; Fosberry, A.; Delgado, A.; Drescher, L. (2) Scott, V.; Fridlund, L.; Kettula, S.; Copeland, D.; Arriaga, J.; Thidé, J.; Olsson, E.; Widegren, S. (3) Delgado, F.; Keegan, S.; Leinonen, A.; Finnigan, E.; Fosberry, F.; Halbrook, J.; Berglund, A.; Jones, P. (4) Watson, B.; Frias, C.; Chooh, B.; Halbrook, J.; Purves, J.; Finnigan, S.; Jones, A.; Cuccia, M. (5) Scott, G.; Copeland, D.; Drescher, B.; De La Garza, R.; Leinonen, I.; Keegan, D.; Watson, T.; Kettula, M. (6) Widegren, J.; Borg, S.; Cuccia, L.; Berglund, A.; Olsson, B.; Frias, J.; Fridlund, T.; Thidé, P.