Akwa Esop Ido Ukpono Ererimbot Nte Enye Eyekụt Unen?
MME adaiso ido ukpono ke ediwak itie ikie ẹma ẹdụk Akwa Esop Ido Ukpono Ererimbot ọyọhọ iba oro ẹkenịmde ke Chicago, Illinois, U.S.A., ke ndaeyo 1993. Ido Ukpono Buddha, Christendom, Ido Ukpono Hindu, Ido Ukpono Jew, ye Islam ẹma ẹdu do. Mme ifọt ye mme andituak ibuot nnọ mme abasi-an̄wan ẹma ẹdu do n̄ko. Mmọ ẹkeneme ẹban̄a udeme oro mmọ ẹnyenede ke ndida utịt nsọk ekọn̄. Etieibuot okpokoro esop oro ama ọdọhọ ete ke “mbahade iba ke itie ita ke otu ikpọ en̄wan ke ererimbot mfịn oto ntak ido ukpono.”
Isua Ikie Ẹmi Ẹkebede
Ndi akwa esop oro ama okụt unen? Kere se ikotịbede isua ikie ẹmi ẹkebede ke akpa Akwa Esop Ido Ukpono Ererimbot. Ẹkenịm enye n̄ko ke Chicago, ke ndaeyo eke 1893, ndien se iwakde ikan mme owo ẹtode ido ukpono 40 ẹkedụk. Mbono Ediomi Akwa Esop Ido Ukpono Ererimbot oro ọdọhọ ete ke mbon oro ẹkedụkde ke 1893 “ẹkenịm ke akpanikọ ẹte ke enye edidi akpa ke udịm udịm mbono mbuaha mbuọtidem ofụri ererimbot oro editịpde n̄kpọ esịn ke ifiọk, emem ye n̄kọri. Oro ikedịghe ntre. Unana edinyịme eke ido ukpono ye afai ẹdi ntak mme ekọn̄ ke isua 100 ẹmi ẹkebede, ndien ke osụk akaiso mfịn.” Ntak ẹnyenede edikpu? Koro ofụri ekikere aban̄ade mbuaha mbuọtidem inyeneke unyịme Abasi. Bible ọdọhọ ke ete: “Ẹkûbọp idem utịn̄e utịn̄e ye mmọ eke mînịmke ke akpanikọ.”—2 Corinth 6:14-17.
Nte enende, Zion’s Watch Tower nsiondi eke September 1893 ama owụt nte ke N̄wed Abasi inọhọ Akwa Esop Ido Ukpono Ererimbot ibetedem ke ini enye ọkọdọhọde, ye ndusụk udomo edu mbubru ete: “Mmọ ẹma ẹdọk ediwak utịbe utịbe otu mbat ke n̄wụre Babylon ye mme obio eset eken, edi odu ndusụk oro owo mîkwe kaban̄a. . . . Mmọ ikwe ndomokiet emi etịn̄de nte Moses ye Joshua ẹkekotde ‘Akwa Esop Ido Ukpono,’ eke mbon Moab ye mbon Ammon, ye mbon Edom . . . Mmọ ikwe kan̄a ndomokiet emi etịn̄de aban̄a ọsọn̄idem akanieren Samuel nte ọdọn̄de ẹka Gath ye Ekron man ẹkekot otu mme oku Dagon ndidọk ndi Shiloh nnyụn̄ ndinyene mbono ye mme oku Jehovah . . . Mmọ ikwe ndomokiet emi etịn̄de aban̄a ọbọbọ-n̄kpaha ikpa akanieren Elijah nte okodiomide ‘mbono’ ye mme oku Baal ye Moloch ndinyene nneme ke urua kiet mban̄a mme ido nsio nsio ido ukpono mmọ, ye ekikere edimenede ukpono edem mbiba ẹmi ẹnyenede ẹnọ ido ukpono kiet eken.”
Obio Ubọn̄ Abasi—N̄kukụre Idotenyịn
Akwa Esop Ido Ukpono Ererimbot oro idikwe unen. Mme n̄wedmbụk n̄kpọntịbe ye mme andidụk ẹma ẹda mme utọ ikọ nte “ọkpọsọn̄ ntịme,” “ndutịme,” ye “ebiet editịm” ke nditịn̄ mban̄a akwa esop oro. Nte mbụk kiet ọdọhọde, idem mme bodisi ẹma ẹtiene ẹbuana ke ndikpan ndutịme iba oro akasiahade oto ubahade ke ukaraidem. Ke n̄wedibet eke 1952, esop oro ama esịn nte kiet ke otu uduak esie ete: “Ndiwụk Akwa Esop Ido Ukpono Ererimbot oro ebịghide ndinam utom ye EDIDIANA M’IDỤT ke ndinyene emem ererimbot ye ifiọk ke otu kpukpru orụk.” Ke edide isio ye oro, Jesus ama ọdọhọ ete ke Obio Ubọn̄ imọ idịghe ubak eke ererimbot emi. Bible anyan ubọk owụt Obio Ubọn̄ Abasi nte n̄kukụre usọbọ ke mme mfịna ubonowo.—Daniel 2:44; John 18:36. ◆