Ntọt M’Ọkwọrọ Obio Ubọn̄

Abasi Iten̄eke Owo Enyịn

KE SE ikande isua 1,900 ẹmi ẹkebede, apostle Peter ama ọnọ Cornelius kpa akwa owoekọn̄, ikọ ntiense, ọdọhọde ete: “Ke akpanikọ mmokụt nte Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” (Utom 10:​34, 35) Cornelius ama owụt mbak Abasi ye ima oro enye amade se inende. Enye ama onyịme ikọ ntiense oro Peter ọkọnọde, onyụn̄ akabade edi Christian.

Ukem edumbet oro edi akpanikọ mfịn​—⁠Abasi iten̄eke owo enyịn. Nnyịn ifiọk emi ito ifiọkutom otode Germany mi. Ntọt oro ọdọhọ ete:

“Ke efakutom esop nnyịn, akamba itieutom mbonekọn̄ Russia ẹdu. Ke 1989, esisịt ini ke Ibibene Berlin ama ọkọduọ, mbiowo ẹma ẹbụp m̀mê odu mme asuanetop ekededi oro ẹfiọkde usem Russia. Ndusụk nnyịn ima idiọn̄ọ, ndien ima ika utom ke efakutom emi, emi ekedide ata n̄kpọ idatesịt. Se itienede mi edi kiet ke otu ediwak ifiọkutom.

“Ami n̄kasan̄a ye asuanetop oro mînaha kan̄a baptism (oro idahaemi ama akana baptism ke anyanini) ke ini ikenyenede nneme ye akwa owoekọn̄ kiet. Akwa owoekọn̄ oro ama ọnọ n̄kpan̄utọn̄ ke se nnyịn iketịn̄de ndien ekem ọdọhọ nnyịn inyene nneme ye mbonekọn̄ esie. Enye ọkọdọhọ ete ke ana mmọ ẹkop ẹban̄a Abasi ye Bible n̄ko, ntre nnyịn ima idiomi ndifiak n̄ka.

“Nnyịn ima idọhọ eyenete an̄wan emi etịn̄de Russia udọn udọn asan̄a ye nnyịn aka nte akabadeikọ. Ke itie usopidem itieutom mbonekọn̄ oro, nnyịn ima inịm okpokoro n̄wed inyụn̄ itịn̄ ikọ inọ mbonekọn̄ 68 inyụn̄ ibọrọ mme mbụme mmọ. Ke oro ebede mmọ ye inemesịt ẹma ẹbọ n̄wed 35 ye se ikperede ndisịm magazine 100. Nte nnyịn ikọkpọn̄de itie usopidem oro, nnyịn ima ikụt n̄kpri otu ẹnemede n̄kpọ ke mme n̄wed oro.

“Nnyịn ima idiomi ndifiak n̄ka ke July 4, 1992. Ke ikosịmde ke n̄kanika 10:50 usenubọk, ekpeme inuaotop itieutom mbonekọn̄ oro ama asian nnyịn ete ke mbonekọn̄ oro ke ẹkebet nnyịn. Akwa owoekọn̄ kiet ama ada nnyịn odụk itie usopidem oro, ndien nnyịn ima ikụt nte ke eyenan̄wan kiet oro ke akpa ọkọbọde nnyịn n̄wed ndisịn ke itie ubonn̄wed, ama ọnọ ntọt aban̄a edidi nnyịn ebe ke ndidian mme kad ntọt ke itieutom mbonekọn̄ oro. Nditọete iren ita ẹma ẹnọ mbio mbio utịn̄ikọ ẹban̄a utom nnyịn eke ofụri ererimbot ẹnyụn̄ ẹwụt ntak emi nnyịn ikemede ndiberi edem ke Bible. Ekem nnyịn ima ibọrọ mme mbụme oro otuowo ẹkebụpde, inọde mme ibọrọ ito Bible. Ke otu mme mbụme oro ekedi, Nso idi idaha Mme Ntiense Jehovah kaban̄a utomekọn̄, ndien nte owo mmọ ndomokiet edi owoekọn̄? Emi ama ọnọ asuanetop oro mînaha kan̄a baptism emi akasan̄ade ye ami ke ntọn̄ọ ntọn̄ọ ifet nditịn̄ mban̄a utom esie ke isua 25 ke udịmekọn̄ East Germany, mme akpatre isua utom esie nte etubom mme an̄wana ekọn̄ ofụm. Enye ama obụk nte imọ ikekpepde n̄kpọ iban̄a Abasi ye Bible ye nte iyomde ndikabade ndi kiet ke otu Mme Ntiense Jehovah idahaemi. Se enye eketịn̄de ama otụk mbonekọn̄ oro. Ke ufan̄ minit itiaba kpukpru n̄wed oro nnyịn ikakamade ika ẹkedidu ke ubọk mbonekọn̄ oro, ndien ediwak mmọ ẹma ẹyom Bible. Nnyịn ima ikeme ndinyene Bible itiaba ke usem Russia nto ufọkurua unyamn̄wed, emi mmọ ẹkekopde inemesịt ndibọ. Ekedi ata n̄kpọ idara ndinọ mbon ọbiọn̄ eke spirit ẹmi ntọt otode Bible, ndien nnyịn imodori enyịn ite ke mmọ ẹyenam n̄kpọ ẹban̄a oro.”

Ke akpanikọ Abasi iten̄eke owo enyịn. Ebede ke Ikọ esie enye omokot mbon esịt akpanikọ inamke n̄kpọ m̀mê mmọ ẹdi mmanie m̀mê edu ke ebiet ewe. Enye ọmọnọ mmọ ikot ndikpep mban̄a enye ye Eyen esie, Jesus Christ, ndien ediwak owo ke nsio nsio idaha ke uwem ke ẹnam oro.​—⁠John 17:3.