Idara Idara Nsụkibuot Nnọ Odudu Ukara
“Ẹmeda ofụri esịt ẹsụk ibuot.”—ROME 6:17.
1, 2. (a) Spirit ewe odu mfịn ke ererimbot, ndien nso idi ntọn̄ọ esie ye utịp esie? (b) Didie ke mme asan̄autom Jehovah oro ẹma ẹkeyak idem ẹnọ ẹwụt ke mmimọ idi isio?
“SPIRIT emi anamde utom kemi ke esịt nditọ ntụtutọn̄” odu mfịn ke usụn̄ oro akpade owo idem. Enye edi spirit nda-ke-idem emi owo mîkemeke ndikara, emi otode Satan, kpa “ọbọn̄ emi akarade edem ikpaenyọn̄.” Spirit emi, “ofụm” emi, m̀mê edu emi akarade mbon ibụk ye mbon ntụtutọn̄ mi, “akara” m̀mê enyene odudu ke ata akamba ikpehe ubonowo. Emi edi ntak kiet oro ererimbot odude ke se ẹkotde ndutịme eke odudu ukara.—Ephesus 2:2.
2 Ke mfọniso, mme asan̄autom Jehovah oro ẹma ẹkeyak idem ẹnọ mfịn iyọhọke obufre mmọ ye “ofụm” oro ẹma ẹkesabade mi m̀mê spirit nsọn̄ibuot emi. Mmọ ẹfiọk nte ke “iyatesịt Abasi etiene nditọ ntụtutọn̄.” Apostle Paul adian ete: “Ntre ẹkûkabade ẹbuana n̄kpọ ye mmọ.” (Ephesus 5:6, 7) Utu ke oro, mme ata Christian ẹsidomo ‘ndiyọhọ ye spirit Jehovah,’ ndien mmọ ẹsin̄wọn̄ mmọn̄ ẹto “eti ibuot emi otode ke enyọn̄,” emi ‘edide edisana, etiede emem emem, emede ime, onyụn̄ awarade ndikop n̄kpeubọk.’—Ephesus 5:17, 18; James 3:17.
Nsụkibuot Nnọ Itie Edikara Jehovah ke Unyịmesịt
3. Nso idi ukpọhọde nsụkibuot unyịmesịt, ndien nso akamba ukpepn̄kpọ ke mbụk ekpep nnyịn?
3 Ukpọhọde nsụkibuot ke unyịmesịt edi ndidiọn̄ọ odudu ukara oro ibet onyịmede. Mbụk ubonowo owụt nte ke edisịn itie edikara Jehovah idaha inemesịt idi. Utọ edisịn oro ikadaha inemesịt isọk Adam ye Eve, ikonyụn̄ idaha isọk andikesịn nsọk nnọ nsọn̄ibuot mmọ, Satan kpa Devil. (Genesis 3:16-19) Ke usụhọde idiọk idaha oro enye odude idahaemi, Satan asan̄a ye “akwa ifụtesịt” sia enye ọdiọn̄ọde ete ke ini imọ edi ibio. (Ediyarade 12:12) Emem ye inemesịt ubonowo, ih, eke ofụri ekondo, ọkọn̄ọ ke ndidiọn̄ọ edinen itie edikara Jehovah ke ofụri ererimbot.—Psalm 103:19-22.
4. (a) Nso utọ nsụkibuot ye n̄kopitem ke Jehovah oyom mme asan̄autom esie ẹwụt? (b) Nso ke nnyịn ikpenyene ndifiọk, ndien didie ke andiwet psalm owụt emi?
4 Edi, ke ntak mme utịbe utịbe nti edu esie, Jehovah ikopke uyụhọ ye ndebe ndebe n̄kopitem. Oh, ih, enye enyene odudu! Edi enye idịghe efịk ufịk. Enye edi Abasi ima, ndien enye oyom mme enyene-ifiọk edibotn̄kpọ esie ẹsụk ibuot ẹnọ enye ke unyịmesịt, ke ntak ima. Enye oyom mmọ ẹsụk idem ẹnọ itie edikara esie koro mmọ ke ofụri esịt ẹmekde ndidu ke idak edinen ukara esie oro ekemde ye ibet, ẹfiọkde ẹte ke idụhe n̄kpọ ndomokiet oro ekemede ndifọn ye mmọ n̄kan mmọ ndisụk ibuot nnọ enye ke nsinsi. Utọ owo oro Jehovah oyomde ke ekondo esie enyene ekikere andiwet psalm emi ekewetde ete: “Ido Jehovah ẹfọn ẹma, edemede ukpọn̄; item Jehovah edi akpanikọ, asian mme ọkọi. Mme ewụhọ Jehovah enen, ẹdat owo esịt; mbet Jehovah ẹyama, en̄wan̄a owo enyịn. Uten̄e Jehovah asana, odu ke nsinsi: mme ikpe Jehovah ẹdi akpanikọ, kpukpru mmọ enen.” (Psalm 19:7-9) Ọyọhọ mbuọtidem ke eti ye edinen itie edikara Jehovah—emi ekpenyene ndidi edu nnyịn edieke nnyịn iyomde ndidu uwem ke obufa ererimbot Jehovah.
Idara Idara Nsụkibuot Nnọ Edidem Nnyịn
5. Didie ke ẹkenọ Jesus utịp ke n̄kopitem esie, ndien nso ke nnyịn ke unyịmesịt ifiọk?
5 Christ Jesus ke idemesie edi eti uwụtn̄kpọ nsụkibuot nnọ Ete esie eke heaven. Nnyịn ikot ite ke “enye ama osụhọde idem, akabade osụk ibuot tutu osụn̄ọ ke n̄kpa, kpa n̄kpa [eto ndutụhọ, NW].” Paul adian ete: “Ke ntak oro Abasi ekemenede Enye onịm ke enyọn̄, onyụn̄ ọnọ Enye enyịn̄ emi okon̄de akan kpukpru enyịn̄; man ke enyịn̄ Jesus kpukpru edọn̄ ẹkpetọn̄ọ ẹnọ Abasi, ye eke mme andidu ke heaven, ye eke mme andidu ke isọn̄, ye eke mme andidu ke idak isọn̄; kpukpru edeme ẹkponyụn̄ ẹnyịme ẹte Jesus Christ edi Ọbọn̄, ẹnọ Abasi Ete ubọn̄.” (Philippi 2:8-11) Ih, nnyịn ke idara imọtọn̄ọ edọn̄ ke iso Adausụn̄ ye Edidem nnyịn oro akarade, Christ Jesus.—Matthew 23:10.
6. Didie ke Jesus okowụt ke idi ntiense ye adausụn̄ inọ mme idụt, ndien didie ke “ubọn̄” esie edika iso ke akwa ukụt ebede?
6 Kaban̄a Christ nte Adausụn̄ nnyịn, Jehovah ama etịn̄ prọfesi ete: “Sese, mmonịm enye ke ntiense mme idụt, ọbọn̄ ye etubom mme idụt.” (Isaiah 55:4) Ebede ke utom esie eke isọn̄ ye enye nditie ke heaven nnọ ndausụn̄ ke utom ukwọrọikọ ke n̄kpa ye ediset ke n̄kpa esie ama ekebe, Jesus owụt idemesie nte idide “ata ntiense akpanikọ” Ete esie ọnọ mme owo eke kpukpru idụt. (Ediyarade 3:14; Matthew 28:18-20) Mme utọ idụt oro edi se “akwa otuowo” emi ibat akade-kaiso ndikọri, emi ẹdibọhọde “akwa ukụt” ke idak ndausụn̄ Christ, ẹdade ke ibuot mmọ. (Ediyarade 7:9, 14) Edi ndausụn̄ oro Jesus ọnọde itreke do. “Ubọn̄” esie eyebịghi ke tọsịn isua. Ye mme okopitem ubonowo, enye eyenam n̄kpọ ekekem ye enyịn̄ esie oro “Utịbe, Ọnọ-Item, Ọkpọsọn̄ Abasi, Nsinsi Ete, Ọbọn̄ Emem.”—Isaiah 9:6, 7; Ediyarade 20:6.
7. Edieke nnyịn iyomde Christ Jesus ada nnyịn usụn̄ aka “idịm mmọn̄ uwem,” nso ke ana nnyịn inam ye unana ubiatini, ndien nso idinam Jesus ye Jehovah ẹma nnyịn?
7 Edieke nnyịn iyomde ndibọ ufọn nto “idịm mmọn̄ uwem” emi Eyenerọn̄, Christ Jesus, edidade mbon nti esịt usụn̄ aka, ana nnyịn ye unana ubiatini iwụt ebe ke usụn̄ edinam nnyịn nte ke nnyịn isụk ibuot idara idara inọ odudu ukara esie nte Edidem. (Ediyarade 7:17; 22:1, 2; men Psalm 2:12 domo.) Jesus ọkọdọhọ ete: “Mbufo ẹma ẹma Mi, ẹyenịm mbet Mi. Owo eke enyenede mbet Mi, onyụn̄ onịmde mmọ, enye edi owo eke amade Mi: ndien owo eke amade Mi, Ete Mi eyema enye, Ami nyenyụn̄ mma enye.” (John 14:15, 21) Nte afo omoyom Jesus ye Ete esie ẹma fi? Do sụk ibuot nọ odudu ukara mmọ.
Mme Esenyịn Ẹsụk Ibuot Idara Idara
8, 9. (a) Nso ke Christ ọnọ man ẹda ẹnam esop ọkọri, ndien ke nso usụn̄ ke irenowo ẹmi ẹkpedi uwụtn̄kpọ ẹnọ otuerọn̄? (b) Didie ke ẹwụt mbiet nsụkibuot eke mme esenyịn ẹdide Christian ke n̄wed Ediyarade, ndien didie ke mmọ ẹkpeyom “esịt ọniọn̄” ke ini ẹkpede ikpe?
8 ‘Esop odu ke nsụkibuot ọnọ Christ.’ Nte Esenyịn esie, enye ọmọnọ ‘mme owo ke enọ’ man ‘ẹnam esop ọkọri.’ (Ephesus 4:8, 11, 12; 5:24) Ẹteme mbiowo eke spirit ẹmi ẹte ‘ẹkpeme otuerọn̄ Abasi oro ẹkeyakde ẹsịn mmọ ke ubọk,’ ‘ẹkûbre odudu ye inyene Abasi, edi ẹdi uwụtn̄kpọ ẹnọ mme erọn̄.’ (1 Peter 5:1-3) Otuerọn̄ edi eke Jehovah, ndien Christ edi “eti ekpemerọn̄.” (John 10:14) Sia mme esenyịn nte odotde ẹdoride enyịn mme erọn̄ oro Jehovah ye Christ ẹkeyakde ẹsịn mmọ ke ubọk ndidiana kiet ye mmọ ke unyịmesịt, mmọ ke idemmọ ẹkpenyene ndidi nti uwụtn̄kpọ nsụhọdeidem.—Utom 20:28.
9 Ke akpa isua ikie, ẹkewụt mme esenyịn oro ẹyetde aran ke ndamban̄a usụn̄ nte ‘ẹsịnede’ m̀mê ‘ẹdude’ ke ubọk nnasia Christ, owụtde mmọ nte esụkde ibuot ẹnọ enye nte Ibuot esop. (Ediyarade 1:16, 20; 2:1) Inyeneke ndidi isio ye oro mfịn, mme esenyịn ke esịt esop Mme Ntiense Jehovah ẹkpenyene ndisụk ibuot nnọ ndausụn̄ Christ nnyụn̄ ‘nsụhọde idem ke idak ọkpọsọn̄ ubọk Abasi.’ (1 Peter 5:6) Ke ini ẹkotde edikpe ikpe, nte Solomon ke mme isua oro enye akanamde akpanikọ, mmọ ẹkpenyene ndibọn̄ akam nnọ Jehovah ẹte: “Nọ owo fo ndien esịt ọniọn̄, man n̄kpe ikpe ikọt fo, man ntịm mfiọk eti ye idiọk.” (1 Ndidem 3:9) Esịt ọniọn̄ eyenụk ebiowo ndiyom ndise mme n̄kpọ nte Jehovah ye Christ Jesus ẹsede man ubiere oro ẹnamde ke isọn̄ ẹkpekpere nditie ukem ukem nte enyeoro ẹnamde ke heaven nte ekekeme.—Matthew 18:18-20.
10. Didie ke kpukpru mme esenyịn ẹkpedomo ndikpebe Jesus ke usụn̄ nte enye akanamde n̄kpọ ye mme erọn̄?
10 Mme esenyịn oro ẹsan̄ade-san̄a ye mbiowo esop ẹyedomo kpa ntre ndikpebe Christ ke usụn̄ oro enye akanamde n̄kpọ ye mme erọn̄. Ke mîbietke mme Pharisee, Jesus ikosioho ekese ibet oro ẹkesọn̄de ndinịm idi. (Matthew 23:2-11) Enye ọkọdọhọ mbon mbieterọn̄ ete: “Ẹtiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo, ndien Ami nyenọ mbufo nduọkodudu. Ẹmen ọkpọnọ Mi ẹkọn̄ọ ke itọn̄ mbufo, ẹnyụn̄ ẹkpebe Mi; koro mmenyene ifụre ifụre ido nnyụn̄ nsụhọdeidem ke esịt; ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ Mi ememem, mbiomo Mi onyụn̄ efefere.” (Matthew 11:28-30) Ke adan̄aemi edide akpanikọ nte ke Christian kiet kiet enyene “ndibiom mbiomo idemesie,” mme esenyịn ẹkpenyene nditi uwụtn̄kpọ Jesus nnyụn̄ n̄n̄wam nditọete mmọ ndikụt nte ke mbiomo ifetutom mmọ nte Christian ‘ẹmem’ ‘ẹfere,’ onyụn̄ edi n̄kpọ idatesịt ndibiom.—Galatia 6:5.
Nsụkibuot eke Ukara Abasi
11. (a) Didie ke owo ekeme ndiwụt ukpono nnọ itie ibuot edi inen̄ekede itiene ndutịm ukara Abasi? Nam an̄wan̄a. (b) Nso ke nditiene ndutịm ukara Abasi enen̄ede ọwọrọ?
11 Ukara Abasi edi ukara emi Abasi akarade. Enye abuana edumbet itieibuot oro ẹtịn̄de ke 1 Corinth 11:3. Edi enye enyene se ọwọrọde akan oro. Owo ekeme ndinam nte imowụt ukpono inọ itie ibuot edi kpa ye oro itieneke ndutịm ukara Abasi ke ọyọhọ ọyọhọ usụn̄ emi ikọ oro ọwọrọde. Didie ke ekeme ndidi ntre? Ke ndinam an̄wan̄a, ukara mbio obio edi ukara emi mme owo ẹkarade, ndien ẹkabade akara ukara mbio obio nte “owo emi onyịmede ye mme ekikere ukara mbio obio.” Owo ekeme ndidọhọ ke idi andida nnọ ukara mbio obio, etiene abuana ke umekowo, idem edide ifịk ifịk ebre mbre ukara. Edi edieke, ke ediwak idaha, enye abiatde edu ukara mbio obio ye kpukpru mme edumbet oro ẹbuanade, nte ekeme ndidọhọ ke enye enen̄ede edi andida nnọ ukara mbio obio? Kpasụk ntre, man enen̄ede etiene ndutịm ukara Abasi, ana owo anam se ikande edisụk idem nnọ itieibuot ke inua. Ana enye ekpebe mme usụn̄ ye edu Jehovah. Ana Jehovah enen̄ede akara enye ke kpukpru usụn̄. Ndien sia Jehovah ama ọkọnọ Eyen esie ọyọhọ odudu ukara, nditiene ndutịm ukara Abasi n̄ko ọwọrọ ndikpebe Jesus.
12, 13. (a) Nso ke nditiene ndutịm ukara Abasi abuana akpan akpan? (b) Ndi nsụkibuot nnọ ukara Abasi esịne edinịm ekese ibet? Nam an̄wan̄a.
12 Ti ete, Jehovah oyom unyịme unyịme nsụkibuot oro ima onụkde. Oro edi usụn̄ emi enye akarade ekondo. Enye edi ata uwụtn̄kpọ ima. (1 John 4:8) Christ Jesus edi “uyama ubọn̄ Abasi, ye ata mbiet Idemesie.” (Mme Hebrew 1:3) Enye oyom mme ata mbet esie ẹma kiet eken. (John 15:17) Ntre ndidi anditiene ndutịm ukara Abasi ibuanake edisụk ibuot ikpọn̄îkpọn̄ edi n̄ko ndinyene ima. Ẹkeme nditịn̄ mban̄a emi ke ibio ibio usụn̄ ntem: Ukara Abasi edi ukara emi Abasi akarade; Abasi edi ima; ke ntre ukara Abasi edi ukara ima.
13 Ebiowo ekeme ndikere nte ke man ẹdi mme anditiene ndutịm ukara Abasi, nditọete ẹkpenyene ndinịm kpukpru orụk ibet. Ndusụk mbiowo ẹma ẹbọp ibet ẹto mme ekikere oro “asan̄autom emi anamde akpanikọ, onyụn̄ enyenede ọniọn̄” ẹsinọde ke ini ke ini. (Matthew 24:45) Ke uwụtn̄kpọ, ẹma ẹnọ ekikere ini kiet ete ke man ẹtịm ẹmehe ye nditọete ke esop, ke ikpọfọnde owo ndisitie kpukpru ini ke ukem n̄kpọitie ke Ufọkmbono Obio Ubọn̄. Ẹkenọ emi nte eti ekikere, idịghe ibet emi edide ke amade ye ke mûmaha. Edi ndusụk mbiowo ẹkeme ndinyene ntụhọ ndikabade enye nsịn ke ibet nnyụn̄ n̄kere nte ke mbon oro mînamke oro itieneke ndutịm ukara Abasi. Edi, ediwak nti ntak ẹkeme ndidu ẹmi ẹkemede ndinam eyenete eren m̀mê n̄wan emek nditie ke ndusụk ikpehe. Edieke ebiowo ke ima ima usụn̄ mîkereke iban̄a mme utọ idaha oro, nte enye ke idemesie enen̄ede etiene ndutịm ukara Abasi? Man ẹdi mme anditiene ndutịm ukara Abasi, “ẹnam kpukpru se ẹnamde ke ima.”—1 Corinth 16:14.
Ndinam Utom ye Idatesịt
14, 15. (a) Didie ke ebiowo ekeme ndinam ndusụk nditọete iren m̀mê iban ẹtaba idara mmọ ke ndinam n̄kpọ Jehovah, ndien nso inam emi mîkpedịghe eke ukara Abasi? (b) Didie ke Jesus okowụt nte ke imọ imadara iban̄a ima oro iwụtde ebe ke utom nnyịn, idịghe ke udomo utom oro inamde? (c) Nso ke mbiowo ẹkpenyene ndikere mban̄a?
14 Ndidi anditiene ndutịm ukara Abasi ọwọrọ n̄ko ndinam n̄kpọ Jehovah ye idatesịt. Jehovah edi “Abasi inemesịt.” (1 Timothy 1:11, NW) Enye oyom mme andituak ibuot nnọ enye ẹnam n̄kpọ esie idara idara. Mbon oro ẹsọn̄ọde ẹyịre ke ibet ẹkpenyene nditi nte ke otu mme ewụhọ oro Israel ‘ẹkenyenede ndinịm’ ekedi se itienede mi: “Dat esịt ke iso Jehovah Abasi fo ke kpukpru n̄kpọ eke afo anyande ubọk fo ke esịt.” (Deuteronomy 12:1, 18) Se ededi oro nnyịn inamde ke utom Jehovah ekpenyene ndidi n̄kpọ idara, idịghe mbiomo. Mme esenyịn ẹkeme ndinam ekese man ẹnam nditọete ẹkop inemesịt ndinam se mmọ ẹkemede ke utom Jehovah. Ke edide isio ye oro, edieke mbiowo mîkpemeke, mmọ ẹkeme ndinam ndusụk nditọete ẹtaba idatesịt mmọ. Ke uwụtn̄kpọ, edieke mmọ ẹnamde mme edimen ndomo, ẹtorode mbon oro ẹsịmde m̀mê ẹbede ukem mbahade oro esop enyenede ke hour oro ẹsịnde ke unọ ikọ ntiense ndien ebede ke nditịn̄ ntụk oro ẹtịn̄de n̄kpọ ẹbiat mbon oro mîkesịmke ukem mbahade oro, didie ke mbon oro ẹkemede ndidi ẹma ẹnyene eti ntak ke ndikọtọt ibat hour oro osụhọrede akan edikere? Nte emi ikemeke ndinam mmọ ẹnyene ubiomikpe nte mîdotke onyụn̄ anam mmọ ẹtaba idara mmọ?
15 Hour ifan̄ oro ndusụk owo ẹkemede ndisịn ke an̄wan̄wa unọ ikọ ntiense ekeme ndida ukeme oro okponde akan ediwak hour oro mbon en̄wen ẹsịnde ke ndikwọrọ ikọ, ke ikerede iban̄a isua uyen, eti nsọn̄idem, ye mme idaha eken. Ke afan̄ emi, mbiowo inyeneke ndibiom mmọ ikpe. Ke akpanikọ, edi Jesus ke Ete ọkọnọ “odudu ndidi ebiereikpe.” (John 5: 27) Ndi Jesus ama etịn̄ n̄kpọ abiat ubuene ebeakpa oro ke ntak emi enọ esie ekekpride akan ukem mbahade? Baba, enye ama ọdiọn̄ọ se ndinọ n̄kpri okudọk iba oro eketakde enye. Mmọ ẹkedi “kpa ofụri se enye akpadade odu uwem.” Nso ntotụn̄ọ ima oro ẹnyenede ẹnọ Jehovah ke mmọ ẹkedi ntem! (Mark 12:41-44) Nte mbiowo ẹkpenam se isụhọrede ikan oro ke ndifiọk mme ukeme mbon oro ofụri se mmọ ẹnọde osụhọrede ke ibat akan “ukem mbahade”? Kaban̄a ima ẹnyenede ẹnọ Jehovah, mme utọ ukeme oro ẹkeme nditịm n̄kpon n̄kan ukem mbahade!
16. (a) Edieke mbiowo ẹsiakde ibat ke utịn̄ikọ mmọ, ntak oyomde mmọ ẹwụt mbufiọk ye eti ibuot? (b) Didie ke ẹkeme ndin̄wam nditọete ke usụn̄ oro ọfọnde akan nditat utom mmọ?
16 Nte ẹkpenyene ndiwọn̄ọde se ẹnemede emi idahaemi nsịn ke obufa “ibet” nte ke ibat—idem ukem mbahade—ikpenyeneke ndidi se ẹsiakde? N̄wan̄ansa-o! Se ẹtịn̄de mi edi nte ke mme esenyịn ẹkpenyene ndida ukem ukem ke ndisịn udọn̄ nnọ nditọete nditat utom mmọ nnyụn̄ n̄n̄wam mmọ ndinam se mmọ ẹkemede ye idara. (Galatia 6:4) Ke n̄ke Jesus aban̄ade talent, ọbọn̄ ama ayak inyene esie esịn ifịn esie ke ubọk “ọnọ owo kiet kiet nte ukeme esie edide.” (Matthew 25:14, 15) Kpa ntre mbiowo ẹkpenyene ndinyene ukeme asuanetop Obio Ubọn̄ kiet kiet ke ekikere. Emi oyom mbufiọk. Ekeme ndidi nte ke ndusụk owo ẹnen̄ede ẹyom nsịnudọn̄ ndinam ekese. Mmọ ẹkeme ndidara un̄wam oro ẹnọde nditịm utom mmọ nte ọfọnde akan. Edi se ededi, edieke ẹkemede ndin̄wam mmọ ndinam se mmọ ẹkemede ye idara, idara oro ekeme ndidi n̄kpọ nsịnudọn̄ ọnọ mmọ nditat utom Christian mmọ ke ebiet ekemede.—Nehemiah 8:10; Psalm 59:16; Jeremiah 20:9.
Emem Oro Otode Idara Idara Nsụkibuot
17, 18. (a) Didie ke idara idara nsụkibuot ekeme ndinam nnyịn inyene emem ye edinen ido? (b) Nso ke nnyịn ikeme ndinyene edieke itịmde ikpan̄ utọn̄ ke mbet Abasi?
17 Idara idara nsụkibuot nnọ itie edikara Jehovah oro ekemde ye ibet ada emem oro okponde ọsọk nnyịn. Andiwet psalm ọkọdọhọ ke akam oro enye ọkọbọn̄de ọnọ Jehovah ete: “Mmọ eke ẹmade ido fo ẹnyene ediwak ifụre: mmọ inyụn̄ ikwe n̄kpọ iduọ baba kiet.” (Psalm 119:165) Ebede ke ndinịm ibet Abasi, nnyịn iyebọ ufọn. Jehovah ama asian Israel ete: “Ntem ke Jehovah, andifak fi, kpa Edisana Abasi Israel, ọdọhọ, ete, Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade. Afo akpakam akpan̄ utọn̄ ke mbet mi! ndien emem fo ekpebiet akpa mmọn̄, edinen ido fo ekpebiet mbufụt inyan̄.”—Isaiah 48:17, 18.
18 Uwa ufak Christ anam nnyịn inyene emem ye Abasi. (2 Corinth 5:18, 19) Edieke nnyịn inyenede mbuọtidem ke iyịp ufak Christ inyụn̄ idomo kpukpru ini ndin̄wana ye mmeme nnyịn nnyụn̄ nnam uduak Abasi, nnyịn iyebọhọ ekikere ubiomikpe. (1 John 3:19-23) Utọ mbuọtidem oro, emi idade utom isọn̄ọ, anam nnyịn inyene eti idaha ke iso Jehovah, ye utịbe utịbe idotenyịn edibọhọ “akwa ukụt” nnyụn̄ ndu uwem ke nsinsi ke obufa ererimbot Jehovah. (Ediyarade 7:14-17; John 3:36; James 2:22, 23) Kpukpru emi ekeme ndidi eke nnyịn ‘edieke nnyịn idikam ikpan̄de utọn̄ ke mme mbet Abasi.’
19. Inemesịt nnyịn eke idahaemi ye idotenyịn nsinsi uwem nnyịn ọkọn̄ọ ke nso, ndien didie ke David okowụt ekikere ofụri esịt nnyịn?
19 Ih, inemesịt nnyịn eke idahaemi ye idotenyịn nsinsi uwem nnyịn eke ini iso ke paradise isọn̄ ọkọn̄ọ ke idara idara nsụkibuot nnyịn nnọ itie ukara Jehovah nte Ọbọn̄ Andikara ekondo. Akpakam nnyịn ikaiso ndinyene ukem ekikere David, emi ọkọdọhọde ete: “O Jehovah, ubom, ye odudu, ye ubọn̄, ye akakan, ye uten̄e ẹdi okwommọ: koro kpukpru n̄kpọ ke enyọn̄ ye ke isọn̄ ẹmenyene fi; O Jehovah, itie edidem edi okwo, afo onyụn̄ okon̄ nte etubom kpukpru. Nnyịn imọkọm fi, ndien, O Abasi nnyịn, inyụn̄ itoro enyịn̄ ubọn̄ fo.”—1 Chronicles 29:11, 13.
N̄kpọ Nditi
◻ Nso orụk nsụkibuot ye n̄kopitem ke Jehovah oyom mme asan̄autom esie ẹwụt?
◻ Didie ke ẹkenọ Jesus utịp ke n̄kopitem esie, ndien nso ke ana nnyịn iwụt ebe ke usụn̄ edinam nnyịn?
◻ Didie ke kpukpru mme esenyịn ẹkpekpebe Jesus ke usụn̄ nte enye akanamde n̄kpọ ye mme erọn̄?
◻ Nso ibuana ke nditiene ndutịm ukara Abasi?
◻ Mme edidiọn̄ ewe ke idara idara nsụkibuot ada ọsọk nnyịn?
[Ndise ke page 24]
Mbiowo ẹsịn udọn̄ ẹnọ otuerọn̄ ẹnam se ededi oro mmọ ẹkemede idara idara
[Ndise ke page 26]
Jehovah esikop inemesịt ye mbon oro ke ofụri esịt ẹkopde uyo esie