Mme Mbụme Ẹtode Mme Andikot
Nte okpodot ndibọ n̄kpinsịn m̀mê edikịm ndusụk ibọkusọbọ eken oro ẹsịnede “albumin” emi ẹdade ẹto iyịp owo?
Ke nditịn̄ in̄wan̄în̄wan̄, ana Christian kiet kiet ke idemesie ebiere emi.
Mme asan̄autom Abasi nte enende ẹyom nditiene ndausụn̄ oro ẹkụtde ke Utom Mme Apostle 15:28, 29, ndibet iyịp. Nte ekemde, mme Christian iditaha unam oro owo mîsioho iyịp m̀mê mme utọ n̄kpọ nte iyịp oro ẹtemde. Edi ibet Abasi enyene n̄kpọ ndinam n̄ko ke n̄kan̄ ibọkusọbọ. Mme Ntiense Jehovah ẹsikama n̄wed oro owụtde nte ke mmimọ ibọhọ ‘edikịm iyịp nsịn ke idem, ofụri iyịp, ndatndat nsen iyịp, afia nsen iyịp, platelet, m̀mê plasma iyịp.’ Nso, ndien, kaban̄a ukịmibọk serum emi esịnede esisịt udomo protein iyịp?
Mme Ntiense ke anyanini ẹmefiọk ẹte ke emi edi n̄kpọ owo enyenede ndibiere ke idemesie nte ekemde ye ubieresịt owo kiet kiet oro Bible ọnọde ukpep. Ẹma ẹsio emi ẹwụt ke “Mme Mbụme Ẹtode Mme Andikot” ke Enyọn̄-Ukpeme eke June 1, 1990, emi ekenemede aban̄a mme ukịmibọk serum oro abiausọbọ ekemede nditoro edieke owo enyenede ndusụk udọn̄ọ. Mme okopodudu n̄kpatan̄a n̄kpọ utọ ibọk oro idịghe mme plasma iyịp ke idemmọ edi ẹdi mme editịbe ẹtode plasma iyịp mbon oro ẹkenyenede ukeme edibiọn̄ọ udọn̄ọ oro. Ndusụk Christian oro ẹkerede ke mmimọ imekeme ndibọ mme utọ ukịmibọk oro ye eti ubieresịt ẹkụt ẹte ke mme editịbe ẹtode iyịp n̄wanidịbi ẹsibe ẹdụk iyịp nsekeyen odude ke idịbi esie. “Mme Mbụme Ẹtode Mme Andikot” ama etịn̄ emi, ọkọrọ ye akpanikọ oro nte ke ndusụk albumin esito n̄wanidịbi ebe odụk nsekeyen esie.
Ediwak owo ẹkụt emi nte odotde, sia ndusụk n̄kpinsịn oro owo mîdaha iyịp inam ẹkemede ndisịne esisịt udomo plasma emi esịnede albumin emi ẹkekamade m̀mê ẹkesịnde ke ini ẹkenamde man ẹnam mme n̄kpatan̄a n̄kpọ ẹbuaha ọfọn. Idahaemi ẹsịn esisịt udomo albumin n̄ko ke mme ukịmibọk ubọknnam hormone EPO (erythropoietin). Ndusụk Ntiense ẹsibọ mme ukịmibọk EPO koro enye ekeme ndinam edisio nsen ndatndat iyịp ndi ọsọp ndien ke ntre ekeme ndinam abiausọbọ okûnyene ekikere nte ke ekeme ndiyom edikịm iyịp nsịn ke idem.
Mme ibọkusọbọ efen ẹkeme ndidu ke ini iso ẹmi ẹdibuanade ata esisịt udomo albumin, sia mme usiakifia unam ibọkusọbọ ẹsion̄ode mbufa ibọk ẹdi m̀mê ẹkpụhọrede mme usụn̄ oro ẹnamde mbon oro ẹdude. Mme Christian ke ntem ẹkeme ndise m̀mê albumin esịne ke n̄kpinsịn m̀mê ukịmibọk eken oro dọkta otorode. Edieke mmọ ẹnyenede eyịghe m̀mê enyenede ntak ndinịm nte ke albumin edi ubak n̄kpọ ẹdade ẹnam, mmọ ẹkeme ndibụp abiausọbọ mmọ.
Nte ẹdiọn̄ọde, ediwak Ntiense isisịnke ndibọ ukịmibọk oro esịnede esisịt udomo albumin. Edi, owo ekededi emi oyomde ndikpep n̄kpọ mban̄a n̄kpọ emi mfọn mfọn mbemiso anamde ọkpọkpọ ubiere ekpenyene ndidụn̄ọde ntọt ẹkewetde ke “Mme Mbụme Ẹtode Mme Andikot” ke Enyọn̄-Ukpeme eke June 1, 1990.