Ndutụhọ Oro Owo Okụtde—Nte Enye Eyetre Tutu Amama?
MME enyene-ndịk ndise ke bọmb ama okobomo ke urua oro ọyọhọde ye owo ke Sarajevo; akpakịp uwotowo ye ubiomo owo ndo ke Rwanda; nditọwọn̄ oro biọn̄ ọdọn̄de ẹmi ẹtuan̄ade ẹyom udia ke Somalia; mme ubon oro ibuot oyon̄de ẹmi ẹbatde se itakde mmọ ke unyekisọn̄ ama akada itie ke Los Angeles; mbon unọmọ oro mînyeneke un̄wam ke Bangladesh emi ukwọ mmọn̄ ọnọmọde. Mme utọ ndise ẹban̄ade ndutụhọ oro owo okụtde do ẹsidu kpukpru usen ke TV m̀mê ke mme magazine ye mme n̄wedmbụk n̄kpọntịbe.
Mfụhọ mfụhọ utịp emi ndutụhọ oro owo okụtde akamade edi nte ke enye anam ndusụk owo ẹtre ndinyene mbuọtidem ke Abasi. Nte ekemde ye ikọ oro n̄ka mbon Jew ke United States ekemịn̄de, “idiọkn̄kpọ ndidu esisịn ata akamba ubiọn̄ọ kpukpru ini ọnọ mbuọtidem.” Mme andiwet ẹtịn̄ ẹban̄a n̄kpan̄a ke mme itienna ekikere Nazi nte eke Auschwitz ye mmọ oro ẹtode mme bọmb utọ nte enyeoro okobomode ke Hiroshima. Mme ewetn̄wed oro ẹdọhọ ẹte: “Mbụme aban̄ade nte edinen ye okopodudu Abasi ekemede ndiyak nsobo osịm utọ ediwak uwem oro mîduehe esidu ke esịt mbon ido ukpono onyụn̄ etịmede ekikere mmọ.”
Ke mfụhọ, mme akama-nyomonsia ntọt oro mînyeneke utịt mi ẹkeme ndinyene idiọk utịp ke mme ntụk owo. Adan̄a nte mme ufan ye iman mîbuanake, ọsọsọn̄ ndutụhọ oro mbon efen ẹkụtde nditụk ediwak owo.
Edi, akpanikọ oro nte ke nnyịn imekeme ndikop mbọm, ke nsụhọde n̄kaha iban̄a mbonima nnyịn, ekpenyene nditịn̄ n̄kpọ nnọ nnyịn mban̄a Andinam nnyịn. Bible ọdọhọ ete ke ẹkebot owo “ke mbiet Abasi” onyụn̄ “etie nte [enye].” (Genesis 1:26, 27) Emi iwọrọke ite ke mme owo ẹtie nte Abasi etiede ke idem. Baba, koro Jesus Christ ama anam an̄wan̄a ete ke “Abasi edi Spirit,” ndien “spirit inyeneke obụk ye ọkpọ.” (John 4:24; Luke 24:39) Ndidi se ẹnamde ke mbiet Abasi ada aban̄a ukeme oro nnyịn inyenede ndiwụt mme edu ẹbietde eke Abasi. Ke ntre, sia mme owo oro ẹnyenede eti idaha ukere n̄kpọ ẹsikopde mbọm ẹban̄a mbon oro ẹkụtde ndutụhọ, ana nnyịn ibiere nte ke Andibot owo, Jehovah Abasi, esikop mbọm aban̄a owo ye nte ke enye esinen̄ede okop mbọm aban̄a edibotn̄kpọ esie ẹdide owo ẹmi ẹkụtde ndutụhọ.—Men Luke 11:13 domo.
Usụn̄ kiet emi Abasi owụtde mbọm esie edi ndinọ ubonowo n̄kpọ oro ẹwetde-wet emi anamde ntak oro ndutụhọ odude an̄wan̄a. Enye anam emi ke Ikọ esie, kpa Bible. Bible owụt in̄wan̄în̄wan̄ ete ke Abasi okobot owo ndidara uwem, idịghe ndikụt ndutụhọ. (Genesis 2:7-9) Enye n̄ko ayarade nte ke mme akpa owo ẹkeda ndutụhọ ẹsọk idemmọ ebe ke ndisịn edinen ukara Abasi.—Deuteronomy 32:4, 5; Rome 5:12.
Kpa ye emi, Abasi osụk okokop mbọm aban̄a ubonowo oro ẹkụtde ndutụhọ. Ẹwụt emi in̄wan̄în̄wan̄ ke un̄wọn̄ọ esie ndida utịt nsọk ndutụhọ. “Sese, ebietidụn̄ Abasi omodu ye owo. Enye eyenyụn̄ odụn̄ ye mmọ; ndien mmọ ẹyedi ikọt Esie, Abasi ke Idemesie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”—Ediyarade 21:3, 4; se n̄ko Isaiah 25:8; 65:17-25; Rome 8:19-21.
Mme utịbe un̄wọn̄ọ ẹmi ẹwụt nte ke Abasi ọfiọk ndutụhọ oro owo okụtde ye nte ke enye ebiere ndida utịt nsọk enye. Edi nso inen̄ede idi ntak ndutụhọ oro owo okụtde ke akpa ifet, ndien ntak emi Abasi ayakde enye akaiso odu tutu osịm usen nnyịn?
[Ebiet Ẹdade Ndise Ẹto ke page 2]
Ikpaedem: Alexandra Boulat/Sipa Press
[Ebiet Ẹdade Ndise Ẹto ke page 3]
Kevin Frayer/Sipa Press