Ọbọn̄ Ekere Aban̄a Ini Iso Esie
ỌBỌN̄ idụt West Africa emi ekedi adaibuot oro ẹtịmde ẹma ẹnyụn̄ ẹnen̄erede ẹkpono ke obio esie. Ke usọrọ usen emana esie ọyọhọ 78, mme ufan esie, ubon, ye mbon eken oro ẹyomde mfọnọn̄kpọ esie ẹma ẹsop idem ndikọm enye. Ke utịn̄ikọ, ọbọn̄ oro ama emek esen esen ibuotikọ kiet ke utọ edinam oro. Enye ama etịn̄ aban̄a mme ekikere esie kaban̄a uwem ke n̄kpa ebede.
Enye ama ọdọhọ ete ke n̄kpa ebede “obufa ererimbot odu emi abian̄a, isịnenyịn ye idiọkitọn̄ mîdụhe.” Enye eketịn̄ aban̄a enye nte “ererimbot oro ọyọhọde ye ndịben̄kpọ,” kiet oro ndinen owo ikpọn̄ ẹdụn̄de, ẹmi ẹdibuanade n̄kpọ ye Abasi.
Mme utọ edinịm ke akpanikọ oro ẹdi ọsọ n̄kpọ ke otu mme owo ke ofụri Africa. Nte ekemde ye ido ukpono ekpụk eke mbon Africa, n̄kpa idịghe utịt uwem edi sụk edikpụhọ uduot, edibe ndụk uwem ke obio mme spirit. Ke n̄kpa ẹdọhọ ke owo ebe ke ererimbot oro ẹkụtde ke enyịn odụk enyeoro owo mîkwe. Nte spirit, owo emi idahaemi odụk ikpehe oro spirit mme eteete esie ẹdụn̄de.
Ediwak mbon West Africa ẹnịm ẹte ke mme eteete, m̀mê spirit mme eteete, ẹsise ẹban̄a mfọnọn̄kpọ ubon mmọ ke isọn̄. N̄wed oro West African Traditional Religion ọdọhọ ete: “Ataata ukpụhọde idụhe ke odudu oro mbio obio oro ẹsụk ẹdude ke isọn̄ ẹnyenede, ye mbon oro ẹdude ke ererimbot efen. Ke ini ẹkedude mi ke isọn̄, [mme eteete] ẹkedi nyobiowo ubon mmọ. Idahaemi edide nnyịn ikwe mmọ aba, mmọ ke ẹsụk ẹdedi nyobiowo ke ererimbot mme spirit. Mmọ ke idemmọ itreke ndinyene udọn̄ ke ofụri mfọnọn̄kpọ ubon mmọ.”
Mmọdo, ọbọn̄ oro ama ọkọsọn̄ mi emi ẹkesiakde ke ntọn̄ọ ntọn̄ọ okodori enyịn ndikadiana ye mme eteete esie nnyụn̄ nnam utom ye mmọ ke obio mme spirit. Enye ọkọdọhọ ete: “Ami mmotịm nnịm uwem ke n̄kpa ebede ke akpanikọ ye ifet ami ndikaiso nnam utom—idem ke n̄kpa ebede.”
Nte ededi, ke ntak se ọbọn̄ oro akafiakde etịn̄, n̄wedmbụk n̄kpọntịbe oro Sunday Times ama ọnọ ekikere ete ke “etie nte [enye] ikonịmke ọyọhọ ọyọhọ ke akpanikọ” nte ke uwem ke n̄kpa ebede odu. Enye ama asian otuowo oro ẹkesopde idem ete ke imọ imokop iban̄a n̄wed kiet oro enemede n̄kpọ aban̄a uwem ke n̄kpa ebede. Ọbọn̄ oro ke okoyom n̄wed oro ke isua ition. Enye ama enen̄ede enyene ọkpọsọn̄ udọn̄ ndikot enye tutu enye ama ọn̄wọn̄ọ ndinọ owo ekededi emi edidade idem kiet isọk enye okụk edide ukem ye n̄kpọ nte $1,500 (U.S.).
Ọbọn̄ oro ekpekefep ndifịna idemesie ebe ke ndika mbịne n̄wed oro mîsọn̄ke utom ndikụt. Enye edi n̄wed oro odude awak ekem emi mîdịghe owo ndomokiet ewet edi Andibot kpukpru owo. (1 Thessalonica 2:13) N̄wed oro edi Bible. Nso ke enye etịn̄ aban̄a uwem ke n̄kpa ebede?