Nte Mme Akpan̄kpa Ẹkeme Ndikụt Nnyịn?

N̄WAN kiet owot ebe esie. Isua itiaba ke ukperedem enye okop ndịk oto ndap oro enye onịmde ke akpanikọ ke edi idiọn̄ọ iyatesịt ebe esie oro akakpade. Man osụk “spirit” esie esịt, enye osio eyen esie an̄wan ọdọn̄ ọkọduọk mmịn ke udi esie.

Eyenan̄wan emi ifiọkke nte ekpetịn̄de ikọ ọnọ spirit ete esie, sia uwa emi otode eka esie emi okowotde enye. Eyeneka esie eren odịbe ada ese. Enye ọwọrọ edi, ndien enye ye eyeneka esie an̄wan ẹbọn̄ akam ẹnọ ete mmọ ete an̄wam mmimọ isio usiene n̄kpa esie.

Edinam emi oto The Libation Bearers, mbre mbon Greece emi ẹkewetde ke se ibede isua 2,400 ẹmi ẹkebede. Ke ndusụk ikpehe ererimbot, akpan akpan ke Africa, ẹsiwa mme ukem uwa itieudi oro idem mfịn emi.

Da, ke uwụtn̄kpọ, ifiọk n̄kpọntịbe Ibe, emi odụn̄de ke Nigeria. Ke ama akataba nditọ ita ke n̄kpa, enye aka ebịne abiaibọk, emi ọdọhọde Ibe ke n̄kpan̄a ẹmi inanake ntak​—⁠ete Ibe oro akakpade ayat esịt sia owo mîkobụkke enye ke eti usụn̄.

Ke etienede item abiaibọk oro, Ibe awa ebot onyụn̄ ọduọk ọkpọsọn̄ mmịn ye ukọt ke udi ete esie. Enye ofiori okot spirit ete esie, ekpede ubọk oyom edifen nnọ, ọsọn̄ọde ima esie, onyụn̄ oyomde edidiọn̄.

Ibe inyeneke eyịghe nte ke ete imọ ekeme ndikụt nnyụn̄ n̄kop se imọ itịn̄de. Enye inịmke ke akpanikọ ite ke ete imọ inyeneke uwem edi nte ke enye “ebe” ererimbot oro ẹkụtde ke enyịn ke n̄kpa odụk ererimbot oro enyịn mîkwe. Ibe onịm ke akpanikọ ete ke ete imọ oto ererimbot eke obụk ye iyịp aka ererimbot eke mme spirit, kpa ebietidụn̄ mme eteete.

Ibe ekere ntem ete: ‘Okposụkedi Papa mîdụhe ke ererimbot emi aba, enye ke osụk eteti mi onyụn̄ enyene udọn̄ ke mfọnọn̄kpọ mi. Ndien sia enye idahaemi edide spirit oro enyenede akwa odudu, enye otịm odu ke ata eti idaha ndin̄wam mi akan ke enye ekedide owo ke isọn̄. Akan oro, enye ekeme nditịn̄ ikọ nnennen nnọ Abasi ke ibuot mi, sia Abasi n̄ko edide spirit. Papa ekeme ndiyat esịt kemi, edi edieke nnọde enye ukpono oro odotde, enye eyefen onyụn̄ ọdiọn̄ mi.’

Ke Africa edinịm ke akpanikọ oro nte ke mme akpan̄kpa ẹsikụt mme owo ke isọn̄ ẹnyụn̄ ẹnyene odudu ke uwem mmọ edi ọsọ n̄kpọ ke otu mbon oro ẹnamde ido ukpono obio. Emi odu ke otu mbon oro ẹdọhọde nte idide mme Christian n̄ko. Ke uwụtn̄kpọ, ke ẹma ẹkedian n̄wan ndọ ke ufọkabasi, idịghe esen n̄kpọ enye ndika ufọk ete ye eka esie n̄kọbọ edidiọn̄ ẹnamde ẹtiene ido eset. Do ẹsitomo mme eteete, ẹnyụn̄ ẹduọk mmịn ẹnọ mmọ. Ediwak owo ẹnịm ke akpanikọ ẹte ke ndikpu ndinam emi esida afanikọn̄ edi ke ndọ.

Ẹkere ẹte ke mme eteete, m̀mê spirit mme eteete, ẹsinam mme ubon mmọ ke isọn̄ ẹdu uwem ẹnyụn̄ ẹforo. Nte ekemde ye ekikere emi, mmọ ẹdi mme okopodudu nsan̄a, ẹkemede ndida nti idọk ndi, ndinam n̄kpọ ọfọn, nnyụn̄ n̄kpeme mme owo nsio ke afanikọn̄. Mmọ ẹkpe ubọk ke ibuot owo. Nte ededi, edieke ẹfụmide m̀mê ẹduede, mmọ ẹda afanikọn̄ ẹdi​—⁠udọn̄ọ, unana, idem n̄kpa. Mmọdo, ebede ke uwa ye edinam, mme owo ẹdomo ndimụm eti itie ebuana ye mme akpan̄kpa n̄kama.

Nte afo omonịm ke akpanikọ ete ke mme akpan̄kpa ẹnen̄ede ẹnyene ubọk ke uwem mme oduuwem? Nte akanam afo amada ke udi owo ima ndien okụt nte etịn̄de ikọ ifan̄, ndusụk m̀mê enye ekeme ndikop se afo etịn̄de? Ọfọn, edide mme akpan̄kpa ẹsikụt ẹnyụn̄ ẹkop se nnyịn itịn̄de m̀mê isikopke ọkọn̄ọ ke se itịbede ke owo akpade. Ẹyak idụn̄ọde se Bible etịn̄de aban̄a akpan ibuotikọ emi.