Owo Isịnenyịn
USEM Hebrew enyene orụn̄ ikọ kiet kpọt ọnọ “ufụp.” Ke ini ẹtịn̄de ẹban̄a mme owo ẹdide mme anamidiọk, ẹkeme ndikabade ikọ Hebrew oro nte “isịnenyịn,” m̀mê “ndomoidem.” (Genesis 26:14, NW; Ecclesiastes 4:4, NW) Nte ededi, usem Greek enyene se iwakde ikan ikọ kiet ọnọ “ufụp.” Ikọ oro zeʹlos, kpa nte ukem ikọ oro ke usem Hebrew, ekeme ndida mban̄a eti ye idiọk ufụp. Ikọ Greek en̄wen, phthoʹnos, aban̄a idiọk ufụp kpọt. Ke New World Translation, ẹkabade enye kpukpru ini nte “isịnenyịn.”
Didie ke ẹkeda ikọ oro phthoʹnos ke Greek eset? The Anchor Bible Dictionary ọdọhọ ete: “Ke mîbietke owo idiọkitọn̄, inen̄eke idi nte ke owo emi enyenede phthonos oyom nti n̄kpọ emi enye okopde idiọkesịt aban̄a owo en̄wen ndinyene; enye n̄kukụre iyomke owo en̄wen enyene mmọ. Enye okpụhọde ye owo emi amiade mbuba ke emi edide uduak esie, ke mîbietke eke owo emi amiade mbuba, idịghe ndikakan edi edi ndibiọn̄ọ mbon en̄wen ndikan.”
Owo isịnenyịn isiwakke ndidiọn̄ọ nte ke edu esie esidi akpan ntak ọnọ mme mfịna esie. Ukem n̄wed ukabadeikọ oro anam an̄wan̄a ete: “Kiet ke otu mme edu phthonos edi unana owo oro ndinyene ifiọk mban̄a. Edieke ẹkotde owo emi enyenede phthonos ndiwụt nte ido esie enende, eyetịn̄ kpukpru ini ọnọ idemesie ye mbon en̄wen nte ke mbon oro imọ inamde ikọ do ẹdot oro ye nte ke edi nte idaha oro ọdiọkde onụk imọ ndikụt ndudue. Edieke ẹbụpde se ikpanamde enye ekeme nditịn̄ ikọ ye ufan ke usụn̄ emi enye anamde, enye eyedọhọ ke mme edikụt ndudue esie akpan akpan edi ke ufọn ufan esie.”
Mme andiwet Gospel oro Matthew ye Mark ẹda ikọ Greek oro phthoʹnos nditịn̄ mban̄a uduak mbon oro ẹkewotde Jesus. (Matthew 27:18; Mark 15:10) Ih, isịnenyịn okonụk mmọ. Ukem idiọk ntụk oro ọmọwọn̄ọde mbon nsọn̄ibuot esịn ke ndidi mme idiọk asua n̄kani nditọete mmọ. (1 Timothy 6:3-5) Eyịghe idụhe ndien owo mîdiyakke mbon isịnenyịn ẹdụk Obio Ubọn̄ Abasi! Jehovah Abasi ọdọhọ ete ke kpukpru mbon oro ẹkade iso “ẹyọhọ ye ufụp [“isịnenyịn,” NW]” “ẹdot n̄kpa.”—Rome 1:29, 32; Galatia 5:21.
[Ndise ke page 7]
Kûyak isịnenyịn abiat uwem fo