Nte Mme Angel Ẹdu ke Otu Nnyịn?
Emi okotịbe ata usọp usọp. Ke ekerede n̄kpọ ntotụn̄ọ ntotụn̄ọ onyụn̄ efrede aban̄a ebiet emi enye odude, Marilynn ama anam isan̄ odụk usụn̄ tren. Inikiet inikiet enye ama okop ọkpọsọn̄ uyom emi ofụtde edi. Enye ama emenede enyịn, n̄kukụre ndikụt nte ke imọ ikada nnennen ke usụn̄ tren oro awatde edi! Iyịp ama asat Marilynn ke idem, akpa ọnọ ndịk. Tren oro ama otịm ekpere tutu enye ekeme ndikụt blu blu enyịn ye iso andiwat emi ndịk okofụkde. Marilynn akananam ifreke n̄kpọ efen emi akadade itie. “Eketie nte n̄kpọ eke okopodudu owo okotode edem edem onụk mi,” ntre ke enye ọkọdọhọ. “Mma nto ke usụn̄ tren oro mfro nduọ ke ukan̄ ẹmi ẹkebonode ke n̄kan̄ eken.” Ke adade esisịt unan, Marilynn ama adaha ada ndikọm owo emi akanyan̄ade enye—edi ikekwe owo ndomokiet! Nso ikedi ubiere esie? “Angel ukpeme mi akanyan̄a uwem mi,” ntre ke Marilynn ọdọhọ. “Anie owo en̄wen ke enye ekpekedi?”
ETIE nte ererimbot eyịghe ọsọsọp ọyọhọ ye mme angel. Ke mme isua eke ndondo emi, mme owo eke heaven ẹdi ibuot nneme ndise television, senima, ye idem mbre ke akwa efe ndise Broadway. N̄wed ẹban̄ade mme angel ẹbemiso ke otu ibat n̄wed ido ukpono ẹmi ẹdide nyama-n̄kan. Mme n̄ka, mbono nneme, ye n̄wed mbụk n̄kpọntịbe ẹdu ẹban̄a mme angel. Ẹmediomi mme mbono unọ ukpep man an̄wam fi—nte ibuotikọ kiet ekesịnde enye—ndinyene un̄wam “‘angel esịtidem’ fo.”
Mbon ẹmi ifet ẹberede ọnọ ndidi mbonurua ẹmi ẹbịnde udịm udịm akpakịp n̄kpọurua ẹsinen̄ede ẹdụk n̄ka angel emi. Owo kiet emi etienede enyene ufọkurua ke United States ọdọhọ ete: “N̄kpọ ekededi emi ẹwetde angel ke idem ẹsinyama etieti.” Ke adianade ye akpakịp n̄wed, enye asiak “mme mbiet angel, mme pin, n̄kpọmbre nditọwọn̄, n̄kpọhọde ọfọn̄idem, mme kad ntọt ye mme kad ekọm”—kpukpru ẹnam se ọkọmbụk n̄kpọntịbe kiet okotde “mme udori ẹtode enyọn̄.”
Edi mme andida nnọ mme angel ẹsọn̄ọ ẹdọhọ ẹte ke emi idịghe sụk n̄kpọ ẹkerede-kere. Man ẹsọn̄ọ se mmọ ẹdọhọde, mmọ ẹsinọ nsio nsio uyarade—“ataata” edisobo ye mme angel. Ndusụk owo ẹdọhọ ke mmimọ ikokụt angel ke mbiet owo. Mmọ eken ẹkụt un̄wana, ẹkop uyo, ẹkop nte owo asan̄ade, mîdịghe ẹkop ntụk emi mmọ ẹnịmde ke akpanikọ ke oto mme angel. Ediwak owo, nte Marilynn, ẹdọhọ ke mme angel ẹkenyan̄a uwem mmimọ.
Nso itịbe? Joan Wester Anderson, emi ewetde n̄wed iba oro ẹtịn̄de ẹban̄a edisobo ye “odudu oro akande eke owo” ọdọhọ ete: “N̄kere ke mme owo ẹfiak ẹnyene udọn̄ ke n̄kpọ eke spirit.” Alma Daniel, emi akan̄wamde ke ndiwet n̄wed en̄wen, etịn̄ n̄kpọ aka anyan akan oro. Enye ọdọhọ ke ẹnọ mme angel “item idahaemi ndinam ẹdiọn̄ọ mmọ man otodo ẹkeme ndisịm ediwak owo efen efen. Ntak emi ifiọkde ekese iban̄a mmọ ntre edi koro mmọ ẹyom emi edi ntre. Mmọ ke ẹnam oro.”
Nte emi enen̄ede edi ntre? Mîdịghe nte n̄kpọ en̄wen edi ntak n̄kpọ etabi eke ndondo emi ye mme angel? Man ifiọk, ana nnyịn idụn̄ọde Ikọ Abasi. Akpanikọ aban̄ade mme angel ẹsịne ke Bible, nte nnyịn idikụtde.
[Ebiet ẹdade ndise ẹto ke page 2]
Page 3 ye 4: The New Testament: A Pictorial Archive from Nineteenth-Century Sources, eke Don Rice/Dover Publications, Inc.