Ufọkn̄wed Gilead Osio Ọyọhọ Otu 100 Esie Ọdọn̄
UFỌKN̄WED Enyọn̄-Ukpeme Ukpep Bible eke Gilead emenyene akpan udeme ke utom editan̄a Obio Ubọn̄ Abasi ke ofụri ererimbot ke eyomfịn. Toto nte Ufọkn̄wed Gilead ọkọtọn̄ọ ndinọ mme isụn̄utom ukpep ke 1943, mbon oro ẹkụrede ukpep ke enye ẹmenam utom ke se ibede idụt 200. Ke March 2, 1996, ọyọhọ otu 100 ama okụre ukpep.
Nditọ ufọkn̄wed oro ẹkedụk ufọkn̄wed oro ke ufan̄ ini oro snow ekedepde oboho okon̄ ke se ikande mita iba ke ikpehe Itie Unọ Ukpep Enyọn̄-Ukpeme oro ke Patterson, New York. Idịghe n̄kpọ n̄kpaidem, nte snow ekedepde ke usen ukụre ukpep mmọ. Kpa ye oro, efe mbono ama ọyọhọ, ndien mbon oro ẹkeyọhọde ẹsụhọ ẹma ẹdu ke Patterson, Wallkill, ye Brooklyn ẹnọ n̄kpan̄utọn̄—owo 2,878 ke ofụri ofụri.
Theodore Jaracz, owo Kọmiti Unọ Ukpep eke Otu Ukara, ekedi etieibuot okpokoro. Ke ama ọkọnọ isenowo oro ẹketode ediwak idụt ẹdi ufiop ufiop ekọm, enye ama ọdọhọ kpukpru owo ẹdada ẹnyụn̄ ẹkwọ ọyọhọ ikwọ 52. Efe mbono oro ama oyomo ye itoro ẹnọde Jehovah nte mmọ ẹkwọde “Our Father’s Name” (Enyịn̄ Ete Nnyịn), ẹto n̄wedikwọ Sing Praises to Jehovah. Ikwọ oro, adianade ye utịn̄ikọ etieibuot okpokoro aban̄ade edida ukpep oro ẹbọde nnam n̄kpọ ke nditoro Jehovah, ama ọdiọn̄ usụn̄ ọnọ ndutịm oro eketienede.
Item N̄wed Abasi Otode N̄kani Owo
Akpa ikpehe ndutịm oro ama esịne mbio mbio utịn̄ikọ ẹmi ediwak ke otu mme asan̄autom Jehovah ẹmi ẹma ẹkenam utom ke anyanini ẹkenọde otu oro okụrede ukpep mi. Richard Abrahamson, kiet ke otu mbonutom ke ibuot itieutom emi ọkọtọn̄ọde utom uyọhọ ini esie ke 1940, ama esịn udọn̄ ọnọ otu oro ete: “Ẹka Iso Ndikpụhọde Nda Ekekem.” Enye ama eti mmọ ete ke mmọ ẹma ẹnyenyene nsio nsio ini unam ukpụhọde ke uwem mmọ nte mme Christian, esịnede ọfiọn̄ ition oro mmọ ẹkedude ke ufọkn̄wed ke Gilead. Ntre ntak emi mmọ ẹkpenyenede ndika iso n̄kpụhọde nda ekekem?
Etịn̄ikọ oro ama anam an̄wan̄a ete ke ikọ oro apostle Paul akadade ke 2 Corinth 13:11 “owụt edinam oro akade-ka iso, n̄kaiso edisụk idem nnọ Jehovah ndidiọn̄ m̀mê ndinam owo ọfọn, edinam ukpụhọde, man otodo owo osịm ata ndinen idaha Jehovah.” Ke mme utom esenidụt mmọ, otu oro okụrede ukpep mi eyesobo mbufa n̄kpọ-ata kaban̄a mbuọtidem mmọ. Oyoyom mmọ ẹkpep mbufa usem, ẹkpụhọde ẹda ẹkekem ye nsio nsio ido edinam ye mme idaha uduuwem, ẹnyụn̄ ẹkpụhọ ẹda ẹkekem ye nsio nsio efakutom. Mmọ n̄ko ẹyenam n̄kpọ ye nsio nsio owo ke mme ufọkidụn̄ isụn̄utom mmọ ye ke mbufa esop mmọ. Edieke mmọ ẹdidade mme edumbet Bible ẹnam n̄kpọ ye ntịn̄enyịn ke kpukpru idaha ẹmi, ye unyịme ndinam ukpụhọde, do, nte apostle Paul ekewetde, mmọ ẹyekeme n̄ko ‘ndika iso ndara.’
John Barr, kiet ke otu mbon Otu Ukara ition ẹmi ẹketienede ẹbuana ke ndutịm oro, akada ibuotikọ esie oto 1 Corinth 4:9. Enye ama eti mbon oro ẹkekpan̄de utọn̄ ẹnọ enye ete ke mme Christian ẹdi n̄kpọ ndise ẹnọ mme angel ye mme owo. Enye ama ọdọhọ ete: “Ndifiọk emi anam usụn̄uwem Christian enen̄ede edi akpan n̄kpọ, ototịm edi ntre ke ini enye ọfiọkde ete ke ebede ke se imọ itịn̄de ye se inamde, imọ imekeme ndinyene akamba odudu ke idem mbon oro ẹsede, ẹdide mbon oro ẹkụtde ke enyịn ye mbon oro owo mîkwe. Mmonịm nte ke emi edi n̄kpọ oro editịmde ọfọn ye kpukpru mbufo ndima nditọete iren ye iban eke ọyọhọ otu 100 eke Gilead nditi nte mbufo ẹkade itụn̄ ye inụk isọn̄.”
Brọda Barr ama esịn udọn̄ ọnọ nditọ ufọkn̄wed 48 oro ndinyene ke ekikere, nte mmọ ẹn̄wamde mbon mbieterọn̄ ndikpep akpanikọ, nte ke “idara odu ke iso mme angel Abasi aban̄a owo kiet emi akabarede esịt.” (Luke 15:10) Ke etịn̄de otụk 1 Corinth 11:10, enye ama owụt ete ke edu owo kaban̄a mme utom ukara Abasi itụkke sụk nditọete nnyịn iren ye iban ẹmi nnyịn ikụtde edi n̄ko mme angel emi nnyịn mîkwe. Ọfọn didie ntem ndinyene ntatara ndise emi ke ekikere!
Owo Otu Ukara efen, Gerrit Lösch, emi ke idemesie edide andikụre ukpep ke Ufọkn̄wed Gilead, ama eneme mme utọ itien̄wed Abasi nte Psalm 125:1, 2; Zechariah 2:4, 5; ye Psalm 71:21 ndiwụt nte ke Jehovah ‘esikan ikọt esie okụk.’ Enye esinọ mmọ ukpeme ke kpukpru afan̄. Nte Abasi edinọ utọ ukpeme oro ke ini akwa ukụt kpọt? Etịn̄ikọ ama ọbọrọ ete: “Baba, koro Jehovah ededi ‘ibibene ikan̄,’ kpa ukpeme ọnọ ikọt esie. Isua ukụre ekọn̄ eke 1919 ama okụt nsụhọ Israel eke spirit ẹnyenede ọkpọsọn̄ udọn̄ ndikwọrọ eti mbụk Obio Ubọn̄ ke ofụri ererimbot nte ntiense nnọ kpukpru mme idụt. Mmọ ẹkedi mme andida ke ibuot ndamban̄a Jerusalem ke mme heaven. Jehovah ọn̄wọn̄ọ ndinọ mme andida ke ibuot ẹmi ukpeme esie nte otu ke utịt ini. Anie ndien ekeme ndikụt unen ke ndibiọn̄ọ mmọ? Idụhe owo ndomokiet.” Ọnọ mmọ ye kpukpru mbon oro ẹbuanade ye mmọ ketket ke ndinam uduak Abasi nsọn̄ọ didie ntem!
Ulysses Glass, akamba owo ke ikpehe ukpepn̄kpọ ufọkn̄wed oro, ama esịn udọn̄ ọnọ otu oro ete ‘ẹnam utom mmọ ẹma ke esop Jehovah eke ofụri ererimbot.’ Utom edi idaha m̀mê edinam oro odotde mme ukeme m̀mê edu owo akpan akpan. Enye ama ọdọhọ ete, “Mbufo emi ẹdoride enyịn ndidi isụn̄utom ẹmenyene utom mbufo ke esop Mme Ntiense Jehovah eke ofụri ererimbot. Edi, yak edi akpan n̄kpọ nte ekpededi idahaemi, emi edi ntọn̄ọ kpọt ke uwem mbufo nte isụn̄utom.” Oyoyom mmọ ẹsịn idem man ẹda mme ukeme mmọ ẹnam n̄kpọ ẹnyụn̄ ẹnam n̄kpọ ẹdot san̄asan̄a utom oro Jehovah ye esop esie ẹnọde mmọ.
Wallace Liverance, owo ikpehe ukpepn̄kpọ Gilead emi ama akanam utom ke isua 17 ke Bolivia, ọkọnọ akpatre utịn̄ikọ. Enye ama obụp otu nditọ ufọkn̄wed ete: “Nte mbufo ẹyedomo Abasi ẹse?” Didie ke mmọ ẹkpenam emi? Idụt Israel ẹma ẹdomo Abasi ẹse ke idiọk usụn̄. (Deuteronomy 6:16) Etịn̄ikọ oro ama ọdọhọ ete: “Nte an̄wan̄ade, ndidomo Abasi nse ebe ke ndiseme m̀mê ndikụni n̄kụni mîdịghe ebe ke ndiwụt unana mbuọtidem ke usụn̄ nte enye esede aban̄a mme n̄kpọ inenke.” Enye ama akpak ete: “Ke ini ẹsịmde obufa efakutom mbufo, ẹbiọn̄ọ ekikere oro.” Nso, ndien, idi nnennen usụn̄ ndidomo Abasi nse? Brọda Liverance ama anam an̄wan̄a ete: “Ebe ke ndinịm ikọ esie ke akpanikọ, ndinam nnennen n̄kpọ oro enye ọdọhọde, ndien ekem ayakde utịp esịn enye ke ubọk.” Nte ẹkụtde ke Malachi 3:10, Jehovah ọnọ ikọt esie ikot ete: “Ẹda emi ẹdomo mi.” Enye ama ọn̄wọn̄ọ ete ke edieke mmọ ke edinam akpanikọ ẹdidade ọyọhọ mbak duop mmọ ẹdinịm ke ubet ubon n̄kpọ temple, enye eyediọn̄ mmọ. Etịn̄ikọ oro ama obụp ete: “Ntak mûsehe utom isụn̄utom mbufo ke ukem usụn̄ oro? Jehovah oyom mbufo ẹkụt unen, ntre ẹdomo enye ẹse. Ẹsọn̄ọ ẹyịre ke utom mbufo. Ẹnam mme ukpụhọde oro enye oyomde mbufo ẹnam. Ẹyọ. Ẹse m̀mê enye ididiọn̄ke mbufo.” Nso eti item ke emi edi ntem ọnọ kpukpru mbon oro ẹnamde n̄kpọ Jehovah!
Ke ẹma ẹkekwọ ikwọ ndutịm oro ama okpụhọde ọkpọn̄ mme utịn̄ikọ odụk udịm udịm inem inem ndụn̄ọde.
Nti Ikọ Ẹtode An̄wautom
Mark Noumair, obufa owo ke ikpehe ukpepn̄kpọ Gilead, ama okot nditọ ufọkn̄wed ete ẹdibụk mme ifiọkutom oro mmọ ẹkenyenede ke utom an̄wautom ke adan̄aemi ẹdụkde ufọkn̄wed. Mmọemi ẹma ẹwụt ufọn oro odude ke ndibem iso nnam usio-ukot ke utom ukwọrọikọ onyụn̄ ọnọ otuowo nti ekikere oro mmọ ẹkemede ndida nnam n̄kpọ.
Ke ini ufọkn̄wed mmọ, nditọ ufọkn̄wed ke otu eke Gilead enyeemi ẹma ẹbọ ufọn san̄asan̄a ebe ke ndikeme ndibuana ye mme andibuana ke Kọmiti N̄kọk Itieutom ẹmi ẹketode idụt 42, ẹmi n̄ko ẹkedude ke Itie Unọ Ukpep Patterson ndibọ san̄asan̄a ukpep. Ediwak mmọ ẹma ẹkụre ukpep ke Gilead ke mme isua ẹkebede. Ke edinam oro, ẹma ẹnam ndụn̄ọde ye mme andida ke ibuot mbon oro ẹkedụkde ọyọhọ otu 3, 5, 51, ye 92, ọkọrọ ye mbon oro ẹketode N̄kọk Ufọkn̄wed Gilead ke Germany. Utịn̄ikọ mmọ ẹkenyene ufọn didie ntem!
Mmọ ẹma ẹtịn̄ nte eketiede mme isụn̄utom ke idem nte mmọ ẹkụtde ibat mme anditoro Jehovah ẹkọride ke efakutom mmọ ọtọn̄ọde ke esisịt ibat osịm ediwak tọsịn ke mme itie duop. Mmọ ẹma ẹtịn̄ udeme oro mmọ ẹkenyenede ke ndida eti mbụk n̄ka mme ufọkidụn̄ ẹmi ẹdude nsannsan ke Ikpọ Obot Andes ye mme obio-in̄wan̄ ke mme itụn̄ Akpa Amazon. Mmọ ẹma ẹtịn̄ ẹban̄a edinọ mbon oro mîkemeke ndikot n̄wed nnyụn̄ n̄wewet. Mmọ ẹma ẹtịn̄ ẹban̄a en̄wan mmọ ndikpep mbufa usem ye se mbon oro ẹkụrede ukpep mi ẹkemede ndinen̄ede ndori enyịn ndikụt kaban̄a m̀mê ediwara adan̄a didie mbemiso mmọ ẹkemede ndinọ ikọ ntiense nnyụn̄ nnọ mme utịn̄ikọ ke utọ usem nte Chinese. Mmọ ẹma ẹkam ẹnanam nnamn̄wụt ke Spanish ye ke Chinese ẹwụt. Mmọ ẹma ẹsọn̄ọ ẹtịn̄ ẹte ke mme isụn̄utom ẹsinen̄ede ẹkụt unen idịghe ke mmọ ndikpep usem kpọt edi n̄ko ke ndifiọk n̄kpọ mban̄a ekikere mme owo oro. Mmọ ẹma ẹtịn̄ ẹban̄a nsọn̄ọn̄kpọ uduuwem oro esiwakde ndidu ke mme idụt oro mînyeneke uforo ẹnyụn̄ ẹdọhọ ẹte: “Mme isụn̄utom ẹnyene ndifiọk nte ke idaha emi esiwak ndinyene n̄kpọ ndinam ye edinam n̄kpọ ye mbon efen nte mîdotke. Isụn̄utom anam ọfọn edieke enye ekerede n̄kpọ nte Jesus ekekerede—enye ama atua mme owo mbọm, ẹmi ẹkebietde erọn̄ eke mînyeneke andikpeme.”
Ke ẹma ẹkekwọ ikwọ ndutịm oro ama aka iso ye nneme otode A. D. Schroeder, owo Otu Ukara. Enye ama enyene ifet ndidi kiet ke otu mme akpa andikpep ke Ufọkn̄wed Gilead ke ini enye ọkọtọn̄ọde ke 1943. Nte utịt oro odotde ọnọ ndutịm oro, enye ama eneme ibuot nneme oro “Nditoro Jehovah nte Obọn̄ Andikara.” Nneme Brọda Schroeder oro okotụkde owo ke idem emi okotode Psalm ọyọhọ Ps 24 ama anam kpukpru owo ke otuowo ẹfiọk nte ifet editoro Jehovah nte Ọbọn̄ Andikara akam edide akpan n̄kpọ.
Ke ama ọkọnọ n̄weditoro, ẹnyụn̄ ẹkwọ akpatre ikwọ, Karl Klein eke Otu Ukara ama eberi ke akam ofụri esịt. Nso eti ndutịm eke spirit oro ọnọde nduọkodudu ke emi ekedi ntem!
Usen ifan̄ ke edinam ukụre ukpep oro ama ekebe, owo 48 eke ọyọhọ otu 100 oro ẹma ẹtọn̄ọ ndidaha n̄ka utom isụn̄utom ke idụt 17. Edi idịghe mmọ ndisụk ntọn̄ọ utom ukwọrọikọ mmọ ekedi oro. Mmọ ẹma ẹnyenyene okopodudu n̄wetnnịm n̄kpọ ke utom uyọhọ ini Christian. Ke ini mmọ ẹkesịnde enyịn̄ ke Gilead, mmọ ẹkedi, ke ẹbaharede ukem ukem, isua 33 ke emana ẹma ẹnyụn̄ ẹsịn se ibede isua 12 ke utom ukwọrọikọ uyọhọ ini. Ndusụk mmọ ẹma ẹdedi mbon ubon Bethel ofụri ererimbot eke Watch Tower Society. Mmọ eken ẹma ẹnam utom nte mme esenyịn oro ẹsan̄ade-san̄a. Ediwak nditọ ufọkn̄wed ẹma ẹbabuana ke ndusụk orụk utom esenidụt—ke Africa, Europe, Edem Usụk America, mme isuo inyan̄ibom, ye ke otu mbon oro ẹsemde usem esenidụt ke idụt emana mmọ. Edi idahaemi mmọ ẹdiana ye ediwak isụn̄utom efen ẹmi ẹkekopde inemesịt ndikeme ndidọhọ, ‘Nnyịn iyanam utom ke ebiet ekededi ke ererimbot oro ẹyomde nnyịn.’ Udọn̄ ofụri esịt mmọ edi ndida uwem mmọ nnam n̄kpọ ke ndinọ Jehovah ubọn̄.
[Ekebe ke page 27]
Idaha Otu:
Ibat idụt ẹtode: 8
Ibat idụt ẹnọde ẹka: 17
Ibat nditọ ufọkn̄wed: 48
Isua emana ke ẹbaharede ukem ukem: 33.75
Isua ẹdude ke akpanikọ ke ẹbaharede ukem ukem: 17.31
Isua ẹdude ke utom uyọhọ ini ke ẹbaharede ukem ukem: 12.06
[Ndise ke page 26]
Ọyọhọ Otu 100 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead
Ke udịm enyịn̄ etienede mi, ẹtọn̄ọ ke udịm iso ẹnọ nọmba ẹka edem, enyịn̄ ẹnyụn̄ ẹtọn̄ọ ke ufien ẹka nnasia ke udịm kiet kiet.
(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.