Ndifiak Ke Ntan Didie?

“KORO afo edide ntan, eyenyụn̄ afiak ke ntan.” Ke ini akpa owo oro, Adam, okokopde mme ikọ oro, enye ama ọfiọk se idisịmde enye. Ẹkenam enye ke ntan isọn̄ okonyụn̄ afiak nte ikpîkpu ntan. Enye ama akpa koro enye mîkokopke uyo Andibot enye, Jehovah Abasi.—Genesis 2:7, 15-17; 3:17-19.

Bible owụt ete ke ẹkeda ntan ẹbot owo. Enye n̄ko etịn̄ ete: “Ukpọn̄ eke anamde idiọk eyekpa n̄kpa.” (Ezekiel 18:4; Psalm 103:14) N̄kpa amada mfụhọ ọsọk ediwak miliọn owo omonyụn̄ edemede mme mbụme ndien ndien aban̄a nte ẹkpebụkde okpo owo.

Mme Edinam eke Eset ye eke Idahaemi

Didie ke ẹkesibụk mme okpo owo ke otu ikọt Abasi ke eset? Ke mme ntọn̄ọ ntọn̄ọ page esie, Bible asiak nsio nsio usụn̄ unam n̄kpọ ye mme akpan̄kpa, esịnede edibụk ke isọn̄. (Genesis 35:8) Ẹkebụk ete-ekpụk oro Abraham ye n̄wan esie, Sarah, ọkọrọ ye eyen mmọ Isaac ye eyeyen mmọ Jacob ke abaitiat Machpelah. (Genesis 23:2, 19; 25:9; 49:30, 31; 50:13) Ẹkebụk mme ebiereikpe Israel Gideon ye Samson ‘ke udi mme ete mmọ.’ (Judges 8:32; 16:31) Emi ọnọ ekikere nte ke ikọt Abasi eke eset ẹma ẹsimek ndinyene udi nnọ ubon. Ke ini Jesus Christ akakpade ke akpa isua ikie E.N., ẹkebụk okpo esie ke obufa udi oro ẹkesiakde ke itiat. (Matthew 27:57-60) Ke ofụri ofụri, ndien, ẹkesibụk mme okpo owo ke isọn̄ mîdịghe ẹbụk ke abaitiat. Edinam emi ke osụk akaiso ke ata ediwak ebiet ke isọn̄.

Ke ndusụk ikpehe ke ererimbot mfịn, nte ededi, nte isọn̄ ananade onyụn̄ ọsọn̄de udep amanam ototịm edi ọkpọsọn̄ n̄kpọ ndinyene itie ubụkowo. Ke ntre, ndusụk owo ke ẹkere ẹban̄a usụn̄ efen oro ẹkpenamde n̄kpọ ye okpo owo.

Ndiduọn̄ọ ntọn̄ ke ẹma ẹkefọp okpo owo amakabade edi ọsọ n̄kpọ. Ke England n̄kpọ nte mbahade 40 eke ikie ke otu mme akpan̄kpa ẹdi se ẹsede ẹban̄a ke usụn̄ emi. Ke Sweden, emi ẹsifọpde-fọp se ibede mbahade 80 eke ikie ke otu mbon oro ẹkpade ke ikpọ obio, ẹsio ndusụk akai ẹnịm ndiduọn̄ọ ntọn̄. Ndien ke Shanghai ye ibat ibat ikpọ obio efen ẹmi ẹdude ke mbeninyan̄ China, ukara obio ẹsise ẹban̄a uwak uduọn̄ọ ntọn̄ ke inyan̄ ediwak ini ke isua.

M̀mọ̀n̄ ke ẹkeme ndiduọn̄ọ ntọn̄? Idịghe ke ebiet ekededi. Ndusụk owo ẹkeme ndikop ndịk nte ke ediduọn̄ọ ntọn̄ ifọnke ye n̄kann̄kụk. Ke akpanikọ, nte ededi, ẹbiat n̄kpọndịk ekededi oro ekemede ndidu nte ke udọn̄ọ eyetara asuana ẹfep ebe ke edifọp okpo. Ẹsisio ikpehe oro n̄kpọ mîdụhe m̀mê mme in̄wan̄ flawa ndusụk itie ubụkowo ke England ye ke United States ẹnịm nte itie uduọn̄ọ ntọn̄. Nte ededi, se itịmde ibehe mme Christian edi ekikere N̄wed Abasi kaban̄a ufọp okpo ye uduọn̄ọ ntọn̄.

Nso Idi Ekikere N̄wed Abasi?

Ke ubiereikpe oro ẹkenọde “edidem Babylon,” prọfet Isaiah ọkọdọhọ ete: “Ẹmesio fi ke udi fo ẹduọk.” (Isaiah 14:4, 19) Ndi ẹkeme ndimen ediduọn̄ọ ntọn̄ ndomo ye utọ idaha esuene oro? Baba, koro owo itịn̄ke n̄kpọ ndomokiet iban̄a edifọp ye editịm okpo nnịm m̀mê ediduọn̄ọ ntọn̄.

Jesus Christ ama etịn̄ aban̄a ediset mme akpan̄kpa ke isọn̄ oro edidade itie ke ini Ukara Tọsịn Isua ke ini enye ọkọdọhọde ete: “Kpukpru mme andidu ke udi [ẹyekop imọ] uyo ẹwọn̄ọ ẹdi.” (John 5:28, 29) Nte ededi, se prọfesi efen etịn̄de aban̄a ediset ke n̄kpa owụt nte ke iyomke san̄asan̄a udi man ẹnam owo eset. Ediyarade 20:13 ọdọhọ ete: “Inyan̄ ibom asana mme akpan̄kpa ẹmi ẹdude ke esịt ayak; n̄kpa ye [Hades, NW] ẹnyụn̄ ẹsana mme akpan̄kpa mmọ ẹyak.” Ntre, akpan n̄kpọ idịghe ke m̀mọ̀n̄ m̀mê didie ke owo ‘afiak ke ntan.’ Utu ke oro, edi m̀mê Abasi eti onyụn̄ anam enye eset. (Job 14:13-15; men Luke 23:42, 43 domo.) Ke akpanikọ Jehovah iyomke ikpọ udi ndin̄wam enye eti mme owo. Edifọp okpo ikpanke owo ndiset. Ndien edieke ẹduọn̄ọde ntọn̄ ye nnennen uduakesịt ndien mînyụn̄ inyeneke n̄kpọ ndinam ye mme edinam ido ukpono, enye idinyeneke ntuaha ye N̄wed Abasi.

Eyeyom mbon oro ẹbierede ndiduọn̄ọ ntọn̄ ẹnọ ntịn̄enyịn ke ibet idụt. Ọkpọfọn mmọ n̄ko ẹkere ẹban̄a mme ntụk mbon oro ẹduọkde owo mmọ ke n̄kpa ye mbon en̄wen. Mme asan̄autom Jehovah ẹyenam ọfọn nditịm n̄kụt nte ke edida ifụre mmọ oro N̄wed Abasi ọnọde nnam n̄kpọ ke afan̄ emi idaha esuene isọk eti enyịn̄ oro mme Christian ẹkerede. Emi enen̄ede edi akpan n̄kpọ ke mme idụt ẹmi ibet onyịmede edifọp okpo ye ediduọn̄ọ ntọn̄ edi emi mme owo mînyịmeke enye ọyọhọ ọyọhọ kan̄a. Nte ededi, Christian eyefep edinam m̀mê edu ekededi oro ọkọn̄ọde ke edinịm ke akpanikọ oro nte ke ukpọn̄ owo ikemeke ndikpa.

Ndibọhọ Udi Ofụri Ofụri!

Mbon oro ẹtorode ediduọn̄ọ ntọn̄ ẹdọhọ ẹte ke enye edi usụn̄ ndibọhọ edibụhọ ke udi. Se ididade n̄kponn̄kan ubọhọ idi, nte ededi, edidi edisu un̄wọn̄ọ Bible oro nte ke “akpatre usua emi Enye edisobode edi n̄kpa.”—1 Corinth 15:24-28.

Emi ọwọrọ ete ke udi, idem edifọp okpo ye ediduọn̄ọ ntọn̄, ẹyekabade ẹdi n̄kpọ eset. Ih, n̄kpa ididụhe aba. Ke idak ndausụn̄ spirit Abasi apostle John ama ewet ete: “N̄kop ọkpọsọn̄ uyo nte otode ke ebekpo ọwọrọ ete, Sese, ebiet idụn̄ Abasi omodu ye owo. Enye eyenyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:3, 4.

Kpukpru emi edida itie ke ini ẹdisiode n̄kpa mme owo emi osụn̄ọde oto idiọkn̄kpọ Adam ẹfep ke idak Obio Ubọn̄ Abasi. Ke ini oro okopitem ubonowo idinyeneke idotenyịn edifiak ke ntan aba.

[Mme ndise ke page 29]

Mme ọsọ usụn̄ edise mban̄a okpo owo

[Ndise ke page 31]

Ediduọn̄ọ ntọn̄ ke Edịk Sagami, Japan

[Ebiet Ẹdade N̄kpọ Ẹto]

Ẹbọ ẹto Koueisha, Tokyo