Nte Inyene Edidem Solomon Edi N̄wọkinua?
“Udobi gold emi osịmde Solomon ke isua kiet edi talent gold ikie itiokiet ye talent ata ye itiokiet.”—1 Ndidem 10:14.
NTE ekemde ye ufan̄ikọ Bible oro, Edidem Solomon ama enyene se ibede tọn gold 25 ke isua kiet! Emi ekpedi $240,000,000 mfịn. Enye ama ekpere ndiwak utịm ikaba nte gold oro ẹkedọkde ke ofụri ererimbot ke isua 1800. Nte emi edi akpanikọ? Nso ke uyarade oro otode udọkisọn̄ nyom n̄kpọeset owụt? Enye ọnọ ekikere nte ke odot ẹnịm mbụk Bible aban̄ade uforo Solomon ke akpanikọ. Biblical Archaeology Review ọdọhọ ete:
◻ Edidem Thutmose III eke Egypt (ọyọhọ isua tọsịn iba M.E.N.) ọkọnọ n̄kpoduoho gold n̄kpọ nte tọn 13.5 ke temple Amon-Ra ke Karnak—ndien emi ekedi sụk ubak enọ oro.
◻ Uwetn̄kpọ mbon Egypt owụt mme enọ gold ye silver ẹwakde ẹsịm n̄kpọ nte tọn 383 emi Edidem Osorkon I (ntọn̄ọ ntọn̄ọ akpa tọsịn isua M.E.N.) ọkọnọde mme abasi.
N̄ko-n̄ko, eboho Classical Greece ke udịm n̄wed oro Great Ages of Man ọtọt ete:
◻ Itie udọk n̄kpọuto Pangaeum ke Thrace ama esinọ Edidem Philip II (359-336 M.E.N.) se iwakde ikan tọn gold 37 ke isua kiet kiet.
◻ Ke ini eyen Philip oro Akamba Alexander (336-323 M.E.N.) akakande Susa, ibuot obio ukara Persia, ẹma ẹfiọhọ n̄kpọuto ẹwakde ẹsịm n̄kpọ nte tọn gold 1,200.
Ntre se Bible etịn̄de aban̄a inyene Edidem Solomon idịghe se owo mîkemeke ndinịm ke akpanikọ. Ti, n̄ko, ete ke Solomon ama “okpon akan kpukpru ndidem ke ererimbot, ke inyene ye ke eti ibuot.”—1 Ndidem 10:23.
Didie ke Solomon akada inyene esie anam n̄kpọ? Ẹkeda “ata eti gold” ẹfụk ebekpo esie, mme n̄kpọ un̄wọn̄ n̄kpọ esie ẹkedi “gold,” ndien enye ama enyene ikpọ otuekọn̄ 200 ye n̄kpri otuekọn̄ 300 ẹdade “gold” ẹnam. (1 Ndidem 10:16-21) Ke akande kpukpru, ẹma ẹda gold Solomon ẹnam n̄kpọ ke ebuana ye temple Jehovah ke Jerusalem. Ẹkeda gold ye silver ẹnam uwụk-utuenikan̄ ye ndisana n̄kpoduoho temple, utọ nte mme fọk, mme usan, mme ufatikan̄, ye mme besịn. Ẹma ẹtara gold ẹfụk ke mme cherub oro ẹkekon̄de mita 4.5 ke Ata Edisana, ke itieuwa incense, idem ye ke ofụri ufọk oro.—1 Ndidem 6:20-22; 7:48-50; 1 Chronicles 28:17.
Nso kaban̄a temple oro ẹketarade gold ẹfụk? Nte enemde, edida gold nnam n̄kpọ ke utọ usụn̄ oro ikedịghe esen n̄kpọ ke ererimbot eset. Biblical Archaeology Review ọdọhọ ete ke Amenophis III eke Egypt “ama okpono akwa abasi Amun ke ndibọp temple ke Thebes oro ‘ẹketarade gold ẹfụk ofụri ofụri, ẹdade silver ẹbana isọn̄ esie, [ẹnyụn̄] ẹdade gold emi ẹbuakde ye silver ẹbana mme usụn̄ esie’”—eti gold abuahade ye silver. N̄ko-n̄ko, Esar-haddon eke Assyria (ọyọhọ isua ikie itiaba M.E.N.) ama atara gold ofụk mme usụn̄ ye mme ibibene itieuwa Ashur. Kaban̄a temple eke Sin ke Harran, Nabonidus eke Babylon (ọyọhọ isua ikie itiokiet M.E.N.) ekewet ete: “Mma nda gold ye silver mfụk mme ibibene esie, nnyụn̄ nnam mmọ ẹsem nte utịn.”
Ntem, mme uwetn̄kpọ mbụk eset ẹnọ ekikere nte ke mbụk Bible aban̄ade inyene Edidem Solomon idịghe n̄wọkinua.