Edidem Oro Ekenyenede Uforo Ye Ọniọn̄
Nte afo emekere ke inyene akpanam fi okop inemesịt? Edieke owo ọkpọnọde fi uwak ibat okụk, ndi ukpunemke esịt? Ekeme ndidi ekpenem. Ekeme ndidi afo ekpekere aban̄a nte edibiatde enye.
NTE ẹnyịmede, ekese n̄kpọ ẹdu ndidep ndinam uwem etịm enem onyụn̄ edi se ẹdarade ẹkan. Okụk ekeme n̄ko ndinam n̄kpọ nte “se ikpemede” ibiọn̄ọ mme mfịna oro owo mîkodorike enyịn, utọ nte udọn̄ọ m̀mê unana utom.—Ecclesiastes 7:12.
Edi nso idi ebuana oro odude ke ufọt okụk ye inemesịt? Ndi afo emekere, nte ediwak owo ẹkerede, nte ke inemesịt edi n̄kpọ efen emi ẹnyenede ẹto inyene? Ndiyom ibọrọ nnọ mme mbụme ẹmi ekeme ndisọn̄ koro ẹkeme ndidomo, m̀mê ndibat okụk mmemmem mmemmem, ke adan̄aemi owo mîkemeke ndinam oro ye inemesịt. Afo ukemeke ndisịn inemesịt ke udomo n̄kpọ ndomo nse.
Ndien, n̄ko, ndusụk mbon inyene ẹkeme nditie nte ẹkop inemesịt, ke adan̄aemi mmọ eken ẹdude ke ọkpọsọn̄ mfụhọ. Ukem oro ke edi ye mbon ẹmi ẹbuenede. Kpa ye oro, ata ediwak owo—idem mbon ẹmi ẹma ẹkededi imọ—ẹnịm nte ke okụk efen efen ayada inemesịt oro okponde akan ọsọk mmimọ.
Owo kiet emi ekewetde aban̄a mme utọ n̄kpọ oro ekedi Edidem Solomon eke Israel eset. Enye ekedi kiet ke otu mforo-n̄kan owo oro akanam odude uwem. Afo emekeme ndikot se ẹtịn̄de ẹban̄a uwak inyene esie ke ọyọhọ ibuot 10 eke n̄wed Akpa Ndidem eke Bible. Tịm fiọk, ke uwụtn̄kpọ, nte ke ufan̄ikọ 14 ọdọhọ ete: “Ndien udobi gold emi esịmde Solomon ke isua kiet edi talent gold ikie itiokiet ye talent ata ye itiokiet.” (Sịghisịghi ubọkn̄wed edi eke nnyịn.) Ibat oro edi ukem ye tọn gold 25. Mfịn, gold awakde ntre ekpenen̄ede ọsọn̄ urua ebe $200,000,000 ke okụk United States!
Kpa ye oro, Solomon ikenyeneke inyene kpọt; Abasi ama ọnọ enye ọniọn̄. Bible obụk ete: “Edidem Solomon okpon akan kpukpru ndidem ke ererimbot, ke inyene ye ke eti ibuot. Ndien ofụri ererimbot ẹyom iso Solomon, kpan̄ ẹkpekop ifiọk esie, emi Abasi ekesịnde enye ke esịt.” (1 Ndidem 10:23, 24) Nnyịn n̄ko imekeme ndibọ ufọn nto ọniọn̄ Solomon, sia mme uwetn̄kpọ esie ẹnamde ubak n̄wetnnịm n̄kpọ Bible. Ẹyak nnyịn ise se enye ekenyenede nditịn̄ mban̄a ebuana emi odude ke ufọt inyene ye inemesịt.
[Ebiet Ẹdade Ndise Ẹto ke page 3]
Ẹfiak ẹmịn̄ ẹto Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart